Tama o Sina Sibona Ia Noho Ruma Besedia ese Namo Idia Davaria Diba!

1-3. Tama o sina sibona ia noho ruma besedia edia namba ia bada ia lao ena badina be dahaka, bona unai bamona ruma bese taudia dekenai dahaka ia vara?

UNITED STATES dekenai idia gwau tama o sina sibona ia noho ruma besedia be hari “edia namba ia bada ia lao haraga ruma besedia.” Tano momo dekenai unai bamona ia vara danu. Headava hadokoa, ruma bese rakatania, bona tau bona hahine idia parara karadia, bona natuna havaraia kava karadia edia namba be bada herea, guna bamona lasi. Unai dainai tama, sina, bona natudia milioni momo be unai ena hisihisi bada idia davaria.

² Adavana lasi sinana ta ia gwau: “Egu mauri lagani be 28 bona lau be vabu mai egu natudia rua. Lau lalo-metau bada, badina tamana be lasi dainai lau sibona ese natudia lau naria maurina lau ura henia lasi. Toana be ta ese lau ia laloa lasi. Nega momo egu natudia idia itaia lau tai bona unai dainai idia lalohisihisi.” Unai bamona tama o sina momo be reana idia badu, idia laloa ia vara gauna be edia kerere, bona sibona idia noho lalohisihisina idia haheaukalaia. To unai sibona lasi, idia momo idia hekwarahi bada, moni gaukara bona ruma gaukara idia karaia totona. Idia ta ia gwau: “Adavana lasi tamana be imana amo bolo ia gadaralaia tauna ta bamona. Hua 6 lalonai oi treinini murinai, oi hegeregere bolo hani oi gadaralaia nega tamona. To unai oi karaia diba neganai, maoromaoro ta ese bolo matamatana oi dekenai ia negea!”

³ Tama o sina sibona ia noho ruma besedia lalonai, natudia be mai edia hekwarahi danu. Edia tamana o sinana ese idia ia rakatania haraga eiava ia mase dainai ia vara lalohisihisi badana idia haheaukalaia. Toana be tama o sina be natudia ida ia noho lasi ese natudia momo edia noho ia hadikaia.

4. Edena bamona ita diba Iehova ese tama o sina sibona ia noho ruma besedia ia laloa?

⁴ Tama o sina sibona ia noho ruma besedia be Baibel negadia ai idia noho danu. Baibel ese ‘tamana lasi merona’ bona “vabu” ia herevalaia loulou. (Esodo 22:22; Deuteronomi 24:19-21; Iobu 31:16-22) Iehova Dirava ese edia hekwakwanai ia laloa. Salamo torea tauna be Dirava ia gwauraia “tamana lasi memero edia tamana bona vabu edia hahemaoro tauna.” (Salamo 68:5, NW) Momokani, hari inai negai danu, Iehova ese tama o sina sibona ia noho ruma besedia ia laloa! Oibe, iena Hereva ena hakaua herevadia ese unai taudia idia durua diba, namo do idia davaria totona.

RUMA GAUKARA KARAIA NAMONAMO

5. Adavana lasi tama o sina ese matamanai dahaka hekwakwanai idia davaria?

⁵ Ruma gaukara ena hekwarahi mani oi laloa. Edia headava idia hadokoa hahine ta ia gwau: “Nega momo oi ura tau ta ia noho, hegeregere bema emu motuka amo regerege ia mai, to oi diba lasi edena kahana amo.” Vanegai sibona edia headava idia hadokoa eiava edia hahine ia mase tatau idia daradara danu, badina hari ruma gaukara momo herea do idia karaia. Bona ruma lalonai gau idauidau idia heau namonamo lasi ese natudia edia daradara ia habadaia.

6, 7. (a) Aonega Herevadia ese ia hahedinaraia “hahine namona” ena kara be edena bamona? (b) Ruma gaukara lalonai gaukara goadagoada karana ese tama o sina sibona ia noho ruma besedia be edena bamona ia durua?

⁶ Dahaka ese idia ia durua diba? Aonega Herevadia 31:10-31 ia herevalaia “hahine namona” ena kara mani oi laloa. Ia karaia gaukara be momo herea—gau haida ia hoia bona ia hoihoilaia, dabua ia turia, ia nanadu, ena moni amo tano ia hoia, uma gabu ia karaia, bona bisinesi ta ia karaia. Edena dala ai unai ibounai ia karaia diba? Ia gaukara goadagoada, ia gaukara ela bona hanuaboi bona ia toreisi haraga iena gaukara ia hamatamaia totona. Bona ena gaukara ia hegaegaelaia namonamo, gaukara haida be ma haida dekenai ia henia bona ia sibona ena imana amo gau ma haida ia karaia. Unai dainai ia idia hanamoa!

⁷ Bema oi be adavana lasi tama o sina ta, namona be oiemu ruma gaukara oi karaia namonamo. Unai gaukara oi moalelaia be namo, badina unai ese oiemu natudia edia moale do ia habadaia. To, palani laloa bona hegaegaelaia namonamo be gau badana. Baibel ia gwau: “Mai haheauka danu ia gaukara noho tauna ena laloa, ese anina ia havaraia bada noho.” (Aonega Herevadia 21:5) Adavana lasi tamana ta ia gwau: “Lau ese aniani lau laloa lasi ela bona lau hitolo.” To oi hegaegaelaia namonamo aniani ese tauanina ia durua bona lalona ia veria, to oi laloa lasi bona oi karaia haraga aniani be unai bamona lasi. Reana hari imana gaukara matamatadia oi dibaia be namo. Adavana lasi sinana haida ese diba bada turadia, hadibaia bukadia, bona heduru idia henia taudia amo diba idia abia dainai, penipeni, plama, bona motuka hanamoa gaukaradia be hari idia karaia diba.

8. Adavana lasi tama o sina edia natudia be edena dala ai ruma gaukara idia durua diba?

⁸ Natudia oi noia oi idia durua totona be maoro, a? Adavana lasi sinana ta ia gwau: “Natudia oi laloa bada badina edia tamana ia noho lasi, bona unai dainai oi ura lasi idia oi hametaua.” Unai lalohadai ena badina ita lalo-pararalaia diba, to reana unai ese natuna ena namo ia havaraia lasi. Baibel negadiai Dirava idia gari henia memero kekeni be mai edia gaukara. (Genese 37:2; Solomona ena Ane 1:6) Unai dainai, ena be oi naria namonamo oiemu natudia be gaukara amo oi hametaua garina, to do oi aonega bema gaukara haida oi henia idia dekenai, hegeregere mereki huria bona sibona edia daiutu hagoevaia gaukaradia. Gaukara haida umui karaia hebou be namo, ani? Unai do umui moalelaia bada.

MONI ENA HEKWARAHI

9. Nega momo adavana lasi sinadia be moni ena hekwarahi idia davaria ena badina be dahaka?

⁹ Adavana lasi tama o sina momo idia itaia moni ena hekwarahi be bada, bona nega momo idia headava lasi sinana matamatadia edia mauri ia auka.a Gavamani ese heduru ia henia tanodia ai, aonega karana be unai heduru idia gaukaralaia diba, ela bona moni gaukara idia davaria diba. Baibel ese ia hahedinaraia dala ma ta be lasi neganai, Keristani taudia be unai bamona heduru idia gaukaralaia be maoro. (Roma 13:1, 6) Vabu bona edia headava idia hadokoa hahinedia edia hekwarahi be unai bamona danu. Idia momo be nega daudau ruma gaukara idia karaia murinai moni gaukara do idia karaia lou, bona davana maragi gaukaradia sibona idia davaria. Idia haida ese edia noho idia hanamoa, badina gaukara ta idia hadibaia program eiava nega kwadogi lalonai idia karaia sikuli kosi lalodiai idia vareai.

10. Adavana lasi sinana be natudia dekenai moni gaukara ia tahua ena badina be edena bamona ia gwauraia diba?

¹⁰ Oi hoa lasi bema moni gaukara oi tahua neganai oiemu natudia idia lalohisihisi, bona oi laloa lasi oi karaia karana be kerere. To, idia oi hadibaia dahaka dainai oi gaukara be gau badana, bona idia oi durua, idia lalo-parara Iehova ia ura oi ese idia oi naria. (1 Timoteo 5:8) Gabeai, natudia momo ese unai do idia abia dae. To, herevana oi bisi, namona be oi hekwarahi idia oi bamoa momo totona. Unai bamona lalokau karana dainai, reana moni ena hekwarahi dainai ruma bese ese ia abia diba lasi gaudia do umui lalohisihisilaia bada lasi.—Aonega Herevadia 15:16, 17.

DAIKA ESE DAIKA IA NARIA?

11, 12. Adavana lasi tama o sina ese edena hetoana idia hadikaia lasi be namo, bona edena dala ai unai idia karaia diba?

¹¹ Nega momo adavana lasi tama o sina be natudia danu ia hetura namonamo, to namona be oi naria namonamo Dirava ese tama sina bona natudia huanai ia atoa hetoana oi hadikaia lasi. Hegeregere, hekwakwanai badadia do idia vara diba, bema sinana ia laloa ena natuna mero ese ruma bese ena kwara dagina do ia huaia be namo eiava bema ia laloa ena natuna kekeni be ena turana namona bona sibona ena hekwakwanai idauidau amo ena kekeni ia hametaua. Unai kara be maoro lasi, unai ese natuna ia hametaua, bona reana ia daradara bada.

¹² Namona be idia dekenai oi hahedinaraia namonamo, oi be tama o sina dainai, oi ese idia do oi naria—idia ese oi idia naria lasi. (2 Korinto 12:14 itaia.) Nega haida, reana oi ura heduru sisina oi abia. Namona be Keristani elda taudia eiava reana lo Keristani hahinedia amo unai heduru oi tahua, emu natudia maragidia amo lasi.—Tito 2:3.

MATAHAKANI OI HENIA NOHO

13. Adavana lasi sinana ese matahakani ia henia neganai, reana edena hekwakwanai ia davaria?

¹³ Tau ta ese matahakani ia henia be auka lasi, to reana hahine ese unai ia karaia toho neganai hekwakwanai ia davaria. Adavana lasi sinana ta ia gwau: “Egu memero edia tauanina bona edia gado regena be tatau edia bamona. Unai dainai, nega haida daradara lasi bona manoka lasi toana lau hahedinaraia be auka.” Danu, reana emu adavana ena mase oi do lalohisihisilaia noho, eiava emui headava umui hadokoa dainai oi badu eiava oi laloa unai be oiemu kerere. Bema natudia naria ena maduna be oi bona emu adavana gunana ese do umui haria, reana oi gari oiemu natuna ese ia do ia ura henia bada to oi ia ura henia maragi. Unai bamona gaudia dainai, nega haida mai laloa maoromaoro ida matahakani oi henia be auka.

14. Adavana lasi tama o sina ese matahakani karana be edena bamona idia laloa maoromaoro be namo?

¹⁴ Baibel ia gwau “sibona ena ura ia karaia noho merona ese, iena sinana do ia hahemaraia.” (Aonega Herevadia 29:15) Iehova Dirava ia ura oi ese ruma bese lalonai taravatu haida oi atoa bona do idia badinaia karana oi naria, unai dainai namo lasi oi laloa unai be kerere, eiava ia dainai oi lalohisihisi eiava oi gari. (Aonega Herevadia 1:8) Baibel ena hakaua herevadia badinaia karana oi hadikaia lasi. (Aonega Herevadia 13:24) Namona be do oi laloa maoromaoro, oi atoa taravatudia oi badinaia hanaihanai, bona oi goada. Natudia momo ese unai do idia abia dae. To, oi ura emu natudia edia hemami oi laloa danu. Adavana lasi tamana ta ia gwau: “Namona be matahakani lau henia neganai mai lalo-parara ida lau henia, badina edia sinana idia haboioa dainai idia lalohisihisi bada. Idia ida lau herevahereva hanaihanai. Aniani ai hegaegaelaia negana be ‘hebamo negana’ ai dekenai. Unai neganai idia ese idia laloa bada gaudia be lau dekenai idia gwauraia.”

15. Edia headava idia hadokoa tama o sina ese ena adavana gunana ia herevalaia neganai, dahaka ia karaia lasi be namo?

¹⁵ Bema oiemu headava oi hadokoa vadaeni, natudia ese emu adavana gunana idia matauraia karana oi hadikaia amo gau namona ta oi havaraia lasi. Tama sina idia heai dainai natudia idia lalohisihisi, bena umui ruaosi do idia matauraia lasi. Unai dainai, lalohisihisi idia havaraia herevadia oi gwauraia lasi, hegeregere oi gwau lasi: “Oiemu kara be emu tamana ena bamona!” Herevana oiemu adavana gunana ese oi dekenai hisihisi ia havaraia, to ia be oiemu natuna ena tamana o sinana, bona emu natuna ese ena tamana bona sinana edia lalokau, hebamo, bona matahakani ia abia be gau badana.b

16. Tama o sina sibona ia noho ruma besedia lalonai, edena lauma gaudia idia karaia hanaihanai be namo, matahakani idia henia totona?

¹⁶ Karoa gunadia ai ita herevalaia hegeregerena, matahakani ena anina ta be hadibaia bona hakaua, ia be panisi henia karana sibona lasi. Hekwakwanai momo oi koua diba bema lauma dalanai natudia hadibaia ena sediual namona oi badinaia. (Filipi 3:16) Keristani heboudia dekenai umui lao hanaihanai be gau badana. (Heberu 10:24, 25) Pura ta ta ruma bese ena Baibel stadi umui karaia hanaihanai danu. Momokani, unai bamona stadi umui karaia loulou be reana auka. Sinana namona ta ia gwau: “Dina ibounai oi gaukara murinai, do oi ura dikadika oi laga-ani. To egu lalona lau hadaia egu natuna kekeni ida do lau stadi totona, badina lau diba unai lau karaia be gau badana. Ia ese emai ruma bese stadi ia moalelaia bada!”

17. Paulo ia bamoa tauna Timoteo idia hadibaia namonamo karana amo dahaka ita diba?

¹⁷ Aposetolo Paulo ia bamoa tauna Timoteo be ena sinana bona ena tubuna hahine ese Baibel ena hakaua herevadia idia hadibaia—toana be ena tamana ese ia hadibaia lasi. To, Timoteo be Keristani tauna namona ai ia lao! (Kara 16:1, 2; 2 Timoteo 1:5; 3:14, 15) Oi laloa diba oi ese unai bamona namo do oi havaraia danu, bema emu natudia be “Iehova ena matahakani bona lalona biagua karana ai” oi naria.—Efeso 6:4, NW.

SIBONA OI NOHO LALOHISIHISINA OI KOUA DALANA

18, 19. (a) Adavana lasi tama o sina ese sibona ia noho lalohisihisina be reana edena dala ai ia mamia? (b) Tauanina ena ura gaudia koua totona dahaka sisiba idia noho?

¹⁸ Adavana lasi sinana ta ia gwau: “Ruma dekenai lau mai bona inai haba hani lau itaia neganai, sibona lau noho lalohisihisina ia bada, bona natudia idia mahuta murinai unai lalohisihisi ia bada momokani.” Nega momo unai lalohisihisi be adavana lasi tama o sina edia hekwakwanai badana. Hetura karana bona headava karadia namodia ura henia be vaia taunimanima edia kara. To, herevana dahaka do ia vara, ta ese unai hekwakwanai ia hanaia toho be maoro, a? Aposetolo Paulo ena negai, vabu hahine matamata haida ese ‘edia ura dikadia dainai, Keriso idia rakatania.’ (1 Timoteo 5:11, 12) Bema tauanina ena ura gaudia ese lauma gaudia idia koua, dika do ia vara.—1 Timoteo 5:6.

¹⁹ Keristani tauna ta ia gwau: “Mahuta hebou urana ia goada, to oi biagua diba. Unai lalohadai be emu lalona dekenai ia vareai neganai, do oi laloa noho lasi. Oi dadaraia be namo. Emu natuna oi laloa karana ese oi ia durua danu.” Dirava ena Hereva ese sisiba ia henia, ia gwau: ‘Ura dikadia umui hamasea.’ (Kolose 3:5) Bema oi ura aniani dekenai emu ura oi hamasea toho, aniani namodia edia laulau idia hahedinaraia magasin do oi duahia, eiava hanaihanai aniani idia herevalaia taudia do oi bamoa, a? Lasi! Tauanina ena ura gaudia be unai bamona danu.

20. (a) Abidadama lasi taudia ida idia turana karaia taudia ese dahaka dika idia davaria diba? (b) Keristani ginigunadia edia negai bona hari inai negai, idia headava lasi taudia ese sibona idia noho lalohisihisina idia haheaukalaia daladia be dahaka?

²⁰ Keristani taudia haida be abidadama lasi taudia ida idia turana karaia. (1 Korinto 7:39) Unai ese edia hekwakwanai ia hamaoromaoroa, a? Lasi. Ena headava ia hadokoa Keristani hahine ta ia gwau: “Headava lasi ena hisihisi ia hanaia momokani karana ta ia noho. Tau kererena oi adavaia karana unai!” Keristani taudia ginigunadia edia negai idia noho vabu taudia danu be sibona idia noho lalohisihisina idia haheaukalaia, to aonega hahinedia idia bisi, bona ‘idau taudia dekenai aniani idia henia, Dirava ena taudia edia aena idia huria, bona hisihisi taudia idia durua.’ (1 Timoteo 5:10) Kamonai Keristani taudia hari inai negai, mai haheauka ida Dirava gari henia adavana idia ura davaria taudia unai, idia bisi noho danu. Mauri lagani 68 Keristani vabuna ta be sibona ia noho lalohisihisina ia mamia neganai, ma vabu haida ia vadivadi henia matamaia. Ia gwau: “Lau itaia unai vadivadi lau karaia, egu ruma gaukara lau karaia, bona lauma dalanai sibona lau naria dainai, nega be lasi sibona lau noho lalohisihisina lau mamia totona.” Taunimanima dekenai Dirava ena Basileia hadibaia gaukarana ese namo bada ia havaraia.—Mataio 28:19, 20.

21. Guriguri bona hebamo namona amo ta ese sibona ia noho lalohisihisina be edena bamona ia hanaia diba?

²¹ Momokani, sibona oi noho lalohisihisina be hoa dalanai oi kokia diba lasi. To Iehova amo oi abia goadana amo oi haheaukalaia diba. Keristani tauna be unai bamona goada ia abia bema Dirava “ia guriguri henia noho, bona Dirava ena durua ia noia noho, dina bona hanuaboi ibounai.” (1 Timoteo 5:5) Noinoi ena anina be heduru oi noia mai momokani ida, reana mai taitai bona matana ranu ida. (Heberu 5:7 itaia.) “Dina bona hanuaboi ibounai” Iehova dekenai emu kudouna lalonai idia noho gaudia oi gwauraia ese oi ia durua diba. Danu, hebamo namona ese sibona oi noho lalohisihisina ia koua diba. Hebamo namona dainai, ta ese Aonega Herevadia 12:25 ia herevalaia hagoadaia “hereva namodia” ia kamonai diba.

22. Bema nega haida sibona oi noho lalohisihisina ia vara, edena lalohadai ese oi idia durua diba?

²² Bema nega haida sibona oi noho lalohisihisina oi mamia—bona vaia do oi mamia—namona be oi laloa ta ena mauri ia goevadae lasi. Momokani, “Keristani varavara taudia tanobada kahana ibounai dekenai” be dala idauidau ai hisihisi idia abia noho. (1 Petero 5:9) Nega gunadia oi laloa momo lasi. (Hadibaia Tauna 7:10) Oi moalelaia diba gaudia oi laloa be namo. Gau badana be, emu lalona oi hadaia do oi kara maoromaoro bona Iehova ena kudouna do oi hamoalea.—Aonega Herevadia 27:11.

MA HAIDA ESE HEDURU IDIA HENIA DIBA DALADIA

23. Kongregesen lalonai adavana lasi tama o sina dekenai, tadikaka bona taihu edia maduna be dahaka?

²³ Keristani tadikaka bona taihu edia heduru be mai anina bada. Iamesi 1:27 ia gwau: “Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia.” Oibe, Keristani taudia do idia karaia karana ta be tama o sina sibona ia noho ruma besedia idia durua. Unai idia karaia diba dala namodia be dahaka?

24. Tama o sina sibona ia noho ruma besedia mai edia dabu gaudia be edena bamona ita durua diba?

²⁴ Tauanina dalanai idia durua diba. Baibel ia gwau: “To, bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, ‘Lau ese Dirava lau lalokau henia?’” (1 Ioane 3:17) Greek herevana idia hahanaia “itaia” ena anina korikorina be, matana negea kava karana sibona lasi, to itaia namonamo karana. Ia hahedinaraia Keristani tauna namona be ruma bese ena noho bona ena dabu gaudia ia dibaia guna. Reana moni dekenai idia dabu. Reana haida ese ruma hanamoa gaukara dekenai heduru idia abia be namo. Eiava reana idia moale bema aniani totona eiava moale hebou ta dekenai idia oi boiria.

25. Edena dala ai Keristani tadikaka bona taihu be adavana lasi tama o sina dekenai hebogahisi idia hahedinaraia diba?

²⁵ Danu, 1 Petero 3:8 ia gwau: “Umui ibounai mai lalona tamona danu do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui bogahisihisi henia.” Adavana lasi sinana ta mai ena natudia 6 ia gwau: “Mauri ia auka bona nega haida lau lalo-metau. To, nega haida tadikaka o taihu ta do ia gwau: ‘Joan, oi ese gaukara namona oi karaia. Anina namona do ia vara.’ Ma haida ese oi idia laloa bada oi diba be heduru namona.” Keristani hahine badadia ese adavana lasi sinana matamatadia idia durua namonamo diba bona idia hakala henidia bema tatau dekenai edia hekwakwanai idia herevalaia be auka.

26. Edena dala ai Keristani tatau ese tamana lasi natudia idia durua diba?

²⁶ Keristani tatau be ma dala haida ai heduru idia henia diba. Kara maoromaoro tauna Iobu ia gwau ia ese tamana lasi merona bona durua lasi tauna do ia durua. (Iobu 29:12, NW) Hari inai negai danu Keristani tatau ese tamana lasi natudia idia laloa bada bona mai momokani ida ‘lalokau goevagoeva’ idia hahedinaraia, lalohadai dikadia dainai unai idia karaia lasi. (1 Timoteo 1:5) Sibona edia ruma bese idia naria namonamo noho, to nega haida unai bamona natudia ida Keristani haroro gaukara idia karaia bona reana edia ruma bese stadi eiava moale karadia lalonai idia boiridia danu. Unai bamona kara namona ese dala dikana amo tamana lasi natuna ia hamauria diba.

27. Adavana lasi tama o sina ese daika ena heduru idia abia diba?

²⁷ To momokani, adavana lasi tama o sina be sibona edia maduna “ena metau do idia huaia.” (Galatia 6:5) To, idia ese Keristani tadikaka bona taihu bona Iehova Dirava edia lalokau idia abia diba. Baibel ese Iehova ia herevalaia, ia gwau: ‘Vabu bona tamana lasi maragidia ia naria noho.’ (Salamo 146:9) Ena lalokau heduruna dainai, tama o sina sibona ia noho ruma besedia ese namo idia davaria diba!