Ma Haida Dekenai Gado Goevadaena Hadibaia
1 Ena be Iehova ena Witnes taudia be ‘bese, iduhu, kopina, bona gado idauidau’ amo, to idia be lalo-tamona taudia, tanobada ibounai tadikaka oreana momokani. (Apok. 7:9) Hari ia parara tanobadana ai, unai be idau momokani. Edena bamona unai ia vara diba? Badina ita dekenai ‘gado ia haidaua bona gado goevadaena ia henia.’—Sep. 3:9, NW.
2 Anina Namodia: Unai gado goevadaena be dahaka? Gado goevadaena be Iehova bona iena ura edia sivarai momokanina Dirava ena Hereva lalonai ia noho, Dirava ena Basileia ena hereva momokani unai, ita lalo-pararalaia namonamo. Iesu ia gwau bamona, unai hereva momokani be iena tanobada oreana, “hesiai tauna mai ena kamonai, bona mai ena kara maoromaoro” oreana amo ia halasia, unai dainai ‘gado idauidau ibounai besedia amo’ taunimanima ese tomadiho momokani idia abia dae noho.—Mat. 24:45; Sek. 8:23.
3 Taunimanima ese gado goevadaena idia dibaia neganai, idia ia veria Iehova ena taravatu hegeregerena idia noho totona. ‘Hereva tamona idia gwauraia bona idia gaukara hebou mai lalo-tamona’ dalana idia dibaia. (1 Kor. 1:10) Dirava ena hadibaia herevadia ese danu idia dekenai kara maoromaoro bona hereva namodia bona momokani gwauraia karana ia havaraia, ma haida dekenai sivarai namona idia harorolaia lalonai unai kara idia hahedinaraia. (Tito 2:7, 8; Heb. 13:15) Edia kara idia haidaua bona idia hahedinaraia kara namodia ese Iehova ia hanamoa.
4 Hegeregere, pablisa ta amo sivarai namona ia kamonai tauna ta be mai ena henanadai momo, to iena henanadai ibounai be Baibel amo idia haerelaia. Ia kamonai gaudia ese iena lalona ia hamarerea dainai, pura tamona ai nega rua ia stadi bona hebou dekenai ia lao matamaia. Kingdom Hall dekenai ia abia welkam karana ia hoalaia, badina hebou dekenai idia noho taudia momo be bese idauidau amo. Daudau lasi murinai, ia bona ena adavana be edia mauri idia haidaua bona bapatiso idia abia. Unai nega amo ema bona hari, ia ese ma taunimanima 40 bona iena ruma bese taudia momo ia durua Iehova idia hesiai henia totona. Ena be ia gorere, to vanegai sibona painia gaukara ia karaia matamaia.
5 Ma Haida Hadibaia: Tanobada dekenai idia vara gaudia dainai, kudou-maoro taudia momo ese edia laloa dalana bona edia mauri idia tahua lou. Iesu bamona, namona be ita ura idia ita durua. Lou henia bona Baibel stadi amo kudou-maoro taudia ita durua gado goevadaena idia dibaia totona.
6 Namo bada ia havaraia haroro dalana namona idia bisi taudia dekenai be, edia iduara dekenai Baibel stadi kwadogina oi karaia. (km 5/02 rau 1) Unai dala oi tohoa vadaeni, a? Lou henia karaia totona oi hegaegae neganai, January 2002 Iseda Basileia Gaukara lalonai idia udaia pepana amo, ruma tauna dekenai do ia namo hamatamaia herevana ta oi abia hidi. Unai udaia pepana lalonai idia noho hamatamaia herevadia momo idia karaia dalana be maoromaoro oi do ia hakaua lao Dahaka Ita Karaia? buklet eiava Diba bukana oi herevalaia totona. Hamatamaia herevana oi gwauraia loulou, unai amo unai oi herevalaia murinai, maoromaoro paragraf ta oi herevalaia diba. Unai paragraf amo Baibel ena siri tamona eiava rua oi abia hidi oi duahia bona oi herevalaia totona, bona unai oi hadokoa totona henanadai ta oi rakatania. Unai henanadai ese oi do ia durua gabeai vadivadi totona oi hegaegaelaia paragraf oi herevalaia totona.
7 Iehova ena taunimanima be gado goevadaena idia dibaia dainai hahenamo momo idia davaria noho. Namona be ma haida ita durua ita ida ‘Iehova ena ladana do ita noinoi henia bona iena hesiai gaukara be mai eda lalo-tamona ida do idia karaia hebou totona.’—Sep. 3:9, NW.