INAI HENIA KARANA ITA HADOKOA DALANA

4 | Dirava Ena Heduru Amo Inai Henia Karana Rakatania

Baibel Ena Hahediba Hereva:

“Lauma helaga ena huahua be lalokau, moale, maino, haheauka, hebogahisi, kara namo, abidadama, manau, bona sibona biagua karana.”—⁠GALATIA 5:22, 23.

Siri Ena Anina:

Dirava ena heduru amo ma haida inai henia karana ita rakatania diba. Sibona iseda goada amo kara namodia ita karaia diba lasi, to Dirava ena lauma helaga ena heduru amo kara namodia ita karaia diba. Unai dainai, ma haida inai henia karana ita rakatania totona, iseda goada dekenai ita tabekau lasi, to namona be Dirava ena heduru dekenai ita tabekau. Unai bamona ita karaia neganai, aposetolo Paulo ia hereva bamona, do ita gwau: “Lau dekenai siahu ia henia tauna amo goada lau abia gau ibounai lau karaia totona.” (Filipi 4:13) Oibe, do ita gwau: “Egu heduru be Iehova amo ia mai.”—⁠Salamo 121:2.

Oi Karaia Diba Gauna:

“Lau be dagedage tauna to Iehova ese egu kara ia haidaua bona hari lau be manau tauna.”—⁠WALDO

Iehova do ita guriguri henia, bona iena lauma helaga totona do ita noinoi. (Luka 11:13) Ia oi noia oi do ia durua emu mauri lalonai kara namodia oi hahedinaraia totona. Baibel dekenai inai karadia hegeregere lalokau, maino, haheauka bona sibona biagua karana oi stadilaia, unai karadia ese inai henia karana ia koua. Oi hekwarahi emu mauri lalonai kara namodia oi hahedinaraia totona. Danu kara namodia idia hahedinaraia taudia oi bamoa. Idia ese oi do idia hagoadaia lalokau bona kara namodia oi karaia totona.—⁠Heberu 10:24.

Mauri Sivaraina—WALDO

Ma Haida Dagedage Henia Karana Ia Rakatania

Waldo be ia tubu daekau lalonai iena mauri be auka bona taunimanima ibounai ia inai henidia. Ia gwau: “Hanaihanai lau be drag hoihoilaia taudia ida lau heatu . . . Nega ta, lau inai henia raskol oreana ta ese ala-ala tauna ta dekenai moni idia henia lau ia alaia totona, kaia amo lau ia gwadaia, to lau heau mauri.”

Waldo ena adavana be Iehova ena Witnes taudia ida Baibel ia stadilaia neganai, ia moale lasi. Ia gwau: “Witnes taudia lau inai henidia, bona nega momo idia dekenai hereva dikadia lau gwauraia. To idia be mai manau ida idia haere.”

Hua haida murinai, Waldo danu be Baibel ia stadilaia matamaia. Ia gwau: “Lau dibaia gaudia lau badinaia be auka. Lau laloa egu badu bona dagedage karana do lau rakatania diba lasi.” To Baibel amo ia dibaia gauna ta ese ena mauri ia haidaua.

Waldo ia gwau: “Dina ta egu stadi naria tauna, Alejandro ese lau ia hamaoroa Galatia 5:22, 23 do lau duahia. . . . Alejandro ese lau ia hamaoroa unai kara namodia lau hahedinaraia totona, lau sibona egu goada dekenai do lau tabekau lasi, to Dirava ena lauma helaga dekenai do lau tabekau. Unai hereva momokani ese egu lalohadai ia haidaua momokani!”

Waldo be Dirava ena heduru dekenai ia tabekau dainai, ma haida inai henia karana ia hadokoa. Ia gwau: “Egu varavara bona tura gunadia be egu kara lau haidaua dainai idia hoa bada.” Ma ia gwau: “Lau be dagedage tauna to Iehova ese egu kara ia haidaua bona hari lau be manau tauna.”