Lauma Aniani Nega Korikori Ai
1 Siahu Ibounai Lohiabadana Iehova ia gwau: “Emui uiti bona koni do lau oda henia, momo herea do ia vara. Unai dainai do umui hitolo lou lasi.” (Ese. 36:29) Unai peroveta herevana be hari Dirava ena taunimanima dekenai ia momokani. Laulau dalanai, Iehova ese ena taunimanima totona oda ia henia mauri idia durua uiti bona koni momo herea idia vara totona. Nega korikori ai iseda distrik hebouheboudia amo idia henia lauma aniani ese unai hereva ia hamomokania.
2 Lagani 1931 ai, Columbus, Ohio dekenai idia abia hebouhebouna ai, Iehova ese ia idia tomadiho henia taudia dekenai ladana matamatana—Iehova ena Witnes taudia—ia henia. (Isa. 43:10-12) Lagani 1935 ai, Apokalupo 7:9-17 ese ia herevalaia hutuma bada herea taudia be idia dibaia. Lagani 1914 ai, Tadikaka Knorr ese hereva ta ladana “Maino—Do Ia Noho Daudau Diba, A?” ia henia. Unai hereva amo tanobada ibounai dekenai idia karaia haroro gaukarana ia hagoadaia, bona unai dainai Gilead Sikuli idia haginia. Ena be hebouhebou haida ita laloaboio diba lasi, to idia ta ta be nega korikori ai idia henia lauma aniani amo ia honu pata namodia.—Sal. 23:5; Mat. 24:45.
3 Edena Bamona Oi Aniani Namonamo Noho? Aniani ia noho, to do ita hitolo bema ita aniani namonamo lasi. (Aon. 26:15) Lauma dalanai danu unai be momokani. Hebouhebou haida ai, ai itaia program lalonai haida be idia raka loaloa kava eiava ma haida ida idia herevahereva. Hebamo namona be hebouhebou ena kahana badana ta, to program ia do matamaia lasi eiava ia ore neganai unai ita karaia be namo. (Had. 3:1, 7) Momo edia kara be edia helai gabuna dekenai idia giroa lou lasi, to idia lao bona Assembly Hall murimurina dekenai idia helai. Bema iseda helai gabuna ita rakatania bona hereva ita kamonai namonamo lasi, reana mai anina bada point ta do ita reaia. Nega haida program ia heau noho lalonai, hebouhebou dipatmen naria taudia bona kahana haida idia karaia tadikaka be hebouhebou ena gau haida idia herevalaia diba. To, program idia kamonai namonamo karana amo haheitalai namona idia hahedinaraia be namo. Ita ibounai ese idia hegaegaelaia lauma aniani ita reaia lasi be namo.—1 Kor. 10:12; Fili. 2:12.
4 Iehova ese lauma dalanai ia henia hereva momokanidia dainai ita moale bada herea, unai be Kerisendom ena anina lasi hahediba koikoi herevadia amo ia idau! (Isa. 65:13, 14) Iseda tanikiu karana ita hahedinaraia dalana ta be, ita diba hebouhebou be Iehova ese ita ia hadibaia nega namona ta. (Kol. 3:15) Tadikaka ena hereva oi laloa, bona oi abia dae unai hereva be “Hadibaia Tauna” Hereadaena amo ia mai. (Isa. 30:20, 21; 54:13) Kamonai namonamo. Point badadia oi torea. Hanuaboi ta ta ai program ena point badadia oi riviulaia. Oi dibaia gauna oi badinaia.
5 Aramagedono ia do mai lasi neganai ita abia hebouhebou ibounai, herevana hanua idia heautania taudia edia kamepa, tuari tanona eiava maino gabuna ta dekenai, to unai amo ita hahedinaraia Satani ita halusia vadaeni! Ita be tadikaka oreana dainai, distrik hebouheboudia dekenai ita hebou karana ita laloa bada. (Ese. 36:38) Ita diba momokani Iehova ese mai lalokau ida ita dekenai nega korikori ai “aniani do ia henia.”—Luka 12:42.
[Study Questions]
1. Hari inai negai, Esekiela 36:29 be edena dala ai ia guguru noho?
2. Iehova ese edena dala ai distrik hebouheboudia ia gaukaralaia lauma aniani be nega korikori ai ia henia totona?
3. Iseda distrik hebouhebou ena lauma ariana amo namo ita abia totona, dahaka ita karaia be namo?
4. Iehova ese hariharibada ita dekenai ia henia dainai, iseda tanikiu be edena bamona ita hahedinaraia diba?
5. Dahaka dainai distrik hebouheboudia amo ita abia gaudia dainai ita moale?
[Box on page 5]
Iehova Ena Pata Dainai Ita Moale
◼ Kamonai namonamo
◼ Point badadia torea
◼ Hanuaboi ta ta ai hebouhebou ena program riviulaia
◼ Oi dibaia gauna badinaia