Gwauhamata Dirava Ena Ura Idia Gwauraia Herevadia
“Iehova . . . be iena gwauhamata ia laloa hanaihanai, iena hahegani hereva unai, ia laloa ela bona uru 1,000.”—SALAMO 105:7, 8.
1, 2. Dahaka dainai ita momo ita gwau diba gwauhamata ta be mai ena siahu iseda mauri lalonai?
SEDIRA gwauhamata ta be—guna, hari, bona dina vairai mai siahuna emu mauri lalonai. Reana oi gwau, ‘Edena gwauhamata?’ Ia be headava gwauhamatana. Ita momo ita vara headava taudia amo bona ita momo be ita headava vadaeni. Ena be haida idia do headava lasi, to dina vairai dekenai headava namona do ia havaraia moalena idia laloa diba.
2 Idau negai Heberu peroveta tauna Malaki ia gwau, “oi matamata negana amo oi adavaia hahinena,” be “emu bamona bona emu adavana, gwauhamata dainai.” (Malaki 2:14-16) Ia gwau headava be gwauhamata ta, badina unai neganai taunimanima rua idia gwau bou kara ta do idia karaia hebou totona. Headava gwauhamatana ena kahana be rua, tau bona hahine idia gwauhamata heheni do idia headava totona, headava ena maduna idia huaia totona, bona do idia vara hahenamodia idia laloa noho.
3. Dahaka dainai gwauhamata ma haida be mai edia siahu bada iseda mauri lalonai, bona idia ese headava gwauhamatana ena siahu idia hanaia?
3 Reana oi laloa gwauhamata iboudiai amo headava gwauhamatana ena anina be bada iseda mauri lalonai, to Bible ese mai anina bada gwauhamatadia haida ia herevalaidia. Encyclopedia bukana ta ese Bible ia gwauraia gwauhamatadia, bona Bible idia abia dae lasi tomadiho oreadia idia gwauraia gwauhamatadia edia idau ia gwauraia, ia gwau, Bible lalonai “Dirava ese iena taunimanima dekediai gwauhamata ia karaia dalana ia hahedinaraia, bona ia be mai anina guba bona tanobada ibounai dekenai.” Oibe, unai gwauhamata be mai edia anina bada iseda Havaraia lalokau Diravana ena ura ia havaraia totona. Dohore oi lalo-parara unai gwauhamatadia be mai edia anina bada bema gabeai oi ura hahenamo do oi abidia. To reana oi gwau, ‘Edia anina be dahaka?’
4. Edena gwauhamata hereva ginigunana ese Dirava ena ura ia herevalaia?
4 Reana oi diba vadaeni, Adam bona Eva ese Dirava ena siahu idia dadaraia neganai dika bada idia havaraia. Idia dekena amo kara dika ia hanai ita ibounai dekenai, unai dainai gorere idauidau ita davaria, bona mase ita lao henia. (Genese 3:1-6, 14-19) Ena be idia kara dika, to ita moale badina edia kara ese Dirava ena ura ia koua lasi; iena ura be tomadiho momokani taudia ese tanobada do idia hahonua, bona gorere lasi dekenai do idia mauri hanaihanai mai moale ida. Unai be iena ura dainai Genese 3:15 (NW) dekenai Iehova ese inai gwauhamata ia karaia, ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” To, unai gwauhamata herevana be kwadogi bona ia be parabole herevana dainai taunimanima edia henanadai be momo. Iehova ese ia karaia gwauhamatana be edena bamona do ia hagugurua?
5, 6. (a) Dirava ese dahaka ia karaia iena ura ia hagugurua totona? (b) Dahaka dainai Dirava ena ura do ia hagugurua dalana ita tahua be namo?
5 Dirava ese dala ia kehoa gwauhamata haida ia karaia totona, Eden gwauhamatana bona ma 6 ia karaia, iboudiai be 7. Bema iseda helaro be hahenamo do ita abia ela bona hanaihanai, unai gwauhamata edia anina ita diba be gau badana. Dirava ia ura kamonai taudia dekenai mauri hanaihanai ena hahenamo do ia henidia, unai dainai ita ura diba unai gwauhamata be edena negai, edena dala amo, daidia dekenai ia karaia, dahaka do idia karaia, bona edia anina be dahaka Dirava ena ura dekenai. Hari be nega namona unai gwauhamata edia anina ita riviulaidia totona, badina April 10, 1990 ai, kongregesen iboudiai edia Keristen taudia do idia hebou, Lohiabada ena Adorahi Anianina idia hahelagaia totona, bona unai be mai anina unai gwauhamata dekediai.
6 Momokani, taunimanima haida reana idia laloa unai gwauhamata be idau negai gaudia dainai, bona idia be taravatu herevadia dainai, edia anina be bada lasi iseda mauri lalonai. To, namona be Theological Dictionary of the Old Testament bukana ena hereva oi laloa, ia gwau: “Idau negai, Near East, Greek bona Roma dekediai ‘gwauhamata’ . . . karaia daladia be rua: ta be gwauhamata herevana bona hagugurua dalana, ta be lalokau bona turana karana.” Iehova ia karaia gwauhamata lalodiai unai dala rua idia noho—idia lalodiai gwauhamata herevana bona turana karana—ita itaia diba.
Abraham Gwauhamatana—Hahenamo Hanaihanai Abia Dalana
7 Idau negai tauna, Abraham, ena “abidadama dainai” Dirava ia gwau ia be abidadama taudia edia tamana, bona ia be “Dirava ena turana.” (Roma 4:11; Iakobo 2:21-23) Dirava be ia dekenai gwauhamata ia karaia, bona unai gwauhamata amo hahenamo hanaihanai do ita abia diba.—Heberu 6:13-18.
7, 8. Abraham dekenai Dirava ia karaia gwauhamatana be dahaka? (1 Sisiga 16:15, 16)
8 Abraham be Uru hanua dekenai ia do noho neganai, Iehova ese Abraham ia hamaoroa Uru do ia rakatania bona ma tano ta dekenai do ia lao, Kanana tanona ai ia lao unai. Unai nega lalonai Iehova ese Abraham dekenai ia gwau: “Lau be oi amo bese bada hereana ta do lau havaraia, bona oi do lau hanamoa, bona oiemu ladana do lau habadaia; . . . tanobada ena bese ibounai be oi dainai sibona do idia hanamoa.”a (Genese 12:1-3, NW.) Murinai, Dirava ese sisina sisina unai gwauhamata ena hereva ma haida ia gwauraia hedinarai, bona mai maoro danu hari ita gwauraia Abraham gwauhamatana ia atoa kau, gaudia be inai; Abraham garana, eiava ena kohu do ia abia natuna, be Gwauhamata Tanona do ia abia; iena garana do idia momo herea; bona Abraham bona Sara edia amo pavapava do idia vara.—Genese 13:14-17; 15:4-6; 17:1-8, 16; Salamo 105:8-10.
9. Edena bamona ita diba Abraham gwauhamatana be mai anina ita dekenai?
9 Dirava ia gwau, “lauegu gwauhamata oi [Abraham] bona lau huanai lau karaia gauna.” (Genese 17:2) To unai gwauhamata be mai anina ita dekenai danu, badina gabeai Dirava ese unai gwauhamata ena anina ia habadaia, ia gwau: “Lau gwauhamata inai, emu garana momo oi dekenai do lau henia, guba dekenai noho hisiu, bona kone dekenai noho miri bamona. Oiemu garana ese idia do idia dagedage henia taudia edia hanua ena vareai gabuna do ia biagua. Tanobada besedia ibounai . . . ese sibodia do idia hanamoa oiemu garana amo.” (Genese 22:17, 18, NW.) Ita be unai bese taudia haida; bona gabeai do idia vara hahenamo do ita abia diba.
10. Abraham gwauhamatana amo dahaka ita diba?
10 Namona be hari, Abraham gwauhamatana ena anina do ita tahua. Guna, Eden gwauhamatana hegeregerena, Abraham gwauhamatana ese “garana” ia herevalaia, unai hereva dainai ita diba inai garana be taunimanima amo do ia vara. (Genese 3:15) Sem, Abraham, bona ena natuna Isako edia iduhu dekenai amo do ia vara. Unai iduhu amo pavapava do idia vara, bona dala do ia kehoa unai iduhu taudia mo sibodia lasi, to tanobada besedia iboudiai ese hahenamo do idia abia totona. Unai gwauhamata herevana be edena dala amo ia guguru?
11. Abraham gwauhamatana be edena dala amo ia guguru?
11 Abraham ena garana be Iakobo, eiava Israel dekena amo idia vara bona idia momo idia lao ela bona bese badana ai idia lao. Abraham ena garana korikoridia idia momo dainai idia duahidia diba lasi, bona idia gwauhamata vadaeni Abraham, Isako, bona Iakobo edia Dirava idia tomadiho henia. (Genese 28:13; Esodo 3:6, 15; 6:3; Kara 3:13) Nega momo Israel taudia be tomadiho momokanina idia rakatania, to “Iehova ese ia lalo-namo henidia, ia hebogahisi henidia, . . . ena gwauhamata Abraham bona Isako bona Iakobo dekenai dainai, ia ura lasi ia haoredia.” (2 Hanua Pavapavadia 13:23; Esodo 2:24; Levitiko 26:42-45) Dirava ese Keristen kongregesen be ena taunimanima ai ia halaodia murinai, nega sisina lalonai Israel taudia ia do kara namo henidia, idia be Abraham ena garana taudia dainai.—Daniel 9:27.
Abraham Garana Lauma Dalanai
12 Abraham gwauhamatana ena anina ma ta ia noho, bona lauma dalanai ia guguru. Iesu ena nega vairanai taunimanima ese unai gwauhamata badana ena guguru negana idia itaia diba lasi, to hari inai nega lalonai ena anina ia hedinarai vadaeni dainai ita moale. Dirava ena Hereva lalonai unai gwauhamata ia guguru ena anina ia hedinarai. Paulo ia gwau: “Buka Helaga ia torea lasi ‘natuna momo,’ to ia torea be ‘natuna’ tamona sibona. Unai ‘Natuna’ be Keriso.”—Galatia 3:16.
12, 13. Abraham gwauhamatana be lauma dalanai ia guguru neganai, edena bamona ia hahedinaraia Iesu be Abraham garana ena kahana badana?
13 Oibe, unai natuna eiava garana be iduhu tamona amo do ia vara, bona unai ia momokani Iesu dekenai, ia be Iuda korikori besena lalonai ia vara, ia be Abraham ena bese tauna korikorina ta. (Mataio 1:1-16; Luka 3:23-34) Ma danu, ia be guba dekenai ia noho Abraham Badana ena bese tauna ta. Inai oi laloatao, mai ena abidadama bada ida Abraham ena lalona ia hadaia ena natuna Isako do ia bouboulaia, bema unai be Dirava ena ura. (Genese 22:1-18; Heberu 11:17-19) Unai hegeregerena, Iehova ese ena natuna tamona sibona ia siaia diho tanobada dekenai, boubou dekenai ia ese ena mauri do ia henia mai edia abidadama taudia do ia hamauridia totona. (Roma 5:8; 8:32) Unai dainai Paulo ia hahedinaraia unai gwauhamata ia gwauraia garana, Abraham garana ena kahana badana be Iesu Keriso.
14. Abraham garana ai idia lao taudia ma haida be daidia, unai dainai dahaka ita ura diba?
14 Danu Paulo ia hahedinaraia unai gwauhamata be lauma dalanai ia guguru neganai, Dirava ese ‘Abraham ena bese do ia habadaia.’ Ia gwau: “Bema umui be Keriso ena taudia neganai umui be Aberahamo ena natuna, bona Dirava ena gwauhamata gauna do umui davaria.” (Genese 22:17; Galatia 3:29) Unai taudia be lauma ia horodia 144,000 Keristen taudia, bona idia be Abraham ena garana kahana iharuana taudia. Idia be unai garana kahana badana idia inai henia lasi, to idia danu be “Keriso badinaia taudia.” (1 Korinto 1:2; 15:23) Ita diba idia momo be Abraham ena bese korikoridia lasi, badina idia be Iuda besedia amo idia vara lasi. Lauma dalanai idia be Abraham Badana ena amo lasi bona Iehova ena bese korikori taudia lasi; to idia be kara dika tauna Adam ena bese taudia amo idia vara. Vadaeni inai hereva ia guguru totona, ita ura diba edena dala amo “Abraham ena natudia” ai do idia lao diba. Gwauhamata ma haida ese unai dala idia hahedinaraia.
Mose ena Taravatu Gauhamatana be Noho Hanaihanai Gauna Lasi
15 Dirava ese Abraham gwauhamatana ia karaia iena ura do ia havaraia totona, to murinai iduhu korikori ia dika eiava ia doko garina, edena bamona ia naria ela bona unai Garana do ia vara? Unai Garana ia vara neganai, tomadiho momokani taudia be edena bamona do idia diba? Paulo ese unai henanadai ia haerelaia, ia gwau Dirava be mai aonegana dainai Mose ena Taravatu gwauhamatana ia henidia idia ia naridia totona. Aposetolo tauna ia gwau:
15-17. (a) Dahaka dainai Abraham gwauhamatana dekenai Mose ena Taravatu ia atoa kau? (b) Mose ena Taravatu be unai gaudia be edena bamona ia hamomokanidia?
16 “Vadaeni, Taravatu ena badina be dahaka? Ena badina be inai bamona: Dirava ia ura kara dika ena anina ia hedinaraia, unai dainai gwauhamata ia henia murinai Dirava ese Taravatu ma ia atoa. Bona inai Taravatu do ia noho ela bona Keriso, Aberahamo ena natuna do ia ginidae. Unai Natuna dekenai be Dirava ese iena gwauhamata ia henia vadaeni. Inai Taravatu be aneru edia durua dekena amo Dirava ese huanai ia gini tauna Mose dekenai ia henia. . . . Taravatu be iseda naria tauna bamona, ia mai bona Keriso ia ginidae. To Keriso ia ginidae neganai abidadama dekena amo Dirava vairanai do ita maoromaoro diba.”—Galatia 3:19, 24.
17 Sinai Ororona dekenai, Iehova be sibona bona Israel besena padanai gwauhamata ta ia karaia—Mose ena Taravatu gwauhamatana unai, bona Mose be unai Taravatu ena gwau kau tauna.b (Galatia 4:24, 25) Unai bese taudia idia gwau idia ura unai gwauhamata idia karaia, bona boromakau bona nanigosi maruanedia edia rara amo unai gwauhamata idia hamomokania. (Esodo 24:3-8; Heberu 9:19, 20) Taravatu gwauhamatana ese Israel besena ia hadibaia Dirava ena taravatu be dahaka, bona kara maoromaoro gavamani karaia dalana ia hahedinaraia. Unai gwauhamata be Dirava tomadiho henia lasi taudia adavaia karana, bona edia kara bodaga tomadiho koikoi karadia ia taravatulaidia. Ia ese Israel taudia ia naridia bona do ia vara garana ena iduhu ia naria ia dika garina. (Esodo 20:4-6; 34:12-16) To Israel taudia be mai edia kara dika dainai idia ta lasi be Mose ena Taravatu iboudiai idia badinaia diba, ia ese edia kara dika ia hahedinaraia. (Galatia 3:19) Danu ia hahedinaraia namona be goevadae, noho hanaihanai hahelaga tauna bona boubou gauna tamona do idia abia, lagani ta ta iboudiai idia bouboulaia gauna bamona lasi. Mose ena Taravatu be naria tauna bamona, natuna ia hakaua lao hadibaia tauna korikori dekenai bamona. Unai tauna be Mesia, eiava Keriso. (Heberu 7:26-28; 9:9, 16-22; 10:1-4, 11) Ena gaukara ia karaia guguru neganai, Mose ena Taravatu gwauhamatana ia ore.—Galatia 3:24, 25; Roma 7:6.
18. Mose ena Taravatu gwauhamatana lalonai ia gwau dahaka do ia vara, bona dahaka dainai unai be daradaralaia gauna?
18 Do ia noho hanaihanai lasi gwauhamatana ia karaia neganai, Dirava ese mai moale gauna badana ta ia herevalaia, ia gwau: “Harihari bema lauegu hereva do umui kamonai henia, bona egu taravatu do umui badinaia neganai, umui be lauegu bese korikori do umui lao. . . . Umui be lauegu helaga taudia ai do lau halaoa, bese helagana ai do umui lao.” (Esodo 19:5, 6, NW.) Unai be hoa gauna momokani! Pavapava bona hahelaga besena ai do idia lao. To, edena bamona unai do ia vara diba? Unai Taravatu ese ia gwauraia, ia gwau pavapava edia iduhu (Iuda) bona hahelaga taudia edia iduhu (Levi) edia gaukara maduna be idau. (Genese 49:10; Esodo 28:43; Numera 3:5-13) Tau ta be pavapava dagina bona hahelaga dagina nega tamona ia abia diba lasi. To, Dirava ena hereva Esodo 19:5, 6 dekenai ese idia hahedinaraia dala ta do ia kehoa, bena Mose ena Taravatu gwauhamatana dekenai idia vareai memba taudia be “hahelaga taudia bona pavapava besena ai idia lao diba.”
David Ladanai Basileia Gauhamatana
19 Gabeai Iehova ese ma gwauhamata ta ia karaia, iena ura do ia hagugurua dalana, bona ia hahedinaraia goevagoeva hahenamo hanaihanai do ita abia diba totona. Ita kikilaia vadaeni gauna be Abraham gwauhamatana, unai ese Abraham besena korikori taudia dekenai pavapava dagina do ia noho ia perovetalaia. (Genese 17:6) Danu, Mose ena Taravatu gwauhamatana ese Dirava ena taunimanima dekenai pavapava dagina do ia noho ia perovetalaia, badina Mose ese Israel taudia ia hamaorodia, ia gwau: “[Gwauhamata Tanona] dekenai do umui noholaia neganai; bema do umui gwau, ‘Namona be pavapava ta ese ita do ia lohiaia, bese idaudia hegeregeredia’; Iehova, emui Dirava, ese do ia abia hidi tauna be emui pavapava ai do umui halaoa. . . . Idau bese tauna ta do umui abia diba lasi.” (Deuteronomi 17:14, 15) Dirava ese unai pavapava dalana be edena bamona do ia havaraia, bona ena anina be dahaka Abraham gwauhamatana dekenai?
20. Edena bamona David bona ena iduhu be mai edia ahuna unai gwauhamata dekenai?
20 Israel ena pavapava ginigunana be Beniamina iduhu tauna Saulo, bona ia murinai Iuda iduhu tauna David, gari lasi bona mai abidadama goada tauna, be pavapava dagina ia abia. (1 Samuel 8:5; 9:1, 2; 10:1; 16:1, 13) David be sisina daudau pavapava dagina ia abia murinai, Iehova ese David dekenai gwauhamata ta ia karaia. Ena hereva ginigunana be inai: “Lau ese oiemu natuna do lau haginia oi murinai; ia be oiemu tauanina amo do ia vara, bona lau ese ena basileia do lau haginia. Ia ese ruma ta do ia haginia, lauegu ladana ena, bona lau ese iena basileia terona do lau haginia, bona do ia noho ela bona hanaihanai.” (2 Samuel 7:12, 13) Unai siri ia hahedinaraia hegeregerena, David natuna Solomon ese ena tamana murinai pavapava dagina ia abia, bona Dirava ese ia gaukaralaia ruma ta, eiava dubu Ierusalem dekenai ia haginia totona. To, unai sibona lasi.
21. David Ladanai Basileia gwauhamatana ese dala ia kehoa dahaka do ia vara totona?
21 Iehova ese David dekenai inai bamona ia gwauhamata henia: “Emu iduhu bona emu basileia be oiemu vairanai do idia gini goada ela bona gwauraia lasi neganai; emu terona do ia gini goada ela bona gwauraia lasi neganai.” (2 Samuel 7:16) Ia hedinarai goevagoeva, Dirava ese dala ia kehoa Israel lalonai David ena iduhu amo pavapava do idia abidia hidi totona. To unai sibona lasi, gabeai David ena iduhu amo ta do ia mai bona do ia pavapava “ela bona gwauraia lasi neganai, iena terona do ia noho, dina be [Dirava] vairanai ia noho hegeregerena.”—Salamo 89:20, 29, 34-36; Isaia 55:3, 4.
22 Vadaeni, unai David ladanai gwauhamatana ese Garana do ia mai dalana ia hahedinaraia. Keristen ginigunadia edia negai, Iuda taudia idia diba Mesia be David ena iduhu dekena amo do ia vara. (Ioane 7:41, 42) Iesu Keriso, Abraham gwauhamatana ia gwauraia garana badana unai, be ia hegeregere David ena Basileia dekenai ia lohia ela bona hanaihanai, bona aneru ta ese unai idia hamomokania. (Luka 1:31-33) Vadaeni, Iesu be gwau maoro ia abia Gwauhamata Tanona do ia lohiaia totona, guna David ese ia lohiaia tanobadana ia laulaulaia tanona unai. Unai ita diba neganai, do ita daradara lasi Iesu dekenai; momokani ia pavapava noho, bona unai dagi ia henaoa lasi, to Dirava ia karaia gwauhamatana dainai pavapava dagina ia abia be maoro.
23. Edena henanadai edia haere ita do tahua noho?
23 Dirava ese ia karaia gwauhamatadia hani sibodia ita kikilaidia vadaeni, bona Dirava ena ura inai tanobada taudia hanamodia totona hagugurua dalana idia hahedinaraia. To, reana, oi do daradara sisina. Reana inai henanadai oi lalodia noho: Taunimanima be mai edia kara dika dainai, hahelaga tauna eiava boubou henia karana, be edena bamona unai kara dika ia kokia momokani diba? Taunimanima be edena bamona gwau maoro do idia abia diba Abraham garana ai idia lao totona? Gwau maoro do idia abia tanobada lohiaia totona sibona, eiava edia lohia siahuna do ia bada guba idia lohiaia totona danu? Abraham garana badana bona unai garana ena kahana iharuana ai idia lao taudia ese edena dala amo hahenamo ita dekenai, bona “tanobada ena bese ibounai” dekenai do idia mailaia diba? Namona be hari unai hereva ita tahua.
[Footnotes]
a “Gwauhamata karana be gau badana Israel tomadihona dekenai, unai gwauhamata sibona ese taravatu idia atoa Dirava tamona idia tomadiho henia totona, bona nega tamona dirava ma haida tomadiho henidia karana, tomadiho idaudia ese idia karaia karana unai, ia taravatulaia.”—Theological Dictionary of the Old Testament, Volume II, rau 278.
b Inai be tau tamona sibona ia karaia gwauhamatana, badina karaia tauna (Dirava) sibona be mai ena maduna hereva ia hagugurua totona.
Oiemu Haere be Dahaka?
◻ Edena bamona Abraham gwauhamatana be dala ia kehoa hahenamo hanaihanai do ita abia totona?
◻ Abraham ena garana korikoridia be daidia? Lauma dalanai idia be daidia?
◻ Badina be dahaka Abraham gwauhamatana dekenai Mose ena Taravatu ia atoa kau?
◻ Edena bamona David Ladanai Basileia gwauhamatana ese Dirava ia ura karaia gauna ia durua?
19. Unai gwauhamata lalodiai pavapava karaia dalana be edena bamona idia hahedinaraia?
22. Edena bamona David gwauhamatana be mai anina do ia vara Garana dekenai, bona dahaka ia vara?
[Diagram on page 15]
(For fully formatted text, see publication)
Eden gwauhamatana Genese 3:15
Abraham gwauhamatana
Garana kahana badana
Garana kahana iharuana
Hahenamo hanaihanai
[Diagram on page 16]
(For fully formatted text, see publication)
Eden gwauhamatana Genese 3:15
Abraham gwauhamatana
Mose ena Taravatu
David Ladanai Basileia gwauhamatana
Garana kahana badana
Garana kahana iharuana
Hahenamo hanaihanai
[Picture on page 10]
Iena ura taunimanima dekenai havaraia totona, Dirava ese kamonai tauna Abraham dekenai gwauhamata ia karaia.