Memorial—Mai Anina Bada Hebouna!
1 Sunday, March 23 ai, dina do ia diho murinai, Keriso ena mase laloa lou karana, Memorial, do ita karaia. (Luka 22:19) Unai be mai anina bada karana! Iesu ese Iehova ia badinaia mai ena maoromaoro ida ela bona ia mase, unai amo ia hamomokania, ena be taunimanima ta ese hisihisi bada ia davaria to Dirava ia badinaia goevagoeva diba, unai amo Iehova ena lohia siahuna ena maoro ia abia isi. (Heb. 5:8) Inai danu, Keriso ena mase be taunimanima goevadaena ta ena boubou, taunimanima edia davana ia henia gauna, bona unai gau dainai, Iesu idia abidadama henia taudia be mai edia dala mauri hanaihanai do idia davaria. (Ioa. 3:16) Bema Memorial hebouna ai ita vareai, ita hahedinaraia diba Iehova ena lalokau bona Iesu ena boubou, ita dainai ia henia boubouna, ita laloa bada mai eda lalona ibounai ida.
2 Baibel siridia, March 18-23 ai do ita duahia totona 1997 Calendar Of Jehovah’s Witnesses dekenai idia torea siridia, ita duahia be namo. Namona be iseda ruma bese taudia ida Tau Hereadaena bukana ena karoa 112-16 do ita herevalaia danu, badina be unai ese ita do ia durua, taunimanima edia sivarai lalonai mai anina bada purana do ita laloa.
3 Memorial huana lalonai hora ma haida lalonai haroro gaukara do oi karaia diba, a? March lalonai Saturday bona Sunday be ima, unai dainai pablisa taudia momo ese unai hua lalonai heduru painia gaukarana do idia karaia. Oi danu ese do oi karaia be namo, ani? Ita ibounai ese Memorial hebouna lao henia karana ena anina bada be mai eda goada ida do ita gwauraia diba. Unai hebou be Sunday ai do ita karaia dainai, momo do idia lao henia be haraga. Baibel stadi taudia bona kamonai taudia oredia iboudiai do umui boiria, ita ida do idia hebou. Diba bukana ena rau 127, paragraf 18 ai ia noho herevana, lagani ta ta amo ita hahelagaia dina tamona herevana, be idia dekenai do umui herevalaia be namo.
4 Lagani 1997 ena hebou mai anina bada do umui naria noho lalonai, Iesu ena mase ena anina ibounai ita dekenai be do umui laloa bada. Tanobada hegegemadai Keristani korikori taudia iboudiai be March 23 ena adorahi ai Memorial do idia karaia mai edia kamonai ida neganai, idia ida do umui hebou.