Boiboi Pepadia Gaukaralaia Namonamo

¹ Kongregesen boiboi pepadia be mai anina bada badina idia ese iseda gabu dekenai idia noho taudia be Kingdom Hall ena adres bona hebou ena nega korikoridia idia hadibaia diba. Do ia namo bema inai pepa be ita davaria taudia iboudiai dekenai ita rakatania. Unai dainai, namona be kongregesen ta ta dekenai boiboi pepadia idia noho. Namona be lagani ta ta ai edia hebou negadia idia haidaua kongregesen ese hua toi idia do noho ela bona idia haidaua negana, boiboi pepa matamatadia idia oda, pepa matamatadia mai edia nega maorodia idia noho totona. Handbill Request fom be unai totona idia gaukaralaia be namo. Unai boiboi pepadia idia noho neganai, edena bamona do oi gaukaralaidia namonamo diba?

² Pablisa momo idia davaria, unai pepa tamona be ta dekenai idia henia neganai, unai be dala namona sibodia idia gwauraia hedinarai bona herevahereva dalana idia hamatamaia totona. Hebou ena sediual eiava pepa murina dekenai ia noho sivaraina ita gwauraia ese dala ia kehoa diba iseda gaukara bona ena badina ita herevalaia totona. Tama sina ese edia natudia dekenai gaukara idia henia diba, haroro gaukara lalonai idia ese boiboi pepadia be ruma tauna dekenai idia henia. Revareva amo haroro gaukara idia karaia pablisa taudia ese unai boiboi pepa ta idia udaia edia revareva lalonai be namo bona unai tauna idia boiria mai hebou dekenai. Unai boiboi pepadia be taunimanima ita davaria lasi rumadia dekenai ita rakatania diba, to namona be ma haida ese idia itaia diba lasi gabuna ta dekenai ita atoa.

³ Boiboi pepadia be gau namona ta badina kudou namo taudia idia hakaua mai hereva momokani lalonai. Ekspiriens ta ia hahedinaraia, nega daudau lalonai hahine ta ia ura Baibel ia dibaia namonamo, bona boiboi pepana dainai unai ura ia hagugurua diba. Hanuaboi ta lalonai Dirava ia guriguri henia murinai, daba kahanai Witness tadikaka mai ena adavana ida be ena iduara dekenai idia pidipidi. Ena ruma iduara ena matu maragina amo idia ia itaia, bena ia boiboi unai be nega namona lasi iduara do ia kehoa totona. Unai Witness taudia ese boiboi pepana be ena iduara henunai idia atoa. Pepa ena hereva kwarana be: “Emu Baibel Do Oi Diba.” Unai pepa ia itaia bona iduara ia kehoa. Maoromaoro stadi idia hamatamaia, bona gabeai bapatiso ia abia. Dirava ena lauma ena siahu ita laloa maragi lasi neganai, namona be hanaihanai boiboi pepadia ita gaukaralaia iseda hesiai gaukara ita hagugurua totona.​—March 1994 ena Iseda Basileia Gaukara pepana ena rau 2 itaia danu.