Iehova Ia Ura Taunimanima Ibounai Idia Helalo-Kerehai

1. Ta ia helalo-kerehai totona, dahaka ia karaia be namo?

KERERE badana ta ita karaia neganai, ita helalo-kerehai be mai anina bada. Baibel ai, ta ia helalo-kerehai neganai, ia be ia karaia kerere ia inai henia, bona ena lalona ia hadaia unai kara do ia hadokoa bona do ia karaia lou lasi.—Baibel Ena Diksenari ai, “Helalo-Kerehai” itaia.

2. Dahaka dainai ita ibounai be helalo-kerehai ena anina ita diba be namo? (Nehemia 8:9-11)

² Taunimanima ibounai be helalo-kerehai ena anina idia diba be namo. Dahaka dainai? Badina ita ibounai be nega momo ita kerere. Ita ibounai be Adamu bona Heva amo kara dika ita abia bona ita mase. (Roma 3:23; 5:12) Unai dainai ita helalo-kerehai be namo. Abidadama taudia, hegeregere aposetolo Paulo, danu be idia hekwarahi lalohadai kereredia idia dadaraia totona. (Roma 7:21-24) Anina be nega ibounai iseda kara dika dainai do ita lalohisihisi, a? Lasi. Iehova be hebogahisi Diravana, bona ia ura ita moale. Mani Nehemia ena nega ai idia noho Iuda taudia ita laloa. (Nehemia 8:9-11 duahia.) Iehova ia ura lasi idia be guna idia karaia kerere dainai idia lalohisihisi, to ia ura mai moale ida ia do idia tomadiho henia. Iehova ia diba ita helalo-kerehai neganai, do ita moale. Unai dainai ita dekenai helalo-kerehai dalana ia hadibaia. Bema iseda kerere amo ita helalo-kerehai, ita diba momokani iseda hebogahisi Tamana ese ita do ia gwauatao henia.

3. Inai atikol ai dahaka do ita herevalaia?

³ Inai atikol ai, helalo-kerehai karana dibaia totona gau toi do ita herevalaia. Ginigunana be, Iehova ese Israela taudia dekenai helalo-kerehai karana ia hadibaia dalana. Iharuana be, taunimanima idia helalo-kerehai totona Iehova ese idia ia durua dalana. Ihatoina be, Iesu ena murinai idia raka taudia ese helalo-kerehai idia dibaia dalana.

IEHOVA ESE ISRAELA TAUDIA DEKENAI HELALO-KEREHAI KARANA IA HADIBAIA

4. Edena dala ai Iehova ese Israela taudia dekenai helalo-kerehai karana ia hadibaia?

⁴ Iehova be Israela taudia dekenai ena taravatu ia henia neganai, idia gwauhamata unai do idia badinaia. Bema ena taravatu idia badinaia, ia ese idia do ia gimaia bona hanamoa. Iehova be ena taravatu ia herevalaia: “Hari dina umui dekenai lau gwauraia oda herevadia be idia auka lasi umui lalopararalaia totona, unai oda herevadia umui badinaia diba.” (Deu. 30:11, 16) To bema idia gwau-edeede eiava dirava idaudia idia tomadiho henia, idia do ia gimaia lasi bona dika do idia davaria. To, idia be Dirava ena lalonamo idia abia lou diba. Bona ‘Iehova edia Dirava dekenai idia giroa lou bona ena hereva idia kamonai’ diba. (Deu. 30:1-3, 17-20) Anina be idia helalo-kerehai diba. Bema unai bamona idia karaia, Iehova be idia kahirakahira do ia lao bona idia do ia hanamoa lou.

5. Edena dala ai Iehova ia hahedinaraia ia be ena taunimanima dekenai ia hesiku lasi? (2 King Taudia 17:13, 14)

⁵ Iehova ena taunimanima be ia dekenai idia gwau-edeede loulou. Idia be kaivakuku idia tomadiho henia bona kara dika badadia haida idia karaia. Unai dainai dika idia davaria. To Iehova be idia ia dadaraia haraga lasi. Ia ese ena peroveta taudia ia siaia loulou, ena taunimanima idia hagoadaia idia helalo-kerehai bona ia dekenai idia giroa totona.—2 King Taudia 17:13, 14 duahia.

6. Edena dala ai Iehova ese ena peroveta taudia amo ena taunimanima dekenai helalo-kerehai karana ia hadibaia? (Laulau itaia danu.)

⁶ Nega momo Iehova be ena peroveta taudia amo ena taunimanima ia hadibaia bona edia kara ia hamaoromaoroa. Hegeregere, Dirava be Ieremia amo ia gwau: “Gwau-edeede Israela e, umui giroa mai. Lau ese mai badu ida umui do lau kara henia noho lasi, badina lau be hebogahisi Diravana, do lau badu hanaihanai lasi. . . . Emu kerere oi gwauraia hedinarai, badina oi be Iehova . . . oi gwau-edeede henia.” (Ier. 3:12, 13) Iehova be Ioela amo ia gwau: “Mai emui kudouna ibounai ida lau dekenai umui giroa mai.” (Ioe. 2:12, 13) Isaia amo ia gwau: “Sibona umui hagoevaia. Emui kara dikadia be egu vairana amo umui kokia. Emui kara dikadia umui hadokoa.” (Isa. 1:16-19) Bona Iehova be Esekiela amo inai henanadai ia henia: “Kara dika tauna ta ia mase neganai lau moale, a? Eiava lau ura iena kara dika do ia rakatania bona ia mauri noho? . . . Lau be tau ta ena mase dekenai lau moale lasi. Unai dainai umui helalo-kerehai bona umui mauri.” (Ese. 18:23, 32) Iehova ia itaia taunimanima idia helalo-kerehai neganai, ia moale, badina ia ura idia mauri hanaihanai! To Iehova be ia naria ela bona ta be ena kara ia haidaua bona do ia durua, a? Mani haheitalai haida ita itaia.

7. Iehova be Hosea bona Gomere edia sivarai amo ena taunimanima dekenai dahaka ia hadibaia?

⁷ Iehova ese peroveta tauna Hosea bona ena adavana Gomere amo ena taunimanima ia hadibaia dalana ita laloa. Gomere ia heudahanai murinai, tatau ma haida totona Hosea ia rakatania. Ena kara do ia haidaua diba, a? Iehova be ta ena kudouna ia diba dainai, Hosea ia hamaoroa: “Oi lao, bona tau ma ta ese ia ura henia bona ia heudahanai hahine oi ura henia lou. Lau, Iehova, ese Israela taudia lau ura henia hegeregerena, herevana idia be dirava ma haida idia ura henia.” (Hos. 3:1; Aon. 16:2) Hosea ena adavana be kara dika badana ia do karaia noho. To, Iehova ese Hosea ia hamaoroa ena adavana ena dika do ia gwauatao bona ia do ia abia dae lou.a Unai hegeregerena, Iehova be ena taunimanima dekenai ia hesiku haraga lasi. Ena be kara dika badadia idia karaia noho, to idia ia do lalokau henia bona idia ia durua idia helalo-kerehai bona edia kara idia haidaua totona. Unai haheitalai ese ia hahedinaraia Iehova be taunimanima ia diba namonamo, bona ia ura ta do ia durua ia helalo-kerehai totona, ena be kara dika badadia ia karaia noho. (Aon. 17:3) Mani Iehova ese unai ia karaia dalana ita itaia.

IEHOVA ESE KARA DIKA TAUDIA IA DURUA DALANA IDIA HELALO-KEREHAI TOTONA

8. Edena dala ai Iehova be Kaino ia durua ia helalo-kerehai totona? (Genese 4:3-7) (Laulau itaia danu.)

⁸ Kaino be Adamu bona Heva edia natuna ginigunana. Ia be ena tama sina amo kara dika karaia urana ia abia. Danu Baibel ia gwau: “Ena kara be dika.” (1 Ioa. 3:12) Reana unai dainai Kaino be boubou gauna ia henia neganai, Iehova ese “ia lalonamo henia lasi, bona ena boubou gauna ia abia dae lasi.” To Kaino be ena kara ia haidaua lasi, “ia badu dikadika bona ia lalometau.” Iehova be dahaka ia karaia? Kaino ia hereva henia. (Genese 4:3-7 duahia.) Iehova be Kaino ia hereva henia namonamo, bona ia hamaoroa bema kara namo ia karaia, do ia hanamoa. Danu Kaino ia hadibaia bema ia badu noho kara dika do ia karaia. To, Kaino ia kamonai lasi. Ia ura lasi Iehova ese do ia durua ia helalo-kerehai totona. Ena be Kaino be Dirava ia kamonai henia lasi, to unai ese Iehova ia koua lasi ma haida ia durua idia helalo-kerehai totona.

9. Edena dala ai Iehova ese Davida ia durua ia helalo-kerehai totona?

⁹ Iehova be King Davida ia lalokau henia bada. Bona Iehova ese ia gwauraia “egu kudouna ia hamoalea” tauna. (Kara 13:22) To Davida be kara dika badadia ia karaia, hegeregere, heudahanai bona ala-ala karana. Mose ena Taravatu hegeregerena, Davida ia mase be namo. (Lev. 20:10; Num. 35:31) To Iehova ia ura Davida ia durua ia helalo-kerehai totona.b Ia ese ena peroveta tauna Natana ia siaia King Davida ia itaia totona, ena be Davida be helalo-kerehai toana ia hahedinaraia lasi. Natana be haheitalai ta ia gaukaralaia Davida ena kudouna ia hamarerea totona. Bena Davida ia laloparara bona ia helalo-kerehai. (2 Sam. 12:1-14) Davida ese ia torea ane ta lalonai ia hahedinaraia ena kara dika dainai ia sori bada. (Sal. 51, ataiai herevana) Unai ane ese kara dika idia karaia taudia momo ia hagoadaia idia helalo-kerehai totona. Ita moale badina Iehova ese mai lalokau ida Davida ia durua ia helalo-kerehai totona.

10. Iehova ena haheauka bona dika gwauatao karana be edena bamona oi laloa?

¹⁰ Iehova be kara dika ibounai ia inai henia. (Sal. 5:4, 5) To, ia diba ita ibounai be kara dika taudia, bona ita ia lalokau henia dainai ia ura ita ia durua kara dika ita dadaraia totona. Danu hanaihanai ia ura kara dika badadia idia karaia taudia ia durua idia helalo-kerehai bona ia kahirakahira idia lao totona. Unai ese ita ia hagoadaia! Iehova ena haheauka bona dika gwauatao karana ita laloa neganai, ita ura Iehova ita badinaia bona ita kara dika neganai, karaharaga ita helalo-kerehai. Hari Iesu ese ena hahediba taudia dekenai helalo-kerehai karana ia herevalaia dalana do ita herevalaia.

IESU ENA HAHEDIBA TAUDIA BE HELALO-KEREHAI KARANA IDIA DIBAIA

11-12. Edena dala ai Iesu ese taunimanima dekenai ena Tamana ena dika gwauatao karana ia herevalaia? ( ena laulau itaia.)

¹¹ Lagani 29 C.E. ai, Mesia ia hedinarai negana ia ginidae. Atikol ginigunana ese ia hahedinaraia bamona, Iehova ese Ioane Bapatiso bona Iesu Keriso ia gaukaralaia, unai amo taunimanima idia hadibaia helalo-kerehai be mai anina bada.—Mat. 3:1, 2; 4:17.

¹² Iesu ena haroro gaukara lalonai, ia ese taunimanima ia hadibaia ena Tamana ia ura iseda dika ia gwauatao. Iesu ese boio natuna mero ena parabole amo unai ia hahedinaraia. Unai mero matamata be abia hidi ia karaia ruma do ia rakatania bona mauri dala kererena do ia badinaia. To, gabeai “ia laloparara” bona ena ruma dekenai ia giroa lou. Tamana be dahaka ia karaia? Iesu ia gwau natuna be “daudau amo ia mai noho lalonai, ena tamana ese ia itaia bona ia hebogahisi henia bena ia heau lao, ia rosia bona ia kisi henia.” Natuna mero ia ura ena tamana ia noia bema ena hesiai tauna ai ia lao diba, to tamana ese ia gwauraia “egu natuna” bona ia abia dae lou. Tamana ia gwau: “Ia boio to ia giroa mai.” (Luka 15:11-32) Iesu be tanobada dekenai ia do mai lasi neganai, ia itaia ena Tamana be mai hebogahisi ida idia helalo-kerehai taudia momo edia dika ia gwauatao. Iesu ese unai sivarai amo ita ia hagoadaia bona ia hahedinaraia iseda Tamana Iehova be hebogahisi bada Diravana!

13-14. Petero be helalo-kerehai karana amo dahaka ia dibaia, bona ma haida dekenai dahaka ia hadibaia? (Laulau itaia danu.)

¹³ Aposetolo Petero be Iesu amo helalo-kerehai bona dika gwauatao karana ia dibaia. Nega momo Petero ia kerere, bona Iesu be mai ura ida ena dika ia gwauatao. Hegeregere, Petero be nega toi ia gwau ena Lohiabada ia diba lasi, unai murinai ena kerere dainai ia lalohisihisi bada. (Mat. 26:34, 35, 69-75) To Iesu ia toreisi lou murinai, Petero be sibona ia noho neganai ia dekenai ia hedinarai. (Luka 24:33, 34; 1 Kor. 15:3-5) Unai nega ai, Iesu be mai lalokau ida Petero ena dika ia gwauatao, badina ia diba ia helalo-kerehai.

¹⁴ Petero dekenai unai ia vara dainai, ia be hari haida dekenai helalo-kerehai bona dika gwauatao karana ia hadibaia. Pentekoste aria murinai, Petero be Iuda taudia momo dekenai ia gwauraia hedinarai, idia ese Mesia idia hamasea. To, mai lalokau ida idia ia hamaoroa: “Unai dainai umui helalo-kerehai, bona Dirava dekenai umui giroa, unai amo emui kara dika do ia kokia, bona Iehova sibona amo goada matamata do umui abia.” (Kara 3:14, 15, 17, 19) Petero ia hahedinaraia helalo-kerehai karana ese kara dika tauna ia durua ena lalohadai bona kara ia haidaua bona mauri dala matamata ia badinaia, unai amo Dirava ia hamoalea diba. Danu ia hahedinaraia Iehova ese kara dika do ia kokia momokani. Bona lagani momo murinai, Petero ese Keristani taudia ia hagoadaia: “Iehova . . . ia haheauka, badina ia ura lasi tau ta ia mase, to ia ura taunimanima ibounai be do idia helalo-kerehai.” (2 Pet. 3:9) Ena be kara dika badadia ita karaia, to ita helalo-kerehai neganai Iehova ese iseda kara dika ia gwauatao momokani!

15-16. (a) Edena dala ai aposetolo Paulo be helalo-kerehai karana ia dibaia? (1 Timoteo 1:12-15) (b) Atikol 33 ai dahaka do ita herevalaia?

¹⁵ Paulo be guna kara dika momo ia karaia. Ia ese Keriso ena murinai idia raka taudia ia dagedage henia bada. Keristani taudia momo idia laloa ena kara do ia haidaua lasi. To, Iesu ia diba Paulo be ena kara do ia haidaua bona do ia helalo-kerehai. Iesu bona ena Tamana ese Paulo ena kara namodia idia itaia. Iesu ia gwau: “Inai tauna be lau abia hidi vadaeni hodu bamona.” (Kara 9:15) Danu Iesu ese hoa karana ta amo Paulo ia durua ia helalo-kerehai totona. (Kara 7:58–8:3; 9:1-9, 17-20) Paulo be Keristani tauna ai ia lao neganai, nega momo Iehova bona Iesu ese idia hahedinaraia hebogahisi karana ia laloa bada. (1 Timoteo 1:12-15 duahia.) Paulo ia gwau: “Dirava be ena hebogahisi amo oi ia durua toho, oi helalo-kerehai totona.”—Roma 2:4.

¹⁶ Paulo ia kamonai Korinto kongrigeisen lalonai matabodaga karana ia karaia tauna be kongrigeisen lalonai ia do noho neganai, dahaka ia karaia? Paulo ena hereva amo ita diba Iehova ese mai lalokau ida ena hesiai taudia ia matahakani henia, bona idia helalo-kerehai neganai, hebogahisi ia hahedinaraia. Atikol 33 ai unai do ita herevalaia.