Ita Kamonai Bona ‘Eda Diba Ita Habadaia’
1 Aonega Herevadia bukana ia gwau aonega ia boiboi, ia gwau: “Lauegu hereva namodia do umui kamonai. Lauegu hereva ibounai be maoromaoro. Lau ese palani lau karaia noho, bona inai palani be lau karaia haorea. Lau be mai egu aonega. . . . Lau dekenai do umui kamonai. Lauegu dala do umui badinaia, vadaeni do umui moale. Badina be lau ia davaria tauna ese, mauri ia davaria, bona Lohiabada ese ia do ia moalelaia.” (Aon. 8:6, 14, 32, 35) “Dirava Ena Hereva Hadibaia Taudia” Distrik Hebouhebouna dekenai, unai bamona hadibaia hereva do ita abia.
2 Tanobada hegegemadai tadikaka oreana idia abia be namo gaudia idia tahua namonamo vadaeni, bona unai gaudia hegeregerena hebouhebou ena program idia hegaegaelaia. Lauma dalanai hadibaia herevadia bona heduru herevadia do idia henia bona bema ita badinaia, ita do ia durua ita moale totona, Iehova ida hetura karana namona ita dogoatao, bona mauri hanaihanai ia lao henia dalana dekenai ita noho totona. Momokani, badina namona dainai do ita kamonai ‘bona eda diba ita habadaia.’—Aon. 1:5.
3 Program Vairanai: Idia gwauraia herevadia amo namo ita abia totona, program ia hamatamaia neganai iseda helai gabudia dekenai ita helai bona lalohadai maorona ita dogoatao be namo. Unai anina be gau ibounai ita hegaegaelaia namonamo. Gau badana be unai oi hamatamaia namonamo totona, oi mahuta haraga. Daba momokani oi toreisi bena grup dekenai idia noho taudia dekenai nega do oi henia idia hegaegae bona aniani totona. Hebouhebou gabuna dekenai oi ginidae haraga, unai amo helai gabudia oi davaria diba bona program ia do matamaia lasi neganai, gau haida oi karaia diba. Dina ta ta ai, program be 9:00 a.m. ai ia matamaia.
4 Ita hebou ena badina badana be “hebou badana lalonai” Iehova do ita hanamoa dainai, ia ita hanamoa dalanai hebou ita kehoa be namo. (Sal. 26:12) Unai karaia totona, ibounai ai hagoadaia hebou kehoa anena idia do gwauraia lasi neganai edia helai gabudia dekenai idia helai guna be namo. Unai be Baibel ena sisiba herevana hegeregerena, ia gwau: “Gaukara ibounai umui karaia namonamo, mai dala maorona, karaia kava lasi.” (1 Kor. 14:40) Ita ta ta dekenai unai ena anina be dahaka? Bema oi itaia seamani be miusiki ena hamatamaia kahana ai platfom dekenai ia helai, emu helai gabuna oi abia haraga be namo. Unai dala amo hebou kehoa anedia ta ta be mai emu kudouna ibounai ida do oi abia bena Iehova do oi abia isi bona hanamoa.—Sal. 149:1.
5 Program Lalonai: Esera ese “ena kudouna ia hegaegaelaia Iehova ena taravatu amo sisiba do ia tahua bona do ia badinaia.” (Esr. 7:10, NW) Edena dala ai iseda kudouna ita hegaegaelaia diba Iehova ese ia henia hadibaia herevadia ita abia totona? Idia printaia program pepana dekenai idia noho kahana idauidau edia hereva kwarana oi riviulaia neganai, sibona oi nanadaia, ‘Iehova be inai program amo lau dekenai dahaka ia hadibaia noho? Edena dala ai inai hereva lau gaukaralaia diba lau sibona bona egu ruma bese ese namo idia davaria totona?’ (Isa. 30:21; Efe. 5:17) Hebouhebou lalonai oi sibona dekenai unai henanadai oi henia. Do oi gaukaralaia hereva badadia oi torea. Dina ta ta ena hebouhebou murinai nega oi atoa unai gaudia oi herevalaia totona. Unai ese oi do ia durua unai hereva oi laloa lou bona oi badinaia totona.
6 Hora sisina momo lalonai hereva oi kamonai henia noho be mai ena hekwarahi. Dahaka ese ita ia durua diba gau ma haida ita laloa lasi totona? Iseda matana ita gaukaralaia namonamo, ia be mai ena siahu badina ita itaia noho gauna do ita laloa noho. (Mat. 6:22) Unai dainai, emu kwarana oi giroa lasi regerege eiava idia loaloa taudia ibounai oi itaia totona. Namona be hereva henia tauna oi itaia. Baibel siri ta ia duahia neganai emu Baibel dekenai oi badinaia, bona unai siri ia herevalaia neganai emu Baibel oi koua lasi.
7 Program ia heau lalonai, Keristani lalokauna ese ita do ia durua ma haida edia kamonai karana ita hadikaia lasi totona. (1 Kor. 13:5) Unai be “regerege lasi” bona kamonai negana. (Had. 3:7) Unai dainai, oi herevahereva kava lasi bona loaloa kava lasi. Palani namonamo guna karana amo mei rumana dekenai do oi lao momo lasi. Oi aniani eiava loliwota gaudia oi inua lasi ela bona nega korikori ai, to bema ta ia gorere, reana ia karaia diba. Idia abia loaloa telefon, pagers, vidio kamera, bona kamera idia mailaia taudia ese ma haida edia kamonai karana hadikaia dalanai unai gaudia idia gaukaralaia lasi. Namona be tama sina ese dala idia karaia ruma bese taudia ibounai—edia matamata taudia danu—be gabu tamona dekenai do idia helai unai amo edia natudia idia naria namonamo diba.—Aon. 29:15.
8 Lagani gunana ai, lagani momo hebouhebou dekenai ia lao elda ta ia gwau: “Lau laloa inai hebouhebou be idau, badina ma ta dainai. Kahirakahira helai taudia ibounai be nouti idia torea, matamata taudia danu. Unai be moale gauna ta. Hereva henia tauna ese idia ia noia siri ta idia itaia neganai, Baibel idia gaukaralaia namonamo.” Unai bamona kamonai namonamo karana dainai, umui ai hanamoa. Ita eiava hebouhebou idia lao taudia dekenai namo ia mailaia sibona lasi, to iseda Hadibaia Tauna Badana, Iehova Dirava, ia hanamoa.—Isa. 30:20.