“Iena Ladana Do Ita Hanamoa Hebou!”
1 Salamo torea tauna ia gwau: “Lau danu Lohiabada do ita hanamoa. Iena ladana do ita hanamoa hebou!” (Sal. 34:3) Kahirakahira do ita abia “Dirava ida Ita Raka” Distrik Hebouhebouna ese dala do ia kehoa kongrigeisen momo amo idia mai tadikaka bona taihu ida Iehova ena ladana do ita hanamoa hebou. Noho gabuna, trenspot bona moni gaukara amo oi laga-ani totona dala oi karaia vadaeni, a? Nega bada ia do noho neganai unai gaudia ita karaia be aonega karana.—Aon. 21:5.
2 Hebouhebou Gabunai Ita Ginidae Neganai: Hebouhebou ta ita lao henia neganai, gau momo ita karaia be namo. Hebouhebou totona ruma ita rakatania haraga ese ita do ia durua nega idia haorea diba hekwakwanaidia ita hanaia bona nega korikori ai eda helai gabuna ita abia totona, unai amo mai eda kudouna ibounai ida ane bona guriguri lalonai do ita vareai. (Sal. 69:30) Miniti haida lalonai hebou ia do matamaia lasi neganai, Basileia miusiki idia gadaralaia lalonai seamani be platfom dekenai do ia helai. Unai negai, ita ibounai be iseda helai gabuna dekenai ita helai vadaeni, unai amo program ia matamaia namonamo diba.—1 Kor. 14:33, 40.
3 Dirava ena Hereva ese ita ia hagoadaia ‘gaukara ibounai be lalokau dekenai do ita karaia.’ (1 Kor. 16:14) Geiti be 8 o’klok ai idia kehoa neganai, ma haida ita laloa dainai ita ura henia helai gabudia abia totona edia vairanai do ita heau, doria bona haragaharaga lasi. Oi ida motuka tamona ai umui guia taudia bona emu ruma taudia edia namba hegeregerena sibona helai gaudia umui makaia be namo.—1 Kor. 13:5; Fili. 2:4.
4 Mani emu kara emu dina tubu ena aniani umui abia lao, namo lasi laga-ani negana lalonai aniani hoia totona hebouhebou gabuna umui rakatania. Unai dala amo ibounai be hebamo namona idia moalelaia diba, bona adorahi ena program ia matamaia neganai be idia noho vadaeni. Bema namo, helai gauna henunai oi atoa diba eski oi gaukaralaia. Hebouhebou gabuna dekenai, piknik ai ita gaukaralaia eski badadia, galasi gaudia bona kekero muramura be taravatu.
5 Tadikaka bona taihu momo edia kara be hebouhebou gabuna kahirakahira idia noho gabudia dekenai idia lao, inuinu gaudia bona aniani idia hoia totona. Unai be hoihoi taudia haida ese idia itaia bona dala idia karaia hebouhebou gabuna kahirakahira dekenai aniani bona inuinu gaudia idia hoihoilaia totona. Unai be namo lasi. Bema iseda dina tubu ena aniani mailaia ena hakaua herevana ita badinaia, aniani idia hoihoilaia taudia be hebouhebou gabuna murimurina dekenai do idia haboua lasi, hoihoi taudia idia tahua totona.
6 Lauma Ariana Ita Naria Noho: King Iehosapata be ‘mai ena kudouna ibounai danu Lohiabada ia tahua noho.’ (2 Siv. 19:3) Hebouhebou totona iseda kudouna be edena bamona ita hegaegaelaia diba? May 22 bona June 8 Awake! ena rau dokona ese do ita abia lauma ariana ia herevalaia. Nega oi atoa unai magasin oi duahia totona, unai amo Iehova ese ita totona ia hegaegaelaia gauna dekenai iseda ura ita habadaia diba, ani? Iseda kudouna ita hegaegaelaia ena anina ma ta be, Iehova ita noia bena ita ia durua do ita abia hakaua herevadia edia anina ita diba bona ita badinaia totona.—Sal. 25:4, 5.
7 Ita ibounai ita ura Dirava ena Hereva amo gau momo ita dibaia, ita lalo-parara unai dala sibona amo hahemauri do ita abia. (1 Pet. 2:2) Unai dainai, namona be “Dirava ida Ita Raka” Distrik Hebouhebouna dekenai do ita lao bona ‘Iehova ena ladana do ita hanamoa hebou.’—Sal. 34:3.
[Study Questions]
1. Dahaka dala ia noho ita ese Dirava ena ladana ita hanamoa hebou totona, bona hari dahaka ita hegaegaelaia be namo?
2. Dahaka dainai hebouhebou dekenai ita ginidae haraga totona palani ita karaia be namo?
3. Helai gabudia ita tahua neganai, edena bamona ita hahedinaraia diba ma haida ita laloa?
4. Dina tubu ena laga-ani negana ai dahaka ita karaia be namo, bona unai ena namo be dahaka?
5. Iseda dina tubu aniani ita mailaia neganai, dahaka do ia vara lasi?
6. Ita abia hakaua herevadia dekenai edena bamona iseda kudouna ita hegaegaelaia diba?
7. Iseda ura gauna be dahaka, bona dahaka dainai?
[Box on page 1]
Lagani 2004 “Dirava ida Ita Raka” Distrik Hebouhebou Negadia
Friday Bona Saturday
9:00 a.m. - 4:40 p.m. bamona
Sunday
9:00 a.m. - 3:35 p.m. bamona