Boiboi Herevana Gwauraia Ranu Mase Taudia Iboudiai Dekenai
1 Peroveta tauna Amosa ese ia perovetalaia bamona, hari inai negai taunimanima be “idia ranu mase, to ranu totona lasi. Do idia . . . ranu mase gauna be Lohiabada ena hereva totona.” (Am. 8:11) Lauma dalanai ranu dekenai idia dabu taudia ita durua totona, Dirava ese ia henia heduru, kara dika bona mase amo taunimanima ia ruhaia totona gaudia ita hamaorolaidia, unai gaudia be Apokalupo ena karoa ginigabena ese ia gwauraia “mauri ranuna ena sinavai.” Iseda hahenamo be kara maoromaoro totona idia ranu mase taudia iboudiai dekenai inai boiboi herevana ita gwauraia, ‘mauri ranuna do idia abia dae, ia be davana lasi.’ (Apok. 22:1, 17) February lalonai edena bamona unai ita karaia diba? Apokalupo—Ena Hagugurua Negana Ia Kahirakahira! bukana do ita hariharilaia. Reana oi ura inai kiki herevadia oi tohoa:
2 Taunimanima momo be tauanina naria gaudia idia laloa momo dainai, reana do oi davaria inai hamatamaia herevana be namo:
◼“Momo be idia lalo-hekwarahi, badina be gorere hanamoa daladia namodia be momo lasi. Reana unai gauna oi lalohadailaia vadaeni. [Haere naria.] Unai hekwakwanai ena haorea vaitani dalana ta ia noho, a? [Haere naria.] Iniseniai helaro namona ia noho.” Apokalupo 22:1, 2 oi duahia. Bena Apokalupo Hagugurua bukana oi kehoa rau 308-9 ena laulau dekenai, bona paragraf 22, rau 311 ai, oi gaukaralaia unai laulau ena anina oi gwauraia totona. Oiemu hereva oi hadokoa inai bamona: “Inai buka ese Apokalupo ena siri iboudiai ia herevalaia bona oi ese kopi ta oi abia diba, ena davana be K4.00 sibona.” Nega umui abia hidi do oi giroa lou totona.
3 Lou henia oi karaia neganai, herevahereva dalana hamatamaia lou totona inai bamona oi hereva diba:
◼“Guna lau mai neganai, ita be gorere haorea dalana ita kikilaia. Oi laloa nega do ia mai bona tau ta be do ia gorere lasi, a? [Haere naria.] Mani inai hereva namona ta oi itaia.” Isaia 33:24 oi duahia. Bena Dahaka Ita Karaia? buklet oi kehoa kahana 5 dekenai, bona paragraf 5-6 umui herevalaia, unai kahana ena hamatamaia gabuna amo unai paragraf edia henanadai oi henia bona idia torea hanai lasi Baibel siri haida oi duahia. Ia oi hamaoroa gorere bona mase haorea karana ese Dirava ena ura ginigunana tanobada totona ena kahana ta do ia hagugurua. Lou henia negana oi hegaegaelaia, unai kahana ena paragraf 1-4 bona 7 umui kikilaia totona. Oi hamaoroa unai buklet ia abia diba, ena davana be 50 toea sibona.
4 Bema taunimanima be nius dekenai kara ta be ta ena mase ia havaraia haraga sivaraina idia laloa momo, reana inai hamatamaia hereva oi gaukaralaia toho diba:
◼“Reana inai sivarai oi kamonai vadaeni [nius ena sivarai oi gwauraia]. Kara ta ese taunimanima edia mauri ia hadokoa haraga neganai, momo idia ura diba edena dala ai edia ruma bese taudia idia hagoadadia diba. Dahaka oi laloa?” Haere naria. Bena Apokalupo Hagugurua bukana ena rau 299 dekenai oi kehoa, bona toreisi lou laulauna oi hahedinaraia. Ma oi gwau: “Taunimanima momo be kara maoromaoro bona kara dika taudia be tanobada Paradaisona dekenai do idia toreisi lou sivaraina idia dibaia neganai, idia hoa. [Kara 24:15 be rau 297 dekenai, paragraf 9 lalonai idia torea hegeregerena, oi duahia, bena ena anina paragraf 10 dekenai oi gwauraia.] Inai buka ese vaira negana totona Dirava ena ura herevadia ma haida ia herevalaia. Bema diba ma haida oi ura abia, inai buka oi abia diba, ena davana be K4.00 sibona.” Lou henia negana oi hegaegaelaia, bona ruma tauna ia laloa bada bona ia lalo-hekwarahilaia gaudia oi torea.
5 Oi vadivadi lou neganai, ruma tauna ena lalohadai hegeregerena emu hereva oi haidaua. Reana inai bamona oi hereva diba:
◼“Guna ita kiki neganai, oiemu hereva Dirava ena ura tanobada totona lau laloa bada. [Iena hereva oi gwauraia lou.] Lau be hereva haida lau davaria, lau laloa do oi ura kamonai.” Dahaka Ita Karaia? buklet kahana 5 dekenai oi kehoa. Unai kahana amo paragraf oi duahia, ruma tauna ena ura hegeregerena. Buklet oi hariharilaia toho, ena davana be 50 toea, bona do oi giroa lou unai kahana oi karaia noho totona negana umui gwauraia. Bema ta ia noho, kongregesen hebou negadia ia hedinarai boiboi pepana oi henia ruma tauna dekenai. Pablik Tok oi herevalaia, bona ia oi boiria mai.
6 Bema pepapepa herevalaia dalana haragana oi ura oi karaia, inai oi gwauraia diba:
◼“Lau ura inai pepapepa oi abia ena ladana be Helaro Namona Mase Taudia Totona be Ia Noho A?” Ruma tauna dekenai oi henia, bona ia oi noia paragraf ginigunana oi duahia neganai hereva ia badinaia. Nega oi henia hereva dokonai ia noho henanadai ia haerelaia totona. Paragraf iharuana oi duahia, bena Apokalupo Hagugurua bukana oi kehoa rau 299 ena laulau dekenai. Ma oi gwau: “Inai buka ese toreisi lou bona Baibel ena gwauhamata namodia nega vairai totona ena hereva ma haida ia gwauraia. Buka ta oi abia diba, ena davana be K4.00 sibona.” Namona be nega umui abia hidi oi giroa lou totona.
7 Boiboi herevana namona be ma haida dekenai ita gwauraia dainai, reana Iehova ese hari ia henia mauri ranuna dekenai idia do ia veria mai. Unai dainai, namona be ranu mase taudia iboudiai dekenai ita gwau, “Umui mai”!—Apok. 22:17.