Ma Haida Durua ‘mai Lalona Ibounai ida Idia Kamonai’ Totona
1 Iehova ese iseda tomadiho karana ia abia dae totona, gau badana be ia ita kamonai henia. (Deu. 12:28; 1 Pet. 1:14-16) Kahirakahira, Dirava ese ‘ia idia diba lasi taudia, bona sivarai namona idia abia dae lasi taudia’ do ia hahemaoro henia. (2 Tes. 1:8) Edena dala ai ma haida ita durua diba, Baibel ena hadibaia herevadia be ‘mai edia lalona ibounai ida idia kamonai henia’ totona?—Roma 6:17.
2 Abidadama Bona Lalokau Habadaia: Baibel ese kamonai bona abidadama karana ia gwauraia hebou. Paulo ese “noho hanaihanai Diravana ena oda” ia herevalaia, Ia idia “abidadama henia bona kamonai henia totona.” (Roma 16:26) Heberu karoa 11 ese abidadama taudia momo edia sivarai ia gwauraia, idia momo be Iehova ena ura idia badinaia. (Heb. 11:7, 8, 17) To, Baibel ese kamonai lasi karana be abidadama lasi karana ida ia gwauraia hebou. (Ioa. 3:36; Heb. 3:18, 19) Namona be Baibel gaukaralaia namonamo karana ita dibaia, unai amo ma haida ita durua Dirava idia abidadama henia, bena kamonai karana do idia hahedinaraia.—2 Tim. 2:15; Iam. 2:14, 17.
3 Baibel ese kamonai karana be Dirava lalokau henia karana ida ia gwauraia hebou danu. (Deu. 5:10; 11:1, 22; 30:16) Ioane Ginigunana 5:3 ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” Edena dala ai Baibel stiuden taudia ita durua diba Iehova lalokau henia karana idia habadaia totona? Namona be emui stadi lalonai dala oi tahua, Iehova ena kara idauidau laloa bada karana oi herevalaia. Oi ese Iehova oi laloa bada karana oi gwauraia hedinarai. Stiuden tauna oi durua Iehova ida hetura karana namona ia haginia dalana ia laloa totona. To gau badana be inai, Iehova lalokau henia karana ese ma haida—ita danu—do ia durua mai lalona ibounai ida Ia ita kamonai henia totona.—Mat. 22:37.
4 Iseda Haheitalai Amo: Iseda haheitalai be mai anina bada, badina unai amo ma haida ita durua diba sivarai namona idia kamonai henia totona. To, namona be hanaihanai ita hekwarahi “kamonai kudouna” ita abia totona. (1 Kin. 3:9; Aon. 4:23; NW ) Unai ena anina be dahaka? Hanaihanai Baibel oi stadilaia bona hebou lao henia karana amo, emu lalona be lauma aniani amo oi ubua. (Sal. 1:1, 2; Heb. 10:24, 25) Mai lalotamona ida tomadiho momokani idia badinaia taudia edia hebamo karana oi tahua. (Aon. 13:20) Oi haroro hanaihanai bona mai momokani ida emu teritori dekenai idia noho taudia oi durua. Iehova oi guriguri henia oi ia durua lalohadai namona oi abia totona. (Sal. 86:11) Emu lalona idia hadikaia gaudia hegeregere, matabodaga bona dagedage laulaudia oi dadaraia. Dirava kahirakahira dekenai oi idia hakaua lao bona ia ida emu hetura karana idia hagoadaia gaudia oi tahua.—Iam. 4:7, 8.
5 Iehova ese ena idaunegai taudia ia hagoadaia, bema ena gadona idia kamonai henia, hahenamo do idia abia. (Deu. 28:1, 2) Unai hegeregerena, Iehova ese hari ia idia “kamonai henia taudia” ia hanamodia bada noho. (Kara 5:32) Unai dainai, iseda hadibaia karana bona haheitalai amo, ma haida ita durua diba mai lalona ibounai ida idia kamonai totona.
[Study Questions]
1. Iehova ia ura ia idia tomadiho henia taudia ese edena kara idia hahedinaraia?
2. Dahaka dainai ma haida ita durua edia abidadama ia goada ia lao totona?
3. (a) Edena bamona kamonai karana be lalokau ida idia gwauraia hebou? (b) Edena dala ai Baibel stiuden taudia ita durua diba Iehova lalokau henia karana idia habadaia totona?
4. (a) Dahaka dainai iseda haheitalai be mai anina bada? (b) Dahaka ita karaia be namo “kamonai kudouna” ita abia totona?
5. Iehova ese kamonai taudia be edena bamona ia hanamodia?
This article is repeated in km 8/10.