Matamata Tadikaka E, Oi Ura Maduna Oi Abia, A?
1. Edena negai tadikaka ta ese 1 Timoteo 3:1 ena hereva ia badinaia matamaia be namo?
1 “Bema ta ia ura . . . maduna ia abia, ia be gaukara namona ia ura henia unai.” (1 Tim. 3:1) Unai ese tadikaka ibounai ia hagoadaia, namona be idia hekwarahi kongrigeisen ai maduna idia abia totona. Anina be oi naria ela bona oi bada guna, a? Lasi, to oi do matamata neganai oi hekwarahi matamaia maduna oi abia totona. Unai amo treinini oi abia, bena oi bada oi lao lalonai oi hahedinaraia oi be hegeregere kongrigeisen hesiai tauna ena maduna oi abia totona. (1 Tim. 3:10) Matamata tadikaka e, unai maduna oi abia totona, dahaka oi karaia be namo?
2. Edena dala ai henia karana oi hahedinaraia diba?
2 Henia Tauna Ia Moale: Laloatao, oi be oi ura gaukara namona oi abia, dagi lasi. Unai dainai, mai ura ida emu tadikaka taihu oi durua. Unai bamona oi karaia totona, Iesu ena haheitalai namona oi laloa dobu. (Mat. 20:28; Ioa. 4:6, 7; 13:4, 5) Iehova oi noia, oi ia durua ma haida edia namo oi tahua totona. (1 Kor. 10:24) Kongrigeisen ai burukadia o gorere taudia oi durua diba, a? Kingdom Hall meintenens oi karaia, ava oi utua, gabu oi daroa, o gaukara ma haida oi karaia, a? Tiokratik Haroro Sikuli ai tok henia stiuden ia mai lasi neganai, oi volantia diba, a? Ma haida durua gaukaradia oi karaia dainai do oi moale.—Kara 20:35.
3. Edena dala ai oi hahedinaraia diba oi be Dirava ena lauma helaga ese ia hakaua tauna?
3 Lauma Helaga ese Ia Hakaua Tauna: Kongrigeisen hesiai tauna ta ena diba ia bada o maragi be gau badana lasi. To gau badana be inai: Dala idauidau ai ia hahedinaraia ia be Dirava ena lauma helaga ese ia hakaua tauna. Gau idauidau dekenai, ia ura Iehova bona Iesu edia lalohadai ia abia. (1 Kor. 2:15, 16) “Lauma helaga ena huahua” ia hahedinaraia. (Gal. 5:22, 23) Basileia ia tahua guna dainai haroro ia goadalaia. (Mat. 6:33) Kongrigeisen heboudia oi reaia lasi be gau badana. Dirava ena Hereva oi stadilaia loulou karana ese oi ia durua diba, kara namodia oi karaia totona. Anina be, dina ta ta ai Baibel, Gima Kohorona, bona Awake! oi duahia, bona kongrigeisen ena hebou gaudia oi hegaegaelaia. (Sal. 1:1, 2; Heb. 10:24, 25) Paulo ese mero matamata Timoteo ia hamaoroa: “Oi sibona bona emu hadibaia hereva dekenai oi naria namonamo.” (1 Tim. 4:15, 16) Unai dainai, Tiokratik Haroro Sikuli ai tok ta oi abia neganai, oi hegaegae namonamo. Haroro totona oi hegaegae, bona unai gaukara oi karaia hanaihanai. Palani oi karaia bona oi hekwarahi painia ai oi lao, o Betele ai oi gaukara, o Singul Tadikaka Edia Baibel Sikuli oi lao totona. Dirava ena lauma helaga ese oi do ia durua “matamata taudia ese vaia idia abia ura idauidau amo oi heau siri” totona.—2 Tim. 2:22.
4. Mai momokani ida gaukara ita karaia ena namo be dahaka?
4 Mai Momokani ida Gaukara Ia Karaia Tauna: Aposetolo taudia be ogogami Keristani taudia edia aniani haria gaukara idia karaia lasi, to idia ese “ladana namona” tatau haida idia abia hidi unai gaukara idia karaia totona. Unai tatau be mai momokani ida edia gaukara idia karaia dainai, aposetolo taudia be gaukara badadia ma haida idia karaia. (Kara 6:1-4) Kongrigeisen ai asainmen ta oi abia neganai, namona be mai emu kudouna ibounai ida oi karaia. Noa oi tohotohoa, ia be Dirava ena hadibaia hereva hegeregerena lagatoi ia karaia. (Gen. 6:22) Mai momokani ida ena gaukara ia karaia tauna be lo tadikakana bona Iehova ese ia laloa bada.—1 Kor. 4:2; mani “Treinini Ena Namo” mauana itaia.
5. Dahaka dainai matamata tadikakadia idia ura maduna idia abia be namo?
5 Peroveta hereva hegeregerena, Iehova be gogoa gaukarana ia haharagaia. (Isa. 60:22) Lagani ta ta ai, taunimanima 250 tausen mai kahana idia bapatiso. Kamonai taudia momo be Iehova ena orea lalonai idia vareai noho dainai, elda o hesiai taudia momo ese kongrigeisen ena maduna idauidau idia huaia be namo. Hari, Iehova ena hesiai gaukara be momo herea, guna bamona lasi. (1 Kor. 15:58) Matamata tadikaka e, oi ura maduna oi abia, a? Bema oibe, oi be gaukara namona oi ura henia unai!
[Blurb on page 2]
Kamonai taudia momo be Iehova ena orea lalonai idia vareai noho dainai, elda o hesiai taudia momo ese kongrigeisen ena maduna idauidau idia huaia be namo
[Box on page 3]
Treinini Ena Namo
Elda ese matamata tadikaka dekenai asainmen idia henia neganai, namona be idia treinia danu. Hebou murinai, sekit naria tauna ta be Kingdom Hall ena vaira kahanai pablisa ta ida ia herevahereva. Sekit naria tauna ia itaia mero ta be edia badinai ia gini. Bena ia nanadaia: ‘Oi ura lau oi hereva henia, a?’ Mero ia gwau: ‘Lau idia henia gaukara be, hebou idia ore negadiai, steij lau daroa.’ Ena be iena tama sina idia hegaegae ruma idia lao totona, to mero ia ura ena gaukara ia hagugurua guna. Sekit naria tauna ia moale bona ia gwau: “Nega momo unai kongrigeisen elda taudia be matamata tadikakadia dekenai asainmen idia henia bona idia treinia. Danu, egu vadivadi negadiai lau itaia, idia be matamata tadikaka ta idia gwauraia hidi hesiai tauna ta ai ia lao totona.”