1994-95 “Dirava Gari Henia” Distrik Hebouhebou

Kahana 1

¹ Noa bona Abel edia nega amo ema bona hari, “Dirava gari henia” taudia ese edia abidadama karana idia hahedinaraia. (Heb. 11:4, 7) Dirava gari henia karana ena anina be “iseda Havaraia Tauna ita matauraia bada herea bona habadua garina ita gari.” (it-1 rau 818) December bona January lalonai, iseda hematauraia bada karana do ita hahedinaraia “Dirava Gari Henia” Distrik Hebouhebou dekenai ita lao karana amo. Ane bona guriguri amo program idia hamatamaia neganai, do oi noho ela bona ane bona guriguri amo idia hadokoa, a?

² Lagani ta ta ai, iseda distrik hebouhebou ia mai neganai, ita ura dikadika ita lao. Ena be iseda moni bona goada bada ita gaukaralaia lao henia totona, to ita abidia hahenamo be momo. Ruma dekenai ita giroa lao mai moale bona mai mamina namona ida badina lauma dalana ai hebou ese ita ia hagoadaia. (1 Hanua Pavapavadia 8:66 itaia.) Hebamo namona ese ita ia hamoalea, bona hebouhebou ena nega lalonai nega momo lasi ita karaia gaudia do ita karaia. To laloaboio lasi, ita mai hebou Iehova tomadiho henia totona. Unai be Iena hahegani ita dekenai. Ita ia hadibaia edena bamona ita sibona be namo ita davaria.​—Deut. 31:​12, 13; Sal. 122:1.

³ Dina Toi Hebouhebouna: Inai lagani lalonai Papua New Guinea dekenai, hebouhebou ena program do idia karaia gabu idauidau 15 dekenai. February 15, 1994, Gima Kohorona lalonai hebouhebou gabudia ena lista ia noho. Taia kudima taudia durua totona, hebouhebou ena program ibounai lalonai, imana amo idia karaia Auslan gado do idia karaia danu, Port Moresby dekenai sibona.

⁴ Program ena hereva do idia kehoa Friday, 9:20 a.m. bona do idia koua Sunday adorahi, 3:15 p.m. ai. Saturday bona Sunday edia program be 8:30 a.m. ai do idia hamatamaia.

⁵ Iehova Matauraia Bada Karana Dainai Do Ita Lao: Paulo ese Heberu Keristen taudia ia sisiba henia, ia gwau, “Dirava ita tomadiho henia, mai hemataurai bona mai gari danu.” (Heb. 12:28) Iseda distrik hebouhebou be ita do ia durua unai ita karaia totona. Lao henia ena ura ia koua gaudia haida do idia vara bona ita do idia tohoa. Reana edia toana be ororo badadia bamona, to Iehova ena heduru amo do ita hanaidia diba. (Mat. 17:20) Bema holide do oi abia diba lasi unai dina 3 lalonai, oi gurigurilaia vadaeni bona oiemu gaukara biaguna oi noia vadaeni nega ia henia hebouhebou dekenai do oi lao totona, a?

⁶ Mai Ena Namo Karana Oi Halusia Kava Lasi: Edena bamona mai ena namo karana oi halusia kava diba? Bema oi palani namonamo bona oiemu nega bona goada oi gaukaralaia hebouhebou lao henia totona to Sunday adorahi hebou ia ore neganai, hebou ena kahana badana oi reaia, unai be aonega lasi karana. Aria badana oi moalelaia noho lalonai ma gau ta karaia totona aria do oi rakatania, a? Lagani gunanai ai itaia tadikaka haida be daba ena program murinai hebouhebou idia rakatania. To, lauma dalana dekenai ita lo dainai bona Dirava ita gari henia dainai, namona be Iehova ia abia hegaegae gaudia ita reaia lasi.​—1 Korinto 2:​9, 10 itaia.

⁷ Ita momo be program ia do ore lasi neganai hebou do ita rakatania lasi. To, kahana badana ta ita reaia diba. Edena bamona unai ia vara diba? Bema ita palani namonamo lasi, hebouhebou ena program ena hereva badadia do ita abia namonamo lasi. Ita ura daba momokani ita toreisi bena nega do ia noho aniani ita ania, ita hegaegae bena ita lao haraga diba bona helai gabuna ita davaria diba program ia do hamatamaia lasi neganai. Ita mahuta haraga danu be mai anina bada. Unai amo iseda lalona do ia noga bona program ibounai do ita kamonai henia namonamo.

⁸ Dala namona ta program ena hereva badadia abia totona be hereva haida ita torea pepa ta dekenai. Tadikaka bona taihu badadia sibodia lasi to maragidia danu idia karaia be mai anina bada. Lagani 16 pablisa kekenina ia gwau: “Hereva ta ena Baibel siridia idia gwauraia neganai lau torea. Lau giroa ruma ai bena lau riviulaia.” Ma lagani 16 merona ta ia gwau: “Hereva badadia lau torea. Unai amo lauegu lalona lau biagua diba.” Hebouhebou dekenai Baibel, ane bukana, noutbuk maragina ta, bona peni eiava pensolo do oi gaukaralaia momo. Momokani, mai edia natudia tama sina ese ma gau haida do idia huaia mai to namona be eski badana o kohu momo idia abia kava lasi idia bona edia tadikaka hahekwakwanaia garina.

⁹ Tadikaka haida be program idia rekodia vidio eiava kaset teipi dekenai bena gabeai ruma dekenai idia itaia o kamonai lou diba. Unai be ta ena abia hidi, to nega momo idia davaria nega ia noho lasi dainai idia gaukaralaia lasi. Danu, unai kaset teipi eiava vidio kamera idia atoa namonamo neganai hereva badadia idia reaia diba.

¹⁰ Program ia do hamatamaia lasi neganai iseda helai gabudia ai ita helai be namo. Reana turadia ita hedavari henia bona sivarai namodia ita kikilaia noho lalonai seamani ia gwau program do ia hamatamaia. Program dekenai kahana idia naria tadikaka, bona idia mai tadikaka ibounai dekenai, hemataurai karana be herevahereva karana ita hadokoa haraga bona helai gabudia ai ita helai.

¹¹ Iehova ena hahenamo momo dainai distrik hebouhebou be moale negana. Tauanina dalana dekenai bona lauma dalana dekenai ita ia hanamoa. Ita laloaboio lasi steidium abia totona moni sisina bada ita negea bona ita diba aniani ena davana ia bada ia lao. Edena bamona unai gaudia edia davana do ita henia diba? Kontribusen mauana amo do ita abia. Kontribusen mauadia haida do idia noho bona unai dala amo hebouhebou lao henia taudia be edia ura hegeregerena, hedurua monina idia henia diba. Salamo 96:​8 ia hereva hegeregerena, ‘Hairai umui gwauraia, Iehova ena ladana ena; boubou gauna umui mailaia, ena magu lalonai umui raka vareai.’

1994-95 “Dirava Gari Henia” Distrik Hebouhebou

Kahana 2

¹² Emu Kara Dainai Iehova Do Idia Hanamoa, A? Lagani ta ta ai, mai lalokau danu Iseda Basileia Gaukara pepana ese iseda kara distrik hebouhebou ita lao henia neganai ia sisibalaia. Momokani, ita diba vadaeni namona be hanaihanai iseda kara ia namo, to hutuma badana idia hebou neganai, ita diba murimuri taudia ese ita do idia raraia. Iseda kara, namo eiava dika, be mai ena siahu, reana iseda haroro gaukara ena siahu ia hanaia. Ita ura iseda kara bona hereva amo Iehova ita hanamoa.​—Her. 27:2; 1 Pet. 2:12.

¹³ Lagani 1993 “Dirava Ena Hahediba” Distrik Hebouhebou murinai, sekuriti tauna ta motel ta dekenai ia hereva, ia gwau: “Nega daudau herea lalonai inai bamona kekeni bona memero lau itaia lasi, idia be namo herea momokani.” Bena, murimuri taudia edia natudia edia kara dika bona gau momo idia hadikaia kava karana ia herevalaia murinai, Witness natudia ia herevalaidia lou, ia gwau: “Edia kara ia namo momokani bona oi ura idia oi bamoa. Lau ura iniseniai idia abia hebouhebou ma haida be unai bamona idia karaia.”

¹⁴ Ma tano ta ai niuspepa toretore tauna ese hebouhebou dekenai dahaka ia itaia ia herevalaia, ia gwau: “Hahine bona kekeni be deresi namodia idia hahedokilaia, tatau bona memero be kouti bona neketai idia atoa. Dina hani idia helai bona hereva idia kamonai bona hereva haida idia torea. Bema goeva karana be helaga karana, Iehova ena Witness taudia ese unai idia badinaia momokani.” To madi, sivarai iboudiai be unai bamona lasi.

¹⁵ Hebouhebou haida dekenai program ia heau noho lalonai taunimanima momo idia loaloa. Unai ese helai taudia edia kamonai dalana ia hadikaia regerege bada herea dainai. Haida be mai ena badina namona dainai idia loaloa, to namona be orena idia helai bona program idia kamonaia namonamo, ani?

¹⁶ Tama sina momo be kongregesen heboudia dekenai edia natudia idia hakaua mai bona idia naria. Unai hegeregerena, program ia heau noho lalonai natudia idia loaloa lasi bona tama sina kahirakahira idia helai be namo, ani? NEGA IBOUNAI NAMONA BE UMUI DIBA EMUI NATUDIA BE EDESENIAI BONA DAHAKA IDIA KARAIA.

¹⁷ Dabua Bona Toana: Iseda nega lalonai loaloa dabua, bona dabua atoa namonamo lasi toana idia abia dae. Taunimaniama momo be unai bamona dabua idia hahedokilaia dubu, aniani gabudia, bona konseti idia lao henia neganai. Paragraf 14 lalonai ia noho sivaraina ia hedinaraia taunimanima momo ese tomadiho gabuna lao henia neganai dabua namodia atoa karana idia laloa bada. Bema ta be ena toana ia laloa lasi, hebou dabua ia atoa lasi bona ia sibona ia hagoevaia lasi, unai toana ese unai tau o hahine ia kikilaia bamona. Namona be ita laloatao unai dina toi lalonai hebouhebou gabuna be iseda Kingdom Hall ai do ia lao.

¹⁸ Namona be idia bapatiso gwauraia taudia idia laloatao digu dabua maorona idia atoa. Daidia ese dabua do idia gwauraia namo eiava dika? Ia be kongregesen ta ta edia elda taudia edia maduna bapatiso gwauraia taudia idia hadibadia, edia dabua toana dainai haida hekwakwanaia be namo lasi. (2 Kor. 6:​3, 4) Dabua mai ena kohu hoihoilaia herevadia, o murimuri taudia edia hereva idia torea, eiava hemarai havaraia dabuadia be maoro lasi bapatiso totona. Elda taudia be Hesiai Gaukara buka amo henanadai idia henia neganai, edena bamona digudigu dabuadia be namo do idia kikilaia diba.

¹⁹ Noho Gabuna: Tadikaka bona taihu momo do idia noho turadia ida bona haida be hotel dekenai do idia noho. To, bema mahuta gabuna oi davaria diba lasi, namona be oiemu ladana oi henia kongregesen seketere dekenai bona do ia siaia hebouhebou ena Rooming Department dekenai. Mani laloaboio lasi, bema tadikaka ida ita noho, namona be edia heabidae karana ita matauraia bona ita noho daudau lasi hebouhebou ia do hamatamaia lasi neganai, bona ia ore murinai. Daiutu idia henia hebouhebou ena nega ai oi gaukaralaia totona SIBONA. Namona be oiemu natudia oi naria namonamo; idia ese tadikaka edia kohu idia hadikaia garina, bona taravatulaia gabudia ai idia vareai lasi. Namo lasi maduna badana idia atoa unai tadikaka dekenai, hegeregere sibodia edia aniani idia mailaia bona P.M.V. monina idia abia mai be namo. Iboudiai idia gini hegaegae edia maduna idia huaia hebouhebou idia lao henia neganai be maoro. (2 Tes. 3:​7, 8) Bema daiutu idia henia tadikaka be hekwakwanai ia davaria, namona be hebouhebou totona noho gabuna naria tadikaka ia hamaoroa haraga, bona mai moale danu heduru do ia henia.

²⁰ Kaset Teipi Bona Vidio Karaia Daladia: Guna ita hereva bamona, bema ta ia ura program ia rekodia kaset teipi o vidio dekenai, unai be ia sibona ena ura. Bema oi ura oi karaia namona be oiemu tadikaka oi laloa guna. Bema helai gabuna amo oi karaia, ma haida edia kamonai karana do oi hadikaia. Oi gini lasi ma haida vairanai bena hereva henia tauna do idia itaia diba lasi. Ma gau haida be inai: unai gaudia oi gwadaia kau lasi hebouhebou ena soun gaudia dekenai eiava ena paua point dekenai, danu taunimanima edia raka gabudia oi koua lasi.

²¹ Helai Gabudia: Nega haida tadikaka be sea momo idia biagua kava bona hekwakwanai ia havaraia. Umui ai hadibaia lou: HELAI GAUDIA OI BIAGUA ENA NAMBA BE EMUI FAMILI BONA UMUI IDA IDIA MAI TAUDIA EDIA NAMBA SIBONA.

²² Do oi noho, a? Lagani 1993 “Dirava Ena Hahediba” Distrik Hebouhebou lao henia taudia 6,972 Papua New Guinea dekenai be edia hereva amo idia hedinaraia mai edia kudouna ibounai ida unai hebouhebou idia moalelaia. Taunimanima 170 be Dirava ena hahediba Baibel lalonai idia badinai dainai bapatiso idia abia. Lagani 1993 ena program namona ese ita ia hagoadaia 1994 ena “Dirava Gari Henia” Distrik Hebouhebou ita reaia lasi.

²³ Mai guriguri danu oi palani namonamo unai dina toi hebouhebou ena kahana ta do oi reaia lasi totona bena do oi noho diba, hamatamaia ane amo ela bona Sunday ena guriguri ginigabena idia karaia neganai. Namona be ai torea vadaeni heduru herevadia be idia mai gwauraia matamata taudia ida oi kikilaia.​—Gal. 6:10.

²⁴ December 23, 1994 ai, iseda “Dirava Gari Henia” Distrik Hebouhebou ginigunana Papua New Guinea lalonai do ia hamatamaia. Unai dina toi hebouhebou namona bona lauma aniani moalelaia negana totona oi hegaegae vadaeni, a? Ai guriguri Iehova ese oiemu hegaegae karana do ia hanamoa bona oi lao diba Iehova ena pata, “Dirava Gari Henia” Distrik Hebouhebou dekenai, bena gau namodia do oi moalelaia diba.

Distrik Hebouhebou Ena Hadibaia Hereva Haida

Bapatiso: Namona be Saturday daba ena program ia do kehoa lasi neganai, idia bapatiso gwauraia taudia be edia gabu korikori dekenai idia helai hegaegae. Idia ura do idia bapatiso taudia ta ta iboudiai ese sibodia edia digudigu dabua namodia bona tauele idia mailaia. Haroro tauna ese bapatiso herevana bona guriguri ia henia murinai, seamani ese hereva haida bapatiso idia abia gwauraia taudia dekenai do ia henia bona ane ena namba do ia gwauraia. Ane ena kahana ginigabena murinai, attendant taudia ese bapatiso abia gwauraia taudia do idia hakaudia lao bapatiso gabuna dekenai. Haida edia kastom be adavana o turana ena imana idia dogoatao idia ruaosi idia bapatiso neganai, to bapatiso be Iehova bona ma ta huanai ia noho gwauhamata toana dainai, nega ta ai tamona sibona do idia habapatisoa.

Lapel Kadi: Oi be distrik hebouhebou gabuna dekenai oi noho neganai bona unai gabu oi lao henia eiava oi rakatania neganai, mani unai 1994 lapel kadi oi atoa. Oi loaloa neganai dala ia kehoa haroro gaukara namona ita karaia diba. Lagani 1993 lalonai Moscow bona Kiev dekenai idia gaukaralaia bona dala badana ai idia davaria unai be momokani. Kongregesen sibona amo kadi bona ena dogoatao gauna oi abia diba, oi abia diba lasi hebouhebou gabuna dekenai. Namona be Betele bona painia taudia ese edia ID kadi hebouhebou dekenai idia abia mai danu.

Volantia Gaukara: Hebouhebou ena nega lalonai volantia gaukara oi karaia diba, a? Bema hora haida ita gaukaralaia iseda tadikaka durua totona, do ita moale. Laganai 16 idia do davaria lasi memero kekeni ese volantia gaukara idia karaia diba bema edia tamana, sinana, eiava lo taihu o tadikaka ida idia gaukara.

Oi Naria Namonamo: Bema ita naria namonamo hekwakwanai do ita davaria lasi. Nega momo taunimanima be edia ruma kahirakahira ai idia noho lasi neganai, raskol taudia ese idia hahisia. Namona be nega ibounai emu kohu oi hunia bona motuka oi lokaia. Hutuma badana idia itaia neganai raskol idia moale badina kohu momo do idia davaria. Unai dainai, aonega karana be helai gauna latanai emu kohu oi rakatania lasi. Keristen taudia sibodia lasi idia mai hebouhebou gabuna dekenai. NEGA IBOUNAI OIEMU NATUDIA BE OI KAHIRAKAHIRA IDIA NOHO. Sivarai haida ai kamonai bona idia gwau taunimanima dikadia ese kekeni bona memero haida idia ura henaoa toho.