Hekwakwanai Neganai Edena Bamona Do Ita Kara?

TAUNIMANIMA momo lasi ese hekwakwanai momo idia davaria, Iobu ese ia davaria bamona. Nega kwadogi lalonai hekwakwanai idauidau momo ia davaria. Ena taga bona ena kohu ibounai idia boio, ena natuna iboudiai be dala dikana ai idia mase, bena gorere dikana ia hisihisilaia bada. Ena turana bona ena varavarana ese idia dadaraia, bona ena adavana ese ia hamaoroa, ia gwau: “Namona be Dirava ena ladana do oi hadikaia, vadaeni oi mase!”​—Iobu 2:9; 19:​13, 14.

To Iobu sivaraina ese unai bamona hetohodia idia davaria taudia ia hagoadaia bada. Ena hekwarahi sivaraina ena dokona namona ese ia hahedinaraia, bema hisihisi ita haheaukalaia badina be Iehova Dirava ita badinaia bona siboda eda namo ita tahua lasi, unai ese ena lalona ia hamoalea.​—Iobu, karoa 1, 2; Iobu 42:​10-17; Aonega Herevadia 27:11.

Inai sivarai Baibel lalonai ese danu ita ia hadibaia hekwakwanai negadiai edena bamona do ita kara be namo. Hetoho ia davaria tauna sisiba henia daladia kereredia bona maorodia ia hahedinaraia. Inai danu, Iobu sivaraina ese ita ia durua diba, dika do ita davaria neganai do ita kara namonamo totona.

Sisiba Daladia Kereredia

Dika ia davaria neganai, Iobu ena turana toi ese ena lalona idia hanamoa lasi to idia hadikaia mo. To ena be edia kara dainai edia sivarai be dika, to namona be ita laloa lasi edia ura iboudiai be dika sibona. Reana idia ura Iobu do idia durua, edia lalohadai kereredia hegeregeredia ai. Dahaka dainai idia kwalimu lasi? Edena bamona idia be Satani ena tulu ai idia lao, Iobu ena kara maoromaoro ia hadikaia gwauraia neganai?

Edia sisiba momo be lalohadai kererena ta dainai idia gwauraia. Idia laloa kara dika taudia sibodia mo ese hisihisi idia ania. Ena hereva ginigunana ai, Elipasa ia gwau: “Tau ta, bema ia be mai ena kerere lasi, unai tau do ia mase, a? Kara maoromaoro tauna be edeseni do idia hadikaia ore? Lau ese lau itaia vadaeni, taunimanima ese kerere bona kara dika idia geia, bona dika idia hadoa. Vadaeni anina idia utua neganai, anina dikana sibona idia abia.” (Iobu 4:​7, 8) Elipasa ia kerere, badina be ia laloa, kerere lasi taudia ese hisihisi idia davaria lasi. Ia laloa Iobu ese hisihisi bada ia davaria badina be Dirava ia kara dika henia dainai.a Unai hegeregerena, Biledada bona Sopara ruaosi idia gwau namona be Iobu be ena kara dika amo do ia helalo-kerehai.​—Iobu 8:​5, 6; 11:​13-15.

Iobu ena turana toiosi ese sibodia edia lalohadai idia gwauraia, Dirava ena aonega herevadia lasi; unai amo ena lalona ma idia hametaua. Elipasa ia gwau, “Dirava ese, iena hesiai taudia ia abidadama henia noho lasi”; ma ia gwau Dirava ese Iobu ena kara maoromaoro ia laloa lasi. (Iobu 4:18; 22:​2, 3) Unai hereva koikoi hereana amo ena lalona ia hametaua momokani! Unai dainai gabeai Iehova ese Elipasa bona ena turana ruaosi ia gwau henidia, ia gwau: “Lauegu sivarai umui gwauraia maoro lasi.” (Iobu 42:7) To Elipasa ena hereva dika hereana be unai hereva murinai.

Elipasa ese Iobu ia doria toho, sibona ena kerere do ia gwauraia hedinarai totona. To ia kwalimu lasi dainai, dokonai Iobu ia samania koikoi, ia gwau ia ese kara dikadia ia karaia vadaeni. Ia hereva henia, ia gwau: “Oiemu kara dika bona kerere bada dainai, sisiba bona matakani oi dekenai ia henia noho. Badina be oiemu tadikakana ese, iena abiatorehai ena davana ia henia lasi neganai, oi ese iena dabua oi abia, ia be dabua lasi. Manoka bona ranu mase taudia dekenai ranu oi henia lasi, bona hitolo taudia dekenai aniani oi henia lasi.” (Iobu 22:​5-7) Unai samani herevadia be badina lasi. Iehova ese Iobu ia gwauraia vadaeni “ia be kerere ta lasi, bona kara maoromaoro tauna.”​—Iobu 1:8.

Unai samani herevadia dikadia dainai, Iobu ena lalona ia idita bona ia metau. Ia ura bada do ia hakoikoidia. Madi, sibona ena maoro gwauraia dalana ia tahua goadagoada dainai, ia ese Iehova ia samania matama, ia gwau ia ese ena hisihisi ia havaraia. (Iobu 6:4; 9:​16-18; 16:​11, 12) Ia bona ena turana ese anina bada gaudia idia laloa lasi, to ia be kara maoromaoro tauna eiava lasi idia hepapahuahulaia. Vadaeni, unai sisiba dalana kererena sivaraina ese Keristani taudia dahaka ia hadibadia?

1. Keristani tauna mai ena lalokau be matamanai ia laloa lasi tadikaka ta ena hekwakwanai be sibona ena kerere dainai idia vara. Namona be ena kerere gunadia dainai ia gwau henia lasi bona ia samania kava lasi, ena lalona do ia hametaua momokani garina, to ia “hagoadaia” be namo. (1 Tesalonika 5:14) Iehova ia ura elda taudia be “lai koua gabuna” ai do idia lao; ia ura lasi “hagoadaia taudia dikadia” ai do idia lao, Elipasa, Biledada, bona Sopara hegeregeredia.​—Isaia 32:2; Iobu 16:2.

2. Bema ta ena kerere sivaraina hamomokanilaia herevana be lasi, namona be do ita samania lasi. Hereva kava o lalohadai kava​—Elipasa ena hegeregeredia​—be sisiba henia badina maorona lasi. Bema elda ta ese tadikaka ta ia samania kerere, reana unai tadikaka ena lalona do ia hahekwarahia bena ia ese do ia abidadama henia lasi. Iobu ese unai bamona sisiba herevadia kereredia ia kamonai neganai, ena lalona ia hisihisi bada dainai, ia haere mai ena badu ida, ia gwau: “Emui durua kara lau dekenai ena namo be dahaka?” (Iobu 26:2) Elda namona ese ta ‘ena imana idia manoka neganai, do ia abia isi, do ia ha-aukaia’ be namo; hekwakwanai ia habadaia be dika.​—Heberu 12:12.

3. Namona be ita ese Dirava ena Hereva amo sisiba do ita gwauraia, siboda eda lalohadai amo lasi. Iobu ena turana edia hereva be hadikaia herevadia kereredia. Iobu idia durua lasi Iehova dekenai do ia raka kahirakahira lao totona, to idia dainai Iobu ia laloa ena Tamana guba ai ese ena dala ia koua. (Iobu 19:​2, 6, 8) To, bema Baibel ita gaukaralaia namonamo, unai amo kerere do ita hamaoromaorodia diba bona manoka taudia do ita hagoadadia momokani diba.​—Luka 24:32; Roma 15:4; 2 Timoteo 3:16; 4:2.

Iobu ena buka ese Keristani taudia ia durua, hekwakwanai gabudia do idia dibaia totona. Ia ese danu sisiba henia daladia maorodia ia hahedibalaia.

Sisiba Henia Dalana Maorona

Elihu ena sisiba be idau vaitani, Iobu ena turana toiosi edia hegeregerena lasi, bona ia kara henia dalana danu be idau vaitani. Iobu ena ladana ia hatoa bona ia hereva henia, turana ta bamona, ia kota henia tauna ta bamona lasi. Ia gwau: “Iobu e, harihari egu hereva do oi kamonai. Egu hereva ibounai do oi kamonai henia. Oi bona lau be hegeregere momokani, Dirava ena vairana dekenai. Ita ruaosi be raro dekena amo ita ia karaia.” (Iobu 33:​1, 6) Elihu ese danu Iobu ia hanamoa haraga iena kara maoromaoro dainai; ia gwau: “Lau ura bada oiemu maoromaoro do lau gwauraia.” (Iobu 33:32) Elihu ia kwalimu, badina be unai bamona ia sisiba henia mai ena hebogahisi dainai bona ma gau haida dainai danu.

Elihu ia naria ela bona edia hereva idia ore, unai dainai ia ese idia hepapahuahulaia gaudia ia lalo-pararalaia guna bena ia hereva. Iobu be kara maoromaoro tauna; vadaeni Dirava ese do ia panisia, a? Elihu ia gwau: “Dirava be nega ta do ia kara dika diba lasi. Siahu Ibounai Dirava be do ia kerere lasi, lasi bona lasi momokani.” Ma ia gwau: “Dirava ese kara maoromaoro taudia ia gimaia noho.”​—Iobu 34:10; 36:7.

Iobu ena kara maoromaoro idia hepapahuahulaia be gau badana, eiava? Elihu ese Iobu ia hamaoroa ena lalohadai be kerere. Ia gwau: “Oi be oi gwau, Dirava ena vairana dekenai oi be kerere lasi. Oiemu matana oi negea, guba do oi itaia. Ori do oi itaia, idia be ataiai, oi be henunai.” (Iobu 35:​2, 5) Ori be ita ataiai momokani hegeregerena, Iehova ena dala be iseda dala ataiai. Ita be hegeregere lasi iena dala do ita hahemaoro henia. Elihu ia gwau: “Unai dainai taunimanima be Dirava dekenai idia gari noho, badina be ia ese, sibodia edia aonega dekenai idia hekokoroku taudia, be ia ura henidia lasi.”​—Iobu 37:24; Isaia 55:9.

Elihu ena sisiba maorona ese Iobu ena lalona ia hegaegaelaia, ma sisiba haida Iehova ena amo do ia abia dae totona. Momokani, Elihu ena hereva, “Dirava ena hoa karadia” herevadia, Iob karoa 37 lalonai, be Iehova sibona ese Iobu ia hamaoroa herevadia, Iob karoa 38 ela bona 41 lalonai ia torea herevadia, hegeregeredia vaitani. Toana be Elihu ena lalohadai be Iehova ena hegeregerena. (Iobu 37:14) Vadaeni, Keristani taudia ese Elihu ena kara namo edena bamona do idia tohotohoa diba?

Elihu hegeregerena, elda taudia do idia hebogahisi be namo, badina be idia diba idia danu be goevadae lasi. Ta idia do sisiba henia lasi neganai, namona be ena hereva do idia kamonaia bona do idia lalo-pararalaia guna. (Aonega Herevadia 18:13) Bona, bema Baibel bona Baibel gwauraia bukadia idia gaukaralaia, dala do idia karaia diba Iehova ena lalohadai do ia kwalimu totona.​—Roma 3:4.

Iobu ena buka ese elda taudia be unai bamona ia hadibadia namonamo, bona hekwakwanai haheaukalaidia dalana ita ia hadibalaia danu.

Hekwakwanai Negadiai Inai Bamona Do Ita Kara Lasi be Namo

Ena hisihisi ese ia hadikaia bona ena turana ese idia hahekwarahia dainai, Iobu ena lalona ia idita bona ia metau. Ia gwau: “Lauegu vara dinana lau gwauraia dika. . . . Egu mauri ena namo lau laloa lasi, lau hesikulaia noho.” (Iobu 3:3; 10:1) Ia diba lasi Satani ese ena hisihisi ia havaraia, unai dainai ia laloa Dirava ese. Ia laloa ia sibona​—kara maoromaoro tauna ta​—be hisihisi ia ania be maoro lasi. (Iobu 23:​10, 11; 27:2; 30:​20, 21) Ena lalohadai dainai, Iobu ese gau haida ia laloa namonamo lasi bona Dirava ese taunimanima dekenai ia karaia karadia ia maumauraia. Iehova ese ia nanadaia, ia gwau: “Oi ura lau dekenai kerere, bona maoromaoro lasi do oi gwauraia, oi sibona be maoromaoro do oi gwauraia totona, a?”​—Iobu 40:8.

Hisihisi ita davaria neganai, Iobu ia laloa hegeregerena, reana maoromaoro ita laloa ta ese ita ia hadikaia. Ita momo ita henanadai, ita gwau, ‘Dahaka dainai inai dika lau davaria? Dahaka dainai ena be haida edia dika ese egu dika ia hereaia to idia ese hekwakwanai momo idia davaria lasi?’ Bema Dirava ena Hereva ita laloa namonamo, unai lalo-metau ita koua diba.

Ita diba gauna badana ta be Iobu ia diba lasi. Ita diba Satani “be laiona mai ena boiboi bada bamona . . . Ia raka loaloa noho, do ia ania ore taudia ia tahua noho.” (1 Petero 5:8) Iobu ena buka ese ia hahedinaraia Diabolo ia ura bada ita do ia hahekwarahia bona unai amo iseda kara maoromaoro do ia hadikaia. Ia gwau ita be nega namodia ai sibona Iehova ena hesiai ita lao henia, bona ia ura bada ena hereva do ia hamomokania. (Iobu 1:​9-11; 2:​3-5) Vadaeni, ita ese Iehova ena lohia siahuna do ita abia isi mai eda boga auka ida bona unai amo do ita hamomokania Diabolo ia koikoi, eiava?

Iesu bona Iehova ena hesiai taudia mai edia kamonai momo herea edia sivarai ese idia hahedinaraia, hisihisi do ita ania inai nega lalonai. Iesu ia gwau, bema ena hahediba taudia idia ura ia do idia gavaia, namona be edia ‘satauro do idia abia isi.’ (Luka 9:23) Reana ita eda “satauro” anina be Iobu ese ia hisihisilaidia gaudia ta o haida​—gorere, eda lalokau taudia edia mase, lalo-metau, ogogami, eiava kamonai lasi taudia edia badu. Herevana dahaka hekwakwanai ita hekwarahilaia noho, eda lalona idia goada diba. Namona be ita laloa iseda hekwakwanai amo do ita hahedinaraia ita haheauka bona Iehova ita badinaia momokani noho.​—Iamesi 1:​2, 3.

Iesu ena aposetolo be unai bamona idia kara. Pentekoste murinai idia dadabadia, Iesu idia harorolaia dainai. Edia lalona idia manoka lasi, to idia raka oho “mai moale bada danu.” Idia moale, unai hisihisi dainai lasi, to badina be “Dirava ese idia ia abia hidi vadaeni Iesu ena ladana dainai hisihisi do idia abia.”​—Kara 5:​40, 41.

To, momokani, iseda hekwakwanai haida idia vara be Iehova ena hesiai ita lao henia dainai lasi. Reana idia be siboda eda kerere dainai idia vara. Eiava, reana ena be hekwakwanai ta ia vara be siboda eda kerere dainai lasi, to eda abidadama ia hadikaia. Herevana dahaka ia vara, bema Iobu hegeregerena ita lalo-manau, eda kerere gabuna do ita diba. Iobu ese Iehova ia hereva henia, ia gwau: “Lau hereva kerere vadaeni, badina be egu diba ia maragi.” (Iobu 42:3) Sibona ena kerere be unai bamona ia lalo-pararalaia tauna ese nega vairai unai bamona hekwakwanaidia amo do ia raka siri be haraga. “Aonega tauna ese dika ia itaia noho, bona unai dika dekena amo ia raka siri.”​—Aonega Herevadia 22:3.

Gau badana be inai: Iobu ena buka ese ita ia hadibaia iseda hekwakwanai be do idia doko. Baibel ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” (Iamesi 5:11) Ita diba momokani Iehova ese ena hesiai taudia edia kamonai hari inai negai ena davana be unai bamona do ia henidia.

Ita ese danu nega matamatana ita naria; unai nega lalonai hekwakwanai idauidau iboudiai​—“gau gunadia” unai​—be do idia ore. (Apokalupo 21:4) Unai nega ia do ginidae lasi negana lalonai, Iobu ena buka ese ita ia hakaua namo herea, hekwakwanai negadiai do ita kara mai eda aonega bona mai eda boga auka ida totona.

[Footnotes]

[Picture on page 28]

“Ori do oi itaia, idia be ataiai, oi be henunai.” Inai hereva amo Elihu ese Iobu ia hadibaia Dirava ena dala be ataiai bona taunimanima edia dala be henuai