‘Edia Kara Do Idia Tahua’—Edena Bamona?
1 Iehova ena orea ia tubu daekau noho lalonai, idia hegeregere tadikaka momo be hesiai taudia ai idia lao be gau badana. Hesiai taudia totona idia do abia hidi lasi tadikakadia, mero matamatadia danu, be idia ura bada kongregesen lalonai gaukara idia karaia. Gaukara haida idia abia neganai, idia laloa idia be mai anina bada bona mamina idia abia gaukara idia karaia diba. Idia goada idia lao totona ‘edia kara do idia tahua.’ (1 Tim. 3:10) Unai be edena bamona idia karaia?
2 Elda Taudia Edia Gaukara: Elda taudia ese tadikaka ta ena kara idia tahua, bema ia be 1 Timoteo 3:8-13 ai idia noho Baibel ena taravatu hesiai taudia totona ia badinaia eiava lasi, to danu, do idia itaia bema unai tadikaka ia hegeregere maduna do ia huaia. Heduru ia henia totona gaukara haida be ia dekenai idia henia diba, hegeregere magasin bona buka naria gaukarana, maikrofon naria gaukarana, Kingdom Hall naria gaukarana, bona unai bamona gaukara ma haida. Elda taudia ese unai gaukara ia laloa bona ia karaia dalana do idia itaia. Do idia tahua bema ia idia abidadama henia diba, nega korikori ai ia ginidae, ia gaukara goadagoada, ia manau, ia ura bada gaukara ia karaia, bona ma haida ida ia gaukara hebou namonamo diba. (Fil. 2:20) Ena dabua bona tauanina ena toana amo haheitalai namona ia hahedinaraia, a? Maduna huaia karana ia laloa bada, a? Idia ura diba bema ‘iena aonega do ia hamomokania, iena mauri namona bona iena kara namodia dekena amo. Bema ia hekokoroku lasi, to iena diba namona ese iena aonega do ia hedinaraia.’ (Iam. 3:13) Ia ura momokani kongregesen lalonai heduru ia henia, a? Ena haroro goadagoada karana amo ia hahedinaraia Iesu ena hahegani, “bese iboudiai taudia be hahediba taudia ai do umui halaoa” haheganina, be ia badinaia, a?—Mat. 28:19, NW; mani June 1, 1991, Gima Kohorona, rau 10-21 itaia.
3 Ena be mauri lagani ta ia noho lasi ta be hesiai tauna ai ia lao diba totona, to Baibel ese unai bamona tadikaka ia gwauraia “hesiai gaukara idia karaia tatau.” Ita laloa lasi idia be mero matamatadia, badina Baibel ia gwau reana idia be mai edia hahine bona natudia vadaeni. (1 Tim. 3:12, 13, NW ) Namona be unai tatau be “uhau edia lebulebu karadia” idia karaia lasi, to edia kara idia naria namonamo, Dirava bona taunimanima vairanai mai edia lalona ena mamina namona ida idia raka maoromaoro.—2 Tim. 2:22.
4 Ta be mai ena diba be namo, to ena lalohadai bona ura korikorina be mai anina bada. Tadikaka ta be mai manau ida ia ura Dirava ia hanamoa bona ena tadikaka ia durudia, a? Bema oibe, Iehova ese ena hekwarahi do ia hanamoa kongregesen lalonai ia goada ia lao totona.