Gini Goada Bona Dirava Ena Ura Diba Namonamo

Nega Korikori ai Idia Halasia Herevadia amo Matamata Taudia Idia Durua

EPAFRA be aposetolo taudia edia nega ai ia noho Keristani tauna ta bona ia be Roma dekenai ia lao. To, badina namona dainai, ia ese Asia Minor ena siti ta, Kolose, ia laloa loulou. Unuseniai sivarai namona ia harorolaia bona mai momokani ida Kolose taudia haida ia durua, Iesu Keriso ena hahediba taudia ai idia lao totona. (Kolose 1:⁠7) Epafra be ena abidadama tamona taudia Kolose dekenai ia lalodia bada, badina be Roma amo aposetolo Paulo ese idia ia tore henia neganai, ia gwau: “Epafra . . . ese umui ia hanamoa henia inai. Nega ibounai umui dainai ia guriguri goada. Dirava ia noia, do umui gini goada, Keriso do umui abidadama henia, mai maoromaoro, bona momokani danu. Bona ia noinoi, Dirava ena ura ibounai, be do umui diba namonamo, bona kamonai henia.”​​—⁠Kolose 4:​12.

Unai hegeregerena, hari inai nega ena Keristani tama sina be lauma dalanai edia natudia idia goada totona idia guriguri goadagoada. Unai tama sina idia hekwarahi Dirava ena lalokau be edia natudia edia kudouna dekenai idia atoa bona unai dala amo abidadama dekenai idia gini goada.

Keristani matamata taudia momo be sikuli gabudia bona ma gabu haida dekenai idia davaria hekwakwanai idauidau dainai heduru totona idia noinoi. Ena mauri lagani 15 kekenina ta ia gwau: “Emai hekwakwanai idia bada idia lao. Gau momo dekenai ai gari. Unai dainai heduru ai abia be namo!” Unai bamona matamata taudia edia noinoi bona Dirava idia badinaia tama sina edia guriguri ena haere idia davaria, a? Oibe! Baibel amo idia abia hadibaia herevadia be “hesiai tauna mai ena kamonai, bona mai ena kara maoromaoro” amo idia mai. (Mataio 24:45) Iniseniai idia herevalaia buka haida ese matamata taudia tausen momo idia durudia idia ‘gini goada bona Dirava ena ura idia diba namonamo.’ Mani inai buka haida ita itaia.

“Itaia . . . Witnes Taudia Matamatadia 15,000!”

August 1941 ai, kamonai taudia 115,000 be St. Louis, Missouri, U.S.A. dekenai idia hebou, bona unai neganai unai be Iehova ena Witnes taudia edia hebouhebou badana momokani. Hebouhebou ena dina dokona ai​​—⁠“Natudia Edia Dina”​​—⁠natudia 15,000 bamona be platfom badinai idia helai bona Joseph F. Rutherford ese hereva ladana “King Ena Natudia” ia henia neganai idia kamonai henia namonamo. Iena hereva ena dokonai, ena mauri lagani 71 tauna tadikaka Rutherford be tamana bamona ia gwau:

“Umui ibounai . . . umui natudia, umui ura momokani . . . Dirava bona ena King do umui badinaia natudia e, mani emui kara umui gini tore.” Natudia be nega tamona idia gini tore. Tadikaka Rutherford ia gwau “Itaia, Basileia ena witnes taudia matamatadia 15,000 mai kahana!” Ibounai be imana idia patapataia. Hereva henia tauna ma ia gwau, “Dala idauidau ai ma haida dekenai Dirava ena Basileia do umui herevalaia taudia ibounai . . . , mani emui kara umui gwau, oibe.” Natudia be idia haere badabada idia gwau “Oibe!” Bena ia ese buka matamata ladana Natudia ia hahedinaraia, bona hebou taudia be nega daudau lalonai edia imana idia patapataia.

Unai lalona hamarerea herevana ia ore murinai, matamata taudia be laini latana idia karaia bona platfom dekenai idia daekau bena Tadikaka Rutherford ese unai buka matamatana ena kopi ta ta ia henidia. Unai kara dainai helai taudia idia tai. Unai kara ia itaia tauna ta ia gwau: “Hebogahisi lasi tauna sibona be matamata taudia edia kamonai bona abidadama bada edia Dirava, Iehova, dekenai idia hahedinaraia karana ese ena lalona do ia hamarerea lasi.”

Unai hebouhebou badana ai, matamata taudia 1,300 be ranu bapatiso amo edia gwauhamata Iehova dekenai idia hahedinaraia. Idia momo be abidadama dekenai idia gini goada ema bona hari. Edia kongregesen idia durua, Betele dekenai volantia gaukara idia karaia, eiava tano idauidau dekenai misinari gaukara idia karaia. Momokani, “Natudia Edia Dina” bona unai buka Natudia be matamata taudia momo edia kudouna lalonai idia laloatao hanaihanai!

“Toana be Nega Korikori ai Idia Mai”

Lagani 1970 lalonai, Iehova ena Witnes taudia ese matamata taudia tausen momo edia lalona idia hamarerea bukadia ma toi idia halasia. Unai buka be Hadibaia Tauna Badana Ita Kamonai Henia, Memero Kekeni​​—⁠Moale Umui Davaria Dalana, bona Lau Egu Bible Sivarai Buka. Lagani 1983 ai, “Matamata Taudia Idia Henanadai . . . ” ena kahana ta ta be Noga! magasin ai ia hedinarai matamaia. Unai sivarai ese matamata taudia bona taunimanima badadia edia lalona ia hamarerea momokani. Ena mauri lagani 14 matamata tauna ta ia gwau: “Hanuaboi iboudiai Dirava lau tanikiu henia, unai magasin ena hereva dainai.” Ena mauri lagani 13 kekenina ta ia gwau: “Unai sivarai lau ura henia,” bona “toana be nega korikori ai idia mai.” Tama sina bona Keristani elda taudia ese idia hamomokania, unai sivarai be nega korikorina ai idia mai bona namo idia havaraia.

Lagani 1989 ia abia neganai, “Matamata Taudia Idia Henanadai . . . ” herevadia 200 bamona be Noga! ai idia hedinarai. Unai lagani ai, “Dirava Kamonai Henia” Distrik Hebouhebouna dekenai, inai buka Memero Kekeni Edia Henanadai​​—⁠Haere Maorodia idia halasia. Unai buka ese matamata taudia ia durua abidadama dekenai idia gini goada totona, a? Matamata taudia toi idia gwau: “Inai buka be ai dekenai kohu namo hereana ta, ai ia durua emai hekwakwanai ai lalo-pararalaia bona hanaia dalana ai dibaia. Tanikiu, emai namo umui laloa bada dainai.” Tanobada ibounai lalonai inai buka idia duahia matamata taudia momo herea ese unai idia hamomokania.

“Emai Hitolo Lauma Dalanai Ia Haorea”

Lagani 1999 ai, Iehova ena Witnes taudia ese matamata taudia nega korikori ai hadibaia gauna ma ta idia karaia​​—⁠Young People Ask​​—⁠How Can I Make Real Friends? vidio. Moale bada ia havaraia. Mauri lagani 14 kekenina ta ia gwau: “Inai vidio ese egu lalona ia hamarerea.” Adavana lasi sinana ta ia gwau: “Inai vidio be emai lauma aniani ena kahana korikorina ta ai do ia lao.” Hahine matamata ta ia gwau: “Iseda Turana namona, Iehova, ese tanobada oreana lalonai matamata taudia ia lalokau henidia bada bona ia naridia, unai ita dibaia neganai, ita moale.”

Unai vidio ese dahaka ia havaraia? Matamata taudia idia gwau: “Lau ia durua egu hebamo karana lau naria, kongregesen dekenai egu hebamo lau habadaia, bona Iehova be egu turana ai ia lao.” “Lau ia durua egu bamodia vairanai lau gari lasi totona.” “Lau ia durua egu lalona lau hadaia goada Iehova do lau hesiai henia namonamo totona.” Bona headava tau bona hahine idia gwau: “Emai kudouna amo ai tanikiu inai ‘aniani’ be ai dekenai umui henia dainai. Emai hitolo lauma dalanai ia haorea.”

Horoa “hesiai tauna mai ena kamonai, bona mai ena kara maoromaoro” be Dirava ese ia henia gaukarana hegeregerena lauma aniani be nega korikorina ai do idia abia dae taudia dekenai ia henia. Bona ita moale badina hari inai negai Baibel ena hadibaia herevadia ese matamata taudia idia durua idia ‘gini goada bona Dirava ena ura ibounai idia diba namonamo’!