Dirava Ena Dubu “Do Oi Laloa Namonamo”!
“Tanobada tauna e, lau ese oi dekenai lau hedinaraia gaudia ibounai be . . . [oi] lalodia namonamo . . . Do oi itaia gaudia ibounai be Israela bese taudia do oi hamaoroa.”—ESEKIELA 40:4.
1. Lagani 593 B.C.E. ai, Dirava ese ia abia hidi besena edia noho be edena bamona?
LAGANI 593 B.C.E. ia abia, unai lagani ai Israela besena be lagani 14 idau tano ai idia noho vadaeni. Babulonia ai idia noho Iuda taudia dekenai, idia ura henia bada tanona be daudau herea momokani. Idia momo ese nega ginigabena Ierusalema idia itaia neganai, ia be lahi ese ia araia noho, ena magu aukana ia makohi, bona ena ruma badadia idia hamorua. Iehova ena dubu—guna unai hanua ia hahairaia, bona tanobada ibounai lalonai tomadiho goevana gabuna tamona—be ia moru bona ia dika vadaeni. Israela besena be hari idau tano ai do idia noho negana ena kahana badana ia do noho. Lagani 56 idia do noho, bena hahemauri gwauhamatana ena anina do ia vara.—Ieremia 29:10.
2. Dahaka dainai Esekiela ese Dirava ena dubu Ierusalema dekenai ia laloa neganai, ena lalona ia hisihisi?
2 Dirava ena dubu be gabu daudau ai momoru bamona ia noho bona animal edia loaloa gabuna ai ia lao, bona peroveta tauna Esekiela be unai ia laloa neganai, ena lalona ia hisihisi. (Ieremia 9:11) Guna, iena tamana, Busi, be hahelaga tauna unuseniai. (Esekiela 1:3) Esekiela be unai hahenamo ia abia diba, to ia be lagani 617 B.C.E. ai, ia do matamata neganai, Ierusalema ena ladana bada taudia ida idau tano dekenai idia abia lao. Hari Esekiela ena mauri laganidia be 50 bamona, bona reana ia diba Ierusalema do ia itaia lou lasi eiava ena dubu haginia lou gaukarana do ia karaia lasi. Esekiela ena hemami mani oi laloa, matahanai ai dubu mai hairaina ia itaia be mai anina bada momokani ia dekenai!
3. (a) Esekiela ese dubu ia itaia ena matahanai ena badina be dahaka? (b) Unai matahanai ena kahana badadia hani be dahaka dahaka?
3 Unai matahanai badana, Esekiela bukana ena karoa iboudiai 9 lalonai, ese unai idau tano ai idia noho Iuda taudia dekenai abidadama hagoadaia gwauhamatana ia hahedinaraia. Tomadiho goevana do idia haginia lou! Lagani handred momo unai nega amo ema bona hari, unai matahanai ese Iehova idia lalokau henia taudia ia hagoadaia. Edena dala ai? Idau tano ai idia noho Israela taudia dekenai Esekiela ena peroveta matahanai ena anina mani ita laloa. Ena kahana badadia be hani: dubu, hahelaga taudia, lohia tauna, bona tano.
Dubu Idia Haginia Lou
4 Dirava ese Esekiela ia abia lao “ororo badana ta” dekenai. Unai ororo dekenai, dubu bada hereana ta be saut kahana ai ia gini, hanua ta mai ena magu bamona. Aneru ta, “toana be auri laboralabora bamona,” ese peroveta tauna ia abia lao unai gabu ia itaia namonamo totona. (Esekiela 40:2, 3) Unai matahanai lalonai Esekiela be unai aneru ia itaia, dubu ena ikoukou 6, kahana toi ai rua rua idia noho gaudia mai edia gima rumadia, ia hahetohoa bona murimuri kahana ena ariara, lalona kahana ena ariara, aniani daiutuna, boubou patana, bona dubu rumana mai ena Helaga bona Helaga Herea daiutudia edia bada ia hahetohoa namonamo.
5. (a) Iehova be Esekiela dekenai dahaka ia hamaoroa? (b) “King edia mase tauanidia” dubu amo do idia kokia be dahaka ia herevalaia, bona dahaka dainai unai be mai anina bada?
5 Bena, Iehova be unai matahanai ai ia hedinarai. Dubu lalonai ia vareai bona Esekiela ia hamaoroa Ia be unuseniai do ia noho. To Ia gwau namona be Iena ruma idia hagoevaia. Ia gwau: “Harihari idia ese dirava idaudia tomadiho henia kara do idia hadokoa, bona edia king edia mase tauanidia be egu noho gabu dekena amo daudau do idia abia lao. Bema unai bamona idia karaia, lau ese idia edia huanai do lau noho ela bona hanaihanai.” (Esekiela 43:2-4, 7, 9) Unai “king edia mase tauanidia” be kaivakuku ia herevalaia unai. Ierusalema ena lohia taudia dikadia bona taunimanima dikadia ese kaivakuku amo Dirava ena dubu idia hamiroa, bona unai gaudia be king bamona ai idia halaoa. (Amosa 5:26 itaia.) Idia be mauri diravadia o king taudia lasi, Iehova ena matana ai idia be mase bona miro gaudia. Namona be idia kokia!—Levitiko 26:30; Ieremia 16:18.
6. Dubu ena bada hahetohoa karana ese dahaka ia hahedinaraia?
6 Unai matahanai ai, unai kahana ena anina be dahaka? Unai idau tano ai idia noho Iuda taudia ia hadibaia, Dirava ena dubu ai tomadiho goevana do idia haginia lou momokani. Danu, unai dubu ena bada hahetohoa karana ese ia hahedinaraia, Dirava ia hereva vadaeni unai matahanai ena anina do ia guguru momokani. (Mani Ieremia 31:39, 40; Sekaraia 2:2-8 itaia.) Kaivakuku tomadiho henia karadia ibounai do ia kokia. Iehova ese ena ruma do ia hanamoa lou.
Hahelaga Taudia Bona Lohia Tauna
7. Levi taudia bona hahelaga taudia be edena bamona ia herevalaia?
7 Hahelaga taudia danu do idia hagoevaia. Levi taudia be kaivakuku idia tomadiho henia dainai, sisiba aukana do idia abia, to Sadoka ena hahelaga besena be hanamoa hereva bona ahuna namona do idia abia, badina idia goeva dainai.a To, unai orea ruaosi be Dirava ena ruma ai, idia hanamoa lou gauna dekenai, hesiai gaukara ena dagi idauidau do idia abia—bona vaia, unai gauna dekenai idia ta ta edia abidadama be mai anina. Danu, Iehova be oda ia henia, ia gwau: “Hahelaga taudia ese egu bese taudia do idia hadibaia, gau helagadia bona gau helagadia lasi edia idau be dahaka, bona Dirava ena taravatu bona oda dekenai, dahaka be goeva, bona dahaka be goeva lasi.” (Esekiela 44:10-16, 23) Unai dainai hahelaga taudia do idia gaukara lou, bona mai edia kamonai ida idia haheauka dainai ahuna namona do idia abia.
8. (a) Idaunegai, Israela ena lohia taudia be daidia? (b) Esekiela ena matahanai ai, lohia tauna be edena dala haida ai tomadiho goevana lalonai ia gaukara goada?
8 Inai matahanai lalonai, lohia tauna ia hedinarai danu. Mose ena nega amo Israela besena be mai edia lohia taudia. Heberu gado herevana na·siʼʹ, anina be lohia tauna, be bese kwarana ta, o iduhu ta eiava bese ta ena lohia ia herevalaia diba. Esekiela ena matahanai lalonai, Israela idia lohiaia oreana be sisiba aukana idia abia badina taunimanima idia hahisia, bona idia hamaorodia namona be edia taunimanima do idia kara henia maoromaoro. Ena be unai lohia tauna be hahelaga taudia edia orea tauna lasi, to tomadiho goevana lalonai gaukara badana ta ia karaia. Hahelaga lasi iduhu taudia ida murimuri kahana ena ariara lalonai ia vareai bona ia raka lasi, Ist Kahana ena Ikoukou ena vareai gabuna ai ia helai, bona taunimanima totona boubou gaudia haida ia henia. (Esekiela 44:2, 3; 45:8-12, 17) Unai matahanai ese Esekiela ena tano taudia ia hadibadia, do ia namo lou besena be hakaua taudia namodia do idia abia. Unai tatau be hahelaga taudia do idia durua Dirava ena taunimanima idia naria totona, bona lauma dalanai idia be haheitalai namodia.
Tano
9. (a) Tano be edena bamona do idia hapararaia, to daidia be ahuna do idia abia lasi? (b) Tano helagana be dahaka, bona unuseniai dahaka ia noho?
9 Bena, Esekiela ena matahanai lalonai Israela tanona ia hedinarai. Unai tano do idia hapararaia, iduhu ta ta ese kahana ta ta idia abia totona. Lohia tauna danu be mai ena ahuna. To hahelaga taudia be ahuna do idia abia lasi, badina be Iehova ia gwau, “Edia ahuna be lau sibona.” (Esekiela 44:10, 28; Numera 18:20) Unai matahanai lalonai, lohia tauna ena ahuna be tano helagana ena kahana kahana ai idia noho. Tano helagana ena toana be maua bamona bona kahana toi ai idia hapararaia—ataiai be helalo-kerehai Levi taudia totona, huanai be hahelaga taudia totona, bona henunai be hanua bona anina namona ia havaraia tanona ia noho. Iehova ena dubu be hahelaga taudia edia kahana ai do ia noho, bona unai tano ena huanai momokani ai do ia gini.—Esekiela 45:1-7.
10. Unai peroveta laulauna ai, tano hapararaia karana ese dahaka ia hadibaia idau tano ai idia noho Iuda taudia mai edia kamonai dekenai?
10 Reana unai matahanai ese unai idau tano ai idia noho taudia edia lalona ia hagoadaia momokani! Ruma bese ta ta ibounai idia diba unai tano ai idia be mai edia ahuna. (Mika 4:4 itaia.) Unuseniai tomadiho goevana do idia abia isi momokani. Bona umui itaia, Esekiela ena matahanai ai taunimanima ese hahelaga taudia dekenai tano idia henia hegeregerena, lohia tauna danu be taunimanima ese idia henia tanona ai do ia noho. (Esekiela 45:16) Unai dainai ia namo lou tanona ai, taunimanima be mai edia kamonai bona manau ida Iehova ese ia abia hidi hakaua taudia edia gaukara do idia durua, bona edia hakaua herevadia idia badinaia. Unai ibounai lalonai, unai tano ese gaukara haheaua namonamo, gaukara hebou, bona noho namo ia laulaulaia namo herea.
11 Iehova ese edia tano do ia hanamoa, a? Unai peroveta herevana ese unai henanadai ia haerelaia, lalona hamoalea sivaraina ta amo. Sinavai ta be dubu helaga amo ia aru lao, bona ena lababa ia bada ia lao, bena Mase Davarana dekenai ia aru lao neganai ia be sinavai badana vadaeni. Unuseniai davara lalonai idia noho gaudia ia hamauria, bona kone gabuna dekenai haoda gaukarana ia bada herea. Sinavai ena isena kahana kahana dekenai lagani ibounai huahua idia havaraia audia idia gini, aniani bona gorere hanamoa totona.—Esekiela 47:1-12.
11, 12. (a) Iehova be edena bamona peroveta dalana amo ia hamomokania iena taunimanima edia tano, ia namo lou gauna, do ia hanamoa? (b) Sinavai ena isena kahana kahana ai idia noho audia ese dahaka idia laulaulaia?
12 Unai gwauhamata ese unai idau tano ai idia noho taudia dekenai guna hanamoa lou karana idia perovetalaia herevadia, idia abia dae herevadia, ia hahedinaraia lou bona ia hamomokania. Nega momo, Iehova ena lauma amo ia hasiahua peroveta taudia ese Israela idia hanamoa lou bona noholaia lou karana idia herevalaia neganai, paradaiso bamona idia herevalaia. Peroveta herevadia momo be mauri gaudia idia mase gabudia ai mauri do ia hedinarai lou idia gwauraia. (Isaia 35:1, 6, 7; 51:3; Esekiela 36:35; 37:1-14) Unai dainai taunimanima idia diba Iehova ena mauri hanaihanai hahenamodia be idia hanamoa lou dubu helagana amo sinavai bamona do ia aru lao. Unai dainai, lauma dalana ai ia mase besena be do ia mauri lou. Idia giroa lou taudia edia hahenamo ta be lauma dalana ai idia goada momokani tataudia do idia abia. Idia be idia gini maoromaoro bona idia goada, unai sinavai ena isena kahana kahana ai idia gini au bamona, bona ia dika vadaeni tanona hanamoa lou gaukarana do idia gunalaia. Isaia danu be haida ia gwauraia “au namodia bamona, . . . kara maoromaoro do idia karaia,” bona idia ese “idaunegai idia dika hanua bona ruma do idia haginia lou.”—Isaia 61:3, 4.
Edena Nega ai Matahanai Ena Anina Ia Guguru?
13. (a) Edena dala ai Iehova ese au namodia bamona idia noho kara maoromaoro taudia amo ena taunimanima ia hanamodia? (b) Mase Davarana perovetalaia herevana be edena dala ai ia guguru?
13 Idia giroa lou taudia idia lalohisihisi, a? Lasi momokani! Idia namo lou orena taudia be lagani 537 B.C.E. ai, idia ura henia bada tanona dekenai idia giroa lou. Bena, unai au namodia bamona idia noho kara maoromaoro taudia—hegeregere toretore tauna Esera, peroveta taudia Hagai bona Sekaraia, bona Hahelaga Tauna Badana Iosua—edia hakaua dalana henunai, idaunegai idia dika gabudia idia haginia lou. Lohia taudia, hegeregere Nehemia bona Serubabele, be unai tano idia lohiaia namonamo mai maoromaoro ida. Iehova ena dubu idia haginia lou, bona mauri totona ia henia gaudia—iena gwauhamata taravatuna idia badinaia dainai idia abia hahenamo idauidau—be ma idia aru mai. (Deuteronomi 30:19; Isaia 48:17-20) Hahenamo ta be diba idia abia. Hahelaga taudia be edia gaukara idia karaia lou, bona taunimanima dekenai Taravatu idia hadibaia. (Malaki 2:7) Unai dainai, taunimanima be lauma dalana ai idia mauri lou bona Iehova ena hesiai taudia namodia ai idia lao, bona huahua idia havaraia, Mase Davarana ia namo lou bena haoda gaukarana ia bada hegeregerena.
14. Dahaka dainai Esekiela ena peroveta herevana do ia guguru negana ma ta be idau tano amo Iuda taudia idia giroa lou murinai ia vara karana ia hereaia momokani?
14 Unai kara sibodia amo Esekiela ena matahanai ia guguru, a? Lasi; unai ia hereaia gauna ia hahedinaraia. Mani inai oi laloa: Esekiela ena matahanai ai ia itaia dubuna be ia herevalaia hegeregerena idia haginia diba lasi. Momokani, Iuda taudia ese unai matahanai idia laloa bada herea bona ena kahana maragidia haida idia badinaia.b To, matahanai lalonai ia hedinarai dubuna ibounai be bada herea dainai, Moraia Ororona, dubu gunana ia gini gabuna, ena bada be hegeregere lasi. Danu, Esekiela ia itaia dubuna be hanua lalonai lasi to sisina ia daudau, tano ena kahana ma ta ai ia noho, to dubu iharuana be ginigunana ena gabu ai idia haginia, Ierusalema ena magu lalonai. (Esera 1:1, 2) Danu, sinavai korikorina ta be Ierusalema ena dubu helagana amo ia aru lao lasi. Unai dainai, idaunegai Israela taudia be Esekiela ena peroveta herevana ia guguru toana sibona idia itaia. Unai ese ia hahedinaraia unai matahanai be dala badana ai, lauma dalana ai, do ia guguru.
15. (a) Iehova ena lauma dubuna be edena nega ai ia hedinarai matamaia? (b) Dahaka ese ia hahedinaraia Esekiela ena matahanai ena anina be tanobada ai Keriso ia do noho negana lalonai ia guguru lasi?
15 Ia hedinarai goevagoeva, namona be Iehova ena lauma dubuna ai Esekiela ena matahanai ia guguru dalana badana ita tahua. Heberu bukana dekenai Paulo ese unai dubu ia herevalaia badabada. Lagani 29 C.E. ai, Dirava ese Iesu ia horoa, bona Hahelaga Tauna Badana ai ia lao neganai, unai dubu be ia hedinarai. To, Iesu ena nega ai Esekiela ena matahanai ena anina ia guguru, a? Lasi. Iesu, Hahelaga Tauna Badana unai, be ena bapatiso amo, sibona ia bouboulaia karana amo, bona Helaga Herea gabuna, guba, ai ia vareai karana amo, Kara Dika ena Davana Karaia Dinana ena anina ia hagugurua. (Heberu 9:24) To, Esekiela ena matahanai lalonai hahelaga tauna badana eiava Kara Dika Davana Karaia Dinana ia herevalaia lasi. Unai dainai unai matahanai be aposetolo taudia edia nega ia herevalaia lasi. Vadaeni, edena nega ia herevalaia?
16 Haere ita davaria totona, unai matahanai ma ita laloa lou. Esekiela ia gwau: “Dirava ese mata hanai ta dekena amo Israela tano dekenai lau ia abia lao, ororo badana ta ena ataiai lau ia atoa diho, vadaeni egu vairana dekenai ruma haida lau itaia, hanua badana ta bamona.” (Esekiela 40:2) Unai matahanai gabuna, “ororo badana” unai, ita laloa neganai, Mika 4:1 ena hereva ita laloa lou, ia gwau: “Nega gabeai dinadia neganai, Dubu Helaga ia gini ena ororo, be ataiai herea do ia lao. Ororo ibounai edia lata be ia ese do ia hanaia. Bese idauidau taudia momo, be inai ororo dekenai do idia mai.” Unai peroveta herevana be edena nega ai ia guguru? Mika 4:5 ese ia hahedinaraia bese idauidau be edia dirava koikoidia idia tomadiho henia noho negana lalonai do ia guguru matamaia. Momokani, unai be iseda nega lalonai, ‘dina gabedia’ ai, Dirava ena hesiai taudia ese tomadiho goevana idia abia isi bona edia mauri lalonai idia atoa guna.
17. Malaki 3:1-5 ena peroveta herevana ese edena bamona ita ia durua Esekiela ese matahanai lalonai ia itaia dubuna idia hagoevaia negana ita diba totona?
17 Dahaka dainai unai hanamoa lou gaukarana idia karaia diba? Oi laloatao, Esekiela ena matahanai lalonai mai anina bada karana be Iehova ia mai dubu dekenai bona mai goada ida ia gwau namona be iena ruma do idia hagoevaia, bona kaivakuku tomadiho henia karana do idia kokia. Iehova ena lauma dubuna be edena nega ai ia hagoevaia? Malaki 3:1-5 lalonai, Iehova be nega ta ia gwauraia, unai nega ai “iena Dubu Helaga dekenai do ia mai” bona iena ‘gwauhamata taravatuna ena hereva ia gwauraia tauna,’ Iesu Keriso, ese do ia bamoa. Dahaka ia karaia totona? “Ia be sopu goadana bamona, dabua mirona huria gauna. Bona ia be golo ia hagoevaia ena lahi bamona.” Unai hagoevaia gaukarana be tanobada ibounai tuarina ginigunana ena nega ai ia matamaia. Unai kara ese dahaka ia havaraia? Iehova be ena ruma ai ia helai bona lagani 1919 amo lauma dalana ai ena taunimanima edia tano ia hanamoa. (Isaia 66:8, NW) Vadaeni, ita gwau diba Esekiela ese ia itaia dubu ena peroveta herevana be mai anina bada dalana ai dina gabedia ai do ia guguru.
18. Dubu ena matahanai be edena nega ai dala ginigabena do ia guguru?
18 Hanamoa lou karana idia perovetalaia herevadia ma haida hegeregerena, Esekiela ena matahanai be dala ma ta, dala ginigabena ai, Paradaiso ai do ia guguru. Unai nega lalonai kudou maoro taudia ese Dirava ena dubu gaudia edia namo ibounai do idia abia. Keriso ese ena boubou gauna ena namo do ia gaukaralaia, bona guba ena hahelaga taudia 144,000 ese do idia bamoa. Keriso ena lohia henunai, kamonai taudia ibounai be do idia namo ela bona idia goevadae. (Apokalupo 20:5, 6) To, Paradaiso be Esekiela ena matahanai hagugurua negana bada hereana lasi. Dahaka dainai?
Matahanai be mai Anina Bada Iseda Nega Lalonai
19 Esekiela ia itaia dubuna do idia hagoevaia be namo. Kaivakuku tomadiho henia bona lauma dalana ai heudahanai karana do idia kokia be namo. (Esekiela 43:7-9) Unai kara be Paradaiso ai Iehova tomadiho henia karana ia herevalaia diba lasi, ani? Danu, matahanai lalonai idia noho hahelaga taudia be tanobada dekenai idia do noho horoa hahelaga taudia idia laulaulaia, guba dekenai idia toreisi lou murinai eiava Lagani 1,000 Lohia Negana lalonai idia ia laulaulaia lasi. Dahaka dainai? Oi itaia unai matahanai lalonai hahelaga taudia be lalona kahana ena ariara dekenai hesiai gaukara idia karaia. Idia halasia vadaeni Gima Kohorona magasin lalodiai idia hahedinaraia unai ariara ese Keriso ena hahelaga taudia, tanobada dekenai idia do noho lalonai, edia gini karana lauma dalana ai ia laulaulaia.c Danu, oi itaia unai matahanai lalonai hahelaga taudia be idia goevadae lasi. Dirava ese ia hamaorodia namona be edia dika gwauatao boubou gauna do idia henia. Sisiba idia abia, badina lauma dalana ai idia bona edia kara idia miro garina. Unai dainai idia be idia toreisi lou vadaeni horoa taudia idia laulaulaia lasi. Unai taudia be Paulo ese ia herevalaidia ia gwau: “Kibi do idia hiriria, vadaeni mase taudia do idia toreisi lou, bona do idia mase lou diba lasi.” (1 Korinto 15:52 Esekiela 44:21, 22, 25, 27) To matahanai lalonai hahelaga taudia be taunimanima huanai idia noho bona edia hesiai gaukara idia karaia. Paradaiso lalonai unai bamona do ia vara lasi. Unai neganai hahelaga oreana taudia be guba dekenai do idia noho. Unai dainai, unai matahanai ese hari inai nega lalonai tanobada dekenai horoa taudia bona “hutuma bada herea” taudia idia gaukara hebou namonamo dalana ia hahedinaraia goevagoeva.—Apokalupo 7:9, NW; Esekiela 42:14.
19, 20. Dahaka dainai matahanai ena anina ia guguru negana badana be Paradaiso dekenai lasi, to hari inai nega lalonai?
20 Unai dainai, Esekiela ese dubu ia itaia ena matahanai be hari inai nega lalonai hagoevaia gaukarana namona ia guguru noho ia laulaulaia. To, unai ena anina oi dekenai be dahaka? Unai be anina ia hehuni laulauna ta sibona lasi. Unai matahanai be mai anina bada dina ta ta iboudiai lalonai Dirava momokani tamona, Iehova, oi tomadiho henia karana dekenai. Hereva gabena ai, do ita itaia edena dala ai unai be momokani.
[Footnotes]
a Reana unai ese Esekiela ena lalona ia hamoalea, badina haida idia gwau ia be Sadoka ena hahelaga besena amo ia vara.
b Hegeregere, idaunegai bukana Mishnah ia gwau idia hanamoa lou dubuna ai, boubou patana, dubu ena iduara mai edia kahana rua gaudia, bona nanadu gabudia be Esekiela ena matahanai hegeregerena idia haginia.
c Gima Kohorona, July 1, 1996, rau 16; May 1, 1974, rau 110-11 itaia.
Inai Oi Laloatao, A?
◻ Esekiela ese dubu bona ena hahelaga taudia ia itaia ena matahanai be edena nega ai nega ginigunana ia guguru?
◻ Edena dala ai Esekiela ena matahanai lalonai tano hapararaia karana ena anina be nega ginigunana ia guguru?
◻ Idaunegai Israela hanamoa lou gaukarana lalonai, daidia be lohia taudia mai edia kamonai bona daidia be au bamona kara maoromaoro taudia?
◻ Dahaka dainai Esekiela ese dubu ia itaia ena matahanai ena anina be dina gabedia ai ia guguru?
4. Esekiela be Dirava ese edeseniai ia abia lao, unuseniai dahaka ia itaia, bona daika ese ia hakaua loaloa unai gabu ia itaia totona?
16. Esekiela ena matahanai gabuna dainai edena peroveta herevana ma ta ita laloa, bona unai ese edena bamona ita ia durua unai matahanai ena anina ia guguru negana badana ita lalo-pararalaia?