Lagani 1997 “Dirava Ena Hereva Abidadama Henia” Distrik Hebouhebouna
1 Aposetolo Paulo ese Timoteo ia hamaoroa “Buka Helaga ena hereva ibounai be Dirava ena Lauma ese ia havaraia.” (2 Tim. 3:16) Lauma helaga ese Dirava ena Hereva ia havaraia dainai, ita abidadama henia ena badina be momo. Hari inai lagani ena distrik hebouhebou ena sinado be “Dirava Ena Hereva Abidadama Henia.” Ena program ese iseda abidadama Baibel dekenai do ia hagoadaia, herevana lagani momo lalodiai hereva momokani ita diba vadaeni eiava vanegai sibona Iehova ena orea ita davaria. Namona be ita ibounai ita hegaegae unai program ibounai ita lao henia totona. Bema kamonai matamata taudia, hegeregere iseda Baibel stiuden taudia, ese ita ida unai hebouhebou dekenai do idia mai, unai ese ita do ia hagoadaia bada!
2 Dina Toi Hebouhebouna: Hari lagani ai, dina toi hebouhebouna idia hegaegaelaia iseda namo totona. February 15, 1997, Gima Kohorona ese Papua New Guinea dekenai do idia karaia hebouhebou 9 edia lista ia hahedinaraia. Namona be hari oi diba edena hebouhebou dekenai do oi lao, bona palani oi karaia unai program ena dina toi dekenai oi noho totona. Emu gaukara biaguna oi itaia vadaeni unai neganai do oi gaukara lasi totona, a? Bema emu natudia be idia do lao sikuli dekenai bona hebouhebou negana be holide negana lasi, mai emu hemataurai ida edia tisa taudia oi hadibaia vadaeni, do idia sikuli lasi, badina edia tomadiho hadibaia ena kahana badana do idia abia dainai, a?—Deut. 31:12.
3 Taia kudima taudia edia namo totona, Port Moresby ena English gado hebouhebouna dekenai taia kudima taudia edia gado, Auslan Sign Language, dekenai program do idia hahanaia.
4 Dina toi ibounai ai, program be 9:30 dabai do ia matamaia. Hebouhebou gabudia momo dekenai iduara be 8:00 dabai do idia kehoa. Ta be helai gabudia do ia abia lasi ela bona hebouhebou gabuna be idia kehoa ibounai totona.—Fil. 2:4.
5 Hakala Henia Namonamo: Aposetolo Paulo ese idaunegai Keristani taudia ia hamaoroa namona be peroveta taudia edia hereva idia badinaia, unai hereva be dibura gabuna amo ia diari lamepa bamona. (2 Pet 1:19) Unai be momokani ita dekenai danu. Hari Satani ese ia biagua tanobada ita noholaia be hegeregere dibura gabuna lalonai ita noho. Ita moale bada badina ta ese ita ia boiria dainai, lauma dalanai unai dibura ita rakatania. (Kol. 1:13; 1 Pet. 2:9; 1 Ioa. 5:19) Bema ita ura diari dekenai ita noho, iseda abidadama ita hagoadaia dalana be Iehova ena lauma amo ia havaraia Herevana ita hakala henia. Hari inai lagani ena distrik hebouhebou ese ita do ia hagoadaia unai bamona ita karaia totona.
6 Reana do ita hekwarahi bada program ena hereva ita hakala henia namonamo totona, to bema ita karaia, namo do ita davaria. Namona be ita laga-ani namonamo bena hebouhebou gabuna dekenai ita lao neganai, program ena hereva do ita kamonai henia namonamo diba. Dina ta ta ai, nega oi atoa hebouhebou lao henia totona, bena program ia do hamatamaia lasi neganai oi helai vadaeni. Bena dina ta ta ena program ena dabai ane bona guriguri do ita abia. Taunimanima badadia ese haheitalai namona idia hahedinaraia be namo, bona tama sina ese edia natudia idia hadibaia be namo.—Ef. 6:4.
7 Dina ta ena program ia do hamatamaia lasi neganai, bema hebouhebou ena hereva kwarana ita itaia guna, dahaka hereva namodia do idia gwauraia hedinarai ita laloa diba. Unai ese iseda ura unai hereva dekenai do ia habadaia. Reana ita idia durua diba herevadia do ita tahua, hegeregere edena bamona ita be ma haida dekenai do ita hahedinaraia dahaka dainai ita ese Dirava bona ia idia tahua taudia edia ahuna namona gwauhamatadia ita abidadama henia. (Heb. 11:1, 6) Namona be hereva haida amo anina bada gaudia ita torea, unai ese ita do ia durua program ena hereva badadia ita laloatao totona. Bema hereva momo ita torea, reana hereva badadia haida do ita reaia, toretore momo karana dainai.
8 Lagani gunanai, haida be idia loaloa kava, bona ma haida idia vadivadi program ia do heau noho lalonai, to “hesiai tauna mai ena kamonai, bona mai ena kara maoromaoro” ese iseda namo totona idia hegaegaelaia gaudia idia kamonai henia lasi. Iesu ia gwauhamata lauma aniani be nega korikori ai do ia henia ita dekenai. (Mat. 24:45-47) Unai dainai, namona be unai lauma aniani idia henia neganai ita noho bona ita laloa maragi lasi. (2 Kor. 6:1) Danu, nega haida natudia idia hesiku neganai, idia noia idia lao mei rumana dekenai, to idia ura idia loaloa kava sibona. Bema ruma dekenai oi hadibaia namonamo, do ia durudia mei rumana dekenai do idia lao momo lasi totona. Nega haida eregabe taudia be gabu idauna dekenai idia helai hebou, idia kiki, ta idia hereva henia metaira, bona revareva idia hanaia lao ma ta dekenai. Iseda matamata taudia be hari inai negai hekwakwanai momo idia davaria, unai dainai namona be hebou ena hereva do idia kamonaia namonamo, gau idauna ta idia karaia lasi be namo. Matamata taudia edia kara, Baibel ena hahegani bamona lasi karadia, idia dadaraia be namo. (2 Timoteo 2:22 itaia.) Iseda kamonai karana, matamata taudia bona matamata lasi taudia edia, ese Iehova do ia hanamoa bona ia do ia hamoalea.
9 Bema atendan tauna ese ta dekenai sisiba ia henia, namona be ia badinaia, badina unai be Iehova ena lalokau karana hahedinaraia dalana ta. (Gal. 6:1) Namona be ita ibounai ita laloatao, inai hebouhebou dekenai ita mai be hereva ita ‘kamonai bona dibaia’ totona. (Deut. 31:12) Danu, “aonega tauna do ia kamonai bena ena diba do ia habadaia.” (Aon. 1:5, NW) Hebouhebou ena nega ia do mai lasi lalonai, namona be ruma bese idia hebou guna bona dahaka dainai ibounai be gabu tamona dekenai do idia helai, program ia heau lalonai do idia helai namonamo, program do idia hakala henia namonamo, bena program amo ahuna namona do idia abia idia kikilaia.
10 Iehova Ia Hamoalea Toana: Iehova ena orea taudia be tanobada taudia ibounai ese idia itaia. (1 Kor. 4:9) Iseda dabua bona tauanina edia toana namona idia itaia. Momo be Keristani kongregesen idia bamoa matamaia neganai, 1 Timoteo 2:9, 10 bona 1 Petero 3:3, 4 dekenai idia noho sisiba idia badinaia dainai, edia toana idia haidaua momokani. Edia toana be hari inai negai taudia edia dabua bona tauanina edia toana karaia daladia amo idia idau momokani. Namona be ita naria namonamo tanobada taudia edia kara toana bamona ita karaia garina—dabua idaudia idia atoa, edia huina be tanobada ena sitaelo idauidau bamona idia karaia, eiava edia dabua be mai hemataurai dalanai idia karaia lasi. Iseda dabua bona tauanina ena toana karaia namonamo dalana ese hebouhebou dekenai idia mai taudia matamatadia do ia hadibaia Keristani taudia edia toana korikori be dahaka.
11 Lagani gunana ena hebouhebou ai, tadikaka bona taihu momo herea edia dabua bona tauanina ena toana be namo. To, hebouhebou totona ita hegaegae lalonai, sibona eda dabua bona tauanina ena toana karaia dalana ita laloa danu be namo. Tama sina e, namona be aonega dalanai emui natudia umui naria, dabua namona do idia atoa hebouhebou totona. Namo lasi tanobada ena sitaelo idauidau ese iseda Keristani toana namona ia hadikaia.
12 Kara Namodia Karaia Noho: Keristani momokani taudia edia toana ta be kara namodia. (1 Pet. 2:12) Iseda kara ita naria be gau badana—hebouhebou gabuna ai, ita mahuta gabuna ai, bona hebouhebou dekenai ita lao neganai. Unai ese witness namona ia henia diba bona ma haida do idia itaia Dirava bona ena Hereva abidadama henia karana ese dahaka ia karaia diba taunimanima totona. Reana unai ese haida ia ha-uraia Iehova idia diba totona. (1 Petero 3:1, 2 itaia.) Iseda hahenamo be iseda kara amo Dirava ita hanamoa diba. To, namona be ita naria namonamo, Iehova idia tomadiho henia taudia edia ladana namona ita hadikaia garina.
13 Natudia ita naria hebouhebou gabuna dekenai, ita rakatanidia lasi idia heau loaloa kava totona, unai bamona hadibaia hereva momo ita abia vadaeni. Ena be hebouhebou be dala namona iseda tadikaka ita hedavari henidia bona bamoa totona, to namona be tama sina ese edia maduna idia laloa, nega ibounai edia natudia idia naria. Iehova ese unai maduna ia henia tama sina ibounai dekenai. (Aon. 1:8; Ef. 6:4) Iseda natudia ita naria namonamo lasi neganai, Iehova ena Witness taudia ma haida idia karaia vadaeni gaukara namona bona ladana namona ita hadikaia diba. (Aon. 29:15) Bema ita itaia iseda Witness tadikaka edia laloa dalana ia kerere, hebogahisi karana be kara maorona ita hadibaia idia dekenai.
14 Mahuta Gabuna: Hebouhebou haida ese sikuli edia mahuta daiutudia idia gaukaralaia, gabu idauidau amo idia mai pablisa taudia durua totona. Sikuli edia biagua taudia ese unai bamona heduru idia henia dainai ai tanikiu henia, bona ita ura gabu ita rakatania neganai ia goeva. Sikuli daiutudia lalonai nadunadu be taravatu, to bema biagua taudia ida unai idia hegaegaelaia guna, ia hegeregere. Danu, sikuli ai lahi karaia taravatudia ita badinaia. Nega haida unai kara idia taravatulaia.
15 Bema ta ese ena ruma dekenai mahuta gabuna ia henia, ena heabidae karana ita gaukaralaia kerere lasi, bona hebouhebou murinai dina momo ita noho lasi. Unai bamona kara be namo lasi bona ruma biaguna ita hahekwarahia. Unai bamona mahuta gabuna idia abia taudia ese ruma ena biaguna be hemataurai dalanai idia kara henia bona ena kohu idia hadikaia lasi eiava edia daiutudia lalonai idia vareai kava lasi. Bema unai dala dekenai ruma biaguna ese hekwakwanai ia davaria, namona be mahuta gabuna hegaegaelaia gaukarana ia naria tadikakana ia hadibaia.
16 Hebouhebou Dekenai Ita Gaukaralaia Gaudia Edia Davana: Hebouhebou lao henia be mai davana ita ta ta iboudiai dekenai. To namona be gau ma ta ena davana ita laloa danu. Hebouhebou totona ita gaukaralaia gabudia edia davana be bada. Gau ma haida edia davana ita laloa danu be namo. Hebouhebou gabudia dekenai aniani do ita hoihoilaia lasi dainai, kontribusen henia karana be mai anina bada. Emu hariharibada karana amo unai dala oi durua dainai, ai tanikiu henia.—Kara 20:35; 2 Kor. 9:7, 11, 13.
17 Helai Gabudia: Lagani momo lalonai ai henia vadaeni sisiba, helai gabuna abia sisibana, ai ura gwauraia lou: OI ABIA HELAI GABUDIA ENA NAMBA BE EMU FAMILI BONA OI IDA IDIA MAI TAUDIA EDIA NAMBA HEGEREGERENA SIBONA. Ai moale badina vanegai laganidia lalonai, momo ese unai sisiba idia badinaia, bona unai ese lalokau hahedinaraia karana hebouhebou dekenai ia habadaia. Gabu momo dekenai helai gabudia haida ai oi lao be sisina auka to haida be oi vareai haraga gabuna dekenai idia noho. Mani emu kara, ma haida oi laloa bona haraga idia davaria diba helai gabudia oi rakatania idia hegeregere lasi taudia totona.
18 Kamera, Vidio, Bona Kaset Teipi: Kamera bona rekodia gaudia oi gaukaralaia diba hebouhebou dekenai. To, namona be oi gaukaralaia neganai, ma haida edia kamonai karana oi hadikaia lasi. Namo lasi program lalonai ita loaloa piksa ita abia totona, bona program idia kamonai toho taudia edia kamonai karana ita hadikaia. Ita herevalaia gaudia be hebouhebou ena paua poin dekenai eiava saun gaudia dekenai umui gwadaia kau be taravatu, danu taunimanima edia raka gabudia eiava idia itaia namonamo karana umui koua lasi.
19 First Aid: First Aid Dipatmen be bero eiava gorere be hebouhebou lalonai idia davaria taudia sibona do idia durua. Ia noho hanaihanai gorerena idia abia taudia do idia naria diba lasi. Unai dainai namona be oi bona emu famili idia durua gaudia do oi hegaegaelaia guna. Mani emu kara sibona emu muramura, hegeregere aspirin, toto kumia muramurana, pini, bona unai bamona gaudia do oi mailaia, badina be hebouhebou dekenai do idia noho lasi. Bema haida be seizures, sugar gorerena, kudouna gorerena, eiava unai bamona gorere idia abia, namona be idia hegaegae namonamo. Namona be idia abia muramura idia noho, bona unai gorere tauna ia diba ruma bese tauna ta, eiava kongregesen tauna be nega ibounai idia danu ia noho, heduru henia totona. Hekwakwanai haida be hebouhebou haida dekenai idia vara badina gorere taudia idia rakatania bona sibona idia noho neganai idia gorere. Hebouhebou naria taudia ese dala idia karaia hospital dekenai idia abia lao totona. Bema gorere tauna naria totona ruma bese tauna be lasi, namona be kongregesen elda taudia idia hamaoroa bona idia ese dala idia karaia heduru henia totona.
20 Aniani Hebouhebou Gabuna Dekenai: Hebouhebou gabuna momo dekenai, aniani hoihoilaia karana idia koua. To gabu haida dekenai reana aniani sisina do idia hoihoilaia adorahi kahanai, badina haida be edia mahuta gabuna dekenai aniani idia nadua diba lasi. Aniani be hebouhebou dekenai ita hoihoilaia lasi dainai, hari momo ese program ena lauma aniani ibounai do idia abia diba. Unai heau dalana ai hamatamaia murinai, haida be edia tanikiu herevadia idia siaia ai dekenai. Namona be ibounai be sibona edia tauanina durua aniani gaudia do idia mailaia dina tubua aniani totona, November 1995 Iseda Basileia Gaukara pepana lalonai idia udaia gauna, ena paragraf 21 ia gwauraia gaudia oi itaia. Galasi kavabu be hebouhebou gabuna dekenai umui mailaia lasi. Bema eski ita gaukaralaia, namo lasi vareai o raka gabudia idia koua. Haida be program ia heau lalonai idia aniani bona inuinu. Unai be hemataurai lasi karana. Tadikaka haida be hebouhebou gabuna kahirakahira dekenai idia noho aniani gabudia maragidia eiava dala ai aniani bona inuinu gaudia idia hoihoilaia taudia dekenai idia lao program ia heau noho lalonai. Unai kara be maoro lasi.
21 Ita ese iseda lauma aniani momo negana ita laloa bada momokani bona laga-ani negana kwadogina ai mai maino ida hebamo heheni karana ita moalelaia. Unai kara ena badina hegeregerena, laga-ani neganai hebouhebou gabuna do oi rakatania lasi aniani hoia totona, to emu aniani oi mailaia be namo. Unai amo nega bada do ia noho emu tadikaka bona taihu oi bamoa totona.
22 Ita moale bada herea badina kahirakahira iseda “Dirava Ena Hereva Abidadama Henia” Distrik Hebouheboudia do idia matamaia! Ita ibounai ita ura ita hegaegae namonamo program ibounai ita abia totona, unai amo Iehova ese ena orea amo ia hegaegaelaia lauma ariana do ita moalelaia. Unai dala amo dina vairai do ita ‘hegeregere momokani, kara namodia ibounai karaia’ totona.—2 Tim. 3:17.
[Box on page 6]
Distrik Hebouhebou Ena Hereva Haida
Bapatiso: Bapatiso idia abia taudia be Saturday dabai, program ia do hamatamaia lasi neganai, idia makaia gabuna dekenai do idia helai. Idia ta ta ibounai ese edia digudigu dabua, mai hemataurai gauna, bona tauele do idia mailaia. Guna haida be idia hegeregere lasi dabuadia idia atoa, hegeregere mai toretore dikadia tisiedi eiava unai nega namona idia hadikaia dabua idia hahedokilaia. Bapatiso gwauraia taudia ida Hesiai Gaukara bukana ena henanadai idia herevalaia kongregesen elda taudia ese do idia hamomokania unai gaudia idia lalo-pararalaia be namo. Bapatiso herevana bona hereva ia henia tadikakana ena guriguri murinai, seamani ese ane ena namba do ia gwauraia. Ane murinai, atendan taudia ese bapatiso idia abia gwauraia taudia do idia hakaua lao bapatiso gabuna dekenai. Bapatiso ese unai tau bona Iehova ihuanai ia noho gwauhamatana ia laulaulaia. Unai dainai bapatiso idia abia neganai, bapatiso gwauraia taudia rua be imana idia dogoatao eiava idia rosia be maoro lasi.
Lapel Kadi: Mani emu kara, hebouhebou dekenai oi lao eiava oi rakatania negadia ai, lagani 1997 ena lapel kadi oi atoa. Dala ia kehoa diba witness namona ita henia totona. Kadi bona ena udaia gauna be kongregesen amo oi abia be namo, badina hebouhebou gabuna ai do oi abia diba lasi. Oi naria lasi ela bona hebouhebou be dina haida sibona murinai do ia matamaia bena emu famili taudia edia kadi oi nanadailaia. Laloaboio lasi, emu Advance Medical Directive/Release kadi, mai ena deit maorona, oi dogoatao.
Mahuta Gabudia: BEMA OI BE MAI EMU HEKWAWANAI EMU MAHUTA GABUNA DEKENAI, namona be oi gari lasi to Mahuta Gabudia Dipatmen oi hadibaia bena maoromaro oi do idia durua.
Volantia Gaukara: Nega sisina oi atoa hebouhebou dipatmen ta dekenai oi gaukara totona, a? Bema hora haida lalodia tadikaka oi durudia, unai be heduru bada bona moale do oi davaria. Bema oi hegeregere, namona be Volantia Gaukara Dipatmen hebouhebou gabuna dekenai oi lao. Bema edia tama sina eiava tau o hahine ma ta ese idia ia naria diba, mauri lagani 16 idia do abia lasi natudia ese heduru idia henia diba.
Umui Naria Namonamo: Naria namonamo hekwakwanai idia vara garina. Nega momo taunimanima be edia ruma kahirakahira ai idia noho lasi neganai, raskol taudia ese idia hahisia. Namona be nega ibounai emu motuka oi lokaia, bona emu kohu oi hunia, ta ena lalona ia veria bona ia henaoa garina. Raskol taudia ese hutuma bada bogaraginai idia gaukara. Oiemu helai gabuna dekenai kohu oi rakatania be aonega karana lasi. Oi diba momokani lasi, idia noho taudia ibounai be Keristani taudia, eiava. Ta oi dibagania lasi be namo, ani? NEGA IBOUNAI OIEMU NATUDIA OI ITAIA BE NAMO.
Mani emu kara, hebouhebou gabuna idia naria taudia oi rini henia eiava oi tore henia lasi, hebouhebou gaudia oi nanadaia totona. Bema emu kongregesen amo unai diba oi abia diba lasi, brens opesi oi tore henia oi idia durua totona.