Sibona Emu Ura Dadaraia Karana Oi Hahedinaraia, A?
1 Iesu Keriso ese sibona ena ura dadaraia dalanai taunimanima totona ia karaia gauna ita laloa bada karana ese ita ibounai ia veria sibona eda ura dadaraia dalanai eda diba bona goada ita gaukaralaia. Baibel ia gwau: “Emui tauanina do umui henia, boubou gauna mai mauri bona mai helaga, Dirava ese ia moalelaia gauna; emui hesiai gaukara helagana.” (Roma 12:1, NW) Nega ta ta ai sibona emu kara oi tahua namonamo karana amo do oi diba, bema emu noho dalana hegeregerena unai kara oi hahedinaraia eiava lasi.
2 Baibel Ena Diba Tahua Karana Ai: Nega oi atoa Baibel duahiduahi bona stadi oi karaia hanaihanai totona, a? Unai sediual oi badinaia, a? Kongregesen ena hebou hegaegaelaia namonamo karana be emu kara korikorina ai oi halaoa vadaeni, a? Bema oi be ruma bese ena kwarana ta, emu ruma bese ena stadi be hanaihanai oi karaia, a? Unai oi karaia totona reana televisen, kompiuta, bona gau ma haida dekenai oi gaukaralaia negana do oi hamaragia be namo. To, unai nega oi hamaragia be gau badana lasi, badina Dirava ena Hereva stadilaia totona oi gaukaralaia negana ese mauri hanaihanai dekenai oi do ia hakaua lao!—Ioa. 17:3.
3 Emu Natudia Hadibaia Karana Ai: Maragi negana be nega namo hereana sibona ena ura dadaraia karana dibaia totona. Emu natudia oi hadibaia gadara be mai ena nega, to gaukara bona tiokratik gaukara idauidau danu be mai edia nega. (Ef. 6:4) Ruma gaukara haida oi henia idia karaia totona. Nega ta oi abia hidi, hanaihanai idia danu haroro gaukara umui karaia hebou totona. Oiemu haheitalai namona amo emu hadibaia herevadia do oi haginia auka.
4 Kongregesen Ena Gaukara Idauidau Ai: Kongregesen do ia goada bema ibounai ese mai moale ida sibona edia ura idia dadaraia, kongregesen ena namo idia havaraia totona. (Heb. 13:16) Basileia harorolaia bona hahediba taudia halaoa gaukarana dekenai emu nega oi habadaia diba, a? Sibona oi henia diba gorere eiava buruka taudia oi durua totona, reana hebou dekenai emu motuka dekenai oi abia lao diba, a?
5 Ena tanobada maurina be boubou badana ai ia do henia lasi neganai, Iesu ese ena hahediba taudia ia sisiba henia Basileia ena gaukarana do idia atoa guna, gau ibounai edia mauri lalonai be gabu iharuana dekenai do idia atoa. (Mat. 6:33) Mai eda moale ida Iehova ita hesiai henia noho lalonai, sibona eda ura dadaraia karana bema ita hahedinaraia, moale bada do ita davaria.