Hebouhebou Hadibaia Herevadia
Taim: Dina toi lalonai program be 9:20 a.m. ai do ia matamaia. Seamani ese hamatamaia miusiki ia gwauraia neganai, namona be ita ibounai be eda helai gabuna dekenai ita helai vadaeni, unai amo program be mai hemataurai ida ita hamatamaia diba. Friday bona Saturday program be 4:50 p.m. ai do ia ore, bona Sunday be 3:45 p.m. ai do ia ore. ITAIA: Dina rua ena hebouhebou ena program be 8:20 a.m. ai do ia matamaia. Saturday be 5:15 p.m. ai do ia ore, bona Sunday be 4:25 p.m. ai do ia ore.
‘Ane amo Iehova hanamoa’: Idau negai Dirava ena taunimanima be ane amo Iehova idia hanamoa, bona unai nega amo ema bona hari miusiki be tomadiho ena kahana badana ta. (Sal. 28:7) Iseda rijinol hebouhebou ai, dina ta ta ena hebou be miusiki amo idia kehoa. Unai be miusiki ta sibona lasi to idia hegaegaelaia ena badina be Iehova do ita dibaia bona tomadiho henia. Danu, bema seamani ia gwau, miusiki be miniti haida lalonai do ai gadaralaia, namona be unai ita badinaia bona eda helai gabudia ita abia bona mai hemataurai ida miusiki ita kamonai. Bema unai ita badinaia, ita hahedinaraia ita be Watchtower orchestra taudia ese idia hegaegaelaia miusiki ita moalelaia. Lagani tamona lalonai unai tadikaka bona taihu be nega rua, sibona edia moni amo peleini davana idia karaia Patterson, New York, dekenai idia lao, unai amo miusiki namodia idia hegaegaelaia ita moalelaia totona. Unai miusiki namona ita kamonai murinai, ibounai do idia gini bona iseda Basileia anedia amo Iehova idia hanamoa.
Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui badinaia.
Helai Gabudia: Ita ida motuka tamona ai ita guia taudia, o ruma tamona ai ita noho taudia, o eda stadi taudia edia namba hegeregerena, helai gabudia ita abia be namo. Buruka bona gorere taudia be mai edia helai gabudia. Bona edia naria taudia ta o rua be unai taudia badinai idia helai diba.
Dabua Namodia: Hebouhebou negadiai, namona be hemataurai dabua namodia ita hahedokilaia, namo lasi tanobada ena sitaelo ita tohotohoa. (1 Tim. 2:9) Danu, namona be hebouhebou ena lapel kadi ita atoa, unai ese dala ia kehoa ma haida ita haroro henia totona. Hebouhebou ita lao neganai, eda toana bona kara namodia ese kudou-maoro taudia edia lalona ia veria diba, Baibel ena hahemauri sivaraina idia kamonai totona. To unai sibona lasi, ita ese Iehova do ita hamoalea danu.—Sep. 3:17.
Mai Hemataurai ida Elektronik Gaudia Gaukaralaia Namonamo: Bema ita be mai eda mobael fon, namona be mobael ena volium ita koua o silent dekenai ita atoa, ma haida edia kamonai karana ita hadikaia garina. Ena be helai gabudia amo kamera, vidio, tablet, bona mobael fon amo laulau ita abia diba, to mani ma haida edia namo ita laloa bona edia itaia dalana ita koua lasi. Danu, program lalonai ma haida dekenai teks mesiji ita siaia lao siaia mai karana be hemataurai karana lasi.
Dina Tubu Aniani: Mani emui kara, dina tubu aniani umui abia lao. Namo lasi hebouhebou gabuna oi rakatania bona stoa dekenai oi lao aniani hoia totona. Helai gauna henunai oi atoa diba eski maragina oi gaukaralaia.
Kontribusen: Iseda tanikiu karana ita hahedinaraia diba bema hebouhebou gabuna ai, Tanobada Ibounai Gaukarana ena kontribusen ita henia. Idia henia seke be “International Bible Students Association” o “IBSA” ena ladana dekenai idia torea diba.
Muramura: Bema doketa ese emu muramura ia henia, vadaeni hebouhebou oi lao neganai emu muramura oi abia lao danu, badina unai bamona muramura be Medikol Heduru Dipatmen ai do idia noho lasi.
Seifti Laloa Bada: Mani ita naria namonamo, namo lasi gadara o dedi karana amo bero ita davaria. Hebouhebou gabuna ita lao neganai, namona be tamaka maorodia ita karaia.
Taia Idia Dika Taudia Durua Totona: Hebouhebou gabudia haida ai, FM frequency idia gaukaralaia taia idia dika taudia idia durua. Hebouhebou program ibounai umui kamonai totona, namona be mobael fon o reidio maragina umui mailaia.
Mani Lou Henia (S-43) Fom: Mani Lou Henia fom oi gaukaralaia, hebouhebou negana ai oi haroro henia tauna ena ladana bona adres oi torea totona. Bema fom ta dekenai kamonai tauna ena ladana bona adres oi torea vadaeni, namona be Buka Gabuna naria tadikaka oi henia, o oi giroa lou neganai emu kongrigeisen seketere oi henia diba.
Hotel: Inai bamona gabudiai, emu kara namodia amo Iehova ena ladana oi abia isi. Emu dabua karaia dalana amo oi hahedinaraia, oi be Iehova ena Witnes ta.
Noho Gabudia:
Bema mahuta gabudia oi ura abia, emu kongrigeisen be Ruma Naria Dipatmen amo fom ia abia neganai, karaharaga seketere oi hadibaia.
Daiutu momo oi noia kava lasi, to do idia noho taudia edia namba hegeregerena oi noia, bona oi gwauraia taudia sibona be emu daiutu dekenai idia noho be namo.
Bema emu noho gabuna oi haidaua, Ruma Naria Dipatmen oi hadibaia haraga be namo.—Mat. 5:37.
Daiutu lalonai aniani umui nadua lasi. To idia abia hidi gabudia dekenai umui nanadu.
Bema tadikaka edia ruma ai oi noho, aniani ena davana, nanadu bona ruma gaukara haida dekenai ruma taudia oi durua be namo.
Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo.—Aon. 25:17.
Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia. Taunimanima ese iseda hebogahisi, haheauka, bona laloa maoromaoro karana do idia laloa bada.
Bema oi noho gabuna dekenai hekwakwanai ta ia vara, vadaeni Ruma Naria Dipatmen oi hadibaia bona oi do idia durua.
Namona be nega ibounai tama sina ese edia natudia idia naria.
Volantia Gaukara: Bema ta ia ura heduru ia henia, namona be hebouhebou gabunai Volantia Gaukara Dipatmen ia hadibaia. Mauri lagani 16 idia do abia lasi natudia ese heduru namona idia henia diba, bema edia tama sina eiava tadikaka o taihu badana ma ta ida idia gaukara hebou.