August Ena Hua Danu be Do Ia Idau, A?
1 Lagani 1963 be lagani idauna ta Iehova ena orea taudia dekenai. Ena badina oi diba, a? Unai lagani ai, pablisa taudia tanobada hegegemadai edia namba ia daekau lao 1,000,000. Taunimanima momo be Basileia ena sivarai idia harorolaia dainai, ita moale bada herea! Hari, United States sibona ai pablisa taudia edia namba be 1,000,000 bamona. Papua New Guinea ai, pablisa taudia edia namba be 3,500 bamona. To, hua ta ta iboudiai, haroro gaukara ena ripoti idia henia lasi taudia edia averes be 600.
2 Maduna Oi Abia Dae: July 1998 Iseda Basileia Gaukara pepana lalonai iseda tahua gauna ai herevalaia hegeregerena, ai ura umui ai hadibaia April 1998 lalonai iseda pablisa edia namba be 3,400, unai be nega ginigunana unai namba ita abia! August lalonai unai ita karaia lou diba, eiava unai namba ita hanaia diba, a? Oibe, bema ita ibounai be iseda maduna ita huaia. Bema unai namba ita davaria, momokani August ena hua be hua idauna ta ai do ia lao!
3 Edeseniai do oi noho August lalonai? Bema August lalonai do oi loaloa, eiava do oi laga-ani, namona be nega oi atoa oi haroro totona. Namona be pepapepa maragidia, buklet eiava magasin haida oi abia danu, bena oiemu loaloa negana ai oi davaria taudia oi haroro henia diba. Bema emu hanua dekenai oi giroa lao, unuseniai idia noho pablisa taudia ida haroro gaukara oi moalelaia diba, eiava unai hanua ai idia noho taudia dekenai buka bona magasin haida oi hariharilaia diba.
4 Bema oi loaloa diba lasi, oi do haroro diba. Reana doketa, nesi, eiava oi idia vadivadi henia taudia ma haida dekenai oi haroro diba. Reana revareva eiava telefon amo oi haroro diba.
5 Reana haida do idia ura heduru idia abia August lalonai haroro gaukara idia karaia totona. Elda taudia, hesiai taudia, bona buka stadi naria taudia ese heduru daladia idia karaia be namo. Namona be oi laloaboio lasi, hua ena dokona ai oiemu ripoti oi henia haraga, unai amo August lalonai pablisa edia namba dekenai oi do idia duahia danu.
6 Hahenamo Oi Laloa Bada: Haroro gaukara be Dirava ese ita “ia henia gauna” namona. (2 Tim. 1:14) Sivarai namona ita harorolaia ena hahenamo ita laloa bada. (1 Tes. 2:4) Iehova ese ita totona ia karaia gaudia iboudiai ita laloa neganai, namona be unai ese ita ia ha-uraia inai gaukara badana do ita karaia lagani ibounai lalonai. Namona be gau ta ese ita ia koua lasi, to haroro gaukara ita karaia hanaihanai. Namona be August ena hua danu be hua idauna ta Iehova ena hesiai gaukara lalonai, bona namona be iseda lalona ita hadaia unai murinai hua ta ta iboudiai Iehova do ita herevalaia totona!—Sal. 34:1.