Dirava Momokani be Daika?

Idaunega amo ema bona hari, taunimanima ese dirava idauidau idia tomadiho henia. To, Baibel ia gwau Dirava be tamona ia be “dirava ibounai ia hereaia.” (2 Sivarai 2:5) Ia be daika? Bona dahaka dainai Ia ese taunimanima idia tomadiho henia dirava ibounai ia hereaia? Inai leseni ai, Dirava momokani ia ura ia oi dibaia.

1. Dirava ena ladana be daika, bona edena dala ai do ita diba ia ura iena ladana ita dibaia?

Baibel ai, Dirava be sibona ena ladana ia gwauraia hedinarai. Ia gwau: “Lau be Iehova. Unai be egu ladana.” (Isaia 42:​5, 8 duahia.) Heberu gado ai inai ladana “Iehova” ena anina be “Ia ese Ia Halaoa.” Iehova ia ura iena ladana ita diba. (Esodo 3:15) Edena dala ai? Baibel ai iena ladana be nega 7,000 mai kahana ia hedinarai!a Inai ladana Iehova be “Dirava momokanina guba bona tanobada ai” ia noho ena ladana.​—Deuteronomi 4:39.

2. Baibel ese Iehova be edena bamona ia herevalaia?

Baibel ia gwau, taunimanima ese idia tomadiho henia diravadia amo Iehova sibona be Dirava momokani. Dahaka dainai? Ena badina be momo. Iehova ena siahu be bada herea bona ia sibona be ‘Ataiai Momokani Diravana, tanobada ibounai ia lohiaia noho.’ (Salamo 83:18 duahia.) Ia be “Siahu Ibounai Diravana,” anina be ia be mai ena siahu ia ura karaia gaudia ibounai ia karaia totona. Ia ese ‘gau ibounai ia havaraia’​—iunives bona tanobada ai idia noho mauri gaudia ibounai danu. (Apokalupo 4:8, 11) Iehova be dirava ma haida bamona lasi, ia be idaunegai ia noho bona do ia noho ela bona hanaihanai.​—Salamo 90:2.

3. Dirava ena dagi ladadia be momo, to iena ladana be tamona

Ta ena dagi ladana bona iena ladana edia idau oi itaia totona, VIDIO itaia, bona henanadai herevalaia.

VIDIO: Dagi Ladadia Momo, To Ladana Tamona (0:41)

• Dagi ladana hegeregere “Lohiabada,” bona ta ena ladana edia idau be dahaka?

Baibel ia gwau, taunimanima be dirava bona lohiabada momo idia tomadiho henia. Salamo 136:1-3 duahia, bena inai henanadai herevalaia:

• Daika be “dirava ibounai ia hereaia Diravana” bona “lohiabada ibounai ia hereaia Lohiabadana”?

4. Iehova ia ura ena ladana oi diba bona oi gaukaralaia

VIDIO: Dirava be Mai Ena Ladana, A?​—Ena Kahana Ta (3:11)

• Dahaka dainai oi laloa Iehova ia ura iena ladana ita dibaia?

Iehova ia ura taunimanima ese iena ladana idia gaukaralaia. Roma 10:13 duahia, bena inai henanadai herevalaia:

• Dahaka dainai Dirava ena ladana, Iehova ita gaukaralaia be mai anina bada?

• Ta ese emu ladana ia laloatao bona ia gaukaralaia neganai, emu hemami be edena bamona?

• Iehova ena ladana oi gaukaralaia neganai, oi laloa iena hemami be edena bamona?

5. Iehova ia ura iena turana ai oi lao

VIDIO: Dirava Momokanina Lau Tahua (8:18)

• Vidio ai edena dala ai Soten be Dirava ena ladana ia dibaia karana ese ia durua?

Ta ena turana ai oi do lau lasi neganai, iena ladana do oi dibaia guna. Iamesi 4:8a duahia, bena inai henanadai herevalaia:

• Iehova ia ura dahaka oi karaia?

• Edena dala ai Dirava ena ladana oi dibaia bona gaukaralaia karana ese oi ia durua iena turana ai oi lao?

POINT BADANA

Dirava momokani tamona ena ladana be Iehova. Ia ura unai ladana ita diba bona ita gaukaralaia unai amo ia kahirakahira ita lao diba.

Riviu

• Edena dala ai Iehova be taunimanima ese idia tomadiho henia dirava ma haida amo ia idau?

• Dahaka dainai Dirava ena ladana ita gaukaralaia be namo?

• Dahaka ese ia hahedinaraia Iehova ia ura ia kahirakahira oi lao?

REFERENS ITAIA

Dirava ia noho ena badina faiv oi itaia.

“Dirava Ia Noho, A?” (Websait atikol)

Dahaka dainai ita abia dae diba Dirava be hanaihanai ia noho?

“Daika ese Dirava Ia Karaia?” (Gima Kohorona, July 1, 2014)

Dirava ena ladana ita gaukaralaia ena badina oi dibaia be namo, ena be guna idia gwauraia dalana ita diba lasi.

“Iehova be Daika?” (Websait atikol)

Dirava ena ladana idauidau ita gaukaralaia be maoro, a? Do ita itaia dahaka dainai ita gwau diba ena ladana be tamona.

“Dirava Ena Ladana Ibounai be Hida?” (Websait atikol)