Inai Nega ai Idia Vara Gaudia Edia Anina Ita Lalo-Pararalaia
1 “Inai tanobada, hari ia noho toana bamona, be kahirakahira do ia ore.” (1 Kor. 7:31) Hari inai negai gau momo idia vara haraga neganai unai bamona ita itaia. Unai gaudia bona Iehova ena orea lalonai idia vara gaudia edia anina oi dekenai be dahaka?—Luka 21:28.
2 Hari inai nega lalonai, Bible ena peroveta hereva idia guguru dainai unai ese ia hamomokania tanobada dikana ibounai be ena nega dokona lalonai ia noho. (Mat. 24:3-14; Luka 21:7-11) Iesu ia gwau: “Inai uru taudia ia do ore lasi neganai unai gaudia ibounai do idia vara.” (Luka 21:32, NW) Oiemu teritori lalonai idia noho bona Iehova ena kahana dekenai idia do gini lasi taudia dekenai unai ena anina oi lalo-pararalaia, a? Bema oi lalo-parara, oiemu haroro gaukara dekenai ena anina be dahaka?—Luka 21:34-36.
3 Nega Ia Do Noho Lalonai Ma Haida Oi Durudia: Iesu ese iena hahediba taudia ia hagoadaia nega ia do namo lalonai sivarai namona idia harorolaia be namo. (Ioane 9:4) Aposetolo Paulo be unai bamona Kolose tadikaka ia hagoadaia, ia gwau: “Keriso idia do abidadama henia lasi taudia edia vairana dekenai kara namodia mai aonega danu do umui karaia. Bona umui dekenai nega ia noho gauna do umui gaukaralaia namonamo.”—Kol. 4:5.
4 Haida be aposetolo ena sisiba, nega idia gaukaralaia namonamo totona, idia badinaia vadaeni bona regular pioneer taudia ai idia lao. Matamata taudia momo be sikuli dekenai idia do noho neganai regular pioneer gaukara idia karaia bona gaukara namona idia karaia. Sikuli dekenai memero kekeni be nega idia gaukaralaia namonamo diba ma sikuli memero kekeni idia durudia hari inai negai idia vara gaudia edia anina bona Dirava ena Basileia henunai mauri ena helaro idia lalo-pararalaia totona.—Koh. 12:1.
5 Hari hua ena Kiki Herevana be edena dala ai ita gaukaralaia diba? Oiemu ladana bona hamatamaia hereva oi gwauraia murinai, reana ruma tauna oi henanadai henia diba, oi gwau: “Oi laloa badina be dahaka hari inai negai lalo-hekwarahi gaudia be momo?” Ia haere murinai, reana ma oi hereva diba, oi gwau: “Bible ia gwau taunimanima momo edia mauri lalonai helaro be lasi bona lalo-hekwarahi be momo. Kohelete 2:17 ena hereva oi itaia. (Duahia.) Unai hereva hegeregerena oi laloa, a? (Ia haere be namo.) Mai ena hekwakwanai momo tauna ta dekenai dahaka oi hereva diba? (Ia haere be namo.) Mauri mai moale bona goada ita laloa totona inai siri ia namo. (Salamo 37:39, 40 duahia.) Unai dainai Iehova ena Witness taudia be taunimanima idia hagoadaia Bible idia diba totona.” Bena iena kamonai toana ia hahedinaraia hegeregerena, reana magasin eiava pepapepa ta oi henia toho. Hari inai nega ai idia vara gaudia edia anina idia lalo-pararalaia totona Awake!, Kirap!, bona Noga! ese do idia durudia.
6 Ita diba hari be nega namona Iehova hesiai henia totona. Namona be unai ita diba dainai, hari hua January lalonai, dala iboudiai ita gaukaralaia namonamo, bena kudou-maoro taudia ita durudia hari inai nega ai idia vara gaudia edia anina idia lalo-pararalaia totona.
[Questions]
1. (a) Dahaka gau idia vara bona unai ese ia hamomokania 1 Korinto 7:31 be hari inai nega ai ia guguru? (b) Luka 21:28 ena hereva hegeregerena, unai gaudia idia vara haraga neganai, ena anina be dahaka ita dekenai?
2. (a) Edena bamona ita diba ita be “nega dokonai” ita noho? (b) Hari tanobada ena nega dokona amo idia roho mauri totona, taunimanima be dahaka idia karaia be namo? (c) Namona be edena dala ai unai ese iseda haroro gaukara ia haidaua?
3. Ioane 9:4 bona Kolose 4:5 duahia. Unai siri rua dekenai dahaka sisiba ia henia?
4. Edena dala ai momo be unai sisiba idia badinaia?
5. Edena dala ai hari hua ena Kiki Herevana ita gaukaralaia diba?