Lagani 1996 “Dirava Ena Maino Gwauraia Taudia” Distrik Hebouhebouna
1 December 1995 bona January 1996 lalonai, Papua New Guinea brens ena teritori dekenai, lagani 1995 “Dirava Hanamoa mai Moale Ida” Distrik Hebouhebouna dekenai idia mai taudia 8,038 momo, ese lauma dalanai hagoadaia program dainai edia tanikiu hereva idia gwauraia. Iseda kudouna idia moale bada, Iehova idia hanamoa taudia 138 ese bapatiso idia abia ita itaia neganai. Ita moale, badina be buklet bona buka matamata, Jehovah’s Witnesses and Education bona Diba ese Mauri Dekenai Ita Ia Hakaua Lao, ita abia dainai. Lagani gunanai unai hagoadaia program ita moalelaia, unai dainai namona be ita goada karaia lagani 1996 “Dirava Ena Maino Gwauraia Taudia” Distrik Hebouhebouna dekenai do ita lao. Hari lagani ai, hebouhebou ena program ese ita ia durua Dirava ena maino ita dogoatao totona, bona iseda gaukara, taunimanima ita durua unai maino idia davaria gaukarana, ia hahedinaraia. Namona be ita ibounai ese iseda Baibel stadi taudia ita boiria bona idia ita durua do idia mai totona. Momokani unai hebouhebou ese ita do idia hagoadaia, inai dina dokodia ai mai eda moale ida Iehova ita hesiai henia lalonai. Oiemu palani oi karaia vadaeni, program ena kahana ibounai do oi kamonai totona, a?
2 Dina Toi Hebouhebouna: Ai diba, hari lagani ena hebouhebou do oi moalelaia bada bona mai emu goada matamatana ida ruma dekenai do oi giroa. (2 Siv. 7:10) Hari lagani ai, gabu momo dekenai dina toi hebouhebouna do ita karaia. Oi hegaegae vadaeni gaukara amo livi oi abia, bona hebouhebou ena kahana ibounai do oi lao totona, a? Hebouhebou haida be sikuli ena negana ai idia karaia. Bema emu natudia be sikuli dekenai idia do lao, mai emu hemataurai ida edia tisa taudia oi hadibaia vadaeni, Friday dekenai do idia sikuli lasi, badina edia tomadiho treinini ena kahana badana do idia abia dainai, a?
3 February 15, 1996, Gima Kohorona ese Papua New Guinea dekenai do idia karaia hebouhebou 8 edia dina ia hahedinaraia. Unai dina haida idia haidaua. August 22 Awake!, August 8 Kirap!, bona July-September Noga! ese dina bona gabu maorodia idia hahedinaraia. August ena Iseda Basileia Gaukara danu ese unai gaudia ia halasia, bona ia hahedinaraia edena hebouhebou dekenai do oi lao. Port Moresby sibona dekenai English gado bona taia kudima taudia edia gado ai program idia karaia. Gabu rua dekenai Hiri Motu program idia karaia, hebouhebou oredia be New Guinea Pidgin gado dekenai. Dina toi ibounai ai, program be 9:30 dabai ia matamaia bona Sunday 4:00 bamona adorahi ai do ia ore.
4 Oi Do Idia Segea, A? August 15, 1993, Gima Kohorona ese Aonega Herevadia 27:17 ena hereva, “Auri ese auri ia segea. Unai hegeregerena tau ta ese ma tau ta ena vairana ia segea” ia torea murinai, ia gwau: “Ita be kaia, idia segea loulou be namo gaudia, hegeregeredia. Iehova ita lalokau henia bona iseda abidadama hegeregerena iseda lalodia ita hadaidia dainai, anina be ita be tanobada hegeregerena lasi, bona taunimanima hutuma ese idia badinaia dalana be ita badinaia lasi.” Unai sisiba be edena dalanai ita badinaia diba?
5 Ita be tanobada hegeregerena lasi bona unai bamona ita noho be gau badana. Bona unai totona ita hekwarahi be namo, bema ita ura mai goada ida kara namodia do ita karaia. (Tito 2:14) Unai dainai ai gwauraia Gima Kohorona be ma ia gwau: “Iehova idia lalokau henia taudia ida ita hebou negadiai, ita segea heheni—ita heduru heheni, lalokau bona kara namodia do ita havaradia totona.” Distrik hebouhebou be Iehova ena hahenamo ta, ita ia durua dahaka be maoro bona dahaka be kerere ita diba namonamo totona. Namo lasi program ena kahana ta ita reaia.
6 Aonega Tauna Do Ia Kamonai: Kamonai karana ita hanamoa be namo. Idia gwau ta ese ia kamonai gaudia amo kahana sibona ia laloatao—herevana ia laloa ia hakala henia namonamo. Ita be lalona veria gaudia edia nega ai ita noho dainai nega haida, nega daudau lalonai mai laloa namonamo ida ita kamonai be auka. Taunimanima momo edia bogaraginai ita helai bona hereva ita kamonai neganai, iseda laloa namonamo karana ena lata ita habadaia diba, a? Bema hebouhebou amo ruma dekenai oi giroa murinai, dina ta ta ena program ena anina idia nanadaia neganai, oi haere diba, a? Hebouhebou program ena kahana ta ta ita kamonai bona ita hakala henia be edena dalanai ita hanamoa diba?
7 Ura bada be gau badana, Dirava ena harihari gauna, laloatao karana, ia gaukara namonamo totona. Ta ese idia herevalaia gauna ia ura bada neganai, unai hereva eiava program ena anina bada herevadia ia laloatao haraga. To, distrik hebouhebou dekenai ita kamonai gaudia ita hakala henia namonamo be mai anina bada. Hebouhebou ena program ena kahana ibounai be mai eda ura bada ida ita hakala henia be mai anina bada iseda lauma dalana bona iseda helaro dekenai. Hebouhebou dekenai Iehova ena dala bona iseda hamauria gaukarana ita karaia daladia ita dekenai idia hadibaia. (1 Tim. 4:16) Oi sibona oi laloa oi be vanagi ta bamona davara ena hurehure badadia dekenai. Iehova ena gwauhamata be helaro dogona goadana. Bema ta ese Keristani program idauidau ia hakala henia namonamo lasi bona ena lalona ia boio bamona, ia ese lauma dalanai do ia mutu lasi totona idia henia sisiba bona hakaua herevadia ia reaia diba.—Heb. 2:1; 6:19.
8 Tanobada ena kahana momo dekenai, iseda tadikaka idia hekwarahi bada, hebou dekenai idia lao totona. Hebouhebou dekenai idia hakala henia namonamo ita itaia neganai ita moale. To, gabu haida dekenai, haida be program lalonai hebouhebou gabuna dekenai idia loaloa amo ma haida edia kamonai karana idia hadikaia. Haida be idia ginidae leiti. Haida be helai gabuna korikorina ai idia helai lasi to gabu daudau ai idia helai bona program idia kamonai namonamo lasi. Hari lagani ai, Attendant Department ese unai hekwakwanai hanamoa totona do idia gaukara bada, bona reana seamani ese helai totona ita ia boiria neganai, ita ibounai do ita helai diba. Oiemu heduru unai dekenai ai ura bada.
9 Edena sisiba ese ita idia durua hebouhebou ena program do ita hakala henia namonamo totona bona idia herevalaia gaudia do ita laloatao totona? Lagani gunadia ai idia gwauraia gaudia ita laloa lou be namo: (a) Hebouhebou gabuna dekenai oi lao ena badina oi laloa namonamo. Moale karadia totona oi lao lasi, to oi kamonai bona diba oi abia totona. (Deut. 31:12) Hanuaboi ta ta ai oi laga-ani namonamo. Bema hebouhebou dekenai oi mai neganai oi hesiku bada, do oi laloa namonamo be auka. (b) Oi hegaegae PMV do oi abia haraga bona program ia do hamatamaia lasi neganai oi helai. Miniti ginigabedia lalonai oi ginidae neganai, nega momo hamatamaia hereva kahana do oi reaia. (c) Hereva haida amo anina bada gaudia oi torea. Hereva momo oi torea neganai, unai ese kamonai namonamo karana ia koua. Oi torea neganai, oi naria namonamo oiemu toretore oi laloa bada bena hereva ma haida do oi reaia. (d) Hebouhebou ena kahana ta idia gwauraia hedinarai neganai, mai ura bada ida oi naria. Sibona oi nanadaia, ‘Inai kahana ese dahaka lau dekenai do ia hadibaia unai amo Iehova lau laloa bada karana bona lau ura henia karana lau habadaia totona? Lau kamonai gaudia ese edena bamona lau idia durua mauri matamata do lau hahedinaraia namonamo totona? Inai ese edena dala amo lau do ia durua egu haroro gaukara do lau hanamoa totona?’
10 Iseda Haroro Gaukara Ia Hanamoa Kara Namodia: Paulo ese Tito ia hagoadaia “kara namodia” do ia hahedinaraia. Tito be mai momokani ida ia hadibaia karana amo, ia ese ma haida ia durua edia kara amo idia be “hairai bona mataurai be Sivarai Namona dekenai do idia havaraia.” (Tito 2:7, 10) Lagani ta ta ai, ita idia hadibaia, dahaka dainai Dirava ena kara ita tohotohoa be gau badana, hebouhebou dekenai ita lao bona ia amo ita giroa neganai, ita mahuta gabuna ai, bona hebouhebou gabuna ai. Lagani gunana ai kudouna hamoalea ekspiriens namona ta ai kamonai bona ai ura umui dekenai ai gwauraia.
11 Komiuniti sikuli ena hedimasta ese sikuli idia biagua taudia edia lalona ia veria, nega ginigunana Iehova ena Witness taudia dekenai gwaumaoro idia henia, klasrum be mahuta gabuna bamona do idia gaukaralaia, ena be unai ese edia sikuli taravatuna ia utua. Guna haida ese idia hadikaia bona hekwakwanai idia vara dainai, grup idauidau dekenai gwaumaoro idia henia lasi, klasrum idia gaukaralaia totona. Hedimasta ia diba Iehova ena Witness taudia be taunimanima goevadia, bona biagua taudia ia hamaoroa idia gaukaralaia murinai do ia goeva momokani. Momokani, tadikaka ese idia gaukara goadagoada bona klasrum idia hagoevaia bona haida idia penia danu, tisa taudia ese unai kara mai edia moale ida idia hoalaia! Idia ura do ita gaukaralaia lou.
12 Ena be iseda hebouhebou momo dekenai aniani idia hoihoilaia lasi, to hebou gabuna ita rentaia bona gau idauidau haida ita gaukaralaia dainai moni sisina bada ita halusia. Mai eda ura ida ita henia monina amo unai davana idia karaia. Taihu ta mai ena natudia be hebouhebou dekenai idia mai bona edia moni be bada lasi. To, ia bona ena natudia ese moni sisina amo idia heduru henia. Ita ta ta be dahaka do ita karaia be ita sibona, to ai diba unai sisiba herevana umui laloa bada.—Kara 20:35; 2 Kor. 9:7.
13 Iseda Dabua Dainai Ita Idia Diba: Iseda dabua ita atoa dalana ese ia hahedinaraia ita be edena bamona taudia bona ma haida be edena bamona ita laloa? Sikuli dekenai bona moni gaukara gabudia dekenai, matamata taudia bona taunimanima badadia momo be edia dabua idia laloa bada lasi sitailo idia badinaia taudia edia bogaraginai idia noho. Lagani ta ta ibounai lalonai, dabua edia sitailo ia dika ia lao. Bema ita naria namonamo lasi, ita danu be haraga herea tanobada taudia edia dabua sitailo bamona do ita karaia. Sitailo momo be hegeregere lasi tomadiho heboudia dekenai ita atoa. Momokani, ita ibounai ita ura Keristani haroro taudia hegeregerena dabua ita karaia, hebouhebou dekenai bona program murinai danu ma haida ida ita hebamo heheni negadiai. Nega ibounai lalonai, Paulo ena sisiba ita laloatao be namo, Keristani taudia ia hagoadaia “mai manau bona mai mataurai danu edia dabua do idia kwatua.”—1 Tim. 2:9.
14 Daika ia gwau diba edena dala be mai manau ida ‘dabua ita kwatua’ dalana? Ta ia manau ena anina be “ia hekokoroku lasi bona sibona ia laloa lasi.” Diksenari ese manau ena anina ta ia gwauraia “hemataurai.” Society bona elda taudia ese dabua bona toana edia taravatu idia atoa diba lasi. To, ia namo bema Keristani tauna ia diba edena dabua edia sitailo be hemataurai lasi eiava idia namo lasi, ani? (Filipi 1:10 itaia.) Iseda dabua bona toana ese taunimanima edia lalona idia veria bada be namo lasi. Iseda toana idia namo, tanobada bamona lasi bona taunimanima idia hahemaraia lasi be gau badana. Ita be sivarai namona harorolaia taudia dainai, distrik hebouhebou gabuna dekenai ita noho neganai, iseda dabua bona toana idia namo ese Iehova bona iena orea idia hanamoa. Unai dainai, tama sina ese haheitalai namona do idia hahedinaraia bona edia natudia idia naria dabua namona do idia atoa hebouhebou dekenai. Elda taudia idia ura haheitalai namona idia hahedinaraia bona idia hegaegae sisiba idia henia totona, bema ta be sisiba ia abia be namo.
15 Mahuta Gabuna: Ai gwauraia vadaeni komiuniti sikuli ena ekspiriens lalonai tisa taudia idia hoa badina tadikaka idia goeva, bona idia hekwarahi sikuli idia rakatania neganai ena toana be idia mai neganai ena toana ia hanaia. Hebouhebou haida ese sikuli edia mahuta daiutudia idia gaukaralaia, gabu idauidau amo idia mai pablisa taudia idia mahuta totona. Bema sikuli dekenai ita idia siaia neganai, ita ura unai Keristani karadia ita badinaia. Society dekenai klasrum be davana namona ai idia henia sikuli edia biagua taudia ita tanikiu henia. Danu, sikuli daiutudia lalonai nadunadu be taravatu, to bema nanadu gabuna ia noho, eiava bema biagua taudia ida unai idia hegaegaelaia guna, ia hegeregere.
16 Ta ese ena ruma dekenai mahuta gabuna ia henia hebouhebou dekenai idia mai tadikaka dekenai be heduru karana ta. To, ta ena heabidae karana ita gaukaralaia kerere lasi bona hebouhebou murinai dina momo lalonai ita noho bona ruma biaguna ita hahekwarahia. Unai bamona mahuta gabuna idia abia taudia bona edia natudia ese ruma biaguna be hemataurai dalanai idia kara henia bona ena kohu idia hadikaia lasi eiava edia daiutudia lalonai idia vareai kava lasi. Bema unai dala dekenai ruma biaguna ese hekwakwanai ia davaria, namona be mahuta gabuna hegaegae gaukarana ia naria tadikaka ia hadibaia.
17 Kamera, Vidio, Bona Kaset Teipi: Kamera, vidio kamera, bona kaset teipi masini umui gaukaralaia diba, to namona be kamonai taudia ma haida umui lalodia danu. Bema program lalonai ita loaloa piksa ita abia totona, idia kamonai taudia edia kamonai karana ita hadikaia sibona lasi, to ita danu program ena kahana haida do ita reaia. Nega momo, namo bada ita abia hebouhebou amo bema mai laloa namonamo ida hereva ita kamonai bona hereva haida ita torea. Ita herevalaia gaudia be hebouhebou ena paua poin dekenai eiava saun gaudia dekenai umui gwadaia kau be taravatu, danu taunimanima edia raka gabudia eiava idia itaia namonamo karana umui koua lasi.
18 Helai Gabudia: Ena be inai be hekwakwanai badana lasi, to helai gabudia abia sisibana ai ura gwauraia lou: OI ABIA HELAI GABUDIA ENA NAMBA BE EMU FAMILI BONA OI IDA IDIA MAI TAUDIA EDIA NAMBA HEGEREGERENA SIBONA. Unai sisiba bema ita badinaia, Iehova do ia moale bona lauma aniani ia henia ‘mai ena kamonai hesiai tauna’ ia moale danu.—Mat. 24:45.
19 Iseda tadikaka haida be mai edia gorere, reana uilisea amo hebouhebou dekenai idia mai bona edia famili taudia ese idia naria be namo. Unai bamona tadikaka bona taihu ita lalodia bada, bona hebouhebou dekenai ita itaia, edia lalona idia hadaia lauma aniani idia reaia lasi, ese iseda kudouna ia hamoalea. Gorere taudia idia naria be famili taudia bona edia bese taudia edia maduna. Hebouhebou ena First Aid Department be ia hegeregere lasi unai bamona gorere taudia ia naria. Bema emui famili tauna ta ia gorere bona ta ese ia naria be namo, mani umui hegaegae ia sibona ia noho lasi totona, dika ia vara garina. Elda taudia ese edia kongregesen taudia, gorere dainai heduru idia abia be namo taudia, idia laloa bona idia itaia hebouhebou vairanai naria daladia idia hegaegae vadaeni.
20 Aniani Hebouhebou Dekenai: Ena be hebouhebou haida dekenai aniani sisina idia hoihoilaia, to ita ta ta be eda aniani ita mailaia karana dekenai momo ese hereva namodia idia herevalaia. Tadikaka ta ia torea: “Lau itaia namonamo unai amo lauma hahenamo badana ia vara. Nega bona goada bada be lauma gaudia dekenai hari ita atoa diba. Maumau herevana ta lau kamonai lasi.” Taihu ta ia torea: “Emui haheitalai amo umui tadikaka ese ai Keristani taudia ta ta umui hagoadaia sibona emai kara ai laloa namonamo bona dala ai tahua emai mauri amo gau haida ai kokia bona tiokratik gaukarana ai habadaia.” Loaloa naria tauna ese guna aniani karaia gaukarana ia herevalaia: “Guna ita karaia dalana dainai tadikaka momo ese hebouhebou ena program ibounai idia reaia.” Elda ta ese tadikaka idia mailaia aniani dainai ia torea: “Ibounai be edia ura gaudia idia abia, bona laini dekenai idia naria lasi.” Ginigabena be, taihu ma ta ia torea: “Program ena kahana ta ta idia ore murinai, maino dekenai ai noho bona regerege be bada lasi, noho namona ai mamia.” Oibe, ta ta idia mailaia aniani ia hegeregere, ia durua adorahi ena program idia kamonai namonamo totona. Momo be idia moale badina nega sisina bada ia noho edia turadia idia davaria totona.
21 Hari lagani ai, hebouhebou momo dekenai, aniani gaudia be lasi. Hebouhebou komiti ta ta ese edia hebouhebou idia mai kongregesen do idia hadibaia bema unai do idia haidaua. Reana miniti haida lalonai November 1995 ena Iseda Basileia Gaukara lalonai idia udaia gauna ena paragraf 21, oi ura oi itaia, unuseniai be tauanina dalanai oi idia durua aniani namodia edia lista idia torea, hebouhebou dekenai do oi mailaia diba gaudia unai. Mani oi laloatao, galasi kavabu bona inuinu kekero gaudia be hebouhebou gabuna dekenai umui mailaia lasi. Bema eski maragina oi mailaia, emu sea henunai oi atoa diba gauna ia hegeregere. Mani oi laloatao, dina tubua ai nega ia hegeregere oi mailaia gaudia oi ania bona inua totona. Kingdom Hall dekenai ita hebou bamona, hebouhebou ena program ena nega ai ita aniani lasi. Unai amo ita hahedinaraia tomadiho dalana bona idia hegaegaelaia lauma aniani ita matauraia.
22 Daudau lasi murinai, “Dirava Ena Maino Gwauraia Taudia” Distrik Hebouhebouna ginigunana do ia matamaia. Oi lao totona emu hegaegae karana oi karaia vadaeni, bona hari oi hegeregere dina toi lalonai hebamo namona bona lauma gaudia namodia do oi moalelaia, a? Ai guriguri, Iehova ese emu hekwarahi, hari lagani ena hebouhebou dekenai do oi lao totona, do ia hanamoa.
[Box on page 6]
Distrik Hebouhebou Ena Hereva Haida
Bapatiso: Bapatiso idia abia gwauraia taudia be Saturday dabai, program ia do hamatamaia lasi neganai, idia makaia gabuna dekenai do idia helai. Ita itaia nega haida hemataurai lasi dabua idia karaia, unai be inai nega namona ia hadikaia. Idia ta ta ibounai ese edia digudigu dabua, mai hemataurai gauna, bona tauele do idia mailaia. Idia ida Hesiai Gaukara bukana ena henanadai idia herevalaia kongregesen elda taudia ese idia itaia ibounai be unai gauna idia lalo-pararalaia be namo. Bapatiso herevana bona hereva ia henia tadikakana ena guriguri murinai, seamani ese hadibaia hereva haida do ia henia bona ane ena namba ia gwauraia. Ane murinai, atendan taudia ese bapatiso idia abia gwauraia taudia do idia hakaua lao bapatiso gabuna dekenai. Bapatiso ese unai tau bona Iehova ihuanai ia noho gwauhamatana ia laulaulaia, unai dainai taunimanima rua be idia rosia o imana idia dogoatao lasi, nega tamona ai do idia bapatisoa totona.
Lapel Kadi: Mani emu kara, hebouhebou dekenai oi lao eiava oi rakatania negadia ai, lagani 1996 ena lapel kadi oi atoa. Ita loaloa neganai dala ia kehoa witness namona ita henia totona. Kadi bona ena udaia gauna be kongregesen amo oi abia be namo, badina hebouhebou gabuna ai do oi abia diba lasi. Oi naria lasi ela bona hebouhebou be dina haida sibona murinai do ia matamaia bena emu famili taudia edia kadi oi nanadailaia. Laloaboio lasi, emu Advance Medical Directive/Release kadi, mai ena deit maorona, oi dogoatao. Betele taudia bona painia taudia ese edia ID kadi idia abia mai be namo.
Natudia: Tama sina e, namona be nega ibounai umui diba emui natudia be edeseniai. Namona be umui hadibaia edena bamona do idia kara. Program ena negadia ai umui kahirakahira idia helai be namo. Program ia do matamaia lasi neganai, namona be toileti dekenai idia lao vadaeni. Idia umui hadibaia toileti idia lao neganai, imana idia huria bona gabu idia hadikaia lasi.
Umui Naria Namonamo: Naria namonamo hekwakwanai idia vara garina. Nega momo taunimanima be edia ruma kahirakahira ai idia noho lasi neganai, raskol taudia ese idia hahisia. Namona be nega ibounai emu motuka oi lokaia, bona emu kohu oi hunia ta ena lalona ia veria bona ia henaoa garina. Raskol taudia ese hutuma bada bogaraginai idia gaukara. Oiemu helai gabuna dekenai kohu oi rakatania be aonega karana lasi. Oi diba momokani lasi, idia noho taudia ibounai be Keristani taudia, eiava. Ta oi dibagania lasi be namo, ani? NEGA IBOUNAI OIEMU NATUDIA OI ITAIA BE NAMO.
Mani emu kara, hebouhebou gabuna idia naria taudia oi rini henia eiava oi tore henia lasi, hebouhebou gaudia oi nanadaia totona. Bema elda taudia idia diba lasi, kongregesen seketere ena faila dekenai ia noho hebouhebou ena adres dekenai revareva do oi siaia.