Hagoadaia Heheni Negana Namona
1 Dina ta ta ai, Iehova ena taunimanima ese edia abidadama idia tohoa gaudia idia davaria. Diabolo ia diba ena nega be kwadogi dainai, ita ia tuari henia goadagoada, iseda abidadama Iehova dekenai ia hadikaia totona. (Apok. 12:12) Gau badana be ‘Lohiabada ena siahu dekena amo do ita siahu, bona Lohiabada ena goada dekena amo do ita goada,’ unai dala ai ‘nega dikana ia ginidae neganai, do ita tuari mai goada danu ela bona dokona, bona do ita gini goada noho.’—Efe. 6:10, 13.
2 Goada ita abia totona Iehova ese ia kehoa heduru dalana ta be iseda tadikaka ida ita hebou. Aposetolo Paulo ia lalo-parara unai be mai anina bada. Ia ura bada iena Keristani tadikaka ida ia noho, idia durua heheni bona ‘goada idia abia’ totona. (Roma 1:11, 12) Dirava ena ura ita karaia goadagoada noho totona, Hakaua Oreana ese mai lalokau ida “Basileia Harorolaia Goadagoada Taudia” Distrik Hebouhebouna ia hegaegaelaia, ia lalonai hagoadaia heheni karana amo heduru do ita abia diba.
3 Goada Abia Totona Do Oi Lao: Namona be dina toi iboudiai hebouhebou dekenai do oi lao. Ane ginigunana ia do matamaia lasi neganai ita ginidae bona do ita noho ela bona guriguri dokona lalonai mai kudouna ibounai ida “Amen” ita gwauraia, unai amo ‘eda namo do ita habadaia.’ (Isa. 48:17, 18) Tadikaka momo ese nega bada ia do noho neganai, edia moni gaukara ena sediual idia hegaegaelaia be namo, bena dina toi iboudiai do idia noho diba. Momokani, reana unai nega abia totona emu gaukara biaguna ena lalona oi veria be auka, to Iehova ese ita ia hamaoroa iena ura ita karaia totona ita do ia durua. (1 Ioa. 5:14, 15) Bema ita do karaia lasi, hari be nega namona lao dalana bona mahuta gabuna do ita hegaegaelaia, namo lasi ita laloa dala do ia kehoa kava. Ita diba momokani, dina toi iboudiai ita lao totona ita hekwarahi lalonai, Iehova ese ita do ia hanamoa.—Aon. 10:22.
4 Hagoadaia Heheni Negana Oi Laloa: Distrik hebouhebou amo oi giroa neganai, reana oi gwau: “Unai be distrik hebouhebou hereadaena!” Reana dahaka dainai unai bamona oi laloa? Badina be ita goevadae lasi taudia be sisina sisina ita manoka diba, bena lauma dalanai goada ita abia be namo. (Isa. 40:30) Taihu ta ia gwau: “Inai tanobada dainai lau hesiku, bona hebouhebou dainai lauma gaudia lau laloa lou, lauma dalanai lau ia hagoadaia, bona lau dekenai unai be mai anina bada. Toana be goada lau abia be gau badana neganai, unai lau abia.” Reana nega haida oiemu hemami be unai bamona danu.
5 Ita ese mai anina bada goadana be hereva bona haida idia henanadai henia kahadia sibona amo ita abia lasi, to distrik hebouhebou lalonai idia hahedinaraia lauma gaudia ma haida amo danu. Tadikaka ta ia gwau: “Lau ese Baibel ena hakaua herevadia badinaia daladia idia hahedinaraia goevagoeva herevadia lau laloa bada. Momokani, drama danu idia namo herea badina haheitalai gunadia, namodia bona dikadia, amo heduru ita abia daladia idia hahedinaraia. Idia halasia buka matamatadia lau laloa bada, bona ruma dekenai lau giroa murinai, nega daudau lalonai idia lau moalelaia.”
6 Distrik hebouhebou be Iehova ese inai ‘metau dikadia momo idia vara’ negana lalonai ita ia hagoadaia dalana badana. (2 Tim. 3:1) Ita idia durua, Dirava ena lauma amo ia vara sisiba ita badinaia totona, ia gwau: “Umui naria namonamo, abidadama dekenai umui gini goada, metau ibounai lalonai do umui haheauka, do umui goada.” (1 Kor. 16:13) Unai dainai, namona be eda lalona ita hadaia, “Basileia Harorolaia Goadagoada Taudia” Distrik Hebouhebouna ena kahana iboudiai dekenai do ita lao bona hagoadaia heheni karana namona do ita moalelaia!
[Box on page 11]
Palani Oi Karaia Dina Toi Iboudiai Do Oi Lao
■ Moni gaukara amo nega oi abia.
■ Hebouhebou idia karaia taoni dekenai mahuta gabuna oi abia.
■ Hebouhebou dekenai lao dalana oi karaia.