“Do Oi Gari Lasi”
1. Ieremia bamona, dahaka lalohadai ita abia diba?
1 Iehova ese Ieremia ia hamaoroa peroveta gaukara do ia karaia neganai, Ieremia ia gwau ia be hereva dalana ia diba lasi bona ia be mero sibona. To Iehova ese ia hamaoroa, “do oi gari lasi,” bona Iehova ena kara namona ese Ieremia ia hagoadaia ena gaukara ia karaia totona. (Ier. 1:6-10) Hari, reana ita hemarai o ita laloa ita be hegeregere lasi haroro gaukara ita karaia totona. Nega haida ita gari badina inai lalohadai ita abia: ‘Haroro ai taunimanima be dahaka do idia herevalaia?’ o ‘Haroro ai taunimanima ese lau be edena bamona do idia laloa?’ Unai bamona henanadai o gari be edena bamona ita hanaia diba, bona dahaka namo do idia vara?
2. Edena dala ai hegaegae karana ese gari karana do ia hamaragia bena haroro gaukara ita karaia diba?
2 Ruma Dekenai Hegaegae Guna: Hegaegae namonamo karana ese gari karana ia hamaragia diba. Hegeregere, bema taunimanima edia ekskius o ura lasi herevadia be eda ruma ai ita riviulaia guna, vadaeni do ita hegaegae unai bamona herevadia ita haerelaia totona. (Aon. 15:28) Dala namona ta be, Ruma Bese Ena Tomadiho negana ai sikuli bona haroro gaukara ai haida edia hereva haerelaia toho daladia umui hegaegaelaia.—1 Pet. 3:15.
3. Edena dala ia Iehova abidadama henia karana ese ita ia durua gari karana ita hanaia totona?
3 Iehova Abidadama Henia: Bema Dirava ita abidadama henia, do ita gari lasi. Iehova ia gwauhamata, ia be ita do ia durua. (Isa. 41:10-13) Oibe, Iehova sibona be ita ia durua diba. Danu, Iesu ia gwauhamata, haroro gaukara lalonai tau ta ese hereva idauna ta ia gwauraia neganai, Dirava ena lauma helaga ese ita do ia durua haroro gaukara ita karaia namonamo totona. (Mar. 13:11) Unai dainai, nega ibounai Iehova ita noia ena lauma helaga ia henia totona.—Luka 11:13.
4. Herevana ita hemarai o dahaka, to mai iseda haheauka ida haroro gaukara ita karaia neganai, dahaka namo do idia vara?
4 Ena Namo: Herevana ita hemarai o dahaka, to mai iseda haheauka ida haroro gaukara ita karaia neganai, unai ese ita ia durua gabeai idia vara hekwakwanai ita hanaia totona. Ita gari lasi—lauma helaga idia abia taudia edia kara be unai. (Kara 4:31) Danu, Iehova ese ita ia durua gari karana ita hanaia neganai, unai ese ita ia hagoadaia eda hamauria Diravana ita abidadama henia totona. (Isa. 33:2) Ma danu, ita diba eda guba Tamana ita hamoalea dainai ita moale. (1 Pet. 4:13, 14) Unai dainai, mai gari lasi ida Basileia ena sivarai ita harorolaia—nega ibounai ita abia dae momokani Iehova be ita ia durua noho!