March 17 ai Boiboi Pepadia Do Ita Hariharilaia Matamaia
1. March 17 ai dahaka gaukara do ita karaia?
1 Lagani ta ta ai ita karaia Memorial hebouna ese Iesu ena mase ia gwauraia hedinarai. (1 Kor. 11:26) Unai dainai, ita ura ma haida danu do idia mai bona idia kamonai Iehova be mai lalokau ida ena harihari gauna, mauri davalaia boubouna ia henia. (Ioa. 3:16) Inai lagani ai, Memorial ena boiboi pepadia be Saturday, March 17 ai, do ita hariharilaia matamaia. Oi ura unai gaukara oi durua, a?
2. Boiboi pepadia hariharilaia totona dahaka do ita gwau?
2 Dahaka Do Ita Gwau: Namona be hamatamaia hereva kwadogina ita gaukaralaia. Reana do ita gwau: “Namo. Tanobada hegegemadai, April 5 ai, mai anina bada hebouna do ai karaia, bona ai ura emu famili dekenai inai boiboi pepana ai henia. Davana lasi Baibel tok ta do idia henia, unai tok be Iesu ena mase ese ia havaraia namo bona hari dahaka ia karaia noho do ia hahedinaraia. Inai boiboi pepana ai, inai gabu dekenai do ai karaia Memorial hebouna ena adres bona taim ia noho.” Wikeni ai boiboi pepadia ita henia neganai, bema mai dalana magasin ita hariharilaia danu.
3. Edena dala ai momo ita boiria diba?
3 Momo Ita Boiria: Iseda tahua gauna be momo do ita boiria. Unai dainai namona be Baibel stadi taudia, lou henia, varavara, gaukara turadia, sikuli turadia, dekena taudia, bona ma haida ita boiria. Elda taudia ese dala do idia karaia teritori ibounai ita karaia totona. Memorial ena boiboi pepadia hariharilaia karana ese anina namona ia havaraia. Vanegai lagani ai, hahine ta be Memorial hebouna ia mai, bona atendan ta ese ia hadibaia do ia durua ia ia boiria pablisa ia tahua totona. To hahine ia gwau, unai hebou ai idia noho taudia ta ia diba lasi, to unai daba ai ta be iena ruma dekenai ia lao bona boiboi pepana ia henia.
4. Dahaka dainai mai ura bada ida boiboi pepadia ita hariharilaia?
4 Reana ta dekenai boiboi pepana oi henia dainai, Memorial hebouna do ia mai. Herevana ta ia mai o lasi, to emu gaukara goadagoada karana amo haroro namona oi henia diba. Oi hariharilaia boiboi pepadia ese do idia hahedinaraia, hari Iesu be siahu bada King ta. Mai ura bada ida unai gaukara oi karaia dainai, teritori ai idia noho taudia, pablisa ma haida, bona gau badana be Iehova dekenai oi hahedinaraia oi ese harihari gauna, mauri davalaia boubouna, oi laloa bada.—Kol. 3:15.