Ita Haroro Ena Badina 12

Dahaka dainai ruma-ta-ruma-ta ai ita haroro bona Baibel stadi ita karaia? Badina ita ura kudou-maoro taudia ita hamauria, a? (Mat. 7:14) Ena be lista dekenai ia be namba 1 dekenai idia torea, to unai be ita haroro ena badina badana, a? Bema lasi, vadaeni oi laloa ita haroro ena badina badana be dahaka?

1. Taunimanima ita durua idia mauri totona.​—Ioa. 17:3.

2. Kara dika taudia ita sisiba henia.​—Ese. 3:18, 19.

3. Baibel ena peroveta herevana ita hagugurua.​—Mat. 24:14.

4. Ita hahedinaraia Dirava ena kara be maoromaoro. Unai amo gabeai ta do ia hereva lasi, ‘Iehova be nega ia henia lasi kara dika taudia idia helalo-kerehai totona, to ia hamasedia.’​—Kara 17:30, 31; 1 Tim. 2:3, 4.

5. Iesu ena rara amo ia hoia taudia ita durua Dirava idia tura henia totona.​—Roma 1:14, 15.

6. Taunimanima edia rara dekenai ita kerere lasi totona.​—Kara 20:26, 27.

7. Dirava ese ita ia hamauria totona.​—Ese. 3:19; Roma 10:9, 10.

8. Ita hahedinaraia, eda dekena taudia ita lalokau henia.​—Mat. 22:39.

9. Ita hahedinaraia, Iehova bona ena Natuna ita badinadia.​—Mat. 28:19, 20.

10. Unai be eda tomadiho karana.​—Heb. 13:15.

11. Ita hahedinaraia, Dirava ita lalokau henia.​—1 Ioa. 5:3.

12. Unai amo Iehova ena ladana ita hahelagaia.​—Isa. 43:10-12; Mat. 6:9.

Oibe, unai bona badina ma haida dainai ita haroro. Hegeregere, haroro gaukara ese eda abidadama ia hagoadaia bona dala ia kehoa Dirava ida ita gaukara hebou totona, bona unai be hahenamo badana. (1 Kor. 3:9) To, ita haroro ena badina badana be ataiai lista ena namba 12 ese ia hahedinaraia. Herevana taunimanima idia kamonai o lasi, to eda haroro amo Dirava ena ladana ita hahelagaia, bona Iehova ia gwauraia kerere tauna be Dirava sibona ese ia haere henia diba. (Aon. 27:11) Momokani, badina namodia dainai, ita be ‘ruma-ta-ruma-ta ai sivarai namona ita hadibaia bona harorolaia noho, ita hadokoa lasi.’​—Kara 5:42.