Basileia Haroro Ripoti

Mauri Ena Anina Namona Ia Davaria

IESU ia gwau iena mamoe be ia diba. (Ioane 10:14) Bema ta be mai ena lalona namona bona bema maino bona kara maoromaoro ia ura henia, Iesu ese do ia veria ena orea dekenai. Mauri ena anina do ia davaria, hahine ta Belgium ai ese ia davaria hegeregerena. Iena sivarai be inai:

“Iehova ena Witness taudia be egu iduara ai idia pidipidi neganai, egu lalona ia metau momokani bona egu mauri lau hadokoa gwauraia. Edia hereva, inai tanobada dikana hanamoa dalana herevadia, be lau moalelaia, to Dirava ese do ia hanamoa herevana be lau moalelaia lasi. Lagani 8 idia lao vadaeni egu dubu oreana lau rakatania, dubu taudia edia koikoi karadia lau badulaidia dainai. To mamina lau abia Witness taudia edia hereva be momokani, bena egu lalona ia parara bema Dirava ese ita ia durua lasi, madi, ita be dala lasi.

“Madi, nega daudau lasi murinai Witness taudia ese lau idia davaria lou lasi. Egu lalona ia hisihisi. Kuku momo lau ania bona drag danu. Lau ura egu tubuna, ia mase vadaeni tauna, do lau hereva henia, unai dainai meamea karadia lau karaia. Unai dainai hua momo lalodiai hanuaboi ai lauma dikadia ese lau idia hagaria bada!

“Bena, dina ta lau be dala idauna ai lau raka loaloa neganai, gabu ta ai lau ginidae. Lau hoa, badina be unuseniai lau ese Iehova ena Witness taudia hutuma lau itadia, Kingdom Hall ta idia haginia noho. Witness taudia ese guna lau idia vadivadi henia negadia be lau laloa lou, lau laloa idia noho hegeregerena tanobada taudia iboudiai bema idia noho be namo.

“Lau ura momokani Witness taudia ese lau do idia vadivadi henia lou, unai dainai unai hall ai idia gaukara taudia haida lau hereva henidia. Dirava lau guriguri henia, bena dina 10 idia ore murinai, matamanai lau ia davaria tauna be egu iduara ai ia kau. Ia gwau Baibel stadi do ai karaia lou be namo, bona ena hereva lau abia dae. Maoromaoro ia ese lau ia vavea, Kingdom Hall do lau lao. Vadaeni, lau lao neganai lau hoa bada! Idia lalokau heheni mai edia moale taudia be nega daudau lalonai lau tahudia vadaeni. Unai neganai lau davaridia!

“Unai murinai hebou iboudiai lau lao. Pura toi murinai, kuku ania karana lau hadokoa. Egu buka, hisiu toadia gwauraidia gaudia, bona egu rekodi, meamea miusik gaudia, be lau negedia, bena mamina lau abia lauma dikadia edia siahu lau dekenai be ia maragi ia lao. Iehova ena Baibel taravatudia hegeregeredia egu kara lau hamaoromaoroa, bona hua toi murinai sivarai namona lau harorolaia matamaia. Hua 6 murinai bapatiso lau abia, bena ma dina rua murinai heduru pioneer gaukarana lau karaia matamaia.

“Iehova lau tanikiu henia, lau dainai ia karaia gaudia namodia iboudiai dainai. Hari egu mauri be mai ena anina namona. Oibe, Iehova ena ladana be kohoro aukana ta, ia lalonai lau noho namonamo. (Hereva Lada-isidia 18:10) Egu lalohadai be Salamo 84:10 ia torea tauna ena hegeregerena: ‘Badina be dina tamona emu magu ai ese dina wan tausen idau gabu ai na ia hereadia!’ ”

Hari lalo-manau hahinena ese mauri ena anina namona ia davaria. Mai edia lalo-namo ida Iehova idia tahua taudia iboudiai ese unai idia davaria diba.