Kahana 2

Tanobada ai Hisihisi Do Ia Ore

1, 2. Taunimanima momo edia lalohadai idauidau be dahaka dahaka?

TO, TAUNIMANIMA milion milion tanobada ibounai lalonai edia lalohadai be idau vaitani. Edia helaro namo hereana be, nega daudau lasi murinai kara dika bona hisihisi be tanobada ai do idia ore vaitani. Idia laloa nega daudau lasi murinai Dirava ese gau dikadia do ia kokidia bona tanobada matamatana do ia haginia. Ma idia gwau unai tanobada matamatana ena badina be hari ia atoa noho!

² Idia laloa tuari, dagedage, raskol karadia, kara gagevadia bona ogogami be tanobada matamatana ai do idia vara lasi. Gorere, lalohisihisi, taitai bona mase do idia ore. Taunimanima do idia goevadae idia lao bona tanobada paradaisona ai do idia noho ela bona hanaihanai. Mase taudia do idia toreisi lou bona mauri hanaihanai dalana do idia davaria!

3, 4. Dahaka dainai unai lalohadai idia abia dae?

³ Unai edia helaro be sibodia edia ura hegeregerena idia lalohadailaia kava gauna mo, a? Lasi vaitani. Edia abidadama be mai ena badina korikorina dainai, idia diba momokani Paradaiso do ia vara. (Heberu 11:⁠1) Badina be siahu ibounai Diravana ese ia gwauhamatalaia dainai.

⁴ Dirava ena gwauhamata be Baibel ese inai bamona ia gwauraidia: “Iehova emui Dirava ese umui dekenai ia gwauraia herevadia namodia iboudiai amo ta ia moru lasi. Iboudiai idia vara momokani umui dekenai.” “Dirava be taunimanima lasi, mai ena koikoi . . . Ia hereva vadaeni; do ia karaia lasi a? Ia gwauraia vadaeni; do ia hagugurua lasi a?” “Iehova . . . ia gwauhamata vadaeni, ia gwau: ‘Lau laloa hegeregerena, unai bamona do ia vara; bona lau lalohadailaia hegeregerena, unai bamona do ia momokani.’ ”​—⁠Iosua 23:14; Numera 23:19; Isaia 14:24.

5. Dahaka henanadai edia haere do ita tahua be namo?

⁵ To, bema Dirava ena palani be tanobada paradaisona do ia karaia bena hisihisi be unuseniai do ia vara lasi, dahaka dainai ia ese dika ia koua lasi? Dahaka dainai lagani 6,000 ia naria ema bona hari? Unai nega daudau lalonai idia vara hisihisidia ese idia hahedinaraia Dirava ese ita ia laloa lasi eiava ia be lasi, a?