Keristani Hebamo Karana Moalelaia
1 Iehova ena Witnes taudia be ta ta idia gwauraia “tadikaka” bona “taihu.” Unai ese Iehova Dirava ena hesiai taudia ibounai huanai ia noho hetura karana namona ia hahedinaraia.
2 Inai hereva “tadikaka” ena anina korikori be “tama sina tamona edia natuna mero.” Lauma dalanai emu hetura karana Iehova ena gwauhamata hesiai taudia ibounai ida oi moalelaia, a? Eiava varavara bona gado tamona taudia ida oi hetura namonamo, a? Namona be Iehova ena hesiai taudia ida ita hetura namonamo, to murimuri taudia ma haida ita tura henia lasi.
3 Lalokau ita hahedinaraia karana ese ia hamomokania iseda Keristani tadikaka dekenai ita be tadikaka eiava taihu ta. To unai lalokau ena badina be dahaka? Iesu ese unai ia hahedinaraia, ia gwau: “Lauegu taravatu do umui badinaia, unai dekena amo lauegu turana do umui lao.” (Ioa. 15:14) Unai ese ia hahedinaraia Keristani turana korikoridia ai idia lao badina edia tahua gauna be tamona, Keriso ena hahegani idia badinaia hebou. Iesu ena turadia be ia idia badinaia taudia—herevana edia mauri lagani, edia gado eiava gabu be idauidau. Unai dainai turadia korikori be Keristani taudia huanai idia noho. Oibe, idia ta ta idia laloa bada gauna be tamona, Dirava idia hesiai henia, unai ese edia hetura karana ia hagoadaia, edia varavara tura henia karana ia hereaia momokani.
4 Hebou Gabuna Ai: Iesu ena hahediba taudia ese hebou karana ena namo idia laloa bada. (Kara 2:42, 46; 20:7, 8) Ita danu ese iseda Keristani tadikaka edia hebamo karana ita moalelaia. (Roma 16:3, 5) To, hebou dekenai ita henia haere ese idia hahedinaraia iseda tadikaka bona taihu edia namo lauma dalanai ita laloa momokani, a? Hebou dekenai ita henia haere amo, ita ese lalokau bona ma haida edia namo laloa bada karana ita hahedinaraia diba. Ita ura iseda tadikaka ita hagoadaia sivarai namona idia harorolaia goadagoada bona edia mauri ibounai lalonai haheitalai namona idia hahedinaraia totona.—Heb. 10:24, 25.
5 Dala momo idia noho hebou ia do matamaia lasi bona hebou murinai iseda tadikaka ida ita hebamo totona. Namona be unai nega ita gaukaralaia iseda hebamo karana ita habadaia totona, anina be kamonai matamata taudia ita hedavari henidia bona idia momo ita dibaia. Haroro gaukara ena ekspiriens bona hagoadaia hereva ma haida ita herevalaia ese ma haida do ia hagoadaia.—1 Tes. 5:11, 15.
6 Hebamo Karana Namona: Ta be Dirava ida ia raka diba lasi bema ia be Dirava ia inai henia gaudia idia abia dae taudia ia bamoa. Baibel ese ita ia sisiba henia: “Bema kara dika taudia danu umui turana karaia neganai, idia ese emui kara namona do idia hadikaia.” (1 Kor. 15:33) Kongrigeisen lalonai, haida be reana idia ura murimuri varavara bona hereva momokani dekenai edia ura idia hahedinaraia lasi taudia idia bamoa. To, unai be aonega karana bona Baibel ena hereva ida ia hegeregere, a? Bema hanua dekenai ita noho, ena anina be varavara huanai ita noho. Ita hekwarahi hereva momokani lalonai idia noho varavara ita bamoa totona, a? Unai hegeregerena, bema setelmen ai ita noho, iseda kara be tadikaka ita bamodia eiava kongrigeisen murimuri ai idia noho taudia ita bamoa momo?
7 Tanobada taudia bona abidadama lasi taudia amo ita naria namonamo totona sisiba ita abia vadaeni. (May 1, 1989, Gima Kohorona, rau 16-17 itaia.) Tanobada ena dala idia badinaia bona Iehova tomadiho henia taudia ai idia do lao lasi taudia ita bamoa kava ena namo be dahaka? (2 Kor. 6:14, 15) Namona be lauma gaudia ita laloa bada, bona tanobada ena lalohadai bona kara idia dogoatao taudia ita tahua lasi. To, lo Keristani taudia, iseda abidadama ia goada noho totona ita idia durua diba taudia unai, ita bamodia be namo. Tanobada taudia, hakaua hereva idia diba lasi taudia unai, ita bamoa karana ese iseda abidadama idia hamanokaia bona ita idia veria oho diba.—2 Tes. 3:14, 15.
8 Mauri hanaihanai ita abia totona, ita dadaraia be namo gauna ta be Iehova idia hesiai henia lasi taudia edia hebamo karana. To, bema unai ita karaia, turadia bona varavara ibounai do ita haboioa lasi. Iehova ese inai gwauhamata ia henia: “Momokani lau hamaoroa umui, bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano. Momokani taunimanima ese unai tau do idia hisihisi henia, to gabeai, vaira neganai, mauri hanaihanai do ia abia.”—Mar. 10:29, 30.
9 Idia ura hereva momokani idia badinaia bona lauma dalanai idia tubu taudia ibounai, be Iehova idia badinaia taudia idia bamoa be namo. Unai taudia ese idia do idia durua hereva momokani lalonai idia raka bona Dirava hesiai henia karana idia habadaia totona. Iseda turadia bona bamodia ese ita idia hagoadaia bada diba. Unai dainai, Dirava idia laloa bada bona ia idia tura henia taudia ita bamodia be aonega karana!—Sal. 119:63.