Oi be Palani ta Hegeregerena Oi Gaukara, A?
1 Iehova be palani karaia Diravana. (Isa. 55:10, 11) Ia ese ita ia hagoadaia ia do ita tohotohoa totona. (Ef. 5:1) Iseda hesiai gaukara ita karaia dalana ai unai ita hahedinaraia be namo. Vadaeni, inai henanadai be maoro: “Oi be palani ta hegeregerena oi gaukara, a?”
2 Ruma ta ruma ta ai oi haroro, nega bona dala idauidau ai oi haroro, bona buka bona magasin hariharilaia be palani ta dainai oi karaia hesiai gaukarana ena kahana idauidau. To ita laloatao, ita abia gaukarana be haroro sibona lasi, to taunimanima be hahediba taudia ai do ita halaoa danu. (Mat. 28:19, 20) Basileia ena hereva momokani ena uhe ita hadoa murinai, ita ura ita giroa lou bona ranu ita henia bona ita naridia hanaihanai, bona Iehova dekenai ita tabekau, ia ese edia anina ia havaraia totona. (1 Kor. 3:6) Namona be lou henia bona Baibel stadi hamatamaia dalana ita laloa bada.
3 Oiemu Hesiai Gaukara Oi Habadaia: Do oi moale bema haroro gaukara dekenai oi karaia gaudia oi laloa lou bona sibona dekenai oi gwau: “Lau ura karaia gaudia lau hagugurua vadaeni.” Timoteo Iharuana 4:5 ai, Paulo ia gwau: “Hesiai tauna ena dagi karadia ibounai do oi karaia namonamo.” Unai ena anina ta be ita hekwarahi ita davaria kamonai taudia ibounai ita lou henia totona. Namona be oiemu pura ena haroro sediual dekenai, nega oi atoa momokani lou henia oi karaia totona. Kara maoromaoro idia ura henia taudia dekenai Baibel stadi hamatamaia karana be oiemu tahua gauna ai oi halaoa. Haroro gaukara oi karaia neganai, namona be unai palani hegeregerena oi gaukara.
4 Pablisa taudia oi henanadai henidia, hebouhebou dekenai edia Baibel stiuden idia bapatiso neganai, edia hemami be edena bamona. Idia moale bada bona reana edia moale be bapatiso ia abia tauna ena moale bamona. Idia ese anina bada palani idia hagugurua unai! Taunimanima be hahediba taudia ai halaoa gaukarana ia karaia hahinena ta, ia gwau: “Taunimanima be hahediba taudia ai halaoa gaukarana dainai ma taunimanima momo be Iehova hanamoa taudia ai idia lao. Ia dainai, hereva momokani idia abia dae taudia ese mauri do idia abia diba. Hereva momokani be taunimanima hadibalaidia gaukarana lau ura henia bada—ia be namo herea! . . . Iehova idia lalokau henia bona idia momo be lauegu turana korikoridia ai idia lao.”
5 Mani oi laloa, oi ese tau ta oi durua Iehova ena gwauhamata hesiai tauna ai ia lao! Unai be moale gauna! Haroro gaukara be palani ta bamona ita karaia neganai, unai bamona huahua do ia vara.— Kol. 4:17.