INAI OI DIBA, A?

Aposetolo Paulo be Roma ena sitisen ta, unai ena namo be dahaka?

Aposetolo Paulo be Kaisara dekenai ia apil — Paulo Ia Gwau: “Lau Ura Kaisara Danu ese Egu Kota Herevana Do Ia Kamonai!”

Roma ese ia biagua hanuadia lalonai, Roma ena sitisen ai idia lao taudia be mai edia maoro gau haida idia karaia totona. Idia be Roma ena taravatu sibona idia badinaia, hanua maragidia edia lasi. Ena be ta ia ura Roma ena sitisen ta ia samania, to hanua maragina ena kota dekenai ia kota henia be hegeregere lasi. Roma ena sitisen be mai ena maoro Roma ena kota dekenai ia lao o abia hidi totona. Bona ena be kota ia gwau ia mase be namo, to ia be mai ena maoro ia apil, Roma ena king ia itaia totona.

Lagani 100 B.C.E. murinai ia noho Roma ena gavamani ofesa ta, Cicero, ia gwau: “Bema ta ese Roma ena sitisen ta ia gwauraia dika, botaia, o alaia, unai be kerere badana,” unai be hegeregere, ta ese ena tama, sina o varavara ia alaia karana.

Aposetolo Paulo be Roma ena gabu momo ai ia haroro. Ia be Roma ena sitisen ta dainai, ia be mai ena maoro danu. Ia ese ena maoro ia gaukaralaia negadia toi be Baibel ese ia gwauraia: (1) Ia ese Filipi ena majistret taudia ia hamaorodia ia idia botaia karana be Roma ena taravatu utua karana. (2) Paulo be Ierusalema ai ia noho neganai, ia hahedinaraia ia be Roma ena sitisen ta, unai dainai, ia idia botaia lasi. (3) Ia apil, ena hereva be Roma ena King Kaisara dekenai ia gwauraia totona.—Kara 16:37-39; 22:25-28; 25:10-12.

Baibel negadiai, mamoe naria taudia be edia gaukara ena pei idia abia, a?

Idaunegai Mamoe bona nani idia hoia ena kontraka — Mamoe Bona Nanigosi Hoia Totona Idia Torea Kontraka Ena Nadi, Lagani 2050 B.C.E. Bamona

Lagani 20 lalonai Iakobo be ena vavana Labana ena mamoe ia naridia. Lagani ginigunadia 14 lalonai, Iakobo ia gaukara Labana ena natuna kekenidia rua ia adavaia totona, to lagani ginigabedia 6 lalonai, Labana ese mamoe amo Iakobo ena gaukara ena davana ia karaia. (Genese 30:25-33) Magasin ta (Biblical Archaeology Review) ia gwau: “Idaunegai Baibel idia torea taudia bona duahia taudia be Labana bona Iakobo idia karaia mamoe naria kontrakana idia diba danu.

Akioleji taudia be Nuzi, Larsa, bona hari Iraq ai idia noho gabudia ma haida ai nadi mai edia toretore gunadia haida idia davaria—unai nadi ai mamoe naria taudia ese kontraka herevadia idia torea. Unai bamona kontraka ena lata o daudau be mamoe huina utua negana ta amo ela bona mamoe huina utua negana ma ta. Mamoe naria taudia ese idia naria mamoe ibounai edia namba be lista ai idia torea, tatau bona hahine mai edia mauri lagani idauidau. Lagani ta murinai, mamoe biaguna be gau haida ia abia, hegeregere mamoe huina o vulu, milika, bona gau ma haida. Bona oredia be mamoe naria tauna dekenai ia henia.

Bema mamoe naria tauna ta be mamoe hahinedia idia naria, vadaeni unai mamoe ese natudia momo idia havaraia be namo. Hegeregere bema mamoe hahinedia be 100, unai mamoe ese natudia 80 idia havaraia be namo. Unai dainai, mamoe naria tauna ese mamoe ia gimadia o naridia namonamo be mai anina bada.