KAROA 4

Dahaka Dainai Siahu Taudia Ita Matauraia?

“Taunimanima ibounai do umui matauraia.”—1 PETERO 2:17.

1, 2. (a) Dahaka dainai siahu taudia ita matauraia be auka? (b) Edena henanadai haida do ita herevalaia?

OI ITAIA tama ta ese natuna maragina ta ia noia gau ta ia karaia totona, to natuna ia ura lasi neganai, ena kara be edena bamona? Reana natuna ena vairana amo do oi itaia ia moale lasi. Ia diba ena tamana ena hereva ia kamonai bona ia matauraia be namo. To, ia ura lasi ena tamana ena ura gauna ia karaia. Iena kara ese ita ibounai dekenai ia vara gauna ta ia hahedinaraia.

² Nega haida siahu taudia ita matauraia be auka. Nega haida oi idia biagua taudia oi matauraia be auka, a? Bema oibe, oi sibona ese unai hekwakwanai oi davaria lasi. Hari inai negai, vaia taunimanima momo be siahu taudia idia matauraia lasi. To, Baibel ia gwau ita idia gunalaia taudia ita matauraia be namo. (Aonega Herevadia 24:21) Momokani, bema ita ura Dirava ena lalokau lalonai ita noho, unai bamona ita karaia be namo. Vadaeni, henanadai haida be inai: Dahaka dainai siahu taudia ita matauraia be auka? Dahaka dainai Iehova ia ura siahu taudia ita matauraia, bona dahaka ese ita ia durua unai bamona ita karaia totona? Bona edena dala ai siahu taudia dekenai hemataurai ita hahedinaraia diba?

DAHAKA DAINAI SIAHU TAUDIA ITA MATAURAIA BE AUKA?

3, 4. Kara dika be edena bamona ia matamaia? Dahaka dainai kara dika taudia ese siahu taudia idia matauraia be auka?

³ Siahu taudia ita matauraia be auka ena badina rua do ita herevalaia. Namba 1: Ita be mai iseda kara dika. Namba 2: Siahu taudia danu be mai edia kara dika. Kara dika be Eden umana ai ia vara, unuseniai Adamu bona Heva ese Dirava ena lohia siahuna idia dadaraia. Unai gwau-edeede karana dainai kara dika ia vara. Unai dainai unai nega amo ema bona hari, gwau-edeede karana be taunimanima edia lalona ai ia noho.—Genese 2:15-17; 3:1-7; Salamo 51:5; Roma 5:12.

⁴ Ita be kara dika taudia dainai, ita momo be hekokoroku bona heagi karadia ita hahedinaraia haraga. Taunimanima momo be manau karana idia hahedinaraia lasi dainai, namona be ita hekwarahi unai kara ita hahedinaraia totona. Ena be lagani momo lalonai Dirava ita hesiai henia, to reana ita ese gwau-edeede bona hekokoroku karadia ita hahedinaraia noho. Kora mani ita laloa, ia be Iehova ena taunimanima ida metau negadiai ia haheauka. To, ia ura dagi bada ia abia dainai manau momokani tauna Mose ia gwau-edeede henia. (Numera 12:3; 16:1-3) King Usaia danu mani oi laloa, ia hekokoroku dainai Iehova ena dubu dekenai ia vareai bona hahelaga taudia sibona ese idia karaia gaukarana ia karaia. (2 Sivarai 26:16-21) Unai bamona gwau-edeede taudia be Dirava ese ia panisidia. To, edia haheitalai dikana ese ita ia hadibaia unai bamona kara ita dadaraia totona. Siahu taudia ita matauraia totona, hekokoroku karana ita dadaraia be namo.

5. Edena dala ai goevadae lasi taudia ese edia siahu idia gaukaralaia kerere?

⁵ To, goevadae lasi taudia mai edia siahu be kara dika momo idia karaia dainai taunimanima ese idia matauraidia lasi. Siahu taudia momo be idia hereva dika bona mai dagedage ida edia taunimanima idia kara henidia. Histori lalonai, sivarai momo ese idia hahedinaraia siahu taudia be taunimanima idia kara dika henia bada. (Hadibaia Tauna 8:9) Hegeregere, Iehova ese Saulo ia abia hidi king ai ia lao neganai, ia be manau tauna namona. To, gabeai ia hekokoroku bona ia mama, bona Davida ia dagedage henia. (1 Samuela 9:20, 21; 10:20-22; 18:7-11) Unai murinai Davida be Israela ena king namona ta ai ia lao, to ia danu be gabeai iena siahu ia gaukaralaia kerere. Ia ese Hiti tauna Uria ena adavana ia abia bona kerere lasi tauna Uria ia siaia lao tuari lalonai idia hamasea totona. (2 Samuela 11:1-17) Oibe, taunimanima be idia goevadae lasi dainai, edia siahu idia gaukaralaia kerere. Bona lohia taudia be Iehova idia matauraia lasi neganai, edia kara be dika momokani. Britain ena histori tauna ta be Katolik pope taudia ese idia havaraia dagedage karadia ia herevalaia murinai, ia gwau lohia taudia be siahu idia abia neganai, unai ese edia kara namo ia hadikaia, bona siahu bada idia abia neganai, edia kara be ia dika momokani. Ataiai gaudia ita herevalaia murinai, namona be inai henanadai ita laloa: Dahaka dainai siahu taudia ita matauraia be namo?

SIAHU TAUDIA ITA MATAURAIA ENA BADINA

6, 7. (a) Iehova ita lalokau henia dainai ita ura dahaka ita karaia, bona dahaka dainai? (b) Kamonai karana ena badina be dahaka, bona edena bamona ita hahedinaraia?

⁶ Siahu taudia ita matauraia ena badina badana be lalokau: Ita ese Iehova, iseda dekena taudia bona ita sibona ita lalokau henia. Ita be Iehova ita lalokau henia bada bona ita ura Ia ita hamoalea. (Aonega Herevadia 27:11; Mareko 12:29, 30) Ita diba Eden umana ai Iehova ena lohia siahuna, tanobada bona guba ia lohiaia dalana unai, be Satani ese ia hepapahuahulaia. Bona taunimanima momo be Satani ena kahanai idia gini bona Iehova ena lohia dalana idia dadaraia. To ita moale badina ita be Iehova ena kahanai ita gini. Apokalupo 4:11 ena hereva ita duahia neganai, iseda kudouna ia hamarerea. Ita diba goevagoeva Iehova be guba bona tanobada ia lohiaia be maoro! Ita ese Iehova ena lohia siahuna ita abia dae bona dina ta ta ai ita badinaia.

⁷ Unai bamona hemataurai karana ena anina be Iehova do ita kamonai henia. Iehova ita kamonai henia ena badina be Ia ita lalokau henia. To, nega haida kamonai karana ita hahedinaraia be auka. Unai bamona negadiai, ita be paragraf 1 ai ita herevalaia natu bamona, siahu taudia do ita badinaia be namo. Ita laloatao Iesu be iena Tamana ia kamonai henia bona iena ura ia karaia, ena be unai ia karaia be auka. Iena Tamana dekenai ia gwau: “Lauegu ura lasi, oiemu ura sibona.”—Luka 22:42.

8. (a) Iehova ena lohia siahuna ita matauraia ena anina be dahaka, bona Israela taudia be Mose dekenai idia maumau neganai, Iehova ena lalohadai be dahaka? (b) Dahaka ese ita do ia durua sisiba bona matahakani ita abia dae totona? (Rau 52-3 ai ia noho mauana itaia.)

⁸ Oibe, hari inai negai Iehova be ita dekenai maoromaoro ia hereva lasi, to Iena Hereva bona tanobada ai ia abia hidi taudia amo ita ia hereva henia. Iehova ese ia abia hidi taudia ita matauraia neganai, ita hahedinaraia Iehova ena lohia siahuna ita matauraia. Bema unai taudia ita matauraia lasi—hegeregere, bema elda taudia be Baibel amo ita idia sisiba henia, iseda kara ita hamaoromaoroa totona, to idia ita dadaraia—iseda Dirava ita habadua unai. Israela taudia be Mose dekenai idia maumau bona idia gwau-edeede neganai, Iehova ia gwau idia be Ia idia matauraia lasi.—Numera 14:26, 27.

9. Dahaka dainai iseda dekena tauna ita lalokau henia karana be ita ia durua siahu taudia ita matauraia totona? Haheitalai gwauraia.

⁹ Danu, ita ese iseda dekena taudia ita lalokau henia dainai, siahu taudia matauraia karana ita hahedinaraia. Edena dala ai? Haheitalai ta mani oi laloa, oi be tuari tauna ta tuari oreana lalonai. Tuari oreana ia kwalimu bona tuari taudia idia mauri totona, gau badana be idia ta ta idia gaukara hebou bona edia gunalaia taudia idia matauraia bona edia hereva idia kamonai. Bema oi gwau-edeede, emu tuari orea taudia ibounai be dika idia davaria diba. Momokani, hari inai negai tuari oreadia ese tanobada ai dika bada idia havaraia noho. To, Iehova ena tuari oreadia be kara namo sibona idia karaia. New World Translation Baibel be nega momo Dirava ia gwauraia “tuari oreadia edia Iehova.” (1 Samuela 1:3, NW) Ia be aneru goadadia momo herea edia Biaguna. Nega haida, Iehova ese iena hesiai taudia tanobada dekenai be tuari orea ta bamona ia gwauraidia. (2 Timoteo 2:3; Esekiela 37:1-10) Bema Iehova ese ia abia hidi taudia ita gwau-edeede henia, unai kara ese iseda tuari oreana lalonai idia noho taudia ma haida ia hadikaia diba. Bema Keristani tauna ta be elda tauna ta ia gwau-edeede henia, kongrigeisen lalonai idia noho taudia ma haida be idia lalohisihisi diba. (1 Korinto 12:14, 25, 26) Natu ta ia gwau-edeede neganai, ruma bese taudia ibounai idia lalohisihisi. Unai dainai siahu taudia ita matauraia bona idia ida ita gaukara namonamo neganai, ita hahedinaraia iseda dekena taudia ita lalokau henia.

10, 11. Edena dala ai sibona iseda namo ita laloa bada karana ese ita ia durua siahu taudia ita matauraia totona?

¹⁰ Danu, iseda namo totona, siahu taudia ita matauraia. Nega momo Iehova ese ita ia hamaoroa siahu taudia ita matauraia neganai, do ita abia hahenamo ia gwauraia danu. Hegeregere, natudia ia hamaoroa edia tama sina idia kamonai henia be namo, badina unai amo mauri namona do idia abia bona do idia mauri daudau. (Deuteronomi 5:16; Efeso 6:2, 3) Iehova be ita ia hamaoroa kongrigeisen elda taudia ita matauraia totona, badina unai ita karaia lasi neganai, iseda hetura karana Iehova Dirava ida ia dika diba. (Heberu 13:7, 17) Bona ita ia hadibaia gavamani ita matauraia be namo, badina idia ese ita idia naria.—Roma 13:4.

¹¹ Iehova ia ura siahu taudia ita matauraia ena badina ita diba neganai, unai ese ita ia durua hemataurai ita hahedinaraia totona. Vadaeni, iseda mauri lalonai siahu taudia do ita matauraia daladia toi mani ita herevalaia.

RUMA BESE LALONAI HEMATAURAI HAHEDINARAIA DALANA

12. Iehova ese tau o tama dekenai dahaka maduna ia henia, bona edena dala ai tau ese unai maduna do ia huaia?

¹² Iehova be gau ibounai ia karaia namonamo Diravana. Unai dainai, ruma bese ia havaraia neganai, do idia gaukara hebou namonamo dalana ia hegaegaelaia danu. (1 Korinto 14:33) Tau o tama dekenai ruma bese ena kwara dagina ia henia. Tau ese iena Kwarana, Keriso Iesu ia matauraia, bema ia be Iesu ese kongrigeisen ia naria dalana ia tohotohoa. (Efeso 5:23) Unai dainai, tau be iena maduna do ia huaia namonamo; ena ruma bese do ia biagua auka eiava dagedage henia lasi, to mai lalokau, manau bona hebogahisi ida do ia naria. Namona be ia laloatao ia be Iehova ena siahu henunai ia noho.

Keristani tama ta ese Keriso ena kwara dagina ia tohotohoa

13. Edena dala ai hahine o sina ta be Iehova ese ia moalelaia dalana ai ena maduna ia huaia diba?

¹³ Hahine o sina be edia adavana do idia durua. Hahine danu be mai ena siahu ruma bese lalonai, badina Baibel ia gwau, “sinana, edia hadibaia hereva do oi kamonai henia.” (Aonega Herevadia 1:8) To, ena siahu be iena tau ena siahu ia hereaia lasi. Keristani hahine be ena tau ena siahu ia matauraia, bema ia ese iena adavana ia durua iena maduna ia huaia namonamo totona. Do ia gwau lasi ena tau be gau ta ia diba lasi, o namo lasi tau ena lalona ia veria ena ura ia karaia totona, o tau ena maduna ia abia. To, namona be iena tau ia durua bona idia gaukara hebou. Bema tau ese ia abia hidi gauna be iena ura hegeregerena lasi, mai hemataurai ida ena lalohadai ia gwauraia diba, to tau ia abia hidi gauna do ia matauraia. Bema iena adavana be Witnes lasi, reana iena tau do ia matauraia be auka, to mai hemataurai ida ia kara henia neganai, iena tau ena lalona ia haidaua bona Iehova ia tahua diba.—1 Petero 3:1.

Natuna mero be ruma lalonai kopukopu ia abia vareai dainai, ena tamana ese mai lalokau ida ia hereva henia

14. Edena dala ai natudia ese edia tama sina bona Iehova idia hamoalea diba?

¹⁴ Natudia be edia tama sina edia hereva idia kamonai henia neganai, Iehova ia moale. Danu edia tama sina idia matauraia bona idia hamoalea. (Aonega Herevadia 10:1) Tama o sina sibona ruma besena lalonai, natudia ese kamonai karana idia hahedinaraia, badina idia laloparara edia tama o sina do idia durua bona idia gaukara hebou be mai anina bada. Ruma bese lalonai ta ta be Dirava ese idia dekenai ia henia maduna idia huaia neganai, maino bona moale bada do ia noho. Unai ese ruma bese ia havaraia Diravana, Iehova ia hanamoa.—Efeso 3:14, 15.

KONGRIGEISEN AI HEMATAURAI HAHEDINARAIA DALANA

15. (a) Kongrigeisen lalonai, edena dala ai ita hahedinaraia ita be Iehova ena siahu ita matauraia? (b) Edena hakaua herevadia ese ita do idia durua elda taudia ita matauraia totona? (Rau 54-5 ai ia noho mauana itaia.)

¹⁵ Iehova ese iena Natuna ia abia hidi Keristani kongrigeisen ia lohiaia totona. (Kolose 1:13) Bena Iesu be “hesiai tauna mai ena kamonai, bona mai ena kara maoromaoro” dekenai Dirava ena taunimanima tanobada dekenai naria gaukarana ia henia. (Mataio 24:45-47) Iehova ena Witnes taudia edia Hakaua Oreana be “hesiai tauna mai ena kamonai” ena ladanai idia gaukara. Aposetolo edia negai bamona, hari kongrigeisen elda taudia be maoromaoro Hakaua Oreana amo hakaua herevadia bona sisiba idia abia, eiava loaloa naria taudia amo idia abia. Bema ita ta ta be Keristani elda taudia ita matauraia, ita be Iehova ita kamonai henia noho.—Heberu 13:17.

16. Edena dala ai elda taudia be lauma helaga ese ia abia hidi?

¹⁶ Elda bona hesiai taudia be goevadae lasi taudia. Idia danu be kerere idia karaia diba, ita bamona. To, elda taudia be “harihari gaudia,” kongrigeisen taudia idia durua Iehova kahirakahira idia noho totona. (Efeso 4:8) Lauma helaga ese elda taudia ia abia hidi. (Kara 20:28) Edena dala ai? Unai bamona tatau be Dirava ena Hereva lalonai idia noho taravatu idia badinaia be gau badana. (1 Timoteo 3:1-7, 12; Tito 1:5-9) Danu, elda taudia ese tadikaka ta be elda maduna totona idia ura abia hidi neganai, Iehova ena lauma helaga idia noia idia ia durua totona.

17. Keristani taihu ta be kongrigeisen ena maduna ta ia huaia neganai, dahaka dainai ena kwarana ia koua be namo?

¹⁷ Kongrigeisen lalonai, nega haida elda o hesiai taudia idia noho lasi maduna ta idia huaia totona, hegeregere haroro gaukara ena hebou idia hakaua totona. Bema unai ia vara, bapatiso tadikaka haida ese idia hakaua diba. To bema tadikaka ta ia noho lasi, vadaeni lo Keristani taihu ese unai maduna ia huaia diba. To, bema hahine ese bapatiso tadikaka edia maduna ta ia huaia, iena kwarana ia koua be namo.a (1 Korinto 11:3-10) Unai kara ese hahine ia hadikaia lasi. To, hahine ese ruma bese bona kongrigeisen lalonai Iehova ese ia atoa kwara dagi taudia matauraia karana ia hahedinaraia.

GAVAMANI MATAURAIA DALANA

18, 19. (a) Roma 13:1-7 ena hakaua herevana ena anina be dahaka? (b) Edena dala ai gavamani taudia ita matauraia?

¹⁸ Keristani taudia korikoridia be Roma 13:1-7 ena hakaua herevadia idia badinaia. Unai siri oi duahia neganai, do oi itaia ia be “gavamani” ia herevalaia. Iehova ese taunimanima edia lohia dalana ia koua lasi dainai, idia be mai anina bada gaukara idia karaia, hegeregere taunimanima idia naria bona idia durua. Gavamani ena taravatu hegeregerena ita kara neganai, ita be gavamani taudia ita matauraia unai. Takisi moni ita henia, gavamani ena fom idauidau ita hahonua neganai ita torea mai momokani ida, bona iseda ruma bese, bisinesi, eiava kohu dekenai idia atoa taravatu ita badinaia. To, bema gavamani taudia ese ita idia hamaoroa Dirava ena taravatu ita utua totona, edia hereva do ita kamonai lasi. To, aposetolo taudia bamona ita gwau diba: “Dirava ai kamonai henia be namo, taunimanima ai kamonai henia be dika.”—Kara 5:28, 29; rau 48 ai, “Daika Ena Siahu Lau Badinaia be Namo?” mauana itaia.

¹⁹ Iseda kara amo ita hahedinaraia gavamani ita matauraia. Nega haida ita be gavamani taudia do ita hereva henia. Aposetolo Paulo be King Heroda Agripa bona Gavana Festo vairadiai ia gini. Unai tatau be kerere badadia idia karaia, to Paulo be mai hemataurai ida idia ia hereva henia. (Kara 26:2, 25) Ena be ita hereva henia tauna be siahu bada tauna o pulisi tauna ta sibona, to namona be Paulo ena haheitalai ita tohotohoa. Sikuli dekenai, matamata Keristani taudia be edia tisa bona gaukara taudia haida idia matauraia danu. Oibe, namo lasi Iehova ena Witnes taudia idia abia dae taudia sibona ita matauraia; to ita idia dagedage henia taudia danu ita matauraia be namo. Oibe, namona be Iehova idia tomadiho henia lasi taudia idia itaia ita be idia ita matauraia.—Roma 12:17, 18; 1 Petero 3:15.

20, 21. Gavamani taudia ita matauraia karana amo dahaka hahenamo haida idia vara?

²⁰ Namo lasi taunimanima haida sibona ita matauraia. Aposetolo Petero ia gwau: “Taunimanima ibounai do umui matauraia.” (1 Petero 2:17) Bema taunimanima idia itaia ita ese idia ita matauraia, do idia moale. Namona be ita laloatao, hari inai negai, taunimanima momo be hemataurai karana idia hahedinaraia lasi. Hemataurai karana ita hahedinaraia neganai, ita hahedinaraia ita be Iesu ena hahegani ita badinaia: “Emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.”—Mataio 5:16.

²¹ Inai dibura tanobadana lalonai, kudou namo taudia be hereva momokani ena diari idia ura henia. Unai dainai ruma bese, kongrigeisen bona gavamani taudia dekenai hemataurai ita hahedinaraia neganai, haida edia lalona do ita veria bona ita ida diari ai do idia raka. Bema unai ia vara do ita moale bada. Herevana unai ia vara eiava lasi, to inai hereva be momokani: Taunimanima ita matauraia dainai Iehova Dirava ia moale bona ita ia durua iena lalokau lalonai ita noho totona. Unai be hahenamo badana!

a Rau 239-42 ai, Apendiks ese unai hakaua herevana badinaia daladia haida ia herevalaia.

SISIBA KAMONAI BONA MATAHAKANI ABIA DAE

Satani ena lauma—iena gwau-edeede, badu bona heai karadia—be tanobada idia hahonua. Unai dainai, Baibel ese Satani ia gwauraia “lauma dikadia edia biaguna,” bona ia gwau ‘Dirava idia kamonai henia lasi taudia edia lalona dekenai ia gaukara noho.’ (Efeso 2:2) Hari inai negai, momo idia ura lasi siahu taudia edia henunai idia noho to idia ura sibona idia biagua. Madi, Keristani kongrigeisen taudia haida be unai bamona lalohadai idia abia. Hegeregere, elda ta ese matabodaga eiava dagedage muvini piksa itaia karana dekenai sisiba ia henia, to haida be unai sisiba do idia abia dae lasi o idia badulaia. Ita ta ta be Aonega Herevadia 19:20 ena hereva ita badinaia be namo: “Bema oi ura bada diba do oi abia, bona sisiba oi kamonai henia noho neganai, oi ese dina ta aonega do oi davaria.”

Dahaka ese ita ia durua diba? Taunimanima ese sisiba o matahakani idia abia dae lasi ena badina toi do ita herevalaia, bona Baibel ena hakaua herevadia do ita itaia.

“Lau laloa unai sisiba be ia maoro lasi.” Reana ita laloa tadikaka ia henia sisiba be ita karaia gauna dekenai ia hegeregere lasi o sisiba ia henia elda tauna be ia vara gauna ia diba namonamo lasi. Unai dainai, ena sisiba ita dadaraia. (Heberu 12:5) Ita ibounai be goevadae lasi taudia dainai, reana iseda lalohadai be kerere bona ita hamaoromaoroa be namo, ani? (Aonega Herevadia 19:3) Badina haida dainai unai sisiba idia henia, a? Namona be sisiba idia henia ena badina ita laloa. Dirava be ita ia sisiba henia: “Egu hadibaia hereva do oi dogoatao, do oi rakatania lasi. Inai diba do oi gimaia, badina ia be oiemu mauri ena badina.”—Aonega Herevadia 4:13.
“Unai sisiba idia henia dalana lau moalelaia lasi.” Momokani, Baibel ese sisiba henia dalana maorona ia hahedinaraia. (Galatia 6:1) To, danu ia gwau: “Ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) Goevadae tauna sibona ese sisiba goevadaena be dala maorona ai ia henia diba. (Iamesi 3:2) To, Iehova be goevadae lasi taudia ia gaukaralaia ita dekenai sisiba idia henia totona. Unai dainai, namo lasi sisiba idia henia dalana ita laloa momo, to idia henia sisiba do ita laloa bada. Gau badana be, unai sisiba ena badina ita laloa, ita gurigurilaia bona do ita badinaia dalana ita lalohadailaia namonamo.
“Iena kara be namo lasi dainai, ia be hegeregere lasi lau ia sisiba henia totona!” Bema ita laloa ita ia sisiba henia tauna be mai ena kerere dainai ita dekenai sisiba ia henia be maoro lasi, namona be ataiai idia noho point ita laloatao. Unai hegeregerena, bema ita laloa iseda mauri lagani be bada, iseda diba be haida edia diba ia hanaia, o kongrigeisen lalonai ita be mai iseda maduna dainai, tau ta ese ita do ia sisiba henia lasi, unai lalohadai ita haidaua be namo. Idaunegai Israela ai, king ena maduna be momo, to ia henunai idia noho peroveta taudia, hahelaga taudia, bona ma haida amo sisiba ia abia dae be gau badana. (2 Samuela 12:1-13; 2 Sivarai 26:16-20) Hari inai negai, Iehova ena orea ese goevadae lasi taudia ia abia hidi sisiba idia henia totona, bona lo Keristani taudia be unai sisiba idia abia dae bona idia badinaia. Bema iseda diba be bada o eda maduna be ma haida edia ia hanaia, namona be mai manau bona laloa maoromaoro ida sisiba ita abia dae bona ita badinaia.—1 Timoteo 3:2, 3; Tito 3:2.

Oibe, ita ibounai be sisiba do ita abia. Unai be Iehova ena harihari gauna. Iehova be ita ia lalokau henia dainai ita ia sisiba henia, bona ita ura Iehova ena lalokau lalonai do ita noho. Unai dainai, namona be iseda lalona ita hadaia sisiba do ita abia dae haraga, iseda mauri lalonai ita badinaia bona unai harihari gauna dainai Iehova ita tanikiu henia.—Heberu 12:6-11.

“Umui Idia Hakaua Taudia Do Umui Kamonai Henia”

Idaunega Israela ai, gaukara idia karaia namonamo totona orea ta ia noho be namo. Tano gagaena ai Mose sibona ese taunimanima milioni ia naria diba lasi. Dahaka ia karaia? “Israela taudia ibounai dekena amo aonega taudia ia abia hidi, bona taunimanima edia gunalaia taudia ia halaodia, 1000 ta ta, 100 ta ta, 50 ta ta, bona 10 ta ta edia gunalaia taudia.”—Esodo 18:25.

Hari inai negai, Keristani kongrigeisen lalonai gaukara idia karaia namonamo totona orea ta ia noho be namo. Unai dainai kongrigeisen lalonai elda taudia idia noho, sekit naria tauna ta ese kongrigeisen haida ia naria, kongrigeisen ena sekit ta ta be distrik naria tauna ese ia naria, bona tano ta ta be Tano Komiti o Brens Komiti ese ia naria. Unai bamona orea idia noho dainai, mamoe naria gaukara idia karaia taudia be Iehova ena mamoe idia naria namonamo diba. Unai bamona mamoe naria taudia be Iehova bona Keriso vairanai do idia gini.—Kara 20:28.

Unai orea lalonai gaukara idia heau namonamo totona, namona be ita ta ta ese hakaua taudia ita kamonai henia. Ita ura lasi Diotrepe ena kara bamona ita karaia, ia be kongrigeisen idia gunalaia taudia ia matauraia lasi. (3 Ioane 9, 10) To, ita ura aposetolo Paulo ena hereva ita badinaia, ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heberu 13:17) Haida be edia hakaua taudia edia hereva idia ura henia neganai idia badinaia be auka lasi, to bema edia hereva idia abia dae lasi eiava sisiba ena badina idia lalopararalaia lasi, do idia badinaia lasi. Namona be ita laloatao, elda taudia edia henunai ita noho totona, ena be edia hereva ta ita ura henia lasi, to do ita kamonai be namo. Unai dainai, ita ta ta be sibona do ita nanadaia, ‘Lau be hakaua taudia henunai lau noho bona edia hereva lau kamonai henia, a?’

Momokani, Dirava ena Hereva ese kongrigeisen naria daladia ibounai ia gwauraia lasi. To, Baibel ia gwau: “Gaukara ibounai umui karaia namonamo, mai dala maorona, karaia kava lasi.” (1 Korinto 14:40) Hakaua Oreana be unai sisiba idia badinaia, bona kongrigeisen ena gaukara karaia namonamo totona dala idauidau ia abia hidi. Kongrigeisen lalonai maduna idia huaia tadikaka be haheitalai namona idia hahedinaraia bona unai gaukara karaia daladia idauidau idia badinaia. Idia be mai laloa maoromaoro ida edia hakaua taudia idia kamonai henia haraga. (Iamesi 3:17, NW) Unai amo kongrigeisen ta ta, sekit, distrik, bona tano idauidau ai idia noho tadikaka be mai lalotamona ida idia gaukara hebou, bona unai amo ia hedinarai idia be moale Diravana idia tomadiho henia.—1 Korinto 14:33; 1 Timoteo 1:11, NW.

To, Heberu 13:17 ai Paulo be gwau-edeede karana ena dika ia herevalaia. Bema ita gwau-edeede, ita idia hakaua taudia be “mai lalohisihisi danu” edia maduna do idia huaia. Tadikaka ta be elda gaukara ia abia neganai, ia dekenai unai be hahenamo ta, to bema kongrigeisen taudia idia gwau-edeede bona idia gaukara hebou lasi, unai tadikaka be mai lalohisihisi ida ena maduna do ia huaia. Unai ese oi bona kongrigeisen taudia ibounai ia hadikaia diba. Oibe, bema ta be tiokratik dalana ia badinaia lasi bona ia hekokoroku, ia be iena hetura karana Iehova ida ia hadikaia. (Salamo 138:6, NW) Vadaeni, namona be ita ibounai ese iseda lalona ita hadaia siahu taudia ita kamonai henia bona ita badinaia totona.