Iseda Buka Bona Magasin Hariharilaia Dalana
1 Papua New Guinea dekenai, buka bona magasin hariharilaia dalana matamatana be do ita kwalimulaia, a? Unai dala idia badinaia matamaia tanodia edia sivarai ese idia hahedinaraia, buka bona magasin momo herea be taunimanima dekenai idia hariharilaia noho. Ita diba iseda teritori dekenai unai gaukara do ita kwalimulaia bona taunimanima momo herea do ita veria “mai. . . mauri ranuna do [idia] abia dae, ia be davana lasi.”—Apok. 22:17.
OI LALOATAO DALADIA HAIDA
2 To, ita ura lasi buka bona magasin ia abia dae taudia dekenai do ita henia kava henia kava sibona. Pablisa ta ta ibounai ena maduna be kongregesen dekenai Society amo davana lasi ai idia abia buka bona magasin do idia gaukaralaia namonamo, ia sibona ena kohu do ia gaukaralaia namonamo hegeregerena. Society ese pablisa dekenai buka bona magasin idia henia davana lasi, to ita gwau lasi unai ena anina be buka bona magasin idia printaia bona idia siaia ena davana idia karaia lasi. Namona be ibounai ita diba iseda buka bona magasin be mai edia heduru bada kudou-maoro taudia ese Iehova bona ena natuna Iesu Keriso idia dibaia totona.—Ioa. 17:3.
3 Dahaka dainai Society ia hegeregere buka bona magasin be taunimanima dekenai davana lasi idia henia diba? Badina be idia printaia bona siaia ena davana be taunimanima edia kontribusen moni amo idia karaia. Unai kara dekenai, Iehova ena gwauhamata hesiai taudia edia heduru karana be bada herea. Iehova ena Witness taudia be taunimanima dekenai moni idia tahua lasi Basileia harorolaia gaukara badana durua totona. Ita be nega ta taunimanima amo moni haboua gaukara ta ita karaia lasi. To, haroro gaukara dekenai ita davaria kamonai taudia bona ura bada taudia ese kontribusen moni maragina idia henia neganai, mai moale ida ita abia dae. Unai dainai, namona be ita hegaegae Baibel hadibaia gaukarana be taunimanima edia kontribusen moni amo idia durua herevana ita gwauraia hedinarai goevagoeva totona.
ISEDA KONTRIBUSEN MONI ESE IA HAVARAIA GAUDIA
4 Hari inai negai, ita davaria moni ibounai amo Basileia harorolaia gaukarana durua gaudia edia davana idia karaia. To, Society ese buka bona magasin idia karaia bena tanobada ibounai dekenai idia siaia sibona lasi, idia ese brens opesi, Betele rumadia, hesiai gaukara bona misinari taudia edia sikuli, misinari taudia bona spesel painia taudia, sekit naria taudia bona Iesu ese ena hahediba taudia dekenai ia henia gaukarana hagugurua gaudia idauidau idia karaia.—Mat. 24:14; 28:19, 20.
5 Pablisa taudia momo bona edia ruma bese taudia ibounai be hanaihanai moni sisina idia atoa siri tanobada ibounai gaukarana durua totona. (1 Korinto 16:1, 2 itaia.) Unai ese Society ena gaukara ibounai, buka bona magasin siaia gaukarana danu ia durua. Namona be ta ia laloa lasi, tanobada ibounai gaukarana durua monina ia henia ena badina be ia abia buka bona magasin ena davana ia karaia.
6 Buka bona magasin hariharilaia dalana ese taunimanima ibounai do ia hadibaia iseda Baibel hadibaia gaukarana be moni haboua gaukarana lasi. Danu, unai dala ese ita do ia durua Basileia ena sivarai namona ita harorolaia bona taunimanima be Iesu ena hahediba taudia ai ita halaoa karana ita atoa gauna totona. Orea momo be heduru idia henia totona moni idia noia, to Iehova ena Witness taudia ibounai idia moale badina be buka bona magasin idia henia davana lasi. Tanobada ibounai gaukarana durua kontribusen monina be iseda sivarai ia laloa bada lasi tauna amo ita noia diba lasi. (The Watchtower, December 1, 1990, rau 22 bona 23 itaia.) Inai orea dekenai idia gaukara taudia ibounai be volantia taudia bona edia gaukara ena davana idia abia lasi, unai dainai kontribusen ena moni ibounai be tanobada ibounai dekenai Baibel hadibaia gaukarana totona idia gaukaralaia. Iseda gaukara idia henanadailaia taudia eiava idia laloa bada taudia sibona dekenai tanobada ibounai gaukarana ia durua kontribusen dalana do ita herevalaia be namo.
OI LALOA NAMONAMO
7 Ruma taudia eiava haida ita haroro henidia gwauraia neganai, namona be Baibel ena hereva ta ita hegaegaelaia guna. Basileia ena sivarai ia kamonaia dalana hegeregerena, pablisa tauna ese buka bona magasin hariharilaia dalana ia laloa. Bema ruma tauna ia ura lasi iseda buka eiava buka ma haida ia abia, reana mai aonega ida kiki herevana oi hadokoa bona ma ta dekenai oi lao. Eiava, bema ta ia gwau iseda pepapepa do ia duahia, ta oi rakatania diba. Namona be pepa dekenai oi torea kamonai taudia oi lou henidia totona. Unai bamona oi karaia diba danu, bema ta ia bisi eiava ita be nega maorona ai ita lao lasi dainai, ia ida ita herevahereva namonamo lasi.
8 Bema iseda hesiai gaukara ita habadaia, Society ena anina bada bukadia ita gaukaralaia namonamo, Iehova ese iseda gaukara ena anina do ia habadaia momokani. Gabu ibounai dekenai kamonai taudia idia moale iseda gaukara ena heau dalana idia dibaia neganai, bona mai edia moale ida iseda gaukara idia durua edia kontribusen monina amo.