Iehova be Daika?

IEHOVA be mai ena kamonai ida Ia ia tomadiho henia tauna ta dekenai ia gwau: “Bema tau ta ese lauegu vairana ia itaia neganai, unai tau be do ia mase.” (Esodo 33:20) “Dirava be Lauma,” bona taunimanima ese edia matana amo idia itaia diba lasi. (Ioane 4:​24) Dina tubu ai dina ita raraia ese iseda matana do ia hadikaia hegeregerena, bema iseda dina mai ena diaridiari bada herea sibona lasi, to guba dekenai idia noho, edia momo ita duahia diba lasi dina ma iboudiai, ia havaraia siahuna ena Badina ita itaia, unai ese ita do ia hadikaia.

Ita moale badina Dirava ita diba totona ia ita itaia be anina lasi. Baibel ese ita totona harihari gauna namona, tanobada, ia hegaegaelaia Tauna bona ena kara ia hahedinaraia. Unai dainai, Baibel ita itaia be namo, mauri bona mauri ita moalelaia gabuna namona ia henia Tamana ita diba totona.

Ena Ladana Ena Anina

Ladana iboudiai be mai edia anina, ena be reana hari momo ese unai idia laloa lasi. Hegeregere, English gado ladana David, taunimanima momo idia abia ladana, be Heberu gado herevana amo ia mai, ena anina be “Idia Lalokau Henia.” Havaraia Tauna ena ladana, Iehova, be mai ena anina danu. Ena anina be dahaka? Matamanai, Heberu gado ai Baibel idia torea neganai, Dirava ena ladana be leta hani, YHWH, amo idia torea bona Baibel ena Heberu gado kahana ai, nega 7,000 bamona ia hedinarai. Idia gwau Dirava ena ladana ena anina be “Ia ese Ia Halaoa.” Ia hahedinaraia Iehova ese ena ura ia hagugurua totona mai ena aonega ida dahaka ai ia lao gwauraia be ia lao diba. Ia be Havaraia Tauna, Kota Biaguna, Hamauria Tauna, Mauri Naria Tauna, bona unai dainai ena gwauhamata ia hagugurudia diba. Ma danu, Heberu gado ai ladana Iehova idia torea neganai, ia ese ia karaia noho karana ta ia hahedinaraia. Oibe, Iehova ese ena ura ia hagugurudia tauna ai ia do lao noho. Ia be mauri Diravana!

Iehova Ena Kara Badadia

Baibel ia gwau Havaraia Tauna be ‘bogahisihisi bona hariharibada Diravana, badu dekenai ia haraga lasi, to bogahisihisi bona lalokau [“bona momokani,” NW] dekenai ia haraga, taunimanima momo herea dekenai ia bogahisihisi henia noho, bona kara dika, bona kara kerere idauidau ia gwauatao noho.’ (Esodo 34:​6, 7) Unai hereva “bogahisihisi” be mai anina bada Heberu herevana amo idia hahanaia. Ia hahedinaraia unai hebogahisi be mai ena lalokau ida gau ta dekenai ia noho ela bona ena ura unai gauna dekenai ia guguru. Idia hahanaia dalana ma ta be “lalokau mai abidadama.” Iehova ese lalokau dalana ai, ia havaraia taudia dekenai ena hebogahisi ia hahedinaraia noho bona ena ura namona ia hagugurua. Oi dekenai mauri ia henia Tauna ese unai bamona lalokau ia hahedinaraia be do oi laloa bada, ani?

Iehova ia badu haraga lasi bona iseda kerere ia gwauatao haraga. Unai bamona tauna kahirakahira ita noho neganai, iseda kudouna ia moale. To, ita gwau lasi unai ena anina be kara dika ia abia dae. Lasi. Ia gwau: “Lau ese kota maoromaorona lau ura henia, to dagedage bona taunimanima alaia kara dekenai lau badu henia.” (Isaia 61:8) Ia be kota maoromaoro Diravana dainai, kara dika idia karaia noho taudia do ia haheaukalaia hanaihanai lasi. Unai dainai, ita diba momokani ena nega maorona ai, Iehova ese inai tanobada ai idia vara kara gageva do ia hamaoromaoroa. Ia ese hisihisi ia ania tauna do ia rakatania lasi.

Lalokau bona kota maoromaoro be dala maorona ai ita hahedinaraia be auka. Bema oi be tamana ta o sinana ta, oiemu natudia idia kerere neganai, matahakani be edena negai, edena dala ai, bona edena bamona do oi henia oi abia hidi be auka, a? Kota maoromaoro bona hebogahisi mai ena lalokau be dala maorona ai oi gaukaralaia totona aonega bada oi abia be namo. Iehova ese taunimanima ia kara henidia neganai unai kara ia hahedinaraia badabada. (Roma 11:33-​36) Momokani, Havaraia Tauna ena aonega be gabu iboudiai dekenai ita itaia, hegeregere ia havaraia gaudia ibounai dekenai ia hedinarai.​—Salamo 104:24; Aonega Herevadia 3:​19.

To, aonega sibona ia hegeregere lasi. Havaraia Tauna ese ena ura do ia hagugurua totona, ia be mai ena siahu danu be gau badana, bona Baibel ese ia hahedinaraia iena siahu be bada, ia gwau: “Emui matana do umui negea, guba do umui itaia. Daika ese hisiu ia karaia? Dirava ese edia orea be ta ta, dekena amo idia ia mailaia hedinarai, bona idia ta ta ibounai edia ladana ia atoa noho. Iena siahu be bada herea dainai, hisiu ta ia boio diba lasi.” (Isaia 40:26) “Iena siahu be bada herea” dainai, Iehova ese gau iboudiai ia karaia haorea diba. Unai bamona kara ese oi ia veria ia dekenai, ani?

Bese Iboudiai Edia Dirava

Reana oi laloa, ‘To Iehova be “Taravatu Gunana,” idaunegai Israela ena Dirava, ani?’ Momokani Iehova ese Israela taudia dekenai sibona ia hahedinaraia. To, Iehova ese taunimanima ruaosi ginigunadia ia havaraia dainai, ia be ‘famili ibounai, tanobada dekenai, edia ladana ia henia’ Diravana. (Efeso 3:​15) Bema oi laloa oiemu tubudia oi matauraia be maoro, tau ginigunana, iseda tubuna, hari tanobada dekenai idia noho besedia iboudiai edia tubuna tamona, dekenai mauri ia henia Tauna ita matauraia danu be maoro, ani?

Taunimanima edia Havaraia Tauna be bese iboudiai ia laloa. Momokani, nega ta Israela besena ia tura henia momokani. To unai negai danu, heduru totona ena ladana idia boiboilaia taudia ibounai ia abia dae. Israela ena aonega pavapavana ta be Iehova ia guriguri henia neganai ia gwau: “Idau tauna ta, oiemu bese Israela tauna ta lasi, bema oiemu ladana namo herea sivarai ia kamonai dainai, . . . tano daudau dekena amo do ia mai, . . . unai neganai iena guriguri do oi kamonai, bona ia noinoi gauna do oi henia. Unai dekena amo tanobada bese ibounai ese oiemu ladana do idia diba.” (1 King Taudia 8:​41-​43) Ema bona hari, bese ibounai taudia be Iehova idia dibaia diba bona ena turadia namodia ai idia lao diba. To unai ena anina oi dekenai be dahaka?

Iehova Oi Dibaia Ena Namo

Hereva gunana ia gwauraia haheitalai mani oi laloa lou, bema idia kumia namonamo harihari gauna ta oi abia, momokani oi ura oi diba unai harihari gauna ena badina be dahaka. Edena dala ai do oi gaukaralaia bona oi naria be namo? Unai hegeregerena, ita ura ita diba Dirava ese ita totona tanobada ia hegaegaelaia neganai, ena ura be dahaka. Baibel ia gwau, “ia noho kava totona ia karaia lasi,” to “taunimanima idia noholaia” totona ia karaia.​—Isaia 45:18.

To, taunimanima momo ese Havaraia Tauna ena harihari gauna idia naria namonamo lasi. Idia ese tanobada idia hadikaia noho, bona Iehova ese unai kara ia ura henia lasi. To, ena ladana ena anina hegeregerena, Iehova ese ena lalona ia hadaia ena ura ginigunana taunimanima bona tanobada totona do ia hagugurua. (Salamo 115:16; Apokalupo 11:18) Ia ese tanobada do ia hanamoa lou bona ena kamonai natudia bamona idia ura idia mauri noho taudia dekenai do ia henia, edia ahuna bamona.​—Mataio 5:5.

Baibel ena buka ginigabena ese unai nega ai do idia vara gaudia ia herevalaia, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:3, 4) Unai nega lalonai taunimanima ta lasi be lalohisihisi dainai do ia tai eiava lalokau tauna ena mase ia taitailaia. Tau ta lasi be daradoko dainai heduru totona do ia noinoi eiava gorere dikana dainai hisihisi ia haheaukalaia. “Dirava ese mase danu do ia haorea.” (1 Korinto 15:26; Isaia 25:8; 33:24) Iehova ese iseda tubudia ginigunadia ia havaraia neganai, ia ura unai bamona maurina ita moalelaia.

Momokani, Iehova idia tomadiho henia taudia bogaraginai unai bamona noho namona, paradaiso bamona nohona, be hari oi mamia diba. Ia be idia ia hadibaia, ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emu raka dalana namona dekenai umui lau hakaua noho.” (Isaia 48:17) Iehova be ita, iena natudia, dekenai mauri dala namona ia hadibaia hebogahisi Tamana ta. Iena hakaua herevadia taunimanima totona ese gau momo idia taravatua lasi, to lalokau dalanai ita idia naria. Bema idia ita badinaia, ura kwalimu korikorina bona moale do ita abia, Baibel ena hereva hegeregerena, ia gwau: “Iehova be Lauma badana; bona Iehova ena lauma ia noho gabuna dekenai, ura kwalimu ia noho.” (2 Korinto 3:​17, NW) Iehova ena lohia siahuna idia abia dae taudia ese Baibel dekenai idia noho hakaua herevadia idia badinaia dainai, lalo-maino idia mamia hari, bona dina ta ai unai lalo-maino be taunimanima ibounai ese do idia abia.​—Filipo 4:7.

Iehova be hebogahisi Tamana! Oi ura gau iboudiai ia Havaraia Tauna do oi diba namonamo, a? Idia ura taudia ese davana namo hereana idia abia hari. Bona vaira negana lalonai idia abia hahenamo be do idia noho ela bona hanaihanai.

[Picture on page 5]

Heberu leta hani amo idia torea Dirava ena ladana be dubu gunadia momo edia haba dekenai idia hedinarai