Iseda Haroro Bona Mauri Dalana Hebou Pepana Edia Referens
© 2024 Watch Tower Bible and Tract Society of Pennsylvania
MARCH 3-9
BAIBEL ENA HEREVA BADADIA AONEGA HEREVADIA 3
Iehova Abidadama Henia Karana Oi Hahedinaraia
ijwbv-E atikol 14 par. 4-5
Aonega Herevadia 3:5, 6—“Sibona Emu Diba Dekenai Oi Tabekau Lasi”
“Mai emu kudouna ibounai ida Iehova oi abidadama henia.” Dirava ena ura hegeregerena gaudia ita karaia neganai ita hahedinaraia ia ita abidadama henia. Namona be mai iseda kudouna ibounai ida Dirava ita abidadama henia. Baibel ai, nega momo inai hereva kudouna idia gaukaralaia ta ena lalona ai ia noho gaudia, hegeregere ena hemami, ura, lalohadai bona kara ia herevalaia. Unai dainai, mai kudouna ibounai ida Dirava ita abidadama henia totona iseda hemami sibona be hegeregere lasi. Unai abia hidi be ita sibona ese ita karaia badina ita abia dae iseda Havaraia Tauna ia diba dahaka be namo ita totona.—Roma 12:1.
“Sibona Emu Diba Dekenai Oi Tabekau Lasi.” Namona be Dirava ita abidadama henia badina ita be goevadae lasi. Bema sibona dekenai ita tabekau o iseda hemami ese ita ia biagua dainai, abia hidi ita karaia do ita laloa ita karaia abia hidi be maoro to unai ese dika ia havaraia. (Aonega Herevadia 14:12; Ieremia 17:9) Dirava ena aonega ese iseda ia hereaia. (Isaia 55:8, 9) Iena lalohadai ese ita ia hakaua neganai, iseda mauri be do ia namo.—Salamo 1:1-3; Aonega Herevadia 2:6-9; 16:20.
ijwbv-E atikol 14 par. 6-7
Aonega Herevadia 3:5, 6—“Sibona Emu Diba Dekenai Oi Tabekau Lasi”
“Oi karaia gaudia ibounai lalonai Dirava oi laloa.” Iseda mauri lalonai bona mai anina bada abia hidi ita karaia neganai, namona be Dirava ena lalohadai ita abia. Unai ita karaia totona ia ita guriguri henia bona Baibel ai ena hereva ita badinaia.—Salamo 25:4; 2 Timoteo 3:16, 17.
“Ia ese emu raka dalana do ia hamaoromaoroa.” Iseda raka dalana ita hanamoa totona, Dirava ese ita ia durua ena kara maoromaoro taravatudia ita badinaia. (Aonega Herevadia 11:5) Unai amo dika ita dadaraia bona iseda mauri ita moalelaia.—Salamo 19:7, 8; Isaia 48:17, 18.
Emu Goada Oi Habadaia
Ta ena mauri lalonai gau idauidau idia vara vadaeni dainai, reana ia laloa: ‘Inai bamona be lau dekenai ia vara vadaeni. Lau diba dahaka do lau karaia be namo.’ Unai be aonega dalana, a? Aonega Herevadia 3:7 ia gwau: “Oi laloa lasi oi be mai emu aonega.” Momokani, eda mauri lalonai idia vara gaudia ita laloa neganai, iseda diba dainai kahana idauidau do ita laloa diba. To bema lauma dalanai eda goada ia bada ia lao, namona be ita abia diba dainai eda lalona bona kudouna dekenai ita abia dae, ita kwalimu totona Iehova ese iseda kara ia hanamoa be gau badana. Unai dainai, iseda goada be sibona eda diba dekenai idia vara gaudia ita hanaia amo ia hedinarai lasi, to eda mauri hakaua totona Iehova dekenai ita tabekau karana amo ia hedinarai. Bona unai goada ia hedinarai danu bema ita abia dae momokani iseda guba Tamana ese dala ia koua neganai gau ta ia vara diba lasi bona bema eda hetura karana ia ida ita naria namonamo noho.
Hakaua Hereva Namodia
Aonega Herevadia Bukana Ena Hereva Badadia
3:3. Hebogahisi-mai-lalokauna, bona kara momokani ita laloa bada be namo, dava bada ageva ta be iseda ‘aiona dekenai ita kwatua’ bona hahedinaraia bamona. Danu, unai kara be iseda kudouna dekenai do ita torea, unai dala amo idia be iseda kara korikori ai do idia lao.
MARCH 10-16
BAIBEL ENA HEREVA BADADIA AONEGA HEREVADIA 4
“Emu Kudouna Oi Gimaia”
Edena Dala ai Emu Kudouna Oi Gimaia Diba?
4 Aonega Herevadia 4:23 ai, inai hereva “kudouna” idia gaukaralaia ta ena “lalona” eiava ta ena kara o lalohadai idia herevalaia totona. (Salamo 51:6 duahia.) Nega haida, “kudouna” be iseda lalohadai, hemami, gau ta ita karaia ena badina, bona iseda ura ia herevalaia. Unai ese ia hahedinaraia, ta ena lalona ia herevalaia, to ia be iseda kara bona hereva amo ia hedinarai sibona lasi.
Edena Dala ai Emu Kudouna Oi Gimaia Diba?
10 Bema ita ura iseda kudouna ita gimaia, namona be dika idauidau edia toana ita diba bona karaharaga dala ita tahua unai gaudia ita dadaraia totona. Aonega Herevadia 4:23 ai, inai hereva “naria namonamo” idia hahanaia neganai, gima tauna ena gaukara ia herevalaia. King Solomona ena negai, gima taudia be siti ena haba ataiai idia gini bona dika ta ia vara o edia inai taudia idia mai neganai, gima taudia ese hanua taudia ibounai idia hadibaia haraga. Unai laulau herevana ese ita ia durua, bena do ita laloparara kara ta ita karaia be namo unai amo Satani ese iseda lalohadai do ia hadikaia lasi.
11 Idaunegai, gima taudia bona geiti idia naria taudia idia gaukara hebou. (2 Sam. 18:24-26) Idia gaukara hebou dainai, siti idia gimaia namonamo, bona geiti idia koua edia inai taudia idia vareai lasi totona. (Neh. 7:1-3) Satani be iseda kudouna—eiava iseda lalohadai, hemami, gau ta ita karaia ena badina, bona iseda ura ia hadikaia lasi totona, Baibel amo ita hadibaia lalomamina be gima tauna bamona ai ita halaoa diba. Unai hegeregerena, bema ita itaia gau dikana ta ese iseda kudouna do ia hadikaia, namona be iseda lalomamina ita kamonai henia bona karaharaga unai dika ita dadaraia.
Edena Dala ai Emu Kudouna Oi Gimaia Diba?
14 Iseda kudouna ita gimaia totona, lalohadai o kara dikadia ita dadaraia sibona lasi, to namona be lalohadai goevadia ita abia dae. Magu ese ia hagegea siti ena haheitalai mani oi laloa. Geiti ia naria tauna be edia inai taudia ese siti do idia vareai lasi totona, geiti ia koua, to nega haida geiti ia kehoa unai amo aniani bona gau ma haida idia abia vareai diba. Bema geiti idia kehoa lasi, siti ai idia noho taudia be do idia hitolo. Unai hegeregerena, namona be hanaihanai Dirava ena lalohadai ese ita ia hakaua.
w12 5/1-E 32 par. 2
“Emu Kudouna Oi Gimaia!”
Dahaka dainai iseda kudouna ita gimaia? Dirava ese King Solomona ia hakaua bona inai hereva ia torea: “Oi gimaia gaudia ibounai amo, emu kudouna oi gimaia be gau badana, badina kudouna dainai oi mauri noho.” (Aonega Herevadia 4:23) Bema iseda kudouna ia namo iseda mauri hari bona vaira negai do ia namo. Dahaka dainai? Badina Dirava ese iseda kudouna ia itaia. (1 Samuela 16:7) Dirava ese ia laloa bada gauna be iseda “kudouna ai ia noho gauna.”—1 Petero 3:4.
Hakaua Hereva Namodia
Mai Haheauka ida Iehova Oi Naria, A?
4 Aonega Herevadia 4:18 ia gwau: “Kara maoromaoro tauna ena dala be daba ena diari bamona, unai diari ia bada ia lao ela bona dina tubu.” Unai siri ese ia hahedinaraia goevagoeva, Iehova be ena taunimanima ia durua ena ura idia lalopararalaia totona. Danu, unai siri ese Keristani tauna ta be iena mauri ai senisi ia karaia bona Dirava kahirakahira ia lao dalana ia hahedinaraia. Tau ta ena hetura karana Dirava ida be metairametaira do ia goada ia lao. Bema Dirava ena Hereva bona iena orea amo idia mai hakaua herevadia ita stadilaia namonamo bona ita badinaia, metairametaira Keriso ena kara namodia do ita tohotohoa bona Dirava do ita diba namonamo. Mani Iesu ena haheitalai ta ita herevalaia.
MARCH 17-23
BAIBEL ENA HEREVA BADADIA AONEGA HEREVADIA 5
Matabodaga Karana amo Oi Noho Daudau
Matabodaga Tanobadana Dekenai Oi Kara Goeva Diba
Unai aonega hereva ese kerere hahine ia gwauraia “idau hahine”—ariara hahine. Iena lalo-ani herevadia be gaiho momokani hani bamona, bona iena digara ese olive dehorona ena digara ia hereaia. Matabodaga karadia momo be unai dala ai idia matamaia, ani? Hegeregere, mani seketere gaukara ia karaia mauri lagani 27 kekenina mai hairaina ladana Amy ena sivarai oi laloa. Ia gwau: “Gaukara gabuna dekenai, tau ta ese lau ia laloa bona hanamoa bada. Unai be namo. To lau itaia goevagoeva gau tamona sibona ia ura, mahuta hebou karana unai. Iena koikoi karana dainai do lau moru lasi.” Matabodaga tauna eiava hahine ena lalo-ani herevadia be mai edia siahu, bema edia anina korikorina ita lalo-pararalaia lasi. Unai dainai ita laloa namonamo be gau badana.
Matabodaga Tanobadana Dekenai Oi Kara Goeva Diba
Matabodaga karadia idia havaraia gaudia be mamina dika muramura bamona bona tuari kaia mai matana rua bamona—hisihisi bona mase idia havaraia. Lalona ena mamina dikana, rogorogo kava, eiava pokese goreredia be nega momo unai kara dainai idia vara. Bona heudahanai tauna eiava hahine ena adavana ena lalo-metau bada mani oi laloa. Heudahanai karana tamona ese ta ena mauri ibounai lalonai do ia noho berona ia havaraia diba. Oibe, matabodaga karana ese hisihisi bada ia havaraia.
Matabodaga Tanobadana Dekenai Oi Kara Goeva Diba
Matabodaga taudia edia lalona veria karana amo ita gini siri be namo. Unai bamona taudia edia lalona veria karana totona dala ita kehoa bona miusiki dikana ita kamonai, dika idia havaraia diba muvi piksa ita itaia, eiava matabodaga sivaraidia bona laulaudia idia hahedinaraia bukadia ita raraia be namo lasi, ani? (Aonega Herevadia 6:27; 1 Korinto 15:33; Efeso 5:3-5) Bona iseda lebulebu karadia, dabua, eiava tauanina ena toana amo edia lalona ita veria be kavakava karana!—1 Timoteo 4:8; 1 Petero 3:3, 4.
Hakaua Hereva Namodia
Matabodaga Tanobadana Dekenai Oi Kara Goeva Diba
Solomona ese matabodaga karana ena davana dikana ia herevalaia unai. Heudahanai bona sibona matauraia lasi karana ita hakapua diba. Ita sibona eda eiava ma ta ena matabodaga urana hagugurua totona sibona ita mauri noho be hemarai gauna momokani, ani? Bema iseda adavana lasi tauna eiava hahine ida ita mahuta hebou, unai be sibona matauraia lasi karana, ani?
MARCH 24-30
BAIBEL ENA HEREVA BADADIA AONEGA HEREVADIA 6
Dimairi amo Dahaka Ita Dibaia?
it-E 1 115 par. 1-2
Dimairi
‘Aonega Bada.’ Dimairi edia ‘aonega’ be Havaraia Tauna ese idia ia havaraia neganai unai diba ia henia. Baibel ia gwau dimairi be ‘siahu negana ai edia aniani idia hegaegaelaia bona idia gogoa aniani idia haboua.’ (Ao 6:8) Palestine ai idia davaria dimairi (Messor semirufus), be spring bona summer ai aniani momo idia haboua bona winter ai, aniani abia totona ia auka neganai unai idia ania diba. Nega momo unai dimairi be witi moia gabuna ai idia davaria, badina unuseni uhe bona witi be momo. Bema medu ese idia haboua aniani ia haparia, dimairi ese aniani be dina dekenai idia atoa idia kaukau totona. Danu idia haboua uhe do ia tubu kahana idia ania, unai amo uhe do ia tubu lasi. Aniani haboua dimairi oreana idia noho gabuna ita itaia diba, badina idia raka lao gabuna ai uhe ena momoru momo idia rakatania.
Haheitalai Namona. Momokani, unai dimairi dekenai ita dibaia gauna ese ita ia hagoadaia: “Lahedo tauna e, dimairi dekenai oi lao, bona edia gaukara dalana oi itaia bona do oi aonega.” (Ao 6:6) Vaira negana totona edia hegaegae karana ita diba sibona lasi to edia gaukara goada karana danu, nega momo idia ese metau bada gaudia idia huaia bona veria, dala idauidau idia karaia edia gaukara idia hagugurua totona, bona ena be do idia moru diho to idia lao sibona bona idia giroa lou. Danu idia gaukara hebou namonamo, bona edia noho gabuna idia hagoevaia bona dimairi ma haida idia laloa bada, nega haida idia bero o hesiku dimairi be edia noho gabuna dekenai idia hakaua lao.
Oiemu Ladana Oi Gimaia
Dimairi bamona, namona be ita danu ita gaukara goada, ani? Ita gaukara goada bona iseda gaukara ita hanamoa toho be namo, herevana ta ese iseda gaukara ia tahua eiava lasi. Oibe, sikuli dekenai, moni gaukara gabuna dekenai, bona lauma gaudia ita karaia lalonai, namona be ita gaukara goada. Dimairi ese iena gaukara goada karana amo namo ia abia hegeregerena, Dirava ia ura ita ese “iseda gaukara ena anina do ita moalelaia.” (Hadibaia Tauna 3:13, 22; 5:18) Gaukara goada ena davana namodia be iseda lalona ia goeva bona iseda gaukara ita moalelaia.—Hadibaia Tauna 5:12.
Solomona ese edia haere ia naria lasi henanadai rua ia henia, lahedo tauna be ena lahedo karana amo ia hanogaia totona, ia gwau: “Lahedo tauna e, oi hekure kava ela bona edena negai? Edena negai mahuta dekena amo do oi noga?” King ese ena hereva ia hevasehalaia, ma ia gwau: “Oi gwau, ‘Lau be laga-ani totona, nega sisina sibona do lau hekure. Lauegu imana do lau lokua, do lau laga-ani sisina.’ To oi mahuta neganai, ogogami ese oi dekenai do ia ginidae, dadidadi tauna bamona.” (Aonega Herevadia 6:9-11) Lahedo tauna ia hekure neganai, ogogami be raskol tauna bamona, ia do ia davaria haraga, bona dabu be tuari tauna bamona do ia mai. Lahedo tauna ena uma gabu be karaharaga ava bona ava ginigini ese do idia hahonua. (Aonega Herevadia 24:30, 31) Karaharaga ena bisinesi ese moni ia haboioa. Gaukara biaguna be nega daudau lalonai lahedo tauna dekenai do ia haheauka, a? Bona lahedo dainai stadi karana ia karaia lasi stiuden tauna ia laloa diba sikuli dekenai do ia kwalimu, a?
Hakaua Hereva Namodia
Oiemu Ladana Oi Gimaia
Unai aonega herevana ia gwauraia karadia 7 be gau badadia bona idia lalonai be kara dika idauidau ibounai idia noho. “Hekokoroku toana” bona “kara dika karaia totona laloa” karana be iseda lalona dekenai ita karaia kara dikadia. “Uduna mai ena koikoi” bona “uitnesi koikoi” karana be hereva amo ita karaia kara dikadia. “Kerere lasi taudia alaia karana” bona “kara dika karaia totona idia haraga momo” karana be iseda kara amo ita karaia kara dikadia. Bona Iehova ese ia inai henia bada tauna be idia noho hebou namonamo taudia huanai heiriheiri havaraia karana ia moalelaia tauna. Unai gaudia edia momo be 6 amo idia bada daekau 7 dekenai ese ia hahedinaraia unai lista ese unai bamona kara iboudiai ia hahedinaraia lasi, badina taunimanima ese idia karaia kara dikadia edia namba ia bada daekau hanaihanai.
MARCH 31–APRIL 6
BAIBEL ENA HEREVA BADADIA AONEGA HEREVADIA 7
Oi Do Idia Tohoa Gaudia Oi Dadaraia
“Lauegu Hereva Do Oi Badinaia, Vadaeni Mauri Do Oi Davaria”
Dina ia diho negana lalonai, Solomona be uindo dekena amo dala ia itaia, bona dala be ia dibura ia lao. Matamata tauna ta, reana do ia moru haraga tauna, ia itaia. Ia be mai ena laloa kavakava tauna, ia be lalo-parara lasi bona aonega lasi tauna. Toana be ia diba edena bamona gabu lalonai ia vareai bona ia diba ia dekenai dahaka ia vara diba. Unai matamata tauna ese hahine “ena kona dekenai,” iena ruma ia lao henia dalana, dekenai ia lao. Hahine be daika? Dahaka ia karaia noho?
“Lauegu Hereva Do Oi Badinaia, Vadaeni Mauri Do Oi Davaria”
Unai hahine ena udu bibinadia be koikoi dekenai idia manada. Iena vairana ena toana be gari lasi, bona mai lalo-goada ida ia hereva. Iena hereva iboudiai ia abia hidi namonamo unai matamata tauna ena lalona veria totona. Ia gwau unai dina dekenai maino karaia boubouna ia henia bona davana ia karaia vadaeni. Unai amo, ia ura kara namo toana ia hahedinaraia, bena reana haida do idia laloa ia ese lauma gaudia ia laloa bada. Ierusalema ena dubu lalonai, maino karaia boubou gaudia be vamu, paraoa, dehoro, bona uaina. (Levitiko 19:5, 6; 22:21; Numera 15:8-10) Ia henia tauna ese maino karaia boubouna ena kahana ta ia abia lao diba, ia eiava iena ruma bese totona. Unai dainai unai hahine ena hereva ena anina be ena ruma dekenai inuinu bona aniani gaudia momo idia noho. Iena hereva amo ia hedinarai goevagoeva, bema unai matamata tauna be unuseniai ia lao, nega namona do idia abia. Iena ruma ia rakatania unai tau sibona do ia tahua totona. Kudouna hamarerea gauna—bema ta be unai koikoi sivaraina ia abia dae diba. Baibel dekenai ena diba be bada tauna ta ia gwau: “To momokani, unai tauna sibona ia tahua totona ia lao, a? Ia kavakava tauna—reana inai kavakava tauna—sibona ese iena sivarai do ia abia dae.”
Unai tau ese ia ura henia totona, hahine ese dabua namodia ia atoa, hanamoa herevadia ia gaukaralaia, ia rosia, ena udu bibinadia dekenai ia kisi henia, bena bonana namona gaudia ia gaukaralaia unai tauna ena lalona ia veria totona. Ia gwau: “Lauegu mahuta patana be, Aigupito ena dabua namona dekena amo lau koua vadaeni. Lauegu mahuta patana dekenai, bonana namo muramura dekena amo lau hanamoa vadaeni, muro, bona aloe, bona kinamono.” (Aonega Herevadia 7:16, 17) Iena mahuta patana dekenai Aigupito dekena amo kala momo dabuadia ia atoa namonamo bona muro, aloe, bona kinamono edia bonana namona ia gaukaralaia.
Ma ia gwau: “Oi mai, hari hanuaboi do ita sihari ia lao bona dabai. Ita ta ta dekenai do ita ura henia, mai iseda moale danu.” Unai tau ia boiria idia ruaosi ese aniani idia ania totona sibona lasi. Hahine ena gwauhamata be mahuta hebou karana do idia moalelaia hebou. Unai eregabe tauna dekenai unai be hasiahua gauna bona ena lalona ia ania bada! Ia veria mai noho totona, hahine ma ia gwau: “Lauegu tau, be ruma dekenai ia noho lasi. Ia be gabu daudau dekenai ia lao. Ia ese moni momo ia danu ia abia, bona pura rua bamona do ia giroa mai lasi.” (Aonega Herevadia 7:18-20) Hahine ese ia hamaoroa, iena tau be bisinesi laolaona ia karaia bona do ia giroa mai haraga lasi dainai, hekwakwanai do idia davaria lasi. Matamata taudia edia lalona ania karana dekenai iena diba be bada! “Hedibagani hereva momo dekena amo, unai tau ena lalona ia veria, bona iena hereva be mai mamina namo dainai, unai tau ese ia abia dae.” (Aonega Herevadia 7:21) Iosepa bamona tauna sibona ese unai bamona hedibagani do ia dadaraia diba. (Genese 39:9, 12) Unai matamata tauna be unai bamona tauna, a?
“Lauegu Hereva Do Oi Badinaia, Vadaeni Mauri Do Oi Davaria”
Eregabe tauna ese hahine ena boiboi ia dadaraia diba lasi. Laloa namonamo karana ia rakatania, bona ia murinai ia lao, ‘boroma be do idia alaia gabuna dekenai ia lao bamona.’ Seini amo aena idia kwatua tauna ese iena panisi amo ia heau diba lasi hegeregerena, unai tau matamatana be kara dika amo ia siri diba lasi bamona. Ia ese unai kara ena dika ia laloa lasi ela bona ‘diba ese unai tau ena asena ia gwadaia,’ ena anina be iena mase ia havaraia diba berona ia abia. Reana tauanina dalanai do ia mase, badina unai heudahanai karana amo ia do ia hamasea pokese gorerena ia abia diba. Unai bero ese lauma dalanai iena mase ia havaraia diba danu; “iena mauri be ia dika vadaeni.” Iena tauanina bona mauri ibounai ia hadikaia diba, bona Dirava ia kara dika henia. Unai dainai manu be reke lalonai ia roho vareai bamona, mase ena siahu lalonai ia heau vareai!
Hakaua Hereva Namodia
“Lauegu Hereva Do Oi Badinaia, Vadaeni Mauri Do Oi Davaria”
Solomona ma ia gwau: “Idia [egu taravatu] be emu ima kwakikwakidia dekenai oi kwatua, bona oiemu kudouna dekenai idia do oi torea.” (Aonega Herevadia 7:3, NW) Hanaihanai iseda ima kwakikwakidia be iseda matana vairanai idia noho bona iseda ura hagugurua totona idia be mai anina gaudia. Unai hegeregerena, Keristani tama sina amo ita dibaia gaudia eiava Baibel amo ita dibaia gaudia ita laloa loulou bona iseda kara ibounai idia hakaua be namo. Namona be iseda kudouna dekenai idia ita torea, idia be iseda kara ena kahana ta ai do idia lao.
APRIL 7-13
BAIBEL ENA HEREVA BADADIA AONEGA HEREVADIA 8
Iesu Ena Aonega Herevadia Ita Kamonai Henia
cf-E 131 par. 7
“Lau be Tamana lau lalokau henia”
7 Siri 22 ai, aonega ia gwau: “Iehova ese lau ia karaia guna, bena gau ibounai ia havaraia, gunaguna negadia ai ia ese lau ia karaia.” Unai be aonega korikorina ia herevalaia lasi, badina Dirava ese aonega ia havaraia lasi. Iehova be ia noho hanaihanai bona aonega danu be matamana lasi. (Salamo 90:2) To, Dirava ena Natuna be “havaraia gaudia ibounai amo ia be ginigunana.” Dirava ese gau ibounai ia do havaraia lasi neganai, Iesu ia havaraia guna. (Kolose 1:15) Aonega Herevadia ese ia hahedinaraia, tanobada bona guba ia do karaia lasi neganai, Natuna be ia noho. Bona ia be Hereva, eiava Dirava ena Gwaukau Tauna dainai, ia ese Iehova ena aonega ia hahedinaraia goevagoeva.—Ioane 1:1.
cf-E 131-132 par. 8-9
“Lau be Tamana Lau Lalokau Henia”
8 Natuna be tanobada ai ia do mai lasi neganai, nega daudau lalonai dahaka ia karaia? Siri 30 ia gwau ia be Dirava badinai ia noho “gaukara karaia namonamo tauna.” Unai hereva ena anina be dahaka? Kolose 1: 16 ese ia hahedinaraia: “Ia amo Dirava ese gau ibounai guba ai bona tanobada ai ia havaraia. . . . Gau ibounai be ia amo bona ia totona ia havaraia.” Unai dainai Iehova, Havaraia Tauna be ena Natuna, gaukara karaia namonamo tauna ida ia gaukara, gau ibounai idia karaia totona. Guba ai idia noho aneru bona iunives, tanobada ai idia noho flaoaflaoa, animal idauidau bona taunimanima idia karaia. Unai be hegeregere Tamana be akitek bona natuna be ruma haginia tauna, ia ese akitek ena disain ia badinaia bona unai hegeregerena ia gaukara. Havaraia gaudia ita moalelaia neganai, ita be Havaraia Tauna ita hanamoa. (Salamo 19:1) Nega daudau lalonai Havaraia Tauna bona ena “gaukara karaia namonamo tauna” be mai moale ida idia gaukara hebou karana ita dibaia.
9 Goevadae lasi taudia rua idia gaukara hebou neganai, nega momo idia lalotamona lasi. To, Iehova bona ena Natuna be unai bamona lasi! Natuna be nega daudau lalonai Tamana ida ia gaukara bona Baibel ia gwau: “Lau be ena vairana ai nega ibounai lau moale.” (Aonega Herevadia 8: 30) Oibe, ena Tamana ida hebamo karana ia moalelaia. Vaia natuna be ena Tamana ena kara ia dibaia bona tohotohoa. Unai dainai Tamana bona Natuna edia hetura karana be ia goada momokani! Bona ita gwau diba iunives ibounai lalonai edia lalokau be guna amo ia matamaia bona ia goada.
Ita Abia Dae Iesu be Davida Badana Bona Solomona Badana
14 Tau tamona sibona ese Solomona ena aonega ia hereaia. Unai be Iesu Keriso, bona ia sibona ia gwau ia ese “Solomona ia hereaia.” (Mat. 12:42) Iesu be “mauri hanaihanai herevadia” ia gwauraia. (Ioa. 6:68) Hegeregere, Iesu ese Ororo Harorona ai ia gwauraia hakaua herevadia be Solomona ena aonega herevadia haida edia anina ia herevalaia. Iehova tomadiho henia tauna ese moale do ia davaria daladia haida be Solomona ese ia gwauraia. (Aon. 3:13; 8:32, 33; 14:21; 16:20) Iesu ia gwau Iehova tomadiho henia karadia bona Dirava ena gwauhamata namodia idia guguru karana ese moale korikori ia mailaia. Ia gwau: “Dirava dibaia totona idia hitolo taudia be idia moale, badina guba basileia be idia edia.” (Mat. 5:3, NW) Iesu ese ia gwauraia hakaua herevadia idia badinaia taudia be Iehova, “mauri ibounai ena badina” kahirakahira idia lao diba. (Sal. 36:9; Aon. 22:11; Mat. 5:8) Keriso be “Dirava ena aonega” ia hahedinaraia. (1 Kor. 1:24, 30) Iesu Keriso, Mesia King be “aonega . . . ena Lauma” ia abia.—Isa. 11:2.
Hakaua Hereva Namodia
g-E 5/14 16
‘Aonega Ia Boiboi Noho’—Oi Kamonai, A?
▪ The World Book Encyclopedia bukana ia gwau, “histori lalonai idia hariharilaia momo bukana” be Baibel. “Danu, Baibel be gado idauidau ai idia hahanaia bona kopi momo idia karaia, buka ma ta be unai bamona lasi.” Baibel ena kahana ibounai o haida sibona be gado 2,600 mai kahana ai ia noho, unai amo taunimanima 90 percent mai kahana ese idia duahia diba.
▪ Danu aonega “ia boiboi noho.” Mataio 24:14 ai, ia gwau: “Bona Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai [inai tanobada ena] dokona do ia ginidae.”
APRIL 14-20
BAIBEL ENA HEREVA BADADIA AONEGA HEREVADIA 9
Oi Aonega, Bona Oi Hekokoroku Lasi
“Aonega Taudia Edia Hereva Oi Kamonai”
4 Ta ese ita ia sisiba henia neganai, reana nega haida ia auka unai ita abia dae totona. Bona ita lalohisihisi danu. Dahaka dainai? Ena be ita be goevadae lasi, to ta ese iseda kerere ia itaia bona ita ia sisiba henia neganai, unai ita abia dae be auka. (Hadibaia Tauna 7:9 duahia.) Reana ekskius herevadia ita gwauraia. Reana sisiba ia henia tauna ena kara ita laloa o sisiba ia henia dalana dekenai ita moale lasi. Eiava sisiba ia henia tauna ena kerere ita tahua, bona ita laloa: ‘Ia be maoro lasi lau ia sisiba henia totona. Ia danu be mai ena kerere!’ Bema unai sisiba ita ura henia lasi, reana do ita dadaraia eiava ita ura henia tauna amo sisiba ita tahua.
“Aonega Taudia Edia Hereva Oi Kamonai”
12 Dahaka ese ita ia durua sisiba ita abia dae totona? Namona be ita manau bona ita laloatao ita be goevadae lasi bona nega haida kerere ita karaia. Matamanai ita herevalaia bamona, Iobu be lalohadai kererena ia abia. To gabeai ena lalohadai ia hamaoromaoroa bona Iehova ese ia hanamoa. Dahaka dainai? Badina tau matamata Elihu ese ia sisiba henia neganai, Iobu be unai ia abia dae, unai ese ia hamomokania ia manau. (Iobu 32:6, 7) Nega haida ita laloa sisiba ita abia be maoro lasi eiava ita ura lasi matamata tauna ta ese ita ia sisiba henia, to manau karana ese ita ia durua sisiba ita abia dae totona. Canada ai elda ta ia gwau, “Bema ta be ita ia sisiba henia lasi, do ia auka iseda kara ita hanamoa totona?” Namona be ita gaukara goada lauma helaga ena huahua ita hahedinaraia noho bona haroro bona hadibaia tauna namona ai ita lao totona.—Salamo 141:5 duahia.
13 Sisiba abia karana be Dirava ena lalokau karana. Iehova be iseda namo ia laloa bada. (Aon. 4:20-22) Ia ese Baibel, pablikeisen idauidau, eiava lo tadikaka o taihu ta amo ita ia sisiba henia neganai, ia hahedinaraia ita ia lalokau henia. Heberu 12:9, 10 ia gwau, “Dirava ese iseda namo totona ita ia matahakani henia.”
14 Ita abia sisiba herevadia ita laloa bada, to idia henia dalana ita laloa bada lasi. Nega haida ita laloa sisiba ita abia dalana be maoro lasi. Oibe, ta ita sisiba henia neganai, do ia abia dae dalanai sisiba ita henia be namo. (Gal. 6:1) To bema ta ese ita ia sisiba henia, namo lasi ita ia sisiba henia dalana ita laloa, to namona be sisiba herevadia ita laloa bada. Reana sibona ita nanadaia: ‘Ena be sisiba ia henia dalana lau ura henia lasi, to unai sisiba herevadia amo gau ta lau dibaia, a? Lau ia sisiba henia tauna ena kara kereredia lau laloa lasi, to ia henia sisiba ena namo lau laloa, a?’ Aonega karana be dala ita tahua ita abia sisiba ita badinaia totona, unai amo namo do ita davaria.—Aon. 15:31.
‘Aonega ese Iseda Mauri Dinadia Do Ia Halataia’
Aonega tauna be sisiba ia abia neganai bona hekokoroku tauna be sisiba ia abia neganai, edia kara idia idau. Solomona ia gwau: “Aonega tauna do oi gwau henia, vadaeni ia ese oi do ia lalokau henia. Aonega tauna do oi hadibaia, vadaeni iena aonega do ia bada lao.” (Aonega Herevadia 9:8b, 9a) Aonega tauna ia diba matahakani ia abia neganai do ia “moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.” (Heberu 12:11) Ena be sisiba be mai ena hisihisi, to bema ita abia dae aonega do ia henia, unai dainai davana ita henia eiava sibona eda namo ita gwauraia toho ena badina be dahaka?
Aonega king be ma ia gwau: “Kara maoromaoro tauna do oi hadibaia, vadaeni iena diba do ia bada lao.” (Aonega Herevadia 9:9b) Tau ta lasi ia gwau diba ia be aonega bada ia abia vadaeni dainai eiava ia buruka dainai diba ma haida ia tahua be anina lasi. To, buruka taudia ese hereva momokani idia abia dae bona Iehova dekenai edia mauri idia gwauhamatalaia neganai, ita ia hamoalea bada! Namona be ita danu ita hekwarahi, diba habadaia urana bona iseda lalona gaukaralaia momo karana ita rakatania lasi totona.
‘Aonega ese Iseda Mauri Dinadia Do Ia Halataia’
Ita hekwarahi aonega ita abia totona be sibona eda maduna. Solomona ese unai ia hamomokania, ia gwau: “Bema oi be aonega, oiemu aonega ese oi do ia hanamoa. Bema oi ese aonega oi negea, oi sibona ese hisihisi ena metau do oi davaria.” (Aonega Herevadia 9:12) Aonega tauna be ia aonega dainai namo ia davaria, bona hekokoroku tauna be sibona ena kerere dainai hisihisi ia abia. Momokani, ita hadoa gauna ena anina sibona do ita abia. Vadaeni, namona be ‘aonega herevadia do ita kamonai.’—Aonega Herevadia 2:2.
Hakaua Hereva Namodia
w06 9/15 17 par. 5
Aonega Herevadia Bukana Ena Hereva Badadia
9:17—“Idia henaoa ranu” be dahaka bona dahaka dainai ena mamina be “gaiho”? Baibel ia gwau tau ta be ena adavana ida ia mahuta hebou karana amo idia abia moalena be kohua amo ranu namona inua karana bamona. Unai dainai “henaoa ranu” be hehuni ai idia karaia matabodaga karana ia laulaulaia. (Aonega Herevadia 5:15-17, NW) Matabodaga karana be hehuni dekenai idia karaia bona ta ese ia davaridia lasi dainai, Baibel ia gwau iena mamina be ia gaiho.
APRIL 21-27
BAIBEL ENA HEREVA BADADIA AONEGA HEREVADIA 10
Edena Dala ai Iseda Mauri Do Ita Moalelaia Momokani?
‘Kara Maoromaoro Tauna ese Hahenamo Do Ia Abia’
Kara maoromaoro tauna ese dala ma ta ai hahenamo ia abia danu. “Bema oi lahedo neganai oi be do oi ogogami, to bema oi gaukara auka neganai, oi be kohu momo do oi abia. Aniani ia mage neganai, ia haboua merona be aonega merona, to aniani haboua neganai ia mahuta noho merona, ese hemarai ia havaraia noho.”—Aonega Herevadia 10:4, 5.
King ese uma anina haboua negana ai idia gaukara taudia dekenai ia gwauraia herevana be mai anina bada. Uma anina haboua negana be mahuta ena nega lasi. Ia be hora momo lalonai gaukara aukana karaia negana. Oibe, ia be karaharaga negana.
Iesu ese uma anina lasi to taunimanima haboua negana ia laloa, bona ena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi. Uma ena biaguna [Iehova Dirava] dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:35-38) Lagani 2000 ai, Iesu ena mase ena Memorial hebouna dekenai idia mai taudia be milioni 14 ia hanaia—unai namba ese nega rua bamona Iehova ena Witnes taudia edia namba ia hanaia. Unai dainai ‘uma anina be idia auka bona mage vadaeni’ be ta ese ia gorea diba lasi, ani? (Ioane 4:35) Tomadiho taudia momokanidia ese Biaguna idia noia gaukara taudia ma haida do ia siaia bona hahediba taudia halaoa gaukarana lalonai idia gaukara mai edia goada ida edia guriguri hegeregerena. (Mataio 28:19, 20) Bona Iehova ese edia gaukara ia hanamoa bada! Hesiai laganina 2000 lalonai, bapatiso matamata taudia be 280,000 idia hanaia. Danu, idia ura Dirava ena Hereva hadibaia taudia ai idia lao. Inai anina haboua negana lalonai moale ita abia totona, namona be hahediba taudia halaoa gaukarana ita goadalaia.
‘Kara Maoromaoro Dalana’ ai Oi Raka
Solomona ese kara maoromaoro ena anina bada ia herevalaia. Ia gwau: “Kohu momo tauna ena moni bona kohu, ese ia idia gimaia noho, to ogogami ese ogogami tauna ia hadikaia ore noho. Kara maoromaoro taudia ese, edia gaukara davana be mauri abia totona idia henia, to kara dika taudia edia gaukara davana ese, edia dika ia habadaia noho.”—Aonega Herevadia 10:15, 16.
Kohu ese mauri lalonai idia vara gaudia haida amo ta ia gimaia diba, hanua mai maguna ese ia lalonai idia noho taudia ia gimaia hegeregerena. Bona guna ita diba lasi gaudia idia vara neganai ogogami ese dika ia havaraia diba. (Hadibaia Tauna 7:12) To, reana unai aonega king ese kohu bona ogogami ese idia havaraia dika dainai sisiba ia henia. Reana kohu bada tauna ese iena kohu sibona ia tabekau henia, bona ia laloa ena kohu be “magu badana bamona, idia ese ia idia gimaia noho.” (Aonega Herevadia 18:11) Bona reana ogogami tauna ia laloa kerere, ia ogogami dainai ena vaira negana be helaro lasi. Unai dainai idia ruaosi edia ladana Dirava vairanai ia namo lasi.
it- 1-E 340
Hahenamo
Iehova ese Taunimanima Ia Hanamoa. “Iehova ena hanamoa dainai ita be mai iseda kohu momo, bona Dirava ese unai hahenamo amo lalohisihisi ia havaraia lasi.” (Ao 10:22) Iehova ese ia lalonamo henia taudia ia hanamoa. Unai ia karaia dalana be idia ia gimaia, durua, hakaua eiava idia karaia gaudia ia hagugurua bona edia dabu gaudia ia henia. Unai ese idia ia hamoalea.
Hakaua Hereva Namodia
Kara Maoromaoro Badinaia Karana amo Ia Vara Moale
18 “Lohiabada ena hanamoa”—unai ese Iehova ena taunimanima dekenai noho namona ia henia. Bona ita diba do ita “lalohisihisi lasi.” (Aonega Herevadia 10:22) To dahaka dainai Dirava ena hesiai taudia momo be hahetoho idauidau idia davaria, bona unai ese hisihisi bada idia dekenai ia havaraia? Hekwakwanai bona hisihisi idia vara ena badina be toi. (1) Sibodia iseda ura dikadia dainai. (Genese 6:5; 8:21; Iamesi 1:14, 15) (2) Satani bona ena demoni. (Efeso 6:11, 12) (3) Inai tanobada dikana. (Ioane 15:19) Iehova ese idia vara gau dikadia ia koua lasi, to unai be ia ese ia havaraia lasi. Momokani, “gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia.” (Iamesi 1:17) Iehova ena amo idia mai hahenamo ese ita idia hahisia lasi.
APRIL 28–MAY 4
BAIBEL ENA HEREVA BADADIA AONEGA HEREVADIA 11
Oi Gwauraia Lasi!
Lalo-Maoromaoro ese Kara Maoromaoro Taudia Ia Hakaua
Kara maoromaoro taudia edia Dirava badinaia karana bona dika idia karaia taudia edia kara dikadia be taunimanima ma haida idia hanamoa eiava hadikaia diba. Israela ena king ia gwau: “Dirava ia gari henia lasi tauna ese, iena hereva dekena amo, iena badibadinai tauna ia hadikaia ore noho, to aonega kara dekena amo, kara maoromaoro taudia idia heau mauri noho.” (Aonega Herevadia 11:9) Daika ia gwau diba ladana hadikaia, udu mauri hereva dikadia, hereva dikadia, bona kiki kava ese ma haida ia hadikaia lasi? To, kara maoromaoro tauna ena hereva be, ia goeva, ia laloa namonamo guna, bona ma haida ia laloa bada. Diba ese unai tauna ia hamauria badina ena lalo-maoromaoro ese ia dekenai ia hamomokania ia idia samania taudia idia koikoi.
Lalo-Maoromaoro ese Kara Maoromaoro Taudia Ia Hakaua
Kara maoromaoro dalana idia badinaia hanua taudia idia ura maino bona moale be edia noho gabuna dekenai idia habadaia. Unai dainai, hanua ta idia hanamoa—ena namo ia bada. Ladana hadikaia hereva, lalona hahisia hereva, bona hereva kereredia idia gwauraia taudia ese hepapahuahu, lalohisihisi, lalo-tamona lasi, bona hekwakwanai idia havaraia. Unai bamona do ia vara bema unai taudia be mai edia siahu. Unai bamona hanua be heiriheiri, kara gagevagageva, bona kara maoro badinaia lasi bona reana moni ena hekwakwanai dainai hisihisi idia mamia.
Iehova ena taunimanima be edia hanua bamona kongregesen lalonai idia hebou neganai idia dekenai Aonega Herevadia 11:11 lalonai ia noho hakaua herevana be mai anina bada danu. Kongregesen lalonai lauma gaudia idia laloa bada taudia—edia Dirava badinaia karana ese ia hakaudia kara maoromaoro taudia—edia kara dainai kongregesen taudia idia moale, idia goada, bona ma haida idia durua, unai amo Dirava ena ladana idia abia isi. Iehova ese kongregesen ia hanamoa, bona lauma dalanai ia tubu. To nega haida, idia maumau bona idia moale lasi taudia haida sibona, kerere idia tahua bona gaukara karaia daladia idia gwauraia dika taudia unai, be “au dikana” mai ena poisini bamona idia tubu bona guna idia namo taudia idia hadikaia. (Heberu 12:15) Unai bamona taudia idia ura siahu bona ladana bada idia abia. Idia gwauraia loaloa kava sivaraidia dekenai idia gwau idau bese taudia inai henia kava karana, eiava unai bamona gauna ma ta, be kongregesen lalonai ia vara eiava elda taudia ese idia hahedinaraia. Momokani, edia uduna ese kongregesen ia hapararaia diba. Namona be edia hereva do ita kamonai henia lasi bona ita hekwarahi lauma gaudia idia laloa bada taudia ai ita lao totona, unai amo kongregesen lalonai maino bona lalo tamona ita havaraia, ani?
Lalo-Maoromaoro ese Kara Maoromaoro Taudia Ia Hakaua
Ia laloa namonamo lasi tauna, eiava “kavakava tauna” ta, ese dika bada herea ia havaraia diba! Ia ese ena udu mauri amo ta ena ladana ia hadikaia eiava ia gwauraia dika. Namona be idia abia hidi elda taudia ese unai kara kererena idia koua haraga. Laloa kehoa tauna be “kavakava tauna” bamona lasi, ia be do ia herevahereva lasi negana ia diba. Hunia herevadia ia hahedinaraia lasi. Ia diba bema ena hereva ia naria namonamo lasi, hisihisi do ia havaraia, unai dainai, laloa kehoa tauna be ‘hunia herevadia ia hahedinaraia lasi.’ Ena tadikaka ia badinaia namonamo bona idia ia hadikaia garina hehuni herevadia ia halasia lasi. Unai bamona lalo-maoromaoro taudia namodia be kongregesen idia hanamoa bada!
Hakaua Hereva Namodia
g20.1 11, maua
Oi Lalohekwarahi Neganai, Dahaka Oi Karaia Diba?
“HEBOGAHISI KARANA AMO LALOHEKWARAHI HAMARAGIA”
“Mai ena bogahisihisi tauna ese, sibona ena namo ia havaraia noho, to dagedage tauna ese, ia sibona ia hisihisi henia noho.”—AONEGA HEREVADIA 11:17.
Buka ladana, Overcoming Stress ena karoa ta ena sinado be, “Kill Your Stress with Kindness.” Inai Buka ia torea tauna, Dr. Tim Cantopher, ia gwau: Ma haida dekenai hebogahisi oi hahedinaraia karana ese helt ia hanamoa bona moale ia havaraia diba. Ma danu, hebogahisi lasi eiava dagedage tauna be ia moale lasi, badina ma haida be ia idia ura henia lasi bona ia idia dadaraia.
Danu lalohekwarahi do ita abia momo lasi, bema iseda tauanina ita hebogahisi henia. Hegeregere, namo lasi sibona ita doria gaukara metaudia ita karaia. Eiava ita laloa ita be anina lasi. Iesu Keriso ia gwau: “Namona be emu dekena tauna oi lalokau henia, oi sibona oi lalokau henia hegeregerena.”—Mareko 12:31.