Taunimanima Ma Haida Durudia Dirava Do Idia Tomadiho Henia Totona

“Bema ekalesia dalana diba lasi o Dirava abidadama henia lasi tauna ia raka vareai, . . . iena hunia laloa do ia gwauraia hedinarai, vadaeni Dirava vairanai do ia tomadiho.”​—1 KORINTO 14:​24, 25.

1-3. Korinto hanuana dekenai taunimanima momo be edena bamona idia durudia Dirava ese do ia lalo-namo henidia totona?

APOSETOLO Paulo ese misinari gaukara do ia karaia totona ia laolao negana iharuana lalonai, lagani ta mai kahana lalonai Korinto hanuana dekenai ia noho. Unuseniai Paulo be “nega ibounai ia haroro goada noho.” Unai dainai “Korinto taudia momo danu, Paulo ena haroro idia kamonai, idia abia dae danu bona bapatiso idia abia.” (Kara 18:​5-11) ‘Dirava ese ia boiridia iena helaga taudia do idia lao totona.’​—1 Korinto 1:2.

² Gabeai, Apolo be Korinto dekenai ia lao. Guna, Prisikila bona Akula ese idia durua, “Dirava ena dala ibounai,” bapatiso ena anina danu, do ia lalo-pararalaia namonamo totona. Unai dala amo ia be Keristen tauna ai ia lao, bona Dirava ese ia lalo-namo henia. (Kara 18:​24–19:7) Apolo ese guna ‘kaivakuku, hereva diba lasi gaudia dekenai idia hakaudia lao’ Korinto taudia ia durudia. (1 Korinto 12:2) Reana edia ruma lalodiai unai taudia ia hadibadia; danu Keristen heboudia dekenai idia lao neganai, diba idia abia.​—Kara 20:20; 1 Korinto 14:​22-24.

³ Unai bamona idia hadibadia dainai, taunimanima momo, guna idia be ‘ekalesia dalana diba lasi o Dirava abidadama henia lasi’ taudia, be tomadiho momokani lalonai idia vareai. Tatau bona hahine be lauma dalana ai idia goada idia lao, bena bapatiso bona Dirava ena lalo-namo idia abia neganai, unai ese moale ia havaraia! Hari inai negai danu unai kara ese moale ia havaraia noho.

‘Ekalesia Dalana Diba Lasi o Dirava Abidadama Henia Lasi Taudia’ Durudia Dalana

⁴ Hari inai negai Iehova ena Witness taudia ese Iesu ena hahegani idia badinaia dainai, ‘bese ibounai be diba tahua taudia idia halaoa, bona . . . idia bapatiso henia.’ (Mataio 28:​19, 20) Uhe idia hadoa hegeregerena, hereva momokani be kamonai taudia edia kudou lalodiai idia atoa murinai, unai kamonai taudia idia lou henidia, hegeregere uhe idia dairia bamona. (1 Korinto 3:​5-9; Mataio 13:​19, 23) Taunimanima ese edia henanadai edia haere do idia davaria totona bona Bible ena hereva momokanidia do idia diba totona, Witness taudia ese idia Bible stadi henidia toho, davana lasi. Witness taudia edia hebou dekenai idia boiridia mai danu, “Dirava abidadama henia lasi” taudia be Korinto dekenai Keristen heboudia dekenai idia boiridia mai hegeregerena. To Iehova ena Witness taudia ese Bible stadi idia abia taudia bona hebou dekenai idia mai taudia be edena bamona idia lalodia be namo?

5. Bible be edena bamona ia hahedinaraia, taunimanima haida ita kara henidia neganai ita naria namonamo be namo?

⁵ Ita moale badina Dirava kahirakahira dekenai idia mai. To, ita laloatao, idia be do bapatiso lasi bona Dirava abidadama henia taudia lasi. Guna ita stadilaidia herevadia rua ita lalodia. (1) Israel tanona dekenai idia noho idau bese taudia, ena be Dirava ena orea taudia kahirakahira dekenai idia noho, bona taravatu haida idia badinadia, to kopina utua karana idia abia lasi bona tomadiho lalonai idia be Israel taudia edia varavara lasi. Unai dainai Israel taudia ese edia hebamo karana idau bese taudia ida idia naria namonamo. (2) Korinto Keristen taudia be ‘ekalesia dalana diba lasi taudia bona Dirava abidadama henia lasi taudia’ idia kara henidia neganai idia naria namonamo, Paulo be inai bamona ia hereva dainai: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba?”​—2 Korinto 6:14.

6. Kongregesen ena hebou be edena bamona “Dirava abidadama henia lasi” taudia ia “kota henia” diba, bona unai kota ena anina be dahaka?

⁶ Unai dainai ena be ‘ekalesia dalana diba lasi bona Dirava idia abidadama henia lasi’ taudia ita dadaraidia lasi, ita laloa Dirava ena taravatu idia do badinadia lasi. Korinto Ginigunana 14:​24, 25 ena hereva hegeregerena, reana namona be unai bamona taudia ese hebou dekenai idia kamonaidia herevadia ese ‘edia kudouna do ia pidia, vadaeni do idia diba idia be mai edia kara dika danu, bona unai hereva ese do ia kota henidia’ be namo. Unai “kota” be hahemaoro komiti ena lasi; unai taudia be kongregesen ena hahemaoro komiti ta vairanai idia gini lasi, badina idia be bapatiso kongregesen taudia ai idia do lao lasi. To, hebou dekenai idia kamonaidia gaudia dainai, unai kamonai matamata taudia idia diba Dirava ese mataganigani karadia bona sihari kava karadia ia ura henidia lasi momokani.

⁷ Gabeai, bapatiso lasi taudia haida be reana do idia ura kamonai matamata taudia bamona hebou dekenai idia mai sibona lasi, to idia ura ma kara haida danu do idia karaia. Iesu ena hereva ese edia kara ena badina idia hahedinaraia, ia gwau: “Diba tahua tauna ese ia hadibaia tauna do ia hanaia lasi, to ena sikuli ia karaia haorea murinai ia be iena hadibaia tauna danu do idia hegeregere.” (Luka 6:40) Bible stadi tauna ia itaia ia stadi henia tauna ese haroro gaukara ia laloa bada bona ia moalelaia. (Mataio 24:14) Unai dainai, ena abidadama ia bada ia lao neganai Bible ena hereva momokani ia dibaia bona hebou dekenai ia mai tauna ese inai hereva do ia laloa namonamo: “Sivarai namona ia mailaia tauna ena aena ororo latadiai be mai edia hairai; maino ia harorolaia tauna unai; gau namona ta ena sivarai namo ia mailaia tauna bona hahemauri ia harorolaia tauna unai danu.” (Isaia 52:7; Roma 10:​13-15) Ena be bapatiso ia do abia lasi, reana ia ura Basileia do ia harorolaia bona Iehova ena Witness taudia edia orea lalonai do ia vareai.

8, 9. (a) Bema Bible stadi tauna ia ura haroro gaukarana do ia karaia matamaia, dahaka idia karaia be namo? (b) Elda taudia rua be ia ura haroro gaukarana do ia karaia matamaia tauna bona ena hadibaia tauna ida idia hebou neganai, dahaka do idia karaia? (c) Pablisa matamatana ese dahaka gaukara maduna ia abia dae?

⁸ Iena Bible stadi ia naria Witness tauna ese ia davaria unai stadi tauna ia ura haroro gaukara do ia karaia, namona be gunalaia tauna ida idia kikilaia hebou. Bena gunalaia tauna ese dala do ia karaia elda taudia rua be Bible stadi tauna bona ena hadibaia tauna ida do idia hebou. Kamonai matamata tauna ta ia ura Dirava ena hesiai gaukara do ia karaia neganai, elda taudia idia moale. Idia diba ena diba be idia bapatiso vadaeni bona hereva momokani ena dala idia manadalaia vadaeni taudia edia diba be idia hegeregere lasi. Bapatiso taudia edia maduna ese bapatiso lasi taudia edia maduna idia hanaia. To, elda taudia idia ura itaia unai kamonai matamata tauna ese kongregesen danu haroro gaukara ia do hamatamaia lasi neganai, ia ese Bible ena hahediba herevadia haida ia diba bona ena mauri lalonai Dirava ena taravatu ia badinadia. Unai dainai elda taudia rua be pablisa ai ia ura ia lao tauna bona ena Bible stadi ia naria Witness tauna ida idia hebou be mai ena badina.a

⁹ Unai elda rua ese Bible stadi tauna do idia hadibaia, ia hegeregere haroro gaukara do ia karaia neganai, haroro gaukara ena ripoti ia henia diba bona Kongregesen Pablisa Ripoti Kadi do idia karaia ia totona. Unai dala amo ia hahedinaraia Iehova ena Witness taudia edia orea ia badinaia bona unai orea henunai ia noho. (Unai be momokani haroro gaukara ena ripoti idia henia taudia iboudiai dekenai.) Bible stadi tauna be elda taudia rua danu idia kiki hebou lalonai namona be Organized to Accomplish Our Ministry bukana, rau 98 bona 99 ai idia torea Bible sisibana idia kikilaia.

10. (a) Bapatiso ia do abia lasi pablisa be edena bamona ia goada ia lao diba bona namona be dahaka ia tahua? (b) Guna ita gwau ia be “kongregesen danu raka hebou diba tauna” to harihari dahaka ita gwauraia?

¹⁰ Ia bapatiso lasi tauna be ia hegeregere kongregesen ena pablisa ta bamona sivarai namona do ia harorolaia neganai, Dirava ese ia lalo-namo henia tauna ta ai ia lao gwauraia.b (Luka 2:14) Ena be Dirava dekenai ia do gwauhamata lasi bona bapatiso ia do abia lasi, to ena haroro gaukara ia ripotilaia diba, tanobada hegegemadai ‘Dirava ena hereva idia harorolaia’ taudia ma milion haida ese idia karaia hegeregerena. (Kara 13:5; 17:3; 26:​22, 23) Kongregesen idia hadibaia diba ia be ia bapatiso lasi pablisa matamatana ta. Namona be unai tauna ese Bible ia stadilaia noho, hebou dekenai ia haere noho, ia dibaia gaudia ia badinadia noho bona taunimanima ma haida dekenai ia gwauraidia noho. Nega sisina murinai, do ia ura Keristen bapatiso do ia abia, bona unai dala amo Dirava ese ia do ia lalo-namo henia bona hahemauri ena ‘maka’ do ia abia.​—Esekiel 9:​4-6.

Kerere Tauna Durua Dalana

¹¹ Hereva gunana lalonai ita kikilaia gauna be, bema bapatiso Keristen tauna ta ese kerere badana ia karaia, kongregesen be edena daladia amo ia durua diba. (Heberu 12:​9-13) Bona Bible amo ita lalo-parara, bema bapatiso tauna ese kerere badana ta ia karaia, reana kongregesen murimuri ai do idia atoa, bena unai murinai kongregesen taudia be ia ida do idia hebamo lasi. (1 Korinto 5:​11-13; 2 Ioane 9-11; 2 Tesalonika 2:​11, 12) To, dahaka do idia karaia bema bapatiso lasi pablisa ta ese kerere badana ta eiava kara dika badana ia karaia?

12. (a) Badina be dahaka idia kara dika bapatiso lasi taudia ese hebogahisi bona heduru idia abia diba? (b) Luka 12:48 ena hereva ena anina be dahaka kara dika hahemaoro henia karana dekenai?

¹² Iuda ia gwau, edia abidadama ia manoka ia lao eiava tauanina ena kara dika dainai idia moru horoa Keristen taudia, bema idia helalo-kerehai, idia boga hisihisi henidia be namo. (Iuda 22, 23; Korinto Iharuana 7:10 itaia danu.) Vadaeni, bapatiso ia do abia lasi tauna ia kerere to ia helalo-kerehai tauna idia boga hisihisi henia be namo, a? (Kara 3:19) Oibe, badina lauma dalana ai ia do goada momokani lasi, bona Keristen mauri dalana ia do manadalaia momokani lasi. Reana Dirava ena lalohadai gau haida dekenai ia diba lasi. Elda taudia be bapatiso abia gwauraia taudia danu idia herevalaidia hebou gaudia idia kikilaidia lasi, bona mai anina bada gauna, bapatiso ranu lalonai, ia abia lasi. Danu, Iesu ia gwau, “gau momo herea ia dekenai do idia henia tauna dekena amo be gau momo herea do idia tahua.” (Luka 12:48) Bapatiso idia abia taudia edia amo gau momo do idia tahua, badina idia be mai edia diba bada bona hahenamo momo idia davaridia, unai dainai dala maoronai idia raka be namo.​—Iakobo 4:17; Luka 15:​1-7; 1 Korinto 13:11.

13. Bema bapatiso ia do abia lasi tauna ia kerere, elda taudia ese dahaka do idia karaia do idia durua totona?

¹³ Paulo ena sisiba hegeregerena, bema bapatiso lasi pablisa ta ia kerere, lauma dalanai idia goada tadikakadia idia ura do idia durua. (Galatia 6:1 itaia danu.) Elda orea taudia ese elda taudia rua, reana guna ia danu idia hebou taudia, idia noidia diba bema ia kerere tauna ia ura heduru do ia abia ena kerere do idia hamaoromaoroa toho. Unai bamona idia karaia neganai idia ura lasi do idia gwau henia mai edia hereva auka ida, to mai edia hebogahisi bona manau ida do idia kara henia. (Salamo 130:3) Bible amo idia gwauraidia herevadia bona edia heduru herevadia ma haida dainai reana ia kerere tauna do ia helalo-kerehai bona dala maoromaorona do ia gavaia toho lou.

14, 15. (a) Bema ia kerere tauna ia helalo-kerehai momokani dahaka idia karaia diba? (b) Nega haida dahaka hadibaia herevana kwadogina do idia gwauraia?

¹⁴ Unai elda taudia rua ese sisiba do idia henia ia kerere bapatiso lasi pablisa do idia durua namonamo totona. Reana unai bamona tauna do idia koua Haroro School lalonai do ia vareai lasi ela bona ia namo lou, eiava hebou dekenai haere do ia henia lasi totona. Eiava reana do idia hamaoroa ia be kongregesen taudia danu haroro gaukara do idia karaia diba lasi ela bona lauma dalanai ia goada ia lao. Ia goada lou neganai do idia hamaoroa haroro gaukarana ia karaia lou diba. Bema ena kerere ese kongregesen ena ladana bona ena kara goeva ia hadikaia lasi, ena kerere be kongregesen taudia dekenai idia gwauraia hedinarai be anina lasi.

¹⁵ Bema unai elda taudia rua ese idia davaria, ia kerere tauna ia helalo-kerehai momokani, to taunimanima momo ese ena kerere idia diba vadaeni, eiava nega vairanai do idia diba, dahaka idia karaia be namo? Unai negadiai, namona be Kongregesen Hesiai Komiti idia hadibaia. Unai Komiti ese inai herevana kwadogina ta be kongregesen dekenai do idia gwauraia: “. . . dekenai ia vara gauna ta ai hamaoromaoroa vadaeni bona iseda kongregesen lalonai ia be bapatiso lasi pablisa bamona ia do gaukara noho.” Unai bamona karadia idia vara negadia iboudiai, bema idia laloa ia namo, elda taudia edia orea be unai kerere ena Bible sisibana idia hegaegaelaia bona murinai, nega ta, hereva ta do idia henia kongregesen dekenai.

16, 17. (a) Dahaka kara rua dainai reana hadibaia herevana idauna ta do idia gwauraia? (b) Unai hadibaia herevana lalonai dahaka do idia gwauraia?

¹⁶ Nega ta ta ai, bapatiso lasi pablisa ta ese kerere ia karaia murinai, elda taudia edia lalokau heduru karana do ia abia dae lasi. Eiava reana bapatiso lasi pablisa ta ese ena lalona ia hadaia ia ura lasi dala do ia tahua noho do ia hegeregere bona bapatiso do ia abia totona, bona elda taudia ia hadibadia ia ura lasi do idia laloa ia be kongregesen ena pablisa ta. Unai neganai, dahaka do idia karaia be namo? Kongregesen murimuri ai atoa tauna ai idia halaoa lasi, badina Dirava ese unai tauna ia do lalo-namo henia lasi. Kongregesen murimuri ai idia atodia taudia be kara kerere bona helalo-kerehai lasi ‘ekalesia taudia,’ idia bapatiso vadaeni taudia unai. (1 Korinto 5:11) Unai ena anina be idia bapatiso lasi taudia edia kerere do idia laloa lasi be namo, a? Lasi.

¹⁷ Elda taudia edia maduna be ‘Dirava ese ia henidia mamoe orea do idia naridia namonamo.’ (1 Petero 5:2) Bema elda taudia rua idia laloa idia durua toho bapatiso lasi tauna be ia helalo-kerehai lasi bona ia hegeregere lasi kongregesen ena pablisa ta ai do ia noho, unai be ia dekenai do idia hadibaia.c Eiava bema bapatiso lasi tauna ese elda taudia ia hamaorodia ia ura lasi idia gwauraia kongregesen ena pablisa ta, elda taudia ese ena ura do idia badinaia. Unai negadiai, namona be Kongregesen Hesiai Komiti ese nega namona ta dekenai inai hadibaia herevana kwadogina kongregesen dekenai do idia gwauraia: “. . . be sivarai namona harorolaia tauna ta lasi.”

18. (a) Kongregesen be unai bamona idia hadibaia murinai, Keristen taudia ese dahaka do idia laloa guna bena edia lalona do idia hadaia dahaka do idia karaia totona? (b) Nega gunanai idia kerere bapatiso lasi taudia ita dadaraidia vaitani, a?

¹⁸ Unai murinai unai bapatiso lasi tauna be Witness taudia ese edena bamona do idia laloa be namo? Guna, ia be ‘Dirava abidadama henia lasi tauna’ ta, kongregesen ena hebou dekenai ia mai tauna. Unai neganai, ia ura sivarai namona do ia harorolaia bona ia hegeregere unai do ia karaia totona. Ena kerere amo ia helalo-kerehai lasi dainai ia be murimuri tanobada tauna ai ia lao lou. Bible ena hereva ese Witness taudia ia koudia lasi ia danu do idia herevahereva hebou, badina ia be kongregesen murimuri ai idia atoa tauna lasi.d To, Keristen taudia ese edia hebamo karana ia dekenai do idia naria namonamo, Israel taudia ese edia hebamo karana Israel tanona dekenai idia noho idau bese taudia dekenai idia naria namonamo hegeregerena. Unai bamona idia kara dainai idia ese kongregesen idia gimaia “hatubua gauna sisina,” eiava kara goeva hadikaia gauna ta ese kongregesen do ia hadikaia garina. (1 Korinto 5:6) Bema gabeai unai kerere tauna ia gwau ia ura ta ese ia Bible stadi henia, bona elda taudia idia laloa unai be hegeregere, reana unai ese unai kerere tauna do ia durua Iehova tomadiho henia mai ena orea taudia danu ena hahenamo do ia laloa bada lou totona.​—Salamo 100.

19. Nega haida elda taudia ese hehuni dalanai heduru ma haida be edena bamona idia henia diba?

¹⁹ Bema elda taudia idia itaia unai bamona tauna ta ese mamoe oreana ia hadikaia gwauraia, namona be ia hadikadia gwauraia taudia be hehuni dalanai idia hadibadia diba. Hegeregere, guna ia haroro bapatiso lasi tauna ta be reana inuinu kekero o sihari kava merona ta. Ena be kongregesen idia hadibaia vadaeni, unai mero be pablisa lasi, to reana kongregesen ena memero kekeni danu do ia hebamo toho. Unai neganai, namona be elda taudia ese unai memero kekeni edia tama sina be hehuni dalanai do idia hereva henidia bona reana unai memero bona kekeni danu do idia hereva henidia. (Heberu 12:​15, 16; Kara 20:​28-30) Bema pablisa ena gaukara amo idia hadokoa tauna ese kongregesen ena hebou ia hadikadia toho eiava ia dagedage, elda taudia ese idia hamaoroa diba, hebou dekenai ia mai diba lasi, bona idia hadibaia Kingdom Hall lalonai ia vareai toho neganai, gavamani ena taravatu do ia utua.

Memero Kekeni Durudia

Dirava Do Idia Tomadiho Henia Totona

²⁰ Bible ia gwau tama bona sina be mai edia maduna edia natudia be hereva momokani dalana ai do idia hadibadia. (Deuteronomi 6:​4-9; 31:​12, 13) Unai dainai, gunaguna ema bona hari Iehova ena Witness taudia ese Keristen ruma besedia idia hagoadadia wiki iboudiai Bible stadi do idia karaia totona. Keristen tama sina ese edia natu maragidia idia hagoadadia, do idia goada idia lao ela bona Dirava dekenai idia gwauhamata diba bona bapatiso idia abia diba bona unai dala amo Dirava ese do ia moale henidia diba. (Hereva Lada-isidia 4:​1-7) Kongregesen lalodiai ita itaia unai ese namo ia havaraia​—memero kekeni namodia tausen momo ese Iehova idia lalokau henia bona idia ura do idia tomadiho henia ela bona hanaihanai.

21-23. (a) Edena dala badana amo mero o kekeni ta ena kerere idia hamaoromaoroa? (b) Unai ia vara negadiai, kongregesen ena elda taudia ese dahaka idia karaia?

²¹ Keristen tama sina ese danu maduna idia abia edia natudia do idia matahakani henidia bona edia kara kereredia do idia hamaoromaorodia, bona edia lalohadai hegeregerena taravatu eiava kara dika ena davana idauidau be edia natudia do idia henidia. (Efeso 6:4; Heberu 12:​8, 9; Hereva Lada-isidia 3:​11, 12; 22:15) To, bema ia bapatiso lasi mero o kekeni ta, ia pablisa vadaeni, bona kongregesen danu ia hebou bena kerere badana ta ia karaia, mamoe oreana idia “naria noho” elda taudia ese unai kerere do idia laloa momo.​—Heberu 13:17.

²² Ia bapatiso lasi merona o kekenina ese kerere badana ia karaia neganai, namona be elda taudia ese unai kerere idia hamaoromaoroa toho, ataiai ai toredia herevadia hegeregerena. Elda rua idia abidia hidi unai kerere do idia tahua totona be namo. Hegeregere, reana unai mero o kekeni ena kerere, ena lalohadai bona unai kerere hamaoromaoroa dalana, be ena tamana bona sinana danu do idia kikilaia hebou be namo. (Deuteronomi 21:​18-21 itaia danu.) Bema unai Keristen tamana bona sinana ese edia natuna ena kerere idia hamaoromaoroa dalana idia naria namonamo, elda taudia be nega ta ta sibona idia danu do idia kiki hebou, heduru herevadia bona sisiba do idia henidia totona, bona mai edia lalokau ida do idia hagoadadia totona.

²³ To, nega haida, unai tamana bona sinana danu idia kiki hebou murinai, elda taudia idia diba ia kerere merona o kekenina bona ena tamana bona sinana danu idia helai hebou bona idia kiki hebou be namo. Unai naria taudia ese unai bapatiso lasi pablisa do idia sisiba henia toho mai edia manau ida. Unai idia karaia neganai, do idia laloatao memero bona kekeni edia aonega be bada lasi bona idia be mai edia manoka idauidau. (2 Timoteo 2:​22-26) Nega haida do ia hedinarai goevagoeva unai mero o kekeni ia hegeregere lasi kongregesen ena pablisa bamona do ia noho bona idia ese kongregesen taudia do idia hadibadia be namo.

24. (a) Ena be mero o kekeni ta ena kerere be bada, to tama sina ese dahaka idia karaia be maoro, bona edena dala amo do idia karaia diba? (b) Bema mero o kekeni ta be kongregesen murimuri ai idia atoa, unai hereva be edena bamona idia badinaia?

²⁴ Unai murinai, unai tama sina ese dahaka do idia karaia edia natuna do idia durua totona? Ena be edia natuna ia hegeregere lasi bapatiso lasi pablisa bamona ia noho, eiava danu bema ia bapatiso murinai ia kerere bada dainai kongregesen murimuri ai idia atoa, to herevana, edia maduna ia do noho edia natuna do idia naria. Ena aniani, dabua, bona noho gabuna idia henia be namo hegeregerena, Dirava ena Hereva amo ena natuna idia hadibaia bona idia matahakani henia be namo. (Hereva Lada-isidia 6:​20-22; 29:17) Unai dainai ena be reana natuna be kongregesen murimuri ai idia atoa, to mai edia lalokau ida ena tamana bona sinana ese reana dala do idia karaia Bible stadi be edia natuna danu do idia karaia totona.e Reana ena kerere do ia hamaoromaoroa totona, tama sina ese idia stadi henia neganai, ia sibona be idia danu idia helai be namo. Eiava reana do idia laloa ruma bese ena Bible stadi lalonai ia vareai be namo. Ena be dala maorona ia rakatania vadaeni, to idia ura Iehova dekenai ia giroa lou, Iesu ese ena parabole lalonai ia gwauraia natuna ese ia karaia hegeregerena.​—Luka 15:​11-24.

25. Badina be dahaka hari inai nega lalonai mai edia lalokau ida ‘Dirava idia abidadama henia lasi taudia’ idia lalodia bona idia durudia?

²⁵ Iseda haroro gaukarana bona taunimanima hadibadia gaukarana ita karaia, taunimanima ma haida do ita durudia Dirava momokanina tomadiho henia mai edia moale danu taudia ai do idia lao totona. Korinto dekenai ‘ekalesia dalana diba lasi o Dirava abidadama henia lasi’ taudia edia lalona ese idia doridia ‘Dirava vairanai idia tomadiho, idia gwau, “Momokani Dirava be umui huanai ia noho.” ’ (1 Korinto 14:25) Hari inai negai ita moale bada badina ita itaia taunimanima momo herea ese Dirava idia tomadiho henia! Unai be dala hairaina amo aneru edia hereva ia hagugurua, idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia [eiava, ia lalo-namo henidia] taudia ese inai maino do idia abia.”​—Luka 2:14.

[Footnotes]

Inai Oi Laloatao A?

◻ Keristen taudia ese kongregesen ena hebou dekediai idia mai ‘Dirava abidadama henia lasi taudia’ be edena bamona idia lalodia?

◻ Bible stadi tauna ia ura haroro gaukarana do ia karaia matamaia neganai, elda taudia ese dahaka dahaka do idia karaia, bona Bible stadi tauna ese dahaka maduna ia huaia matamaia?

◻ Bema bapatiso lasi pablisa ia kara dika bada dahaka do idia karaia?

◻ Ena be edia ruma bese danu idia do noho memerodia bona kekenidia ese kerere badana do idia karaia, to tama sina bona elda taudia ese edena bamona do idia durudia diba?

4. Hari inai negai taunimanima momo be edena dala idauidau ai idia durudia, Korinto hanuana idia noholaia taudia idia durudia hegeregerena?

7. Bible stadi taudia momo do idia ura dahaka kara ma haida do idia karaia bona badina be dahaka?

11. Kongregesen taudia ese idia kerere bapatiso taudia be edena bamona idia kara henidia?

20. Keristen tama sina ese dahaka heduru be edia natudia idia henidia, bona unai amo dahaka ia vara?

[Picture on page 17]

Ena be bapatiso ia do abia lasi, to pablisa ai ia lao tauna ena kara be mai anina bada Dirava ese ia do ia lalo-namo henia totona