Dina Toi Lalonai Iehova Ena Hahenamo Abia
1. Inai lagani ena distrik hebouhebou ai, dahaka namo do ita abia?
1 Satani ena tanobada dikana ai, Iehova be ena hesiai taudia ia hanamoa noho. (Isa. 58:11) Lagani ta ta ena distrik hebouhebou amo Iehova be ita ia hagoadaia. Inai lagani ena distrik hebouhebou ia kahirakahira dainai, edena dala ai do ita hegaegae, ita bona ma haida ese Iehova ena hahenamo ita abia totona?—Aon. 21:5.
2. Dahaka gaudia ita hegaegaelaia be namo?
2 Bema oi do hegaegae lasi, hari be nega namona emu sediual bona emu moni gaukara ena nega oi palanilaia, unai amo dina toi hebouhebou oi lao diba. Program ia do matamaia lasi neganai helai gabuna oi abia totona, hebouhebou oi lao henia ena hora oi laloa vadaeni, a? Ita ura lasi Iehova ese ita totona ia hegaegaelaia hereva namodia ita reaia. (Isa. 65:13, 14) Emu lao dalana bona noho gabuna oi hegaegaelaia vadaeni, a?
3. Dahaka ese ita bona eda ruma bese do ia durua, hebouhebou amo namo bada ita abia totona?
3 Dahaka ese oi do ia durua program oi kamonai namonamo totona? Bema mai dalana, hanuaboi ta ta ai oi laga-ani namonamo. Tok henia tadikaka oi itaia. Idia gwauraia siridia be emu Baibel ai oi itaia. Point badadia oi torea. Namona be ruma bese idia helai hebou, unai amo tama sina ese natudia idia durua do idia kamonai namonamo. (Aon. 29:15) Reana adorahi ta ta ai, ruma bese ida program ena point namodia umui herevalaia diba. Hebouhebou ena tok ese emu ruma bese ia hagoadaia noho totona, nega umui atoa do umui badinaia point haida be Ruma Bese Ena Tomadiho ai umui herevalaia.
4. Edena dala ai kongrigeisen ai haida ita durua Iehova ena hahenamo idia abia totona?
4 Ma Haida Durua: Ita ura ma haida danu be hebouhebou ai Iehova ena hahenamo idia abia. Kongrigeisen ai pablisa burukadia o ma haida be hebouhebou lao totona heduru idia ura, a? Idia oi durua diba, a? (1 Ioa. 3:17, 18) Namona be elda taudia idia itaia unai bamona pablisa be heduru idia abia.
5. Edena dala ai boiboi pepadia do ita hariharilaia? (Ataiai maua itaia.)
5 Guna bamona, hebouhebou do lasi neganai wiki toi lalonai, ita ese boiboi pepadia hariharilaia gaukarana amo, haida do ita boiria hebouhebou idia mai totona. Namona be kongrigeisen ese palani idia karaia boiboi pepadia ibounai be edia teritori ai idia henia haorea totona. Boiboi pepadia hariharilaia gaukarana ia ore murinai, bema emu ruma bese be pepa oredia idia do dogoatao, namona be hebouhebou dekenai oi abia lao, nega bona gabu idauidau ai oi davaria taudia dekenai oi henia totona. Unai ena hadibaia hereva haida be Friday ena program ai do ita kamonai. Bema emu ruma bese idia laloa unai pepa oredia do idia gaukaralaia lasi, vadaeni hebouhebou dekenai oi abia lao bona atendan taudia oi henia. Mani emu kara sibona emu kopi ta oi dogoatao, badina Sunday ena tok ginigabena ai do ita herevalaia.
6. Edena dala ai hebouhebou gabunai hemataurai karana ita hahedinaraia diba?
6 Hemataurai Karadia: Hari taunimanima momo be ‘sibodia idia laloa bada’ bona ma haida edia hemami idia laloa lasi, to ita be hemataurai idia hahedinaraia Keristani tadikaka huanai ita noho be hahenamo ta! (2 Tim. 3:2) Hemataurai karana ita hahedinaraia dalana be, mai regerege lasi ida hebouhebou gabunai ita vareai, bona ruma tamona ai ita noho taudia, o motuka tamona ai ita guia taudia, o eda stadi taudia edia namba hegeregerena ai helai gabudia ita abia. Bema seamani ese ita ia hadibaia eda helai gabudia do ita abia bona program do ia matamaia ena miusiki ita kamonai, ita badinaia be namo. Hemataurai ita hahedinaraia dalana ma ta be, eda mobael ita koua, unai amo ma haida edia kamonai karana ita hadikaia lasi. Danu, program lalonai ita herevahereva lasi, teks mesiji ita siaia lasi, ita aniani o loaloa kava lasi.
7. Edena dala ai tadikaka taihu ida ita hebamo namonamo diba?
7 Hebamo Namodia: Hebouhebou be nega namodia eda Keristani tadikaka taihu ida ita hebamo namonamo totona. (Sal. 133:1-3) ‘Emu lalokau oi habadaia’ totona, namona be kongrigeisen haida amo idia mai tadikaka taihu oi hedavari henidia. (2 Kor. 6:13) Dina ta ta ai kamonai matamata tauna ta o ruma bese matamata ta dibaia karana be emu tahua gauna ai oi halaoa. Dina tubua ena laga-ani negana be nega namona unai bamona oi karaia totona. Unai dainai aniani sisina oi abia lao, unai amo mai moale danu ma haida ida oi aniani bona hebamo diba, bona sitoa dekenai oi lao lasi aniani hoia totona. Unai ese dala do ia kehoa tura matamatadia haida do oi hedavari henia.
8. Dahaka dainai hebouhebou dekenai volantia gaukara ita karaia, bona edena dala ai?
8 Iseda Keristani tadikaka ida hesiai gaukara helagana ita karaia be hahenamo! Hebouhebou ena dipatmen ta o emu kongrigeisen danu hagoevaia gaukarana ai oi volantia diba, a? (Sal. 110:3) Bema oi ura gaukara ta oi durua, mani emu kara hebouhebou gabunai Volantia Gaukara Dipatmen oi itaia. Volantia taudia be momo neganai, gaukara do ia ore haraga bona ita moalelaia.
9. Dahaka dainai hebouhebou negana ai iseda kara bona toana idia namo?
9 Kara Namodia: Unai dina toi lalonai iseda kara ita naria namonamo be mai anina bada. Namona be iseda kara namodia idia itaia taudia idia diba ita bona Witnes lasi taudia be idau. (1 Pet. 2:12) Hebouhebou gabunai, ita noho gabunai, sitoa ai, restaurant ai, bona maketi gabudiai, iseda dabua bona toana amo Iehova ita hanamoa be namo. (1 Tim. 2:9, 10) Bema eda lapel kadi ita atoa, ita idia itaia taudia do idia diba ita be Iehova ena Witnes taudia. Unai ese dala do ia kehoa idia dekenai iseda hebouhebou ita herevalaia bona ita haroro henidia totona.
10. Dahaka ekspiriens ese idia hahedinaraia eda Keristani kara namodia ese anina namona ia havaraia?
10 Hebouhebou ai, iseda kara namodia dainai haida be dahaka idia gwau? Niuspepa ta ai, hebouhebou idia abia gabuna ta ena biaguna ia gwau: “Taunimanima be kara namodia idia hahedinaraia. Ai ura bada lagani ta ta ai iniseniai idia hebou.” Vanegai lagani ai, hebouhebou idia lao taudia ese idia gaukaralaia hotel ta dekenai, Witnes lasi tauna ta ena paosi ia boio. Tadikaka ese unai paosi mai ena lalona gaudia ibounai be hotel biaguna dekenai idia henia neganai, hotel biaguna ese unai paosi biaguna ia hamaoroa: “Namo herea emu paosi oi davaria, badina Iehova ena Witnes taudia be kahirakahira gabuna ta ai edia hebouhebou totona idia mai, bona inai hotel ai idia noho. Bema idia be lasi, reana emu paosi do oi davaria lasi.”
11. Hebouhebou ia mai kahirakahira dainai, emu lalona oi hadaia dahaka oi karaia totona, bona dahaka dainai?
11 Inai lagani ena distrik hebouhebou be ia mai kahirakahira. Tadikaka be edia nega bona goada bada idia henia program idia hegaegaelaia bona hebouhebou amo ita idia hagoadaia totona. Namona be emu lalona oi hadaia dina toi ena hebouhebou oi lao henia totona, bona oi hegaegae Iehova bona ena orea ese oi totona idia hegaegaelaia gaudia do oi abia. Namona be emu lalona oi hadaia hemataurai karadia, hebamo namodia, bona kara namodia amo ma haida oi hagoadaia totona. Unai amo oi bona ma haida emui hemami be vanegai lagani ena hebouhebou ia lao taihu ta ena hemami bamona, ia gwau, “Hebouhebou lau moalelaia bada!”
[Blurb on page 1]
Guna bamona, hebouhebou do lasi neganai wiki toi lalonai, ita ese boiboi pepadia hariharilaia gaukarana amo, haida do ita boiria hebouhebou idia mai totona
[Blurb on page 3]
Hebouhebou gabunai, ita noho gabunai, bona restaurant ai, iseda dabua bona toana amo Iehova ita hanamoa be namo
[Blurb on page 4]
Namona be emu lalona oi hadaia hemataurai karadia, hebamo namodia, bona kara namodia amo ma haida oi hagoadaia totona
[Box on pages 2-4]
2011 Distrik Hebouhebou Hadibaia Herevadia
◼ Nega: Dina ta ta ena program be 8:20 a.m. ai do ia matamaia. Namona be miusiki ia matamaia neganai, ita ibounai be iseda helai gabunai ita helai vadaeni, unai amo program be mai hemataurai ida ita matamaia diba. Dina toi hebouheboudia dekenai Friday bona Saturday program be 3:55 p.m. ai do ia ore, bona Sunday be 2:40 p.m. ai do ia ore. Dina rua hebouheboudia dekenai, Saturday program be 4:10 p.m. ai do ia ore bona Sunday be 3:30 p.m. ai do ia ore.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui badinaia.
◼ Helai Gabudia: Ita ida motuka tamona ai ita guia taudia, o ruma tamona ai ita noho taudia, o eda stadi taudia edia namba hegeregerena, helai gabudia ita abia be namo.—1 Kor. 13:5.
◼ Dina Tubua Aniani: Mani emui kara, dina tubua aniani umui abia lao. Namo lasi hebouhebou gabuna oi rakatania bona sitoa dekenai oi lao aniani hoia totona. Helai gauna henunai oi atoa diba eski maragina oi gaukaralaia. Hebouhebou gabuna dekenai, eski badadia bona galasi gaudia be taravatu.
◼ Kontribusen:Iseda tanikiu karana ita hahedinaraia diba bema hebouhebou gabuna ai, Tanobada Ibounai Gaukarana ena kontribusen ita henia. Idia henia seke be “International Bible Students Association” o “IBSA” ena ladana dekenai idia torea diba.
◼ Aksiden: Bema hebouhebou gabunai ta ia gorere dikadika eiava bero ta ia abia, mani atendan tauna ta oi hadibaia haraga. Ia ese Medikol Heduru Dipatmen do ia hadibaia bona idia ese gorere tauna idia sekea diba bona heduru do idia henia.
◼ Muramura: Bema doketa ese emu muramura ia henia, vadaeni hebouhebou oi lao neganai emu muramura oi abia lao danu, badina unai bamona muramura be Medikol Heduru Dipatmen ai do idia noho lasi.
◼ Please Follow Up (S-43-E) Fom: Please Follow Up fom oi gaukaralaia, hebouhebou negana ai oi haroro henia tauna ena ladana bona adres oi torea totona. Pablisa ibounai ese unai fom ta o rua idia abia lao diba hebouhebou gabunai. Bema fom ta dekenai kamonai tauna ena ladana bona adres oi torea vadaeni, namona be Buka Gabuna naria tadikaka oi henia, o oi giroa lou neganai emu kongrigeisen seketere oi henia diba.—September 2011 Iseda Basileia Gaukara, rau 4 itaia.
◼ Restaurant: Restaurant o aniani gabudiai emu kara namodia amo Iehova ena ladana oi hanamoa.
◼ Noho Gabudia:
(1) Bema mahuta gabudia oi ura abia, emu kongrigeisen be Ruma Naria Dipatmen amo fom ia abia neganai, karaharaga seketere oi hadibaia.
(2) Daiutu momo oi noia kava lasi, to do idia noho taudia edia namba hegeregerena oi noia, bona oi gwauraia taudia sibona be emu daiutu dekenai idia noho be namo.
(3) Bema emu noho gabuna oi haidaua, Ruma Naria Dipatmen oi hadibaia haraga be namo.—Mat. 5:37.
(4) Daiutu lalonai aniani umui nadua lasi. To idia abia hidi gabudia dekenai umui nanadu.
(5) Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo.—Aon. 25:17.
(6) Bema tadikaka edia ruma ai oi noho, aniani ena davana, nanadu bona ruma gaukara haida dekenai ruma taudia oi durua be namo.
(7) Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia. Taunimanima ese iseda hebogahisi, haheauka, bona laloa maoromaoro karana do idia laloa bada.
(8) Bema oi noho gabuna dekenai hekwakwanai ta ia vara, vadaeni Ruma Naria Dipatmen oi hadibaia bona oi do idia durua.
◼ Volantia Gaukara: Hebouhebou ita lao henia ena moale ita habadaia diba, bema ena gaukara idauidau dekenai ita volantia. (Kara 20:35) Bema ta ia ura heduru ia henia, namona be hebouhebou gabunai Volantia Gaukara Dipatmen ia hadibaia. Mauri lagani 16 idia do abia lasi natudia ese heduru namona idia henia diba, bema edia tama sina eiava tadikaka o taihu badana ma ta ida idia gaukara hebou.
[Box on page 2]
Edena dala ai boiboi pepadia do ita hariharilaia?
Iseda teritori ibounai ita karaia totona, namona be eda hereva ia kwadogi. Reana inai bamona ita hereva diba: “Namo. Tanobada hegegemadai taunimanima dekenai inai boiboi pepana ai henia. Inai be oiemu kopi. Hereva ma haida be inai boiboi pepana dekenai oi davaria diba.” Boiboi pepana ena vairana kahana ese taunimanima edia lalona do ia veria, unai dainai ruma tauna oi henia bena ia ese ia itaia diba. Namona be mai emu ura ida oi hariharilaia. Wikeni ai boiboi pepadia oi henia neganai, bema mai dalana magasin oi hariharilaia danu.