“Haheauka Noho”

¹ Ita itaia Satani ena tanobada ena dokona be kahirakahira, to gau badana be Iehova ena hahemauri dinana ita naria lalonai, ita “haheauka noho.” Nega ia kwadogi dainai, iseda inai taudia idia hekwarahi ita idia veria Iehova ena lohia siahuna ena maoro hamomokania karana ita laloa maragi bona iseda ura gaudia idauidau ita laloa momo totona. Unai dala amo, Satani ese ita ia koia bena Basileia harorolaia gaukarana do ita karaia goadagoada lasi matamaia, eiava do ita rakatania. (Iam. 5:​7, 8; Mat. 24:​13, 14) Edena dala idauidau ai unai haheauka noho karana ita hahedinaraia diba?

² Do Ita Hesiku Lasi: Iseda haroro gaukara lalonai, taunimanima ese iseda haroro gaukara idia laloa bada lasi eiava ita idia dagedage henia neganai, do ita hesiku lasi bona iseda haroro gaukara do ita karaia noho. Ita do idia hagaria eiava habadua haraga lasi, herevana idia hereva auka eiava hebogahisi lasi herevadia idia gwauraia. (1 Pet. 2:​23) Ita lalonai unai goada ia noho dainai, iseda teritori lalonai idia noho taudia, iseda gaukara idia laloa bada lasi eiava idia inai henia taudia unai, do ita gwauraia dika lasi. Ita diba unai bamona hereva ese ita ia hamanokaia bona haroro gaukara lalonai ita idia bamoa taudia do ia hamanokaia danu.

³ Mai Haheauka ida Ita Tahua Noho: Reana iseda haheauka karana ia tohoa gauna be, haroro gaukara ita karaia neganai tau ta ida herevahereva namona ita karaia, to ena ruma dekenai ita giroa lou neganai unai kamonai tauna ita davaria lou lasi. Reana gau ma ta be stadi taudia be lauma dalanai idia goada idia lao haraga lasi, eiava hereva momokani idia abia dae haraga lasi. To, bema mai haheauka ida ita kara anina namona do ia havaraia. (Gal. 6:9) Taihu ta be nega momo hahine matamata ta ia lou henia, ela bona Baibel stadi idia hamatamaia. Nega ima ia giroa, to hahine be gau ma haida dainai nega be lasi idia kiki totona. Ia lou henia negana namba 6 ai, medu bada herea ia diho bona unai taihu ena dabua ibounai idia paripari, bona unai hahine ia noho lasi. To herevana, ena lalona ia hadaia ma nega ta do ia tahua. Ia vadivadi henia neganai unai hahine ia noho bona ia ura ia stadi. Ia goada ia lao bona nega daudau lasi murinai iena mauri be Iehova dekenai ia gwauhamatalaia.

⁴ Ita diba Iehova ena dina be do ia leiti lasi. Unai dainai Dirava ena ura hagugurua negana ita naria lalonai, ita diba ena haheauka ese huahua namodia do ia havaraia. (Hab. 2:3; 2 Pet. 3:​9-​15) Namona be Iehova bamona ita haheauka noho bona iseda haroro gaukara ita rakatania lasi. Do ita “abidadama bona haheauka,” bona Iehova dekenai ita lao iseda gaukara goadagoada karana ena ahuna abia totona.​—Heb. 6:​10-​12.