Lau Ura Baibel Stadi ta Lau Abia!

¹ Ita momo ese ita hahedinaraia Baibel stadi ta ita ura abia, bona unai be mai badina namona. Baibel stadi gaukarana amo hahediba taudia halaoa gaukarana ita hagugurua. (Mat. 28:​19, 20) To herevana ita momo be hua momo, reana lagani momo, ita gaukara vadaeni, to reana ma ta dekenai hereva momokani hadibaia karana ena moale bada ita do mamia lasi. November hua lalonai, dahaka ita karaia diba unai ita haidaua totona? Namona be do ita hekwarahi unai hua lalonai lou henia dekenai Baibel stadi matamatadia ita hamatamaia totona.

² Saturday Bona Sunday ta Eiava Haida Abia Hidi: Ibounai ai hagoadaia nega umui abia hidi inai hua lalonai Baibel stadi hamatamaia totona. Namona be kongregesen Buka Stadi idia naria tadikaka ese unai idia karaia totona Saturday bona Sunday ta eiava haida idia abia hidi, bena edia grup taudia do idia durua lou henia gaukara idia karaia goadagoada totona.

³ Namona be haroro hebou ta ta ibounai dekenai, emu lou henia taudia edia adres bukana oi mailaia. Bena idia kamonai taudia, buka eiava magasin idia abia taudia, eiava hebou dekenai idia mai taudia oi lou henia. Lou henia ta ta ibounai oi karaia neganai, namona be oi laloa gauna be stadi do oi hamatamaia.

⁴ Baibel Stadi Haheitalaia: Idia abia hidi haroro hebou lalodiai, namona be idia hegaegaelaia namonamo haheitalai ta idia karaia, lou henia dekenai Baibel stadi ita hamatamaia dalana do idia haheitalaia. Reana do oi gwau: “Taunimanima momo be mai edia Baibel, to idia diba lasi Baibel ese iseda mauri lalonai ita davaria mai anina bada henanadai ia haerelaia diba. [Diba bukana ena karoa edia lista oi hahedinaraia, bona karoa 3, 5, 6, 8, bona 9 edia sinado oi duahia.] Pura ta ta ai, hora ta bamona inai buka oi gaukaralaia neganai, hua haida lalonai Baibel ena hereva badadia do oi lalo-pararalaia diba. Bema oi ura karoa ta oi abia hidi, mai moale ida oi dekenai unai stadi program do lau hahedinaraia.” Bema ta ia bisi dainai ia ura lasi ia stadi, oi hahedinaraia ita ese stadi program kwadogina ita karaia danu. Dahaka Ita Karaia? buklet oi hahedinaraia, bona oi hamaoroa pura ta ta ai miniti 15 ia lao 30 lalonai umui stadi diba.

⁵ Bema ita ibounai ita gaukara hebou stadi ita hamatamaia totona, bona bema Iehova ena heduru ita noia, momokani, ita ese stadi matamatadia do ita davaria! (1 Ioa. 5:​14, 15) Bema oi ura Baibel stadi ta oi abia, hari be nega namona ta oi hamatamaia totona.