Iehova Ena Ladana mai Hairaina Oi Laloa Bada
1 Satani ese iseda tama sina ginigunadia ia koia bena idia kara dika neganai, ia ese Dirava ena ladana ia hadikaia. Diabolo ese ena hereva amo ia hahedinaraia toho Iehova ese Adamu ia koia. (Gen. 3:1-5) To Satani ena samania herevana ese Dirava ena ladana ia hadikaia momokani, badina ena ladana ena anina be ena hereva do ia hagugurua. Iehova ese ena ura ia hagugurua karana amo ena ladana hadikaia herevadia ia hakoikoia bona ena ladana ia hahairaia.—Isa. 63:12-14.
2 Ita be Iehova ese ‘ena ladana do idia abia totona ia boiria’ taudia. (Kara 15:14, 17) Unai ese ita dekenai dala ia kehoa ena ladana ia hahelagaia karana be edena bamona ita laloa ita hahedinaraia totona. Ita davaria Iehova ena ladana be mai ena hairai, badina ia be gau namodia, kara namo, lalokau, hebogahisi, bona kara maoromaoro ia laulaulaia dainai. Iehova ena ladana ena hairai be bada herea dainai, ita hoa dikadika. (Sal. 8:1; 99:3; 148:13) Unai ese ita ia hagoadaia dahaka do ita karaia totona?
3 Dirava Ena Ladana Hahelagaia: Dirava ena ladana be ia helaga herea vadaeni, unai dainai ena helaga ita habadaia diba lasi. To iseda kara goeva amo bona Basileia ita harorolaia gaukarana amo ita hahedinaraia diba Dirava ena ladana ita laloa bada. Namona be ita gwau: “Lohiabada do umui hanamoa, bona iena durua abia totona, iena ladana do umui boiboi henia. Bese idauidau taudia dekenai, Lohiabada ena kara namodia do umui hadibaia. Lohiabada ena ladana bada herea, do umui gwauraia hedinarai, tanobada taudia dekenai.” (Isa. 12:4) Edena dala amo unai ita karaia diba?
4 Namona be dala ia kehoa negadia ibounai ita gaukaralaia, Iehova ena ladana bona ena anina do ita gwauraia hedinarai totona. Herevana nega bona gabu idauidau ai, ruma ta ruma ta eiava sitoa ta sitoa ta ia, dala dekenai eiava telefon amo ita haroro, unai gaukara ese Iehova ia hanamoa bada. Bema kamonai taudia ita davaria, namona be nega ita abia hidi ita lou henidia bona edia diba Iehova dekenai ita habadaia totona. Anina be unai nega ita abia hidi neganai, do ita laloa boio lasi bona Baibel stadi ita hamatamaia totona ita hekwarahi. Moale gauna be inai, lagani iboudiai taunimanima handred tausen momo ese Iehova ena ladana mai hairaina idia dibaia, matauraia, bona idia hahelagaia matamaia.
5 Iseda kudouna ibounai ida Dirava ena ladana hahelagaia gaukarana ita karaia neganai, ita hahedinaraia goevagoeva Satani ese Eden dekenai ia havaraia hepapahuahua lalonai edena kahana ai ita gini. Ita karaia gaukarana be helaga momokani. Namona be Iehova ena ladana hairaina ita laloa bada bona mai eda lalo-goada ida ita hanamoa!—1 Siv. 29:13.