“Taunimanima Ibounai” Haroro Henidia
1 Bese idauidau taudia eiava tomadiho idauidau taudia ita hedavari neganai, ita laloatao Iehova ena ura be “taunimanima ibounai ese mauri do idia davaria, bona hereva momokani do idia diba.” (1 Tim. 2:4) Pepapepa maragidia bona buklet haida idia hegaegaelaia, to danu ita be mai eda buka namodia rua, bona nega iboudiai idia ita gaukaralaia diba edia tomadiho oreadia ese Dirava bona Keriso edia sivarai momokanina idia hadibaia lasi taudia ita durua totona.
2 Mauri Hanaihanai Paradaiso Lalonai bukana ena karoa ladana “Oi Emu Tomadiho be mai Anina Bada” be gabu ibounai dekenai idia noho taudia ia durua diba, Dirava idia tomadiho henia dalana be mai anina bada eiava lasi idia lalo-pararalaia totona. To danu, Tau Hereadaena bukana ese Iesu Keriso ena mauri ia hahedinaraia dainai, tau ta ia durua diba Dirava ena Natuna ia dibaia namonamo bona do ia ura henia totona, aposetolo taudia edia negai idia noho taudia momo hegeregerena. (Ioa. 12:32) Ia maoro negadia ai, inai buka oi hariharilaia neganai, reana henunai idia noho heduru herevadia oi tohoa diba.
3 Tau ta dekenai “Tau Hereadaena” bukana oi hariharilaia neganai, reana oi nanadaia:
◼ “Iesu Keriso oi laloa neganai, oi laloa ia be edena bamona tauna? [Haere naria.] Idau negai sivarai torea taudia momo idia gwau Iesu be tau hereadaena. [Tau Hereadaena bukana ena hamatamaia herevana amo haheitalai ta oi gwauraia.] Baibel ia hahedinaraia Iesu ena mauri dalana ita tohotohoa be namo.” Petero Ginigunana 2:21 bona Tau Hereadaena bukana lalonai hamatamaia herevana ena rau dokona ai ia noho paragraf ginigunana oi duahia. Bema ruma tauna ia ura Iesu ena sivarai ia dibaia, buka oi hariharilaia, ena davana be K4.00. Oi do rakatania lasi neganai, Ioane 17:3 oi duahia bena oi nanadaia, “Edena dala amo unai mauri hanaihanai dekenai ita ia hakaua lao dibana do ita abia diba?” Do oi lou henia negana oi gwauraia, haere do oi henia totona.
4 Oi giroa lou neganai, mauri ia henia dibana ia abia dalana oi gwauraia totona, reana oi gwau diba:
◼ “Guna lau gwauhamata do lau giroa mai bona mauri hanaihanai dekenai ita ia hakaua lao dibana ita abia dalana be oi dekenai do lau hahedinaraia.” Diba bukana oi hahedinaraia, bona karoa ginigunana oi gaukaralaia stadi dalana oi haheitalaia totona. Buka oi hariharilaia, ena davana be K1.50.
5 Bema oi ura “Mauri Hanaihanai Paradaiso Lalonai” bukana oi hariharilaia, reana oi gwau diba:
◼ “Hari inai negai, tomadiho idauidau momo idia noho dainai, nega haida oi laloa edena bamona ita diba edena tomadiho be Dirava ese ia abia dae, a?” Haere ia henia murinai, Mauri Hanaihanai bukana oi kehoa rau 189 dekenai. Ruma tauna oi nanadaia bema ia laloa tomadiho momokanina ese ena orea taudia huanai lalokau do ia habadaia be namo. Rau 189 amo, Ioane 13:35 oi duahia, bena paragraf 16 ena orena bona paragraf 17 oi duahia. Bema nega ia hegeregere, unai karoa dekenai idia noho tomadiho momokani ena toana ma haida oi herevalaia. Buka oi hariharilaia, bena oi rakatania neganai, reana oi nanadaia diba, “Tomadiho momokani ese tau ta ena kara be edena bamona ia haidaua be namo?” Lou henia negana hegaegaelaia, haere oi henia totona.
6 Oi giroa lou neganai, edena dala amo tomadiho momokani ese tau ta ena mauri ia haidaua oi gwauraia totona, reana oi nanadaia:
◼ “Oi laloa tomadiho ese taunimanima edia kara be edena bamona ia haidaua be namo? [Haere naria.] Keriso ia hahedinaraia edena dala amo tomadiho ita hahetohoa be namo.” Mataio 7:17-20 oi duahia. Bena ruma tauna oi noia paragraf 22, rau 33 dekenai do ia duahia. Reana unai dala amo Dahaka Ita Karaia? buklet eiava Diba bukana lalonai stadi oi hamatamaia diba.
7 Herevahereva Hamatamaia Daladia: Mauri Hanaihanai bukana lalonai hadibaia gaudia momo idia noho, bona vadivadi ginigunana ai eiava lou henia negana ai, idia ita gaukaralaia diba herevahereva ta ita hamatamaia totona. Henanadai namona ta amo, herevahereva ta oi hamatamaia diba. Hegeregere, henunai idia noho henanadai bona oi herevalaia diba gaudia bona edia rau mani oi itaia:
“Dirava Ena Ura Tanobada Dekenai Idia Noho Taudia Totona be Dahaka?” (73-74)
“Edena Bamona Ita Diba Iesu be Tau Korikorina Ta?” (57)
“Daika ese Baibel Ia Torea?” (48)
“Baibel Ena Hereva be Momokani, A?” (53-56)
“Edena Dala amo Ita Diba Edena Tomadiho be Momokani?” (184-190)
8 Unai rau haida be Mauri Hanaihanai bukana lalonai oi itaia diba, bona ia hahedinaraia herevana oi kikilaia diba. Bena lou henia dalana oi karaia totona, henanadai ma ta oi henia, bona unai henanadai be Dahaka Ita Karaia? buklet eiava Diba bukana amo oi haerelaia diba. Ruma tauna oi boiria Pablik Tok dekenai bona ia dekenai boiboi pepana ta oi henia.
9 Kudou-maoro taudia idauidau be Dirava bona Keriso edia sivarai momokanina idia tahua. Iseda haroro gaukarana amo idia ita durua diba. Vadaeni, namona be “ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna.”—1 Tim. 4:10.