INAI HEHENI KARANA HADOKOA DALANA!

1 | Taunimanima Ibounai Oi Abia dae

Baibel Ena Hahediba Hereva:

“Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.”—KARA 10:34, 35.

Siri Ena Anina:

Iehovaa Dirava be iseda hanua, toana, kopina ena kala o kastom ia laloa lasi. To, ia be mai anina bada gaudia, unai be iseda lalohadai bona ura gaudia ia itaia. Oibe, Baibel ia gwau: “Taunimanima ese ta ena toana sibona idia itaia, to Iehova ese kudouna ia itaia.”—1 Samuela 16:7.

Oi Karaia Diba Gauna:

Ena be taunimanima edia kudouna ai idia noho gaudia ita diba lasi, to Dirava ita tohotohoa diba bona ita abidia dae. Namona be taunimanima ta ta edia kara ita laloa, to orea ta bamona ita hahemaoro henidia lasi. Bema oi mamia oi be ma haida, reana bese o tano idau taudia dekenai lalohadai kereredia oi abia, namona be Dirava oi guriguri henia bona ena heduru oi noia unai lalohadai kereredia oi kokia totona. (Salamo 139:23, 24) Bema mai momokani ida Iehova oi noia taunimanima ibounai oi abia dae totona, emu guriguri do ia kamonai bona oi do ia durua.—⁠1 Petero 3:12.

a Iehova be Dirava ena ladana.—Salamo 83:18.

“Nega ta lau be kopi kurokuro tauna ta ena ruma ai mai maino ida ai aniani hebou lasi. Hari lau be tanobada hegegemadai tadikaka oreana lalonai lau noho.”—⁠TITUS

Mauri Sivaraina—TITUS

Inai Henia Karana Ia Hadokoa

Titus be kurokuro bona korema taudia do idia noho hebou lasi taravatuna dainai ia badu bona dagedage tatau haida edia orea ia bamoa. Ia gwau: “Nega momo ai be kopi korema taudia idia abia dae lasi hotel o inuinu gabudia dekenai ai lao, heatu ai hamatamaia totona.” Titus ia gwau ma haida inai henia karana dainai dagedage karadia ia karaia. Ma ia gwau: “Tau o hahine ta be lau ida ia hepapahuahu neganai, hanaihanai lau be ia lau botaia guna.”

Titus be Iehova ena Witnes taudia ida Baibel ia stadilaia neganai, ena kara ia haidaua matamaia. Baibel ia duahia neganai, ena lalohadai ia haidaua. Nega vaira totona inai gwauhamata, “mase, lalohisihisi, taitai, bona hisihisi be do idia ore,” ia duahia neganai, ena kudouna ia hamarerea momokani.—⁠Apokalupo 21:3, 4.

Matamanai, Titus ia hekwarahi bada ma haida inai henia karana ia hadokoa totona. Ia gwau: “Egu kara bona lalohadai lau haidaua be auka.” To Kara 10:34, 35 ena hereva ese ia durua, unai siri ese ia hahedinaraia Dirava be taunimanima edia toana ia laloa lasi.

Vadaeni Titus be dahaka ia karaia? Ia gwau: “Lau abia dae momokani Iehova ena Witnes taudia be tomadiho momokani ena kara idia badinaia, badina herevana idia be bese o kopina idauidau taudia, to ta ta idia lalokau henia. Lau do bapatiso lasi neganai, kopi kurokuro Witnes tauna ta ese lau ia boiria iena ruma dekenai ai aniani hebou totona. Unai nega ai lau laloa unai be nihi ta sibona. Badina nega ta lau be kopi kurokuro tauna ta ena ruma ai, mai maino ida ai aniani hebou lasi. Hari lau be tanobada hegegemadai tadikaka oreana lalonai lau noho.”