August be Gaukara Badana Momokani!

1. Basileia ena aniveseri ia kahirakahira dainai, dahaka gaukara badana do ita karaia?

¹ Dirava ena Basileia ena lagani 100 lohia negana ena aniveseri be ia kahirakahira. Unai dainai, gaukara badana ta amo Iehova ita hanamoa be maoro! August lalonai, ita ese pepapepa matamatana ta be tanobada ibounai do ita hariharilaia, ena ladana be, Henanadai Badadia Edia Haere be Edeseniai? Unai pepapepa ese taunimanima ia hagoadaia edia henanadai edia haere be Baibel lalonai idia tahua, bona jw.org gaukaralaia dalana ia herevalaia.

2. Edena dala ai August lalonai Iehova ita hanamoa mai boiboi bada danu?

² Haroro: Bema pablisa idia ura edia haroro idia habadaia, vadaeni August be nega namona, heduru painia idia karaia totona. Unai hua ai, bapatiso pablisa be heduru painia do idia karaia bona hora 30 idia hagugurua diba. August ena Friday be 5, Saturday be 5, bona Sunday be 5 dainai, wiki lalonai moni gaukara idia karaia bona idia sikuli pablisa momo be heduru painia idia karaia diba. Bema emu stadi tauna o emu natuna ta ia ura pablisa ai ia lao, maoromaoro elda orea ena kodineita oi hadibaia. Unai bamona taudia be August lalonai ita ida idia haroro be hagoadaia gauna! Ena be regula painia momo idia ura August lalonai idia laga-ani (badina lagani ta ena hora idia hagugurua), to reana edia sediual idia haidaua bona haroro gaukara badana idia durua. Hari be nega namona famili iboudiai idia herevahereva, dahaka do idia karaia August lalonai Iehova “idia hanamoa henia, mai gado bada, bona mai boiboi bada danu” totona.​—Esr. 3:11; Aon. 15:22.

3. August lalonai eda ura o tahua gauna be dahaka?

³ Ita ura August lalonai pepapepa hariharilaia gaukarana ese lagani gunadia edia do ia hanaia. Unai hua ena hora, pablisa, bona heduru painia edia namba badadia matamatadia ita abia diba, a? Namona be hesiai laganina 2014 dokonai ita gwau, ‘Tanobada ibounai Iehova be ena taunimanima edia gaukara ia hanamoa dainai, August lalonai haroro gaukara hereadaena ita karaia!’​—Mat. 24:14.