Eda Kara amo Dirava Ita Hanamoa
1. Dahaka dainai Iehova ena Witnes taudia be distrik hebouhebou idia lao neganai, momo be unai idia itaia diba?
1 Distrik hebouhebou ita lao neganai, taunimanima be ita idia itaia diba. Gabu momo ai TV, reidio, bona ma haida be komiuniti taudia dekenai unai idia sivarailaia danu. Eda vadivadi taudia momo be hebouhebou ena lapel kadi idia atoa, bona momo be unai idia itaia diba. Henunai idia noho herevadia be ita do idia hadibaia, hebouhebou ita lao neganai, eda kara namodia amo Dirava ita hanamoa be namo.—1 Pet. 2:12.
2. Hebouhebou ena program lalonai bona murinai, edena dala ai ita hahedokilaia dabua amo Dirava ita hanamoa?
2 Dabua Namodia: Hebouhebou ena program lalonai bona murinai, hemataurai toana idia hahedinaraia dabua namodia ita hahedokilaia dainai, momo be ita idia hanamoa. Taunimanima ese Witnes taudia bona Witnes lasi taudia edia idau idia itaia be namo. (Roma 12:2) Danu, namona be hebouhebou ena lapel kadi ita atoa, badina unai ese eda hebouhebou ia gwauraia hedinarai, dala ia kehoa ma haida ita haroro henia, bona tadikaka taihu haida ese ita idia dibaia.
3. Edena dala ai haheauka bona kara namodia do ita hahedinaraia?
3 Haheauka Bona Kara Namodia: Inai tanobada taudia momo be sibona edia namo idia laloa bada bona idia tanikiu lasi, to ita moale badina stoa o aniani gabudiai eda haheauka bona kara namodia idia itaia diba. (2 Tim. 3:1-5) Hebouhebou gabunai sea dekenai ita helai o buka matamatadia abia totona laini ai ita gini neganai, ita sibona eda namo ita tahua lasi, to ma haida edia namo ita tahua be namo. (1 Kor. 10:23, 24) Kamonai tauna ta be nega ginigunana hebouhebou ta ia lao murinai, ia gwau: “Unai dina ai idia henia tok idauidau lau laloaboio vadaeni, to Witnes taudia edia kara namodia lau laloatao noho.”
4. Dahaka dainai hebouhebou gabunai volantia gaukara ita karaia be namo?
4 Volantia Gaukara: Keristani taudia korikoridia idia ura volantia gaukara idia karaia, bona momo be unai idia itaia diba. (Sal. 110:3) Oi ura hebouhebou gabunai volantia gaukara oi karaia, a? Gabu ta ai, hebouhebou ia do matamaia lasi neganai, tadikaka taihu 600 bamona be steidiam idia hagoevaia. Steidiam naria tauna ta ia gwau: “Inai be idau momokani, nega ta unai bamona lau itaia lasi! Lau hoa badina inai taunimanima ibounai be volantia taudia.” Namona be mai eda ura ida 2013 distrik hebouhebou ita naria noho, badina unai negai Dirava do ita kamonai henia bona dibaia sibona lasi, to Ia ita hanamoa danu.
Study Questions]
[Box on pages 3-6]
2013 Distrik Hebouhebou Hadibaia Herevadia
◼ Nega: Dina ta ta ena miusiki be 9:20 a.m. ai do ia matamaia. Unai negai, ita ibounai be iseda helai gabunai ita helai vadaeni, unai amo program be mai hemataurai ida ita matamaia diba. Friday bona Saturday ena program be 4:50 p.m. ai do ia ore, bona Sunday be 3:35 p.m. ai do ia ore. (Dina rua hebouheboudia dekenai, Saturday program be 5:30 p.m. ai do ia ore bona Sunday be 4:05 p.m. ai do ia ore.)
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui badinaia.
◼ Helai Gabudia: Ita ida motuka tamona ai ita guia taudia, o ruma tamona ai ita noho taudia, o eda stadi taudia edia namba hegeregerena, helai gabudia ita abia be namo.
◼ Dina Tubua Aniani: Mani emui kara, dina tubua aniani umui abia lao. Namo lasi hebouhebou gabuna oi rakatania bona stoa dekenai oi lao aniani hoia totona. Helai gauna henunai oi atoa diba eski maragina oi gaukaralaia.
◼ Kontribusen: Iseda tanikiu karana ita hahedinaraia diba bema hebouhebou gabuna ai, Tanobada Ibounai Gaukarana ena kontribusen ita henia. Idia henia seke be “International Bible Students Association” o “IBSA” ena ladana dekenai idia torea diba.
◼ Muramura: Bema doketa ese emu muramura ia henia, vadaeni hebouhebou oi lao neganai emu muramura oi abia lao danu, badina unai bamona muramura be Medikol Heduru Dipatmen ai do idia noho lasi.
◼ Mani Lou Henia (S-43) Fom: Mani Lou Henia fom oi gaukaralaia, hebouhebou negana ai oi haroro henia tauna ena ladana bona adres oi torea totona. Bema fom ta dekenai kamonai tauna ena ladana bona adres oi torea vadaeni, namona be Buka Gabuna naria tadikaka oi henia, o oi giroa lou neganai emu kongrigeisen seketere oi henia diba.
◼ Noho Gabudia:
(1) Bema mahuta gabudia oi ura abia, emu kongrigeisen be Ruma Naria Dipatmen amo fom ia abia neganai, karaharaga seketere oi hadibaia.
(2) Daiutu momo oi noia kava lasi, to do idia noho taudia edia namba hegeregerena oi noia, bona oi gwauraia taudia sibona be emu daiutu dekenai idia noho be namo.
(3) Bema emu noho gabuna oi haidaua, Ruma Naria Dipatmen oi hadibaia haraga be namo.—Mat. 5:37.
(4) Daiutu lalonai aniani umui nadua lasi. To idia abia hidi gabudia dekenai umui nanadu.
(5) Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo.—Aon. 25:17.
(6) Bema tadikaka edia ruma ai oi noho, aniani ena davana, nanadu bona ruma gaukara haida dekenai ruma taudia oi durua be namo.
(7) Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia. Taunimanima ese iseda hebogahisi, haheauka, bona laloa maoromaoro karana do idia laloa bada.
(8) Bema oi noho gabuna dekenai hekwakwanai ta ia vara, vadaeni Ruma Naria Dipatmen oi hadibaia bona oi do idia durua.
(9) Namona be nega ibounai tama sina ese edia natudia idia naria.
◼ Volantia Gaukara: Bema ta ia ura heduru ia henia, namona be hebouhebou gabunai Volantia Gaukara Dipatmen ia hadibaia. Mauri lagani 16 idia do abia lasi natudia ese heduru namona idia henia diba, bema edia tama sina eiava tadikaka o taihu badana ma ta ida idia gaukara hebou.