Tulu Matamatana Ita Abia Baibel Stadi Hamatamaia Totona!
1 America hahinena ta be Roman Katolik tomadihona ia goadalaia hahinena. Dubu ena hahediba herevadia edia maoro ia gwauraia goadagoada. Ia ese Vatican ia vadivadi henia danu. To, Iehova ena Witnes tauna ta be ena ruma dekenai ia lao neganai, Baibel stadi ia abia dae. Dahaka dainai? Badina Baibel ena hereva ia ura dibaia bona ena dubu dekenai Baibel stadi idia karaia lasi. Unai ekspiriens amo dahaka ita dibaia? Ita diba lasi daika ese davana lasi Baibel stadi do ia abia dae.—Had. 11:6.
2 Ita ese idia ura taudia danu mai moale ida Baibel ita stadilaia be nega haida taunimanima dekenai oi gwauraia be ia auka, a? Emu gabu dekenai taunimanima iboudiai idia diba unai davana lasi gaukarana ita karaia, a? Edena bamona ita hamomokania diba unai idia diba? Tulu matamatana ita gaukaralaia amo! Unai tulu be toana namona rau 6 pepapepana ladana Oi Ura Baibel Do Oi Diba Namonamo, A? Namona be unai pepapepa ena kwara hereva maragidia ta ta ita dibaia.
3 “Dahaka Dainai Baibel Oi Duahia be Namo?” Pepapepa ese ia henia badina idauidau be namo herea. Ia gwau Baibel ese “Dirava ena lalokau hadibaia herevadia,” guriguri amo iena heduru noia dalana, bona iena harihari gauna mauri hanaihanai abia dalana ia hahedinaraia. (1 Tes. 2:13) Pepapepa ese Baibel lalonai idia noho “lalo-parara idia havaraia hereva momokanidia” ia gwauraia, hegeregere mase murinai dahaka ia vara bona tanobada dekenai hekwakwanai momo idia vara ena badina. Ia ese “Dirava ena hakaua herevadia Baibel lalonai” ia herevalaia, idia ita badinaia neganai tauanina dalanai namo ia havaraia bona moale, helaro, bona kara namodia ma haida idia habadaia. Pepapepa ese Baibel ita duahia be namo ena badina ma ta ia gwauraia—unai be kahirakahira do idia vara gaudia idia hahedinaraia peroveta herevadia.—Apok. 21:3, 4.
4 “Heduru Namona Baibel Lalo-Pararalaia Totona”: Pepapepa ia gwau: “Ita ibounai be Dirava ena Hereva lalo-pararalaia totona heduru ita abia be namo.” Bena Baibel ita stadilaia dalana ia hahedinaraia, ia gwau: “Baibel oi stadilaia dalana namona be hahediba hereva badadia amo oi matamaia, bona kahana ta ta amo emu diba oi habadaia.” Pepapepa ese ia hahedinaraia goevagoeva “Baibel be diba abia bukana badana,” to ia gwau danu, Dahaka Ita Karaia? buklet ese stiuden tauna ‘do ia durua gau badadia idauidau dekenai Baibel ena hereva ia lalo-pararalaia totona.’ Hereva kwarana maragina gabena ese lalona veria henanadai ia gwauraia.
5 “Oi Ura Pura Ta Ta Lalonai Nega Oi Atoa Baibel Oi Lalo-Pararalaia Totona, A?” Pepapepa ese ia hahedinaraia stiuden tauna dekenai ia namo negana bona gabuna ai Baibel stadi ia abia diba, ena ruma dekenai eiava telefon amo. Daika be unai herevahereva lalonai ia vareai diba? Pepapepa ia haere: “Oiemu famili taudia ibounai. Oi ura oi boiria mai turadia danu idia vareai diba. To bema oi ura oi sibona ida do idia herevahereva, unai bamona umui karaia diba.” Stadi ena lata be edena bamona? Ia gwau: “Taunimanima momo be pura ta ta ai hora tamona idia atoa unai Baibel stadi totona. Bema oi be unai totona pura ta lalonai nega bada oi atoa diba eiava nega sisina oi atoa diba, Witnes taudia be oi durua totona dala do idia karaia.” Unai be mai anina bada! Ita ura stiuden iboudiai edia noho dalana hegeregerena stadi ita karaia.
6 “Boiboi ta Diba Oi Abia Totona”: Pepapepa ia abia tauna ese rau dokona ai ia noho toretore amo ia noinoi diba, Dahaka Ita Karaia? buklet ia abia eiava ta ese ia dekenai davana lasi Baibel stadi program ia hahedinaraia totona. Dahaka Ita Karaia? buklet ena rau ginigunana be mai ena kala ida ia hedinarai. Oi itaia diba dahaka dainai inai pepapepa ese kudou-maoro taudia momo do ia hagoadaia heduru idia abia totona, ani? Vadaeni, edena bamona inai tulu matamatana ita gaukaralaia namonamo diba?
7 Daidia Dekenai Oi Hahedinaraia Diba? Pepapepa be taunimanima dekenai oi henia eiava taunimanima idia noho lasi rumadia dekenai oi rakatania diba. Ruma-ta-ruma-ta gaukarana ai, dala gaukarana ai, bona bisinesi teritori dekenai oi hariharilaia diba. Taunimanima dekenai oi henia, herevana iseda buka idia abia eiava idia dadaraia. Oi hariharilaia magasin eiava buka ma haida lalonai oi udaia. Revareva oi torea neganai pepapepa oi siaia danu. Telefon amo oi hereva henia taudia dekenai oi siaia. Hanaihanai, sitoa dekenai oi lao, PMV eiava peleini ai oi guia, bona nega bona gabu idauidau dekenai oi haroro neganai, oi hariharilaia. Emu ruma dekenai idia mai taudia ibounai dekenai oi henia. Emu varavara, dekena taudia, gaukara turadia, sikuli turadia, bona oi diba taudia ma haida dekenai oi henia. Oi davaria taudia ibounai dekenai inai pepapepa oi henia toho! Bena dahaka oi karaia?
8 Bema Maoromaoro Idia Haere: Taunimanima haida be maoromaoro idia haere bona idia gwau Baibel stadi idia ura abia. Unai dainai, haroro gaukara oi karaia negadia ibounai lalonai, namona be oi dekenai Dahaka Ita Karaia? buklet rua idia noho—ta be stiuden tauna totona bona ta be oi totona. Bema ta ia ura, maoromaoro stadi oi hamatamaia. Rau 2 oi kehoa, bona “Inai Buklet Gaukaralaia Dalana” oi duahia. Bena kahana 1 oi hamatamaia, bona stadi dalana oi hahedinaraia. Unai be auka lasi, ani?
9 Bema Kamonai Tauna Ia Ura Ia Laloa Guna: Nega daudau lasi murinai, ia oi lou henia. Unai oi karaia neganai, namona be oi dekenai Dahaka Ita Karaia? buklet ia noho. Rau 2 dekenai ia noho Anina oi hahedinaraia. Dala oi kehoa ia ura kahana ia abia hidi totona. Unai kahana oi kehoa, bona umui stadilaia matamaia.
10 Magasin Idia Abia Taudia Lou Henia: Bema magasin ida pepapepa oi rakatania, reana oi giroa lou neganai inai bamona oi gwau: “Guna lau mai neganai, lau moale badina oi dekenai Gima Kohorona ta lau rakatania diba. Reana oi itaia unai magasin ena ladana korikorina be Gima Kohorona—Iehova Ena Basileia Ia Harorolaia. Hari lau ura unai Basileia bona ena anina oi bona emu ruma bese dekenai lau hahedinaraia.” Bena Dahaka Ita Karaia? buklet ena kahana 6 oi kehoa. Paragraf ginigunana amo oi hamatamaia bona ruma tauna ena nega hegeregerena, buklet umui duahia bona herevalaia. Bena dala oi karaia, dina ma ta ai do oi giroa lou bona unai kahana umui haorea.
11 Pepapepa Momo Idia Noho be Namo: Namona be haroro naria tauna bona buka naria tauna idia hekwarahi, hanaihanai kongregesen dekenai Baibel Oi Diba pepapepadia momo idia noho totona. Namona be idia haida be emu poketi eiava baege, emu motuka, emu gaukara gabuna, sikuli, bona emu ruma ena iduara kahirakahira dekenai—idia oi gaukaralaia diba gabudia ibounai dekenai—idia noho. Bona momokani, emu haroro baege lalonai haida idia noho danu be namo, Baibel oi herevalaia taudia dekenai oi henia totona.
12 Emai Ura be Iehova ese Iseda Gaukara Ia Hanamoa: Keristani taudia ibounai edia tahua gauna namona be ma ta dekenai hereva momokani idia hadibaia. (Mat. 28:19, 20) Hari Baibel stadi ta oi karaia, a? Bema oibe, pura ta ta ai nega oi davaria stadi ma ta oi karaia totona, a? Bema hari Baibel stadi oi karaia lasi, reana oi ura oi karaia, ani? Baibel stadi davaria totona oi hekwarahi lalonai, Iehova oi noia emu gaukara do ia hanamoa. Bena unai guriguri hegeregerena oi kara.—1 Ioa. 5:14, 15.
13 Stadi hamatamaia totona tulu matamatana ita abia! Unai tulu oi dibaia namonamo. Oi hariharilaia goadagoada. Oi karaia diba gaudia ibounai oi karaia ‘namo gaudia oi karaia, kara namodia dekenai oi taga, oi hariharibada’ bona Dirava ena Hereva dekenai oi dibaia gaudia ‘oi ura bada oi hariharilaia.’—1 Tim. 6:18, NW.
[Box on page 6]
PEPAPEPA HARIHARILAIA NEGADIA
◼ Dina ta ta ai ma haida ida ita herevahereva neganai
◼ Ta ese iseda buka eiava magasin ia abia dae neganai
◼ Ruma dekenai ta ia noho lasi neganai
◼ Lou henia ita karaia neganai
◼ Dala gaukara lalonai ta ita davaria neganai
◼ Bisinesi teritori dekenai ita haroro neganai
◼ Nega bona gabu idauidau dekenai ita haroro neganai
◼ Revareva ita torea neganai
◼ PMV eiava peleini ai ita guia neganai
◼ Ta be eda ruma dekenai ia mai neganai
◼ Varavara, dekena taudia, gaukara turadia, sikuli turadia, bona ita diba lasi taudia ma haida ida ita hereva neganai