Iehova Hanamoa Totona Ita Hebou
1 Iehova be siahu ibounai Diravana, iena aonega be bada herea, iena hahemaoro be goevadae, bona ia be lalokau. Ia be Havaraia Tauna, Mauri Henia Tauna, bona Guba bona Tanobada edia Lohia Badana dainai, ia sibona ita tomadiho henia be maoro. (Sal. 36:9; Apok. 4:11; 15:3, 4) Inai lagani ena “Dirava Ita Hanamoa” Distrik Hebouhebouna ese iseda lalona do ia hagoadaia Dirava momokanina tamona ita hanamoa totona.—Sal. 86:8-10.
2 Palani Namonamo Karana: Iehova ese ia hegaegaelaia lauma ariana amo namo bada ita abia totona, palani namona be gau badana. (Efe. 5:15, 16) Emu noho gabudia, hebouhebou lao dalana oi hegaegaelaia, bona gaukara bona sikuli amo nega oi abia vadaeni, a? Namona be inai mai anina bada gaudia be nega kwadogina lalonai oi karaia lasi. Bema laga-ani negana abia totona oi naria, reana unai moale negana ena kahana ta do oi reaia. Namona be hebouhebou ena kahana iboudiai dekenai ita noho.
3 Dina ta ta hebouhebou gabuna dekenai oi ginidae haraga be emu tahua gauna ai oi halaoa. Unai amo ane ginigunana ia do matamaia lasi neganai oi helai vadaeni, unai ese emu lalona ia hegaegaelaia oi kamonai herevadia amo namo oi abia totona. Dina ta ta ai, program be 9:00 a.m. ai do ia matamaia. Emu ruma bese taudia eiava motuka tamona amo umui mai hebou taudia edia namba hegeregerena sibona helai gabudia oi abia be namo.
4 Umui ai noia dina tubu aniani umui mailaia totona, unai amo sitoa eiava ma gabu ta dekenai aniani hoia totona hebouhebou gabuna do umui rakatania lasi. Unai dala ita badinaia neganai, maino do ia havaraia bona nega do ia noho iseda tadikaka ita bamodia totona. (Sal. 133:1-3) Mani inai laloatao, hebouhebou dekenai galasi kavabu bona kekero muramura be taravatu.
5 Kamonai Bona Diba: Esera be mai guriguri ida iena kudouna ia hegaegaelaia Dirava ena hereva ia abia totona. (Esr. 7:10) Ena kudouna ese Iehova ena hadibaia herevadia ia ura henia. (Aon. 2:2) Ruma ita do rakatania lasi neganai, hebouhebou ena sinado ita lalohadailaia bona iseda ruma bese ida ita herevalaia amo iseda kudouna ita hegaegaelaia diba.
6 Hebouhebou rumana lalonai, ena toana bona regerege ese iseda kamonai karana ia hadikaia diba. Unai bamona gaudia ese iseda lalona do idia veria diba hereva henia tauna do ita kamonai henia lasi. Unai ia vara neganai, mai anina bada herevadia do ita reaia. Maua lalonai idia noho hereva haida ese ita do idia durua diba iseda kamonai karana ita hanamoa totona.
7 Ma Haida Oi Laloa Danu: Kamera, eiava vidio kamera be program lalonai oi gaukaralaidia diba, to ma haida edia kamonai karana hadikaia lasi totona, emu helai gabuna amo unai oi karaia. Bema gau ta dainai murimuri dekenai ita lao, namona be iseda helai gabuna dekenai ita giroa lou haraga. Haida be murimuri ai idia helai bona program ena anina bada kahadia idia reaia. Ena be hora momo lalonai hebouhebou rumana ai ita helai, to namona be iseda lalona ita hadaia program ibounai lalonai iseda helai gabudia dekenai ita helai noho totona. Atendan taudia do idia hadibaia, murimuri ai idia helai eiava idia raka loaloa taudia do idia noia edia helai gabudia dekenai idia giroa lou totona. Namona be program lalonai idia volantia taudia ibounai be edia gaukara idia haorea murinai, maoromaoro edia helai gabudia dekenai idia giroa lou.
8 Ita ura ita hebou neganai Iehova do ita hanamoa! Namona be iseda lalona ita hadaia hebouhebou ena kahana ibounai dekenai ita noho, ita kamonai namonamo, bona ita dibaia gaudia ita badinaia amo Iehova ita hanamoa.—Deu. 31:12.
[Study Questions]
1. Hebouhebou ena sinado be dahaka, bona dahaka dainai Iehova ita hanamoa be namo?
2, 3. Palani namona karaia karana ese edena bamona ita do ia durua?
4. Dahaka dainai ita idia noia, hebouhebou dekenai sibona eda dina tubu aniani ita abia lao totona?
5. Edena dala ai hebouhebou totona iseda kudouna ita hegaegaelaia diba?
6. Dahaka ese ita idia durua diba program ita laloa bada totona? (Maua itaia.)
7, 8. Edena dala ai ma haida laloa bada karana ita hahedinaraia diba, bona dahaka dainai iseda helai gabudia dekenai ita giroa lou haraga be namo?
[Box on page 1]
Kamonai Karana Hebouhebou Dekenai
▪ Tok ena hereva kwaradia laloa namonamo
▪ Baibel siri kehoa
▪ Hereva badadia ita torea
▪ Do oi badinaia gaudia oi torea
▪ Oi dibaia gaudia oi riviulaia