‘Emu Kamonai Oi Naria Namonamo’
DIBA abia lalonai kamonai be mai anina bada. Hahemauri abia totona ia be mai anina bada danu. Iehova ese Aigupito ena igui amo ena taunimanima ia ruhaia dalana ia hegaegaelaia neganai, Mose ia hadibaia, bena ia ese Israela ena tau badadia ia hadibaia dahaka do idia karaia be namo, aneru ese edia vara guna natudia ia alaia lasi totona. (Eso. 12:21-23) Bena unai tau badadia ese ruma bese ta ta dekenai unai hereva idia abia lao. Edia uduna amo idia gwauraia. Taunimanima idia kamonai namonamo be gau badana. Dahaka idia karaia? Baibel ia gwau: “Israela taudia ibounai ese unai bamona idia karaia, Mose bona Arona dekenai Lohiabada ese ia hereva henidia hegeregerena.” (Eso. 12:28, 50, 51) Unai dainai, Israela taudia be hoa dalanai hahemauri idia davaria.
Hari inai negai, Iehova ese hahemauri badana totona ita ia hegaegaelaia. Unai dainai, mai eda ura ida iena hadibaia herevadia ita kamonai namonamo. Unai bamona hadibaia herevadia be kongregesen heboudia dekenai idia henia. Unai bamona heboudia amo namo bada oi abia, a? Unai totona oiemu kamonai karana be mai anina bada.
Hebou lalodiai ita idia hadibaia herevadia edia hereva badadia oi laloatao, a? Pura ta ta iboudiai dala oi tahua, ita idia hadibaia herevadia be emu mauri lalonai do oi badinaia bona ma haida dekenai do oi hadibaia, a?
Emu Kudouna Oi Hegaegaelaia
Keristani heboudia dekenai ita idia hadibaia herevadia amo namo bada ita abia totona iseda kudouna ita hegaegaelaia be namo. Iuda ena King Iehosapata ena lohia negana lalonai ia vara gauna ese ia hahedinaraia unai kara be mai anina bada. Iehosapata be mai gari lasi ida tomadiho momokanina totona ia gini goada. “Ia ese ataiai idia noho tomadiho gabudia, bona hahine dirava Asera ena kaivakuku ibounai ia kokia Iuda dekena amo” bona lohia taudia, Levi taudia, bona hahelaga taudia ia siaia, Iuda ena hanua ibounai dekenai Iehova ena Taravatu idia hadibaia totona. ‘To ataiai tomadiho gabudia ibounai idia kokia ore lasi.’ (2 Siv. 17:6-9; 20:33) Ataiai kaivakuku tomadiho henia gabudia dekenai dirava koikoidia bona dala kererena ai Iehova tomadiho henia karadia idia goada momokani dainai ia kokidia momokani diba lasi.
Dahaka dainai Iehosapata ia hegaegaelaia hadibaia karana ena namo ia noho daudau lasi? Unai sivarai be ma ia gwau: “Taunimanima ese, edia sene taudia edia Dirava idia tomadiho henia lasi mai edia kudouna ibounai danu [“Dirava totona edia kudouna idia do hegaegaelaia lasi,” NW ].” Idia kamonai to idia badinaia lasi. Reana idia laloa Ierusalema dekenai boubou gaudia henia totona idia lao be mai ena hekwarahi. Ena badina be herevana, to abidadama ese edia kudouna ia hamarerea lasi.
Satani ena tanobada karadia ita badinaia lou garina, namona be iseda kudouna ita hegaegaelaia, hari inai negai Iehova ena hadibaia herevadia ita abia dae totona. Edena dala ai? Mai anina bada dalana ta be guriguri. Namona be ita guriguri Dirava ena hadibaia herevadia be mai moale ida do ita abia dae. (Sal. 27:4; 95:2) Unai ese ita do ia durua, iseda tadikaka edia hekwarahi ita laloa bada totona, badina ena be idia goevadae lasi to sibona idia henia, Iehova be idia amo ena taunimanima ia hadibaia diba totona. Unai ese ita do ia veria ita dibaia matamata gaudia dainai bona guna ita dibaia gaudia dekenai laloa bada karana ita habadaia ena dala ia kehoa dainai Iehova do ita tanikiu henia. Ita ura Dirava ena ura do ita karaia momokani dainai, ita guriguri: “Lohiabada e, oiemu dala lau dekenai do oi hadibaia, . . . Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.”—Sal. 86:11.
Emu Lalona Oi Biagua
Gau momo ese iseda kamonai namonamo karana idia koua diba. Reana gau momo dainai ita lalo-hekwarahi. Hebou gabuna lalonai eiava murimuriai idia vara regerege bona kara haida ese eda lalona idia veria diba. Reana tauanina ena hisihisi dainai ita kamonai namonamo be auka. Mai edia natuna maragidia taudia idia davaria gau ma haida do idia laloa danu. Dahaka ese ita ia durua diba, eda lalona ita biagua bona program ita kamonai namonamo totona?
Iseda matana ia itaia gauna ese iseda lalona ia veria. Hereva henia tauna oi raraia, unai amo emu kamonai namonamo karana oi durua. Ia ese Baibel siri ta—herevana oi diba namonamo sirina—ia gwauraia neganai, do oi kehoa, bona ia duahia neganai oi itaia. Emu lalona oi biagua bona regerege gabuna eiava idia vara gaudia ibounai oi itaia toho lasi. Bema matana idia itaia gaudia idauidau ese emu lalona idia veria, platfom amo idia gwauraia gaudia momo do oi reaia.
Bema emu “lalona ia hekwarahi momo” dainai program oi laloa be auka, namona be Iehova oi guriguri henia, emu lalona bona kudouna ai maino ia noho bona oi kamonai namonamo diba totona. (Sal. 94:19; Fili. 4:6, 7) Oi karaia loulou bema lalona ia hekwarahi noho. (Mat. 7:7, 8) Kongregesen heboudia be Iehova ese ia henia harihari gauna. Oi abia dae diba ia be ia ura idia amo namo oi abia.—1 Ioa. 5:14, 15.
Idia Henia Herevadia Oi Kamonai
Reana, idia henia herevadia lalonai oi kamonai gau namodia haida oi laloatao. To, kamonai karana be gau namodia haboua karana sibona lasi. Idia henia hereva be laolao ta bamona. Ena be dala dekenai gau namodia oi itaia diba, to mai anina bada gauna be oi lao gabuna, eiava unai hereva idia henia ena badina. Reana hereva henia tauna ia ura kamonai taudia ia hakaua lalohadai ta idia abia dae totona, eiava ia hagoadaia kara ta idia karaia totona.
Iosua ese Israela besena dekenai ia henia herevana, Iosua 24:1-15 ai ia noho, mani oi laloa. Iena hereva ia henia ena badina be ia ura taunimanima ia hagoadaia, kahirakahira idia noho bese edia kaivakuku tomadiho henia karadia idia dadaraia bona tomadiho momokanina ai do idia gini goada. Dahaka dainai unai be mai anina bada? Kaivakuku tomadiho henia karana ia bada dainai, Iehova vairanai Israela ia gini namonamo karana do ia hadikaia diba. Taunimanima ese Iosua ena hereva idia haerelaia, idia gwau: “Ai ese Lohiabada do ai rakatania lasi, dirava idauna be do ai tomadiho henia lasi, lasi momokani. . . . Lohiabada ena hesiai gaukara do ai karaia.” Bona unai bamona idia karaia!—Ios. 24:16, 18, 31.
Hereva ta oi kamonai neganai, idia henia ena badina oi lalo-pararalaia toho. Hereva henia tauna ena hereva badadia ese unai badina hagugurua karana idia durua dalana oi laloa. Sibona oi nanadaia oi abia dibana dainai dahaka oi karaia be namo.
Henanadai Bona Haere Kahadia ai Oi Kamonai
Gima Kohorona Stadi, Kongregesen ena Buka Stadi, bona Hesiai Hebou ena kahana haida ai, Baibel hahedinaraia herevadia be henanadai bona haere dalanai ita karaia.
Dala haida ai, henanadai bona haere kahadia lalonai oi kamonai karana be herevahereva lalonai oi vareai karana bamona. Namo bada oi abia totona oi kamonai namonamo be namo. Unai henanadai bona haere ese iseda lalona idia veria dalana oi itaia. Hakaua tauna ese sinado bona hereva badadia ia gwauraia hedinarai dalana oi itaia. Emu lalona ai ena henanadai oi haerelaia. Ma haida ese stadi herevana bona badinaia dalana idia gwauraia hedinarai neganai oi kamonai. Ma haida edia lalohadai oi kamonai neganai, reana guna oi diba herevana be dala matamatana ai do oi lalo-pararalaia. Hagoadaia heheni karana oi durua totona emu haere amo emu abidadama oi hahedinaraia.—Roma 1:12.
Stadi herevana oi stadilaia karana ese oi do ia durua, unai henanadai bona haere kahana dekenai oiemu lalona ibounai oi henia totona bona ma haida edia haere oi kamonai namonamo totona. Bema oiemu noho dalana dainai unai hereva oi stadilaia namonamo diba lasi, namona be hebou dekenai oi do lao lasi neganai miniti haida lalonai oi itaia. Unai oi karaia dainai, unai henanadai bona haere kahana amo heduru do oi abia.
Sekit Bona Distrik Hebouhebou Lalodiai Oi Kamonai
Sekit bona distrik hebouhebou lalodiai eda lalona idia veria gaudia be momo, reana kongregesen heboudia be unai bamona lasi. Unai dainai ita kamonai namonamo be mai ena hekwarahi. Dahaka ese ita ia durua diba?
Gau badana be hanuaboi lalonai oi mahuta namonamo. Dina ta ta ai, program ia do matamaia lasi neganai, dina ena sinado oi laloa namonamo. Hereva ta ta edia kwarana oi itaia, bona do idia herevalaia gaudia oi laloa toho. Oiemu Baibel oi gaukaralaia namonamo. Taunimanima momo idia davaria hereva kwadogi amo hereva badadia idia torea karana ese idia ia durua program idia kamonai namonamo totona. Oi ura emu mauri bona haroro gaukara lalonai do oi badinaia herevadia oi torea. Dina ta ta ai, hebou gabuna dekenai bona hebou gabuna amo oi lao neganai, unai gaudia haida oi herevalaia. Unai ese oi ia durua, oi kamonai herevadia oi laloatao noho totona.
Natudia Umui Hadibaia Idia Kamonai Totona
Keristani tama sina ese edia natudia—natuna maragidia danu—be kongregesen heboudia bona sekit bona distrik hebouheboudia dekenai idia abia lao karana amo idia durudia, ‘hahemauri idia davaria’ totona. (2 Tim. 3:15) Natudia edia kara bona idia kamonai diba negana ena daudau be idauidau dainai, mai lalo-parara ida idia umui durua, mai edia lalona ibounai ida kamonai karana idia dibaia totona. Reana henunai idia noho gaudia ese heduru idia henia diba.
Ruma dekenai nega umui atoa, emui natuna maragidia be idia helai namonamo bona iseda Keristani bukadia idia duahia eiava edia laulau idia itaia totona. Hebou lalodiai, gadara gaudia amo natudia edia lalona umui veria lasi. Idaunegai Israela ai ia vara hegeregerena, hari danu natudia be hebou dekenai idia mai ‘do idia kamonai bona edia lalona be do idia kehoa’ totona. (Deu. 31:12) Tama sina haida ese hebou dekenai idia gaukaralaia bukadia edia kopi be natuna maragidia dekenai idia henia danu. Natudia idia tubu neganai idia umui durua, idia hegaegae bona henanadai bona haere kahadia ai haere do idia henia.
Baibel ese Iehova ena hereva kamonai henia bona badinaia karadia ia hakapua. Mose ese Israela besena dekenai ia gwauraia herevana ese unai ia hahedinaraia, ia gwau: “Lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, . . . Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo.” (Deu. 30:19, 20) Hari inai negai, Iehova ena hadibaia herevadia ita kamonai bona eda mauri lalonai ita badinaia be gau badana, Dirava ena lalo-namo bona mauri hanaihanai ena hahenamo ita abia totona. Unai dainai, Iesu ena sisiba ita badinaia be gau badana, ia gwau: “Emui kamonai do umui naria namonamo”!—Luka 8:18.